محشي الميبّس


         وصفة : منى                 2013/11/02                 2 تعليقات

آخر تصويت


آخر تعليق

محشي الميبّس

هل النوعية من المحاشي مشهورة بكل بلاد الشام و بتركيا كمان وعندي أطيب المحاشي هي المحاشي الميبسة الي مناكلها بالشتوية , الهيأة وقت الشمس بتدخل على الوصفة و يتكون واحد من الاشيا الي طبختها , بتصير الوصفة غير شكل .. هل السنة و ع كتر قطع الكهربا , أغلب الستات السوريات صاروا يميلوا لتيبيس خضرة الصيف للشتي , و انا بشوف ان الخضرة الميبسة مو بس أضمن كمان أطيب بكتير من الخضرة المفرزة , الطبيعي دايماً غير . و بالعادة بسوريا منيبس المحاشي ع ايدينا , أما في تركيا فبينباع جاهز و بيرتبوه بخيوط بيصير شكله متل عقد , بيكون شكلهن حلو كتير كتير , هي الصورة لمحل بالسوق القديم بغازي عنتاب بأخر زيارة رحنا عليها في شتوية سنة 2011 .




عقود فريدة من الخضرة المجففة




وقت نجهز المحشي رح نقعه بالمي و نغير عليه اكتر من مرة , و انا بنقعه طول الليل , و باليوم التاني بفور عليه تفويرة صغيرة لحتى ما يطول وقت الطبخ يا دوب غليه أو غليتين و بعدها بخليه ليبرد و ع الحشي .و بخب حضر قرع و بانجان و فليفلة مع بعض , بحس بتصير الطعمة كتيررر طيبة لما ينطبخوا مع بعض , و لهل الوصفة ما في مقادير معينة لان حجم الخضرة بيختلف كل مرة , تقريباً بياخد معي لكل 30 حبة بانجان و قرع و فليفلة من الحجم الوسط حوالي 3 كاسات رز


كل طبخي بزيت الزيتون حتى المحشي , لهيك بستعمل لحمة دهنها خفيف مع شوية زيت زيتون , بس اذا حبيتي تطبخيها على الأصول حضريها متل الوصفة , و مع نتفة دبس فليفلة و فليفلة حمرا رح يطلع المحشي خيلة و شي ناهي و بيتقدم لملوك


بالصحة و الهنا

شو لازمنا ؟
30 – 35 حبة باذنجان و قرع و فليفلة مجفف

الحشوة :

3 كوب رز مصري
400غ لحمة غنم مفرومة مدهنة
ملعقة صغيرة بهار مشكل
نصف ملعقة كبيرة ملح
ملعقة صغيرة فليفلة حمراء ناعمة
ربع ملعقة صغيرة قرفة
3 ملعقة كبيرة دبس البندورة
1 ملعقة كبيرة دبس فليفلة
نصف كوب ماء

مرق الطبخة :

نصف كوب عصير الحصرم ( مية حصرم ) أو عصير حبتان ليمون
2 – 3 ملعقة كبيرة دبس بندورة
5 فص ثوم , مهروس
1 معلقة كبيرة نعناع يابس
ملح
طريقة التحضير

1 - تغسل الخضار المجففة جيداً ثم تنقع بالماء الساخن لبضع ساعات حتى تفتح , يتم استبدال الماء بضعة مرات .

2 - يغلى ماء في قدر كبير , ترفع حبات المحشي من ماء النقع و تصفى جيداً ثم توضع في قدر الماء المغلي , تغلى لبضع دقائق ثم ترفع و تترك جانباً حتى تبرد .

3 - تخلط كل مقادير الحشوة حتى تتجانس .

4 - تحشى حبات الباذنجان و القرع و الفليفلة بالحشوة المجهزة و ترتب في قدر كبير , تغطى بطبق و ثقل كي يحافظ المحشي على شكله ثم تغمر بالماء و تضاف بقية مقادير صلصة الطبخ .

5 - يوضع القدر على نار متوسطة حتى يغلي , تهدى النار و يترك لمدة ساعتين أو أكثر على نار هادئة حتى ينضج المحشي .

6 - ترتب حبات المحشي في طبق التقديم و تقدم فوراً مع الفليفلة الحرّة و الفجل و النعناع .

التعليقات

  1. رنا 17 November 2013

    والله وصفة رائعة وبتشهي القلب يسلمهن ياعسل
    بس شو وضع زيت الزيتون بقلب المحشي مابيطعم؟؟؟نحنا منحط مازولا

    • منى 18 November 2013

      هلا رنون , انا كل طبخي بزيت الزيتون , من زمااان المازولا ما بستعمله الا للقلي , و زيت الزيتون مع المحشي بالزات بيطلع غير شكل , جربيه و ان شا الله بيعجبك

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.67 out of 5)