أكواب البطاطا و الشوندر


         وصفة : منى                 2013/10/28                 2 تعليقات
أكواب البطاطا و الشوندر

هي وصفة شكلها بياخد العقل و رح تلفت نظر عيلتك و ضيوفك كتير , طريقتها بسيطة نوعاً ما و ممكن تشوي البطاطا و تخليها بالبراد قبل بيوم من وقت التقديم , أهما الشي انك تخليها تبرد كتير منيح قبل البشر و انك تبشريها ع الطرف الخشن و ما ترققيها كتير لحتى تتماسك بعد الشوي . بعد ما تبشري البطاطا و تبليها بالبهارات رح تشمي اطيب ريحة بالدني , متعة لوحدها هل الريحة …



ع أيام المولات كنت استخدم للحشوة سالمون مدخن و كريما حامضة , يطلع اللون البرتقالي مع الابيض شغلة بتجنن , هلا ما عاد في هيك شي بحلب , بس انا لسى حابة حضر الوصفة , لهيك صرت استبدل الكريما الحامضة بمزيج من اللبنة و المايونيز , و عواض السالمون بحط أيا شي متوفر عندي و بحسه بيطبق مع هل الصلصة , و هل المرة استعملت شوندر مسلوق , طلع اللون و الطعم حلو كتير . انت ممكن تستخدمي أشيا على زوءك و تحسي انها بتطبق مع الصلصة . و إذا حابة تستعملي السلمون المدخن فافرميه ناعم و قلبيه مع البشر و الكريما الحامضة , و يمممم


بالصحة و الهنا

شو لازمنا ؟
3 حبة متوسطة ,1000 غ , بطاطا
1 – 2 ملعقة كبيرة طحين
نصف ملعقة صغيرة ملح
ربع ملعقة صغيرة ثوم بودرة , ريحان مجفف , فلفل أبيض

الحشوة :

كوب و نصف كريما حامضة ( يمكن استبدالها بمزيج من كوب لبنة مع نصف كوب مايونيز )
1 ملعقة كبيرة بشر ليمون
ملح و رشة فلفل أسود
مكعبات من الشوندر المسلوق
طريقة التحضير

1 - تغسل حبات البطاطا و تجفف , تثقب بشوكة ثم تشوى في الميكروييف على الطاقة الكاملة كل حبة على حدة لمدة 5 دقائق , توضع الحبات في الثلاجة و تترك لمدة ساعة حتى تبرد .

2 – تحضر الحشوة : تقلب الكريما الحامضة و البشر و الملح و الفلفل الأسود , يغطى الخليط و يوضع في الثلاجة حتى الاستعمال .

3 - تقشر البطاطا و تبشر خشناً , تتبل بالملح و الفلفل و الريحان و الثوم البودرة , يضاف الطحين و تقلب بلطف .

4 – تدهن قوالب تارت أو مافن غير لاصقة بالقليل من الزيت , توزع البطاطا على القوالب و ترص في الصينية المجهزة , و تخبز في الفرن المحمى على درجة حرارة 220 درجة مئوية على الرف السفلي لمدة 15 – 20 دقيقة أو حتى تكتسب اللون الذهبي و يحمر الوجه و تتماسك القطع .

5 – عند التقديم ترتب أكواب البطاطا في طبق مسطح , توزع الحشوة المجهزة و ترتب فوقها قطع الشوندر و تقدم فوراً .

فكرة :

في حال استعمال السالمون المدخن يضاف في الخطوة الثانية لمزيج الكريما الحامضة و يتم الاستغناء عن الشوندر في الخطوة الأخيرة .

التعليقات

  1. الساجدة لله وحده 23 December 2013

    يسلمو ايديكي على هالوصفة
    طيب ممكن اعرف كيف بتستعملي السلمون بتحطيه على الوش يعني ؟؟

    • منى 24 December 2013

      قسم بفرمه ناعم كتير كتير و بحطه مع الحشوة و بترك شوي للوج كزينة

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)