نيوكي السبانخ بصوص الميرمية و الزبدة


         وصفة : منى                 2012/02/19                 8 تعليقات
نيوكي السبانخ بصوص الميرمية و الزبدة

النوكي (Gnocchi ) من أشهر المعجنات الايطالية , و عادة بتتحضر من البطاطا و بتتقدم مع تشكيلة كبيرة من الصلصات و هي وجبة أساسية في كل المطاعم الايطالية متلها متل الباستا و اللازانيا و الذي منه …


لما حدى بيقدر النوكي يعرف انك عم تحضريهم على ايديكي رح تصيري سوبر ستار شيف بعيونه , و الاحلى من هيك انها وصفة سهلة . يعني عصفوريين بحجر . و ان شاء الله اذا رب العالمين راد رح نزل وصفة النوكي الأصلية و كمان النوكي باليقطين و هلا رح حضر النوكي بالسبانخ .. تحضيره كان بالصدفة , جبت حليب و انا عم اغليه وقع فيه حمض :( و صار عندي ريكوتا من غير احم و لا دستور , و دستور من خاطركن يعني , كان عندي سبانخ .. قلت اجى وقتها , مع انو هلا مو وقتها …..!


بحب النوكي مع زيت زيتون و رشة فلفل أسود و رشة صغيرة فلفل أحمر و جبنة بارمجان كتيرة على الوج ( الي نسيت حطه بالصورة , كالعادة يعني ) . أو فيك تحمي زبدة لحتى يبدى لونها يتغير و تصير طعمتها فيها شي من المكسرات و ترشيها على النوكي , بتطلع رائعة و هل الطريقة هي اكتر طريقة بتتقدم فيها , و من زمان كان في زرعة صغيرة مريمية , جربت قطعت كم ورقة منها , نضفتهن و فرمتهم و حطتهم مع الزبدة , عطت نكهة كتير مميزة و بتستاهل تجربيها . ممكن كمان صلصة بندورة , و ممكن صلصة كريم فريش , مع كل صلصة بتعطيكي طعمة جديدة و مختلفة…. انا ما كتير حبيتها مع صوص الكريم حسيت انو ضيع طعمتها ..


بالصحة و الهنا

كوب و نصف ريكوتا
2 كوب سبانخ , مسلوق
2 صفار بيض
3- 4 ملعقة كبيرة طحين
ملح و فلفل أسود و جوزة الطيب
ربع كوب جبنة بارمزان


للتقديم :

إصبع زبدة , 100 غ
عصرة ليمون , اختياري
فلفل أسود
جبنة بارمجان حسب الرغبة
بضعة أوراق ورق ميرمية طازجة
• يعصر السبانخ بين راحتي اليد للتخلص من أكبر كمية ممكنة من الماء , يوضع في محضرة الطعام مع الريكوتا و صفار البيض و الملح و الفلفل الأسود و جوزة الطيب و جبن البارمجان , يمزج حتى تختفي اوراق السبانخ و نحصل على مزيج أخضر جميل . يضاف الطحين بالتدريج حتى الحصول على عجينة طرية و دبقة قليلاً . لا يقلب المزيج بشكل زائد .



• يرش المزيد من الطحين على صينية كبيرة و تمرغ اليدان بالطحين , باستخدام ملعقة صغيرة يؤخذ مقدار نصف أو ثلاث أرباع ملعقة و تدحرج على الطحين حتى الحصول على شكل بيضاوي .

null

• يمكن أن تمرر شوكة على طرف كل حبة لتعطيها شكل مميز , تغطى و توضع في البراد لمدة ساعتين .

• يوضع قدر كبير على النار , بعد أن يغلي يملح و تضاف بضعة حبات نوكي , يغطى القدر و يترك على نار متوسطة حتى تطفو الحبات مجدداً على السطح , لمدة دقيقة أو دقيقتان . ترفع باستخدام ملعقة مثقبة و توضع في طبق .

• تحمى الزبدة على نار متوسطة لمدة دقيقتان أو ثلاثة أو حتى تظهر رغوة بيضاء على الأطراف , تضاف الميرمية و تترك لمدة دقيقتان , يضاف بضعة قطرات من عصير الليمون حسب الرغبة .

• تصب الزبدة على النوكي و تقلب بلطف حتى تتغلف الحبات بالزبدة , يقدم فوراً مع المزيد من جبن البارمجان .

سر الوصفة :

لا يقلب مزيج النوكي بشكل زائد أثناء اعداده كي تبقى الحبات خفيفة و لذيذة . كما يعصر السبانخ جيداً كي لا يضاف الكثير من الطحين .

التعليقات

  1. laraye 19 February 2012

    منى أنا لازم اكون اول وحدة هون وأول وحدة فرط ريقا
    صرلي من اب وانا عم اقول بدي اعمل نيوكي السبانخ ي الله سبحان الله أديس انشغلت
    منى هي أكلة طفولتي المفضلة بموت عليها وع طعمة الزبدة والمريمية والبرمزان
    يعني بحبا أمتار من النيوكي الاصلي تبع البطاطا وبندورةولحمة
    بس كان بدي بلاك انو ممكن تحضريها بس ب بطاطا وسبانخ وطبعا بتحتاج ل نوع بطاطا اللي لونها ابيض لانها مناسبة للسلق اكتر
    من يومين عملت اللازانيا فريش وكان عندي ست بتساعدني بشغل البيت
    ضليت يومين قبلا تقلي ليش لتعملي العجينة ع ايدك في عجينة جاهزة وانا اقلها لااااا وهيك لبين ما عملناها استغربت من اد ما انها سهلة و ع إد ما حبيتها طار عقلها عليها
    المهم نحنا هلأ هون ويا عيني و يا عيني عهالاكلة يسلم. ايديكي يارب ;)

  2. منى 20 February 2012

    اتمنيت تكوني انت اول واحدة تشوف الوصفة :roll
    مممم , حبيت فكرة نحضرها بالبطاطا و السبانخ عواض الريكوتا , رح جربها هل اليومين ان شاء الله ..
    لاروش انا بشوي البطاطا شوي لان البطاطا البيضا ما بلاقيها دوما , هيك بحس انو نجاحها بيصير مضمون و ما بتشرب مي , شو رأيك ؟

    قالتلي مريم انو في بيبي جديد , حبيب قلبي اديه جاي على بالي شوفك و شوفه ;)

  3. ام نبيل 20 February 2012

    السلام عليكم
    شكرا على المقدمة (التاريخية) لأني الصراحة مالي سمعانة بهالأكلة من قبل
    بس شكلها كتير شهي بس انا حاليا زعلانة من السبانخ
    هون كتير غليظ غسله وفرمه من اسبوع طولت فيه ساعتين ونصف ويادوب كفاني يوم واحد
    بس كنت ناوية جيب شوي مشان الكاتو الأخضر عملتو برمضان وكان رائع وضيوفي كتير اعجبو بطعمته وفكرته وناوية اعمله مرة كمان
    وان شاء الله رح اتشجع واكتر الكمية مشان اجرب هي الاكلة
    ادعيلي تجيني الهمة
    تسلم ايديك يارب والله يعطيك العافية
    وان شاء الله قريبا بصير وقت العزايم والفرحة

  4. farah 20 February 2012

    من زمان عندي وصفة النيوكي وما كان يصيرلي اساويها بس الوصفة اللي عندي بالبطاطا
    عجبتني فكرة السبانخ بس يا تري بيمشي حالها ؟؟السبانخ اللي عندي مفرزة وناعمة يمكن اذا حطيته بمصفاية لتنزل المي بيكون مناسب , الصورة اللي حاطتيها بتشهي كمان الريكوتا كتير بحبها حيرتيني :roll بس اكيد اكيد شجعتيني ساويها سلم ايديكي يارب
    احلى ما في هالوصفة حسيت انها رجعتك للمطبخ ولنشاطك اللي بيمدنا نحنا كمان بالنشاط والتفاؤل والبسمة

  5. غيث 20 February 2012

    سلامات ميمو كيف صحتك والاهل ان شاء الكل بخير الله يفرجها يا رب ويحمي الجميع والله اول مرة بسمع بهالاكلة بس انا كتير عدوي السبانخ لكتر الشغل بتنظيفه ياالله ستي الله بيعين ليش اصلا في اكلة ما بدها شغل وفعي ههههه الله يسلم ايديك واشتقنالك واشتقنا لحكياتك :)

  6. منى 21 February 2012

    و عليكم السلام و رحمة الله و بركاته ام نبيل :)
    انا زعلانة منه دوما , العيلة بتحبه كتير و كل ما بشوفه عندي بالمطبخ بيعصني قلبي , يا رب الله يبارك باوقاتنا و يخلي نياتنا صافية و يحي هممنا :)

    الله كريم

    اذا جربتيها خبريني , و الف هنا و صحة على كاتو السبانخ

  7. منى 21 February 2012

    هلا غيوثة :)
    الحمد لله نحنا كلنا من رب العالمين بالف خير , الله يفرجها على الكل ..
    اي قولتك , بحس انو بس ما دخلت للمطبخ ما بقى اطلع منه الا بطلوع الروح :grin

    تشتاقلك العافية , القلب على القلب حبيبتي

  8. منى 21 February 2012

    هلا فروحة :)
    اي اكيد بيمشي حالها , المهم انك تقيسي السبانخ و بعدها الكمية الي بتطلع معك عصريها بين ايديكي لحتى تخلصي من كل ميتها و هادا اساسي بالوصفة ;)

    شكرا فروحة لملاحظتك , عينك عين محبة , و بين القلب و القلب في اشيا بتنحس و ما بتنحكى :zzz

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)