بسكويت القرفة


         وصفة : منى                 2012/07/20                 11 تعليقات
بسكويت القرفة

بصورة عامة انا ما بحب البسكوتات او الكوكيز , بس من أكتر من سنتين جابتلي انسانة عزيزة كتير على قلبي علبة من بسكويت قرفة من تركيا , البسكوتات كانوا رقاق كتير , تقريباً متل الخبزة و طعمتهن بتجنن , مع فنجان قهوة الصبح كانت طعمتهن غير شكل . و هل الصديقة طلبت مني دور على وصفة للبسكويت يطلع فيها نفس هل البسكوتات …

انا طبعا ما كذبت خبر . جربت كتير وصفات . و تقريباً كل وصفة تطلع اطيب من التانية , القرفة وين ما انحطت بتكون روعة . هل الوصفة مميزة و مختلفة عن غيرها بطريقة تحضيرها . رح تعطيكي بسكوتات يمممي بطعم الزبدة و القرفة و رح يدوب الكراميل بتمك , مقرمشين من الأطراف و ناعمين من جوى , شغلة يممممممي . رح يحبها الصغير قبل الكبير و رح تخلص بكم دقيقة .

بالصحة و الهنا






2 كوب ناقص ملعقة صغيرة , 245 غ , طحين
ملعقة صغيرة بيكنغ بودر
ربع ملعقة صغيرة بيكربونات الصوديم
1ملعقة صغيرة قرفة
ربع ملعقة صغيرة ملح
1 كوب سكر ناعم
اصبع , 100 غ , زبدة , طرية
ملعقة كبيرة , 15 مل , كورن سيروب فاتح أو قطر سميك
بيضة
فانيليا

للوجه :

ربع كوب سكر بني
نصف ملعقة صغيرة قرفة





1 - يقلب الطحين و البيكنغ بودر و بيكربونات الصوديم و الملح و القرفة في وعاء و يوضع جانباً .

2 - تخفق الزبدة لمدة 5 دقائق أو حتى ينتفخ المزيج , يضاف السكر و يخفق حتى يمتزج السكر بالزبدة . تضاف البيضة و الكورن سيروب أو القطر مع الفانيليا و يخفق الكل لمدة دقيقتان .

3 - يضاف مزيج الطحين على مزيج الزبدة و يقلب بلطف حتى تصبح عجينة متجانسة , لا يقلب بشكل اضافي كي لا يقسى البسكويت .

4 - ترص العجينة على بعضها البعض و تغلف بشكل محكم على شكل اسطوانة ثم توضع في الثلاجة لمدة 30 دقيقة حتى تبرد و تتماسك ,لا تترك لفترة طويلة كي لا يصعب تقطيعها . حجم الاسطوانة حسب الرغبة .

5 - تغلف صينيتا فرن بورق الزبدة , يمزج السكر البني و القرفة في وعاء صغير . يحمى الفرن على درجة حرارة 175 درجة مئوية ,. تقطع الاسطوانة الى شرائح بسماكة نصف سم تقريباً . ترتب الشرائح على الصواني المجهزة بحيث يكون الفرق بين البسكوتة و الأخرى 3 او 4 سم . و ترش بمزيج السكر البني و يضغط عليها بلطف .

6 - يخبز البسكويت في الفرن على الرف المتوسط . الحجم الكبير يحتاج لـ 12 دقيقة و الحجم الصغير يحتاج لـ 8 دقائق . يرفع من الصينية و يترك حتى يبرد ثم يحفظ في وعاء محكم الاغلاق .



التعليقات

  1. nosheenzaza 3 October 2012

    شكله جميل و أكيد لذيذ. تسلم ايدك يا منى. على التجربة قريبا. صاير معي حالة ادمان على البسكويت، يمكن بسبب الأحوال النفسية المتردية هه هه.

  2. souha 3 October 2012

    السلام عليكم
    كيفك منى تسلم الأيادي ع الوصفة فنانة أنا كتير بحب البسكويت على عكس أهل حلب خاصة إنو في وصفات بسكويت فاخرة جداً و كمان البسكويت ما بياخد وقت بالفرن أسرع من غير وصفات
    تمنياتي بالتوفيق

  3. ام مثنى 5 October 2012

    تسلم الايادي يامنى انا بحب طعم القرفة بالمعجنات وان شاء الله رح اجربو باقرب وقت

  4. Mona 6 October 2012

    هلا نوشين :)
    الله يسلمك يا قمر , بعد زمان , ان شاء الله تكون اوضاعك كلها بخير

    مممم , منيح الادمان على البسكويت مو على غير شي :roll الله يلطف

    جربيها و خبريني رايك

  5. Mona 6 October 2012

    , عليكم السلام سهى :)
    الله يسلمك حبيتي , من زووءك و الله و كمان من بعض ما عندكم ;)

    و كمان البسكويت بيتنقرش نقرشة , انا ما كنت كتير صحبة معه , بس هلا مغيرة رايي

    ان شاء الله تجربيه و تححبيه و تصوريه بطريقتك الحلوة

  6. Mona 6 October 2012

    هلا ام مثنى :)
    الله يسلمك حبيبتي , جربيها و اكيد بتحبيها ان شاء الله
    رح استنى رايك

  7. فطومه 12 October 2012

    السلام عليكم
    كيفك أخت منى
    ودي استفسر عن طعم البسكويت هل يشبهه طعم الكوكيز ;)

  8. فطومه 12 October 2012

    أهلا أخت منى كيف حالك
    يستفسر عن طعم بسكويت القرفة هل يشبهه الكوكيز ؟

  9. Mona 25 October 2012

    هلا اختي :)
    اي قريب على الكوكيز ااقصد قوامه , بس طعمته فيها قرفة ;)

  10. Razan 30 June 2014

    الوصفة كتير شكلا رائع و بحب القرفة كتير…بس حابة اسأل شو فيني استخدم بدال الكورن سيروب؟!
    و هل فيني الغي البيكاربونات؟! لآن محل ما انا ما في من هدول

    • منى 9 July 2014

      صباح الخير رزان :)
      هلا اذا متوفر افضل , اذا لا استعملي قطر سميك بس من دون مازهر و اذا مو متوفر البيكربونات الغيه , هو بيعطي هشاشة للوصفة بس بيطلع طيب من دونه كمان

تقييم الوصفة
عاديةقد أحضرهاجيدةممتازةأكثر من رائعة (1 votes, average: 1.00 out of 5)