خضرة مشكلة


         وصفة : منى                 2007/10/16                 20 تعليقات
خضرة مشكلة

هل الوصفة الرائعة اتعلمتها من بنت احماي هلا و الي هي اتعلمتها من حماتها خالة لميس , الله يرحم روحها , وصفة بتاكلي بتاكلي منها ما بتشبعي , ع كتر مو طيبة و ع كتر مو الوانها بتفتح النفس , شغلةةة . و نحنا ع كتر ما منحبها من تحت ديات هلا منطلب منها تحضرلنا اياها بكل عزيمة .
دقناها مرة بالشام بمطعم الكمال و كان حاطط تشكيلة كبيرة من الخضرة , بامة و كوسا و باتنجان , و مرة فاصوليا و ذرة , انت استخدمي الخضرة الي بتحبيها , بس انا شفت انو اطيب توليفة هي الخضرة الي ذكرتها بالوصفة .
تقشير الخضرة و تقطيعها ممكن ياخد وقت , بقى اذا كنت مستعجلة ممكن تجهزي الخضرة قبل بيوم , تغمري البطاطا بالمي , و الباقي حطيهم بكيس نايلون بيتسكر منيح و تاني يوم ع الطبخ فوراً .
بالصحة و الهنا

- المقادير :
كيلو لحمة غنم هبرة مدقوقة
2 – 3 ملعقة كبيرة صنوبر
نصف ملعقة صغيرة بهار
2 حبة فليلفة حمراء
2 حبة فليلفة خضراء
بصلة كبيرة
3 حبة بطاطا
4 – 5 حبة جزر
نصف كوب بازلاء مجمدة
2 فص ثوم
عصير نصف ليمونة صغيرة
2 حبة بندورة
1 – 2 ملعقة كبيرة معجون طماطم
2 ملعقة كبيرة سمنة
- طريقة التحضير :

• تفرم الفليلفة الحمراء و الخضراء إلى عيدان صغيرة , يهرس الثوم و بفرم البصل جوانح , تقشر البطاطا و البندورة ثم تفرم إلى عيدان أو مكعبات .

• تدعك اللحمة مع الصنوبر و البهار ثم تشكل بهيئة أسياخ صغيرة .

• تذوب السمنة على نار متوسطة ثم تضاف قطع الهبرة و تقلب بلطف حتى تنضج اللحمة و يجف مرقها .

• يضاف البصل ثم الجزر ثم الفليلفة ثم البطاطا ثم البازلاء و الثوم مع التقليب بعد إضافة كل نوع .

• أخيراً تضاف البندورة المفرومة مع معجون الطماطم و عصرة الليمونة و ما يكفي من الماء أو المرق لغمر المكونات .

• بعد أن تغلي المرقة تهدى النار و تغطى الطنجرة و تترك لمدة نصف ساعة حتى تتسبك المرقة ثم تقدم فوراً مع الأرز المفلفل أو الأرز بالشعيرية .

التعليقات

  1. nidaa84 18 October 2007

    كل سنة وانت سالمه وانشالله بينعاد عليك وعلى الامة الاسلامية بالصحة والخير والسلامة والله اله يسلم ايديك انا هل اكله دائما بعملها فعلا كتير كتير طيبه بس انا عادة بستخدم الكبابة وليس الهبرة بس انشالله بدى اجربها بالهبرة اكيد طيب يسلمو وبانتظار المزيد

  2. منى 20 October 2007

    هلا نداء :)
    و انت بالف خير و ينعاد عليك و على عيلتك يا رب بالخير و البركات

    و أنا كمان كنت متلك اعملها بالكباب لحتى دقتها عند أخت زوجي و عجبتني بهل الطريقة أكتر ;)

    إن شاء الله تجربيها و تعجبك

  3. linda 21 October 2007

    و انا كمان بدي جرب ما حدا احسن من حدا
    بس بلحمة شقف ,جوزي لازم كل يوم ياكول لحمة شقف يا اما قال بيحس انو ناقص شي عل الاكل :x

    يعطيكي العافية يا منى و يسلم ايديكي

  4. منى 22 October 2007

    هلا ليندا :)
    بتطلع طيبة بلحمة شقف , بس عن جد اذا شي مرة صار عندك لحمة هبرة اتذركي الوصفة و جربيها و ان شاء الله رح تدخل للمنيو تبع العيلة ;)

    الله يعافي قلبك و بدنك يا رب :)

  5. seeramazen 31 October 2007

    ماشاء الله الله يعطيكى العافية

  6. منى 31 October 2007

    الله يعافيك أختي :)

    مية اهلا و سهلا فيك

  7. larooo 24 April 2010

    مساء الخير ..
    معلش اسأل شو الفرق بين الهبرة والكبابة
    انا فكرت كلو لحمة مفرومة :?
    بحب الاكلات اللي بتتقلى فيها الخضرة بالاول شوي
    ان شاء الله رح جربها انا كمان :)

  8. منى 25 April 2010

    لارا جربيها و ان شاء الله ما بتندمي ;)

    الهبرة هي اللحمة المدقوقة الي ما فيها دهنة ابداو الي نستعملها للمرتديلا و الكبة و بيكون لونها احمر احمر ما فيه ايا بياض :roll

    اللحمة المفرومة هي الي منستعملها لكل الطبخات البقية متل المحشي و اخواته و بيكون فيها نسبة دهن تختلف حسب الشخص الي عم يقطع اللحمة و كيف بيحب تكون

    شرحت و الا فوتك بالحيط :?

  9. نور الأسلام 13 October 2010

    السلام عليكم كيفك منى :) هون باسعوديه بالسوق في زيتون اسود مكلس بدي اسئلك عن وصفتو اذا عندك فكره عنو

  10. منى 25 October 2010

    هلا نور :)
    ما عرفته حبيبتي , عنا الزيتون الاخضر بيجي مكلس و هادا كمان لسا مو مجربته , بس ناوية ;)

  11. karamela 20 November 2010

    اختي منى شو بتفرق هي الاكلة عن يخنة البازلاء باللحمة
    انا لاني بعمل يخنة البازلاء على طريقتك
    اختي منى عندي موضوع حابة نطرحه بلقمة طيبة
    واللي هو كيف تعرفتوا على هالموقع
    بتمنى يكون عجبك
    انا عم حاول كون طالبة شاطرة حتى ماتنسينا

  12. منى 21 November 2010

    بتفرق كتير كرميلا , هلا ما بتتخيلي استخدام الهبرة هون شو بيعمل للوصفة كلها , كمان في فليلفللات و عصرة ليمونة , هللا باختصار كل واحد نكهة مختلفة عن التانية حتى لو في تشابه بالمقادير :zzz

    ممم فكرة حلوة كتير , انا كنت من زمان عملت استفتاء , هلا بموضوع بيصير الذ , يلا رايجحة عشبقوا على الصفحة الرئيسية :zzz

    الله يخليلي هل الاخت الحلوة و ان شاء الله ربي يديم المعروف على طول

  13. ديما 20 March 2014

    انا بطبخا لهلأكلة بس على صدور جاج وبحط مع الخضرا كمان بروكلي وفطر والبطاطا بشكلها عادية وحلوة البطاطا الحلوة كتير طيبة بالطبخ وبعمل جنبا رز بالزعفران أو رز بالكاري كتير بيلبقو معا

    • ديما 20 March 2014

      بس ما بحط بندورة ولا حامض بزيد على الخضار من مية سلق الجاج

      • منى 20 March 2014

        كانو صارت غير اكلة هيك , اكيد طيبة كتير , شكرا للاضافة :)

    • منى 20 March 2014

      فكرة شهية ديما , شكرا للاضافة , حابة جربها كتير و خصوصا انو اكلات الدجاج عندي اطيب من اللحمة , يسلموا ايديكي

  14. ديما 20 March 2014

    لا تنسي تجربي حدا رز بسمتي تبلي بالكاري خلي الكاري يتحمص شوي مع الرز قبل ما تحطي مي لأنو مرة جربت حطيتو بعد ما حطيت مي فوق الرز ابدا ما أعطى نكهة :) انا كمان بعد ما تستوي الخضرا بديرن بجاط بايركس وفي خلطة بعملا بدهن صدور الجاج منشان ما ينشفو وياخدو طعمة ولون حلو وبصفن فوق الخضار وبالفرن عالشواية لياخدو لون حلو …….. جربيا وخبريني بالنتائج :)

    • منى 20 March 2014

      ممممممم , يا لطيف شو بتشهي , ع التجربة بااقرب وقت و رح نزلها ان شا الله

      ممنونتك كتير :)

  15. ديما 21 March 2014

    اذا بدك من شان تدهني الجاج انا بحط كتشاب ومايونيز ودبس فليلفة وشوية خردل ورشة فلفل اسود وشوي زيت زيتون بيطلع لون الجاج كتير حلو …. يالله بانتظار الوصفة مع الصور :)

    • منى 21 March 2014

      يسلم دياتك ديما ع كل هل النصايح , ان شا الله بجربها و بتشوفي تطبيقي :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)