كاري القرنبيط و اللحم المفروم


         وصفة : منى                 2012/01/23                 14 تعليقات
كاري القرنبيط و اللحم المفروم

في جروب لقمة طيبة في صبية لذيذة كتير و لذيذة هون بتنطبق على شخصيتها و على طبخاتها . مي ياسين , من كم يوم عملت سلطة و استخدمت فيها ورق الشوندر ..


الفكرة حبيتها و رح جربها اول ما جيب شوندرات معهن ورق أخضر و من هون لوقتها خطرلي انو جرب الفكرة على ورق القرنبيط , اسمي بحب اكله ني فاتوقعت انو ورقه كمان يطلع طيب و هو ني , جبت القرنبيطة و شلت الورق القاسي الي برة و تركت الورق الغض البض الي تحته و غسلته و فرمته و دقته …. كان ماشي حاله بس ما حبيت حطه في السلطة خفت و اتوقعت انو اطفالي الحلويين و ابوهم ما ياكلوها .. لذاا قررت ضيف الورق للطبخة الي كنت عاملتها و الي هي كاري القرنبيط .. و طلعت الطبخة بتاخد العقل , و كنت انا مبسوطة على حالي انو استخدمت الورق الي اكيد فيه فوائد غذائية لسى ما بعرفها ..


بالصحة و الهنا






5 - 6 ملعقة كبيرة زيت زيتون
1 حبة كبيرة بصل , مفروم ناعماً
1 رأس قرنبيط متوسط , حوالي كيلو و ربع
قطعة زنجبيل كبيرة , مقشرة و مبشورة
ثلث كيلو لحمة غنم , مفرومة
2 ملعقة صغيرة فليفلة حمراء حلوة
2 ملعقة صغيرة كمون
2 ملعقة صغيرة كركم
ملح
باقة صغيرة كزبرة خضراء, مفرومة ناعماً





• تنزع أوراق القرنبيط الخارجية القاسية , تغسل الأوراق الداخلية و تفرم . يقطع القرنبيط الى زهرات متوسطة .

• يسخن الزيت و يقلب البصل حتى يشقر . يضاف الزنجبيل و اللحمة المفرومة و تقلب حتى تنضج اللحمة و يجف مرقها , يضاف ورق القرنبيط المفروم و يقلب لبضع دقائق .

• تضاف زهرات القرنبيط و البهارات و تقلب حتى تغلف البهارات القرنبيط , يغطى القرنبيط و يترك لمدة 10 – 15 دقيقة حتى يطرى مع التقليب اللطيف بين الحين و الأخر .

• تضاف نصف الكزبرة الخضراء و تقلب لمدة دقيقة , يرفع الكاري عن النار و تضاف بقية الكزبرة الخضراء , يقدم الكاري ساخناً مع الأرز أو الخبز .

فكرة :

يمكن الاستغناء عن اللحمة في هذه الوصفة و تقدم كطبق مرافق للبرياني أو كطبق رئيسي نباتي مع الأرز أو الخبز .

التعليقات

  1. farah 23 January 2012

    عزيزتي منى انا من محبي أكلات الكاري بس كأنك بهالوصفة ما استعملتي بهارات الكاري واكتفيتي بالتوابل المشكلة ولا نسانة تكتبيها؟؟ :?
    بصراحة انا مرة طبخت الزهرة من غير قلي ما كتي استسغناها بدي جرب هالوصفة على مسؤوليتك :grin
    شو رأيك

  2. farah 23 January 2012

    انا بعرف ان في كتير اكلات هندية بيكون الكزبرا و الزنجبيل والكمون هو الكاري تقريبا بوصفاتهم
    على كل حال تسلم ايديكي يا عسل :)

  3. ام نبيل 31 January 2012

    الحمد الله عالسلامة اهلا برجعتك
    طولتي علينا الغيبة كتير انشغل بالنا عليك
    وفوقها الموقع توقف كم يوم
    ممم طيب بالنسبة للأكلةانا ما لي معجبة كبيرة بالقرنبيط وجوزي ابدا وفوقها فيها كزبرة فللأسف مارح احسن جربها
    الله يعطيك ألف عافية وعمننتظر شي جديد منك

  4. غيث 31 January 2012

    اهلين منى والله اش زعلت لانو الموقع صار له فترة ما عم يفتح واليوم كتير انبسطت انو رجع الحمد لله على سلامتك وسلامته اشتقنا للمتكم يا لقمة طيبة يسلم هالايدين على كل جديد كانو الكل الو مشاكل مع القرنبيط انا بعملو لفوائده بس يعني مو كتير مستساغ شكرا منى ونورت والله :)

  5. منى 1 February 2012

    هلا فرح :)
    لا حبيبتي , هي هي البهارات المطلوبة مع الكزبرة الخضرا صار عنا خلطة الكاري ;)

    فيكي تقلي الزهرة , انا صايرة بكتير وصفات ما عم ااقليها و عم حبها كتير , بس ااقليها لحتى اخلي المسؤولية :grin

    الله يسلمك و يا ريت تجربيها و تكون نممم

  6. منى 1 February 2012

    هلا ام نبيل :)

    شكرا حبيبتي لسؤالك , الحمد مشكلة صغيرة و انحلت …

    و لا يهمك ان شاء الله الوصفة التانية بتكون على زوء الراي العام العالمي عندك :zzz

  7. منى 1 February 2012

    هلا غيوثة حبيبتي :)
    الله يسلمك و يخليك يا رب , اي قولتك مع اني بحبه كتير و ما عم افهم ليش :roll

    شكرا الك و انت الي منورة اللقمة

  8. Rasha33 1 February 2012

    مساء الخير منى ومبسوطين كتير انو انحلت قصة

    الموقع لازم تعلقيله خرزة زرقا مشان ما بقا
    يصير هيك مرة تانية
    الاكلة باينتها كتير طيبة
    وبالنسبة لعمو قرنبيط المشكلة عامة الكل موكتير صحبة معه بس انا بحبه وعم حاول عود بنتي تاكله
    زميلي بالجامعه عم يعمل دكتوراته عنه وخصوصي انو فيه نسبة عالية من مضادات سرطان الثدي لهيك الاهتمام فيه عم يزيد
    هالاكلات كنز مرسي كتير ميمي :zzz

  9. nanita 5 February 2012

    يسلم ايديكي على هالوصفة الرائعة , أنا من عشاق القرنبيط وبدور على وصفاته دوارة :grin وأكتر الشي عم حبه مشوي بالفرن ممممم, كمان هون في كزبرة خضرة شي لذيذ كتير
    أختي عندي سؤال هون لما ضفتي زهرات القرنبيط كنتي سالقتيهم من قبل؟ ولا لما ضفتيهم للحمة حطيتي عليهم ماء؟ :? في عندي وصفة للقرنبيط باللبنة كتير طيبة كيف أبعتلك اياها؟

  10. منى 5 February 2012

    هلا رشا :)
    اي قولتك رح جيب بخور و بخره و حط خرزة زرقا , و صلوا على محمد :grin

    شكرا كتير للمعلومة , انا بحبه كتير و الحمد لله قطاطي متلي , يمكن اذا الطفل شاف امه عم تاكله عادي فرح يكون متله متل ايا نوع خضرة تانية

    رح نزل كمان وصفات ان شاء الله فيه ;) و رح استنى رايك بعد التجربة

  11. kuwaiti_girl 8 February 2012

    مممممم حسيت بطعمتها

    تسلم الايادي

    بحب القرنبيط او الزهره بكل اشكالها والحمدالله عندي راس بالثلاجه ان شاء الله بسويه اليوم بعشاي :)

    بس من غير ورق لانهم يشيلونه قبل العرض بالجمعيات

    اختي ناريتا .. ناطرين وصفه القرنبيط باللبنه احس طعمتها بتكون طيبه

  12. منى 9 February 2012

    هلا nanita :)
    متل حكايتي على الظبط , كتير بشوفه طيب , بستغرب من هل السمعة الي اله :grin

    أنا ما كنت سالقة القرنبيطات قبل ما ضيفهم , و هنن طالعوا مي فاستوا من ميتهم و مرقة اللحمة , بس اذا حسيتس انها شوي ناشفة , فيك تضيفي شوية مي ..

    اكيد بانتظار هل الوصفة , ممكن تبعتيها برد هون ;)

  13. منى 9 February 2012

    هلا كويتية :)
    بعد زمااااان كتير مو مبينة , اشتقتلك

    هي الوصفة انا بحضرها اساسا من دون الورق و بتطلع تمام , بقى بانتظار رايك ;)

  14. kuwaiti_girl 12 February 2012

    حبيبتي انا اشتقتلج اكثر :***

    سويتها وكانت لذيذه

    تسلم الايادي

    شوي وانزلها بالموقع عندي و ماني ناسيه لينك الوصفه الاصليه :**

    فديتج على هالوصفات الحلوة

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)