دبس الفليفلة


         وصفة : منى                 2007/06/11                 24 تعليقات
دبس الفليفلة

في سورية بتحضر الناس بالعادة دبس الفليفلة باواخر الصيف ، بتتلون كل الاسطحة باللون الاحمر ، و كل ما مشيت كم خطوة بالشوارع الضيقة بتشم ريحة الفليفلة المجففة ، و كانها اشارة ان الصيف بكل شوبه و الوانه بدي يلملم توبه ، و ان الخريف ع الباب .

دبس الفيفلة واحد من اهم الكونات في المطبخ السوري عموماً و المطبخ الحلبي حصوصاً / تقريباً مستحيل يخلى بيت منه ، طريق تحضيره مو صعبة .. بس بتاحد وقت .. و مع انو متوفر بالسوق جاهز دوماً . بس دبس الفليفلة الي منحضره ع ايدنا غير شكل ، بلونه و بريحته و طعمته ، و الي ما داق دبس فليفلة بيتوتي ما بيعرف شو هو دبس الفليفلة الحقيقية .
بالصحة و الهنا

-المقادير:

فليفلة حمراء ( حرة أو حلوة أو وسط )
ملح خشن
- طريقة التحضير :

1 - تقطع كل حبة فليفلة لنصفين و يتم التخلص من الجزء الأخضر و البذور . لا تغسل الفليفلة كي تحافظ على لونها الأحمر المشرق .

2 - تنشر الفليفلة على سطح مستوي في مكان مشمس بحيث يوضع كل نصف بجانب الأخر و يجب أن تكون الشمس قوية و أن ننشر الفليفلة مباشرةً بعد التقطيع لأن الفليفلة سريعة العطب .

3 - تترك الفليفلة في الشمس مدة يوم أو يوميين حسب حدة الشمس حتى تجف بشكل غير كامل أي تكون ثلاث أرباع جافة .


4 - تغسل الفيفلة بشكل سريع تحت الماء الجاري او في دلو ثم تطحن بماكينة طحن اللحمة على الشفرات المتوسطة مرتان .

5 - توضع الفليفلة في طبق مسطح كبير و تغطى بقماش رقيق ثم توضع تحت الشمس لمدة يوم كامل مع التقليب حتى لا تجف .
6 - ترش الفيفلة المطحونة بالملح الخشن و توزع على مرطبانات صغيرة و توضع في الفريزر حتى وقت استخدامها
  • وصفات تانية ممكن تعجبك


التعليقات

  1. linda 11 June 2007

    يا عيني عل الوصفات الاصيلة
    قليل جدا تلاقي وحدة بتعرف او بالحرى بتعمل هيك شغلات بالبيت
    هلاء صار زمن الجاهز يلي ما لو طعم

    بما انو عنا الشمس قوية رح ساوي هادا الاسبوع دبس الفليفلة
    مشان لما تعملي المحمرة كون مستعدة للتطبيق ;)

    جزاك الله خير الجزاء

  2. linda 11 June 2007

    نسيت انو ما عندي مكنة لحمة بيسوى الخلاط العادي
    يا اما بفرمها ناعم بالسكين
    شو رائيك

  3. منى 11 June 2007

    هلا ليندا :)

    كلامك مظبوط , و قليل هلا حدا يعملها في البيت ,, بس أكيد بيبقى شغل البيت غير ..

    شوفي ليندا هدا الدبس الفليفلة ما بيصير الا بماكينة فرم اللحمة ..

    بس عندي طريقة تانية لمعجون الفليفلة على الطريقة الأرمنية , هي ما بدها ماكينة فرم ,,
    رح نزل لك الوصفة بكرة بإذن الله ;)
    تكرم عيونك أختي :)
    مية أهلا و سهلا فيك

  4. تورتاية بالكريز 12 October 2007

    طريقة روعة من زمان بدور عليها الله يكرمك ياقمر ويرزقك كل اللي تتمني كتير انبسط بالرابط ياقمر الله يعطكي الصحة والعافية .

  5. منى 12 October 2007

    الله يكرمك أختي تورتاية :)

    و ان شاء الله لما تجربيها رح تعجبك كتير
    لان احنا ما منستغني عنها في كل شي تقريباً :)

  6. لارا مينا 12 May 2008

    مساء الخير أخت منى هل من الممكن أن يطحن الملح الخشن ثم يضاف للوصفة, وعند دهن الخبز بدبس الفليفلة هل تبقى قطع الملح الخشن موجودة,وبالنسبة للفليفلةعندماتنشر بالنهارهل أضعها بالثلاجةأثناء الليل حتى يتم نشرهافي اليوم التالي. وعذرا للإطالة ويعطيكي الصحة والهمة على طول يارب .

  7. منى 12 May 2008

    هلا لارا :)
    أختي ما في داعي انك تطحني الملح وبعدها تضيفيه , بيكفي انك تضيفيه و بس لان هو رح يدوب مع الفيلفة و ما رح يظهر ابداً ;)

    ما في داعي تدخليها للبراد بالليل , تصوري امي مثلا و هي عم تحضر 50 كيلو فليلفة حمراء تحطها بالبراد :grin بس في شرط اساسي انك تحضريها و الشمس حراقة مو بهل الوقت لارا استنى كمان لحتى تسوي الفليلفة و تصير الشمس حدة أكتر و إذا بدك تحضريها من دون شمس فيك تحضري دبس الفيلفة الارمنية هي بتنطبخ على النار ;)

    و لا يهمك لارا , انا تحت امرك و اي سؤال او استفسار من عيوني :)

  8. قمر2010 23 September 2008

    اخت منى مشكوره على الوصفه
    وهل لديك وصفة صلصة الفلفل الأحمر التي تقدم في المطاعم مع سندويتشات الفلافل لاني اعتقد انها مختلفه عن هذه الوصفه فالتي تقدم في المطاعم تكون سائله قليلا
    وجزاك الله خير

  9. منى 23 September 2008

    مية هلا قمر نورتي و نور الموقع , أختي الصلصة الي عم تقولي عليها ما عرفتها , بس رح ااقولك على خلطة رائعة و أنا دايما بدهن فيها الخبز قبل ما ألفه بالفلافل , ممكن تحضري الحشوة الموجودة على هل [URL=http://www.l2ma.com/content/view/116/2/]الرابط[/URL] و بعدها تدهنيها على الخبز و فوقهم فلافل و مخلل و بندورة و خس و أكيد طحينة ,,, مممم و الله سندويشة لا يعلى عليها

  10. ام عبداله 24 December 2008

    السلام عليكم وكل عام وانتي بخير وعام خير علي الجميع حبيت استفسر منك هل يمكن تجفيف الفلفل في الفرن علي نار هادئه حتي يجف لعمل دبس الفليفلة

  11. منى 25 December 2008

    هلا أختي :)
    انا مو مجربة هس الطريقة الي قلتيها بس عندي كتير اصدقاء بانكلترا و هنيك متل ما بتعرفي ما في شمس , لهيك بيجففوا الفليلفة في الفرن على نار هااااااادية كتير كتير عوض الشمس ;)

  12. ميسونو 2 January 2009

    سلام منى ..
    ما هو الفرق بين الملح الخشن والملح العادي؟
    يعني هل أستطيع تحضير الوصفة بملح الطعام العادي؟

  13. منى 3 January 2009

    هلا ميسون :)
    الملح الخشن هو ملح البحري أو الصخري و إلي مو معالج باي اضافات متل مانع التجبل أو اضافة اليود
    بكل وصفات الحفظ لا ينصح باستعمال الملح المعالج ;)

  14. راجيه عفو الرحمن 18 May 2009

    جزاكى الله خير
    ان شاء الله هاجربها

  15. منى 19 May 2009

    هلا اختي راجية :)
    مية اهلا و سهلا فيك اختي بالموقع , نورتي و الله

    ان شاء الله تجربيها و تكون على زووءك و تظبط معك :zzz

  16. dody 11 June 2009

    السلام عليكم

    يعطيكي العافية اختي

    عندي سؤال
    ضروري نحفظ الدبس بالفرريزر؟؟

  17. منى 11 June 2009

    و عليكم افضل السلام و اتم التسليم اختي :)
    ضروري نحفظها في الفريزر و الا بتحمض و بتنتزع كلها :roll

  18. Nisren 31 October 2011

    صباحو حبيبتي منووونة عندي دبس فليفلة وبدي اعمله خبز بفليفلة وبدي أسألك على تتبيلة الدبس فليفلة شوهي البهارات اللي بتنحط معه وكمان على العجينة شو هي أطيب عجينة لحتى يطلع متل الجاهز

  19. Rana 1 July 2014

    ما شاء الله رائعه … بس ممكن سؤال قديش كميه الملح لكميه الفليفله.. و بالبراد او فريزر ؟ شكرًا كتير الك الله يجزيكي الخير

    • منى 1 July 2014

      بدوقي و بتحطي و لازم يكون الملح ظاهر نوعا ما , و الحفظ الافضل بالفريزر

      مية اهلا و سهلا منورة :)

  20. منال 29 August 2014

    مرحبا ست منى يعطيكي العافية شي بيشهي انا بساويهم نفس الطريقة مع اختلاف بسيط حبيتي انا بغسلهم قبل ما افتحهم وهن حبات كاملة وبحطهم على مصفى وبعدين بفتحهم وانشرهم على
    شرشف ولما ينشفو تلاتة ارباع ناشفة بفرمها دغري على المرطبانوبحط شوي ملح بخلطهم وبحفظهم بالفريزر وبيطلعوا نفس اللون

    • منى 27 October 2014

      يا سلاام تسلم هل الديات الحلوة يا رب

      طيب ما بيتوسخوا بعد النشر بشي غبرة او هيك مثلاً ؟

  21. رحاب البارودى 26 October 2014

    صباح الخير يا منى
    تسلم ايديكى رائعه كالمعتاد
    لكن عندكم بسوريا بتستخدموا الدبس ده فى وصفات زى ايه ؟؟؟
    وتعيشى وتعملى دايما يا جميلة

    • منى 26 October 2014

      اهلا و سهلا رحوب نور الموقع يا ست الستات

      تقريبا بكل شي ،كل طبخة بدها رب البندورة ممكن نحطه معها بيعطي طعم بيجنن ، الكبة النية اليالنجي المحمرة ، مع الزيتون و المكدوس و البيض و الفطاير و الزعتر و السلطة

      انا كل يوم لازم اكل منه ، ما بعرف اوصفلك

تقييم الوصفة
عاديةقد أحضرهاجيدةممتازةأكثر من رائعة (5 votes, average: 3.60 out of 5)