سلطة الباذنجان و الفليفلة المشوية


         وصفة : منى                 2011/10/30                 17 تعليقات
سلطة الباذنجان و الفليفلة المشوية

هي الوصفة من الوصفات الي اتعذبت بصورتها كتيررر , هي تالت صيفية بحضرها و ما بقدر نزلها لان صورتها مو عاجبتني , بتكون هيك مشقرقة على الحقيقة و بتطلع باهتة بالصورة , بس اليوم لما حضرتها كنت مقررة انو رح نزلها لو شو ما كانت الصورة , و هي هي الوصفة ..

كتير طيبة و خفيفة و نعنوشة و انا هل الوصفة بحبها اكتر من المتبل لان بحسها باردة و فيكي تاكليها بالخبزة او بالمعلقة و انا كنت محضرة معها خبز بيدا التركي . و ما بتتخيلي الفليفلة المشوية طعمتها ادي طيبة و مختلفة , يمممم .

عم استعمل اللبن البقري , و مع اني من 3 شهور كنت ما حبه ابدا , هلا صايرة ما عم حب لبن الغنم لان على الاغلب عم يكون حامض كتير و عم تطغى طعمته على باقي المكونات , لهيك للارمان بلبن او الشاكرية و اللبنية عم استعمل لبن غنم و الباقي كله لبن بقر , و هادا اكيد راي شخصي , انت فيك تستعملي الي بتحبيه . عم جفف اللبن شوي لان ما بحب السلطة تكون مريقة , بحبها يكون الها قوام . و كمية اللبن تقريبة , فيكي تزيدي او تنقصي حسب الحاجة .

بالصحة و الهنا




4 حبة متوسطة باذنجان , مشوي
2 حبة فليفلة خضراء كبيرة , من النوع السميك
كوب لبن
فص ثوم مدقوق
ربع كوب جوز , مفروم
ملعقة كبيرة بقدونس مفروم , اختياري




• يحمى الفرن على أعلى عيار , يثقب الباذنجان بالشوكة ثم يوضع على صينية الشوي . تقسم حبة الفليفلة الخضراء لنصفين و توضع بحيث يكون القسم المقطوع للاسفل .

• تشعل شواية الفرن من الاعلى, تشوى الفليفلة لمدة 15 دقيقة تقريباً أو حتى تسود القشرة , ترفع و توضع في كيس أو وعاء محكم الاغلاق لتسهيل التقشير . و يشوى الباذنجان لمدة 35 – 40 دقيقة أو حتى تتحمص قشرته و يطرى داخله مع التقليب مرتان أو ثلاث أثناء الشوي .

• يقشر الباذنجان و الفليفلة ثم تقطع الخضار المشوية لقطع صغيرة . تضاف للبن مع الثوم و الملح و الجوز و البقدونس . يضاف المزيد من اللبن اذا دعت الحاجة , تقدم مع الخبز العربي او خبز بيدا .

التعليقات

  1. Rasha33 30 October 2011

    كتير شكلها طيبة والصورة حلوة والريحة ع شوي ح شمها منها
    انا بحب البيتنجان يكون مشوي عالفحم بس رح جربها هلق بالفرن لانو موسم الشوي راح
    تسلم ايديكي يا ميمي :)

  2. منى 30 October 2011

    الله يسلمك رشوشة , ان شاء الله تجربيها و تحبيها

    انا مو حابة الصورة و هلا حاطة براسي انو بكرة رح ارجع حضرها و جرب لشوف :zzz

  3. ام نبيل 31 October 2011

    مممممممممممممممم تسلم ايدك ان شاء الله اليوم رح اعملها عنجد حاسة طعمتها بتمي
    الله الله شو هالابداع وما في حكي على الصورة ابدا من الصورة حسيت الاكلة طيبة انا مهوسة تصوير ومعروفة بالعيلة بس مو متل ابداعك بالتصوير
    وبالنسبة لللبن انا رأي متل رأيك بالظبط وهيك بعمل
    رح قوم اعملها وبقلك النتيجة كيف رح تطلع :zzz

  4. ام نبيل 31 October 2011

    طلعت السلطة طيبة كتير نعومة الباذنجان والفليفلة وقرمشة الجوز وطعمة البقدونس الفريش ممممم
    ما حسنت افرمها ناعمة كتير ولذلك حطيتها بالفود بروسسر وطلعت ممتازة
    وزوجي حس اني بدها طحينة فعملت شوي بطحينة طبعا طلعت تقريبا متل المتبل بس كمان طيبة
    تسلم ايدك والله يعطيك العافية :)

  5. ورد 31 October 2011

    مسا الخير ست منى حبيت اقلك الكلام يلي عبيخطر ببالي واللي هو ياريتني كنت اختك او جارتك كنت مابتزحزح من بيتك عشان اكل هالاكلات الطيبه الله يسلم هالايدين ومافي قلك غير الله يهني ابو الولاد والاولاد عليكي

  6. منى 1 November 2011

    صحتين و الف هنا ام نبيل , كتيررررر انبسطت انك جربتيها بهل السرعة , بتعرفي بعد ما قرات ردك قمت جربت شوي بالطحينة :grin

    التنتين طيبين بس حبيتها باللبن اكتر لام حسيتها اخف و هي ببتاكل بالمعلقة و بتبرد القلب

    و انا كمان بحب كتيرر التصوير ’و بالاخير بطلع مصورة شي 50 صورة للعيلة و انا ما الي و لا صورة :roll
    اذا بتحبي تصوري الاكل فاهم نصيحة انو تكون الاضاءة طبيعية و يكون الطبق بينك و بين مصدر الضوء و بس ;)

  7. منى 1 November 2011

    حبيبة قلبي ورد , شكرا كتير لردك المزوء و الله اتمنى انو اجتمع بكل الاخوات هون واحدة واحدة , و نكون رفقة بالحقيقة متل مو نحنا هون :)

    الله يسلمك و يخليك لعيلتك و يبارك بوقتك و صحتك

  8. ام نبيل 2 November 2011

    صحتين وهنا على قلب
    انا هيك يابجرب الشغلة بسرعة او بتروح علي والله بيعلم ايمت رح تجي الهمة واجربها
    وشكرا كتير على النصائح التصويرية الحلوةبس الصراحة قليل ما صور الاكل واكتر شي بصور اذا كانت سفرة معتبرة او صحن فواكة لان ما في احلى من الفواكة والوانها
    وانا بختلف عنك بالنسبة لعدد الصور لاني بحب اصور واتصور يعني بهلك ابو نبيل وانا بقلو وقف هون اصورك وبعدين صورني وبالآخر بيطلعو صوري اكتر :zzz

  9. منى 2 November 2011

    ان شاء الله دوما همتك عالية ;)
    انا بحب كتير صور الاكل و حتى لما بكون معزومة على الزيارات بتمنى تكون كاميرتي معي و صور , بس بعدها بقول كبري عقلك يا بنت :grin

    بالهنا حبيبتي و الله يخليلك ابو الشباب و يخليك اله :zzz

  10. لامي 17 December 2011

    مرحبا،بدي اسال عن اللبن الي بالوصفة هو الحليب او اللبن روب او شي ثاني؟؟
    بدي اجربها ان شا الله و يسلمو ايديكي ست منى

  11. منى 18 December 2011

    هلا فيك اختي :)
    هو اللبن الزبادي او الروب ;)

    بانتظار تجربتك و رايك

  12. لامي 19 December 2011

    ان شاء الله و الله كل الي جربتن من الموقع حبيتن و ما خيبني و لا مرة شكرا كثير ست منى ع الوصفات :)

    • Mona 24 February 2013

      شكرا الك لامي لثقتك فيه , مية هلا فيك

  13. نسرينa 6 July 2012

    شكرآ منى عالوصفة أنا عضوة جديدة من سوريا حبيت سلم عليكي

    • منى 19 May 2014

      مية هلا نسرين نورتي و شرفتي يا قمر :)

  14. نسرينa 6 July 2012

    شكرآ منى عالوصفة أنا عضوة جديدة من سوريا حبيت سلم عليكي

    • Mona 24 February 2013

      هلا نسرين , منورة يا عسل شرفتي الموقع و نورتيه

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)