شنكليش


         وصفة : منى                 2014/04/20                 32 تعليقات
شنكليش

شنكليش أو سوركة واحدة من الوصفات الي ما تركت شغلة ما جربتها لحتى تطلع معي , مين ما شوف من الستات الكبارية أسألهن , مين ما صحلي حدى من شي ضيعة من ضيعنا الحلوة اسألوا , و حتى اجتني كتير وصفات من زوار الموقع الكرام .. كنت جرب و جرب و جرب , يطلع معي اشيا طيبة بس بتشبه كرات اللبنة , اكتر منها الشنكليش .
المهم شفت وصفة لسها في جروبها tea and cake و جربتها , كتير كانت سهلة , المقادير كلها تحت ايدي , قمت فوراً و جربتها , ريحتها كانت روعة , لونها طلع بيعقد , شغلهاا كان متعة و الأهم انها كانت خالصة بربع ساعة , شي ما بيتسدق و وصفة ما فيها جنس التعقيد ..
لتيتها بالفليفلة و الزعتر , و خليتها تنشف شي اسبوع , و بعدها اجى وقت الدوااق , مممم , فعلاً روووعة و اطيب من اطيب شنكليش خرج تشتريه من السوق . تسلم دياتك سهى .
إذا ما في عندك قريشة ففي حلينن ادامك , اما تجيبي لبن بقر و تغليه ع النار مع عصرة ليمونة لوقت يفرط , بعدها بتخليه يبرد و تصفيه و تستعمليه في الوصفة و هادا افضل حل , و في حل سريع هو انك تحضري الوصفة باستعمال الفيتا , بس طبعاً ما في داعي تضيفي ملح لان الفيتا مالحة و خالصة

بالصحة و الهنا

-المقادير:

1 كغ قريشة
2 ملعقة صغيرة ملح
1 ملعقة كبيرة زعتر ناشف مطحون
2 ملعقة كبيرة فليفلة حمراء مطحونة متوسطة الحر
1 ملعقة صغيرة حبة بركة

للتغطية :
زعتر ناشف مطحون
فليفلة حمراء مطحونة
- طريقة التحضير :

1- توضع القريشة في قماش رقيق , تجمع أطراف القماش مثل الصرة و يضغط عليها جيداً باليدين لاستخراج الماء من القريشة .

2- توضع القريشة في وعاء عميق و تخلط مع الملح و الزعتر و الفليفلة و حبة البركة , تزاد كمية الملح حسب الرغبة .

3- تشكل القريشة على هيئة كرات بالحجم المفضل لديك , تغمس بالزعتر أو الفليفلة . ( أنا أفضل الكرات المغمسة بالزعتر .

4- توضع كرات الشنكليش على صينية مغطاة بقماش رقيق لامتصاص الرطوبة , توضع في مكان فيه هواء لبضعة أيام حتى تجف , احتاجت حوالي 5 أيام . في حال كان الجو عندك حاراً يفضل وضعها في البراد حتى تجف .

5 - تقدم مع البندورة المفرومة و زيت الزيتون و الخبز الطازج .

ملاحظة :

لحفظ السوركة إما أن ترتب في مرطبان زجاجي و تغمر بالزيت أو تلف كل كرة بالنايلون الغذائي مثل البون بون و تحفظ في الفريزر .

التعليقات

  1. Haya 20 April 2014

    يسلموا ليديك يا اخت منى انا من عشاق الشنكليش ودائما بشتريه جاهز بس هيث صار فيني أعمله بالبيت الطريقة كثير سهله وبيكون أنظف من الجاهز ،، بس سؤالي شو هو القريشة ؟

    • منى 20 April 2014

      هلا هيا و بعد زماان :)
      ان شا الله بتجربيه و بيكون متل الي بتشتريه و اطيب ..

      القريشة هي الي بتبقى من الحليب بعد ما يطالعوا منه الزبدة , إذا مو متوفرة عندك فيكي تحضري الوصفة بالريكوتا

      http://l2ma.com/%D8%AA%D8%AD%D8%B6%D9%8A%D8%B1-%D8%A7…/…

      ايا سؤال تاني من عيوني يا قمر

  2. Farah 20 April 2014

    اول شي يسلم ايديكن انت و سها عالوصفة اليوم عاملة البحث شغلتي و عملتي بالموقع و قررت جرب تلت وصفات جديدة لفتت نظري و هلق هي انضافت عليهن ان شا الله سؤالي بصير استعمل ريكوتا بدال القريشة و لا شو اعمل مابعرف وين رح لاقي قريشة ولا اعملها بالبيت افرط حليب بالخل و صفيه؟ و يسلم ايديك مرة تانية عكتير وصفات عملتا و كلهن بيطيروا العقل الحمد لله عنعمه

    • منى 21 April 2014

      منورة يا فرح مية اهلا و سهلا فيك :)
      اي طبعا بيصير تجربيها بالريكوتا , بتطلع روعة و انا بنصحك تحضري هل الطريقة

      http://l2ma.com/%D8%AA%D8%AD%D8%B6%D9%8A%D8%B1-%D8%A7%D9%84%D8%B1%D9%8A%D9%83%D9%88%D8%AA%D8%A7-%D9%81%D9%8A-%D8%A7%D9%84%D8%A8%D9%8A%D8%AA/#.U1QsDKL4JnA

      رح استنى رايك بعد التجربة , و منورة يا جميل

      • Farah 21 April 2014

        تسلم ايديك عوصفة القريشةوان شا الله رح ارجع اكتب النتيجة طلعلي سؤال تاني مكتوب انو فينا نستفيد من المصل لتحضير عجين متل شو العجين بالعادة حدسي الطبخي‎;)‎‎;)‎ بيدلني بس هالمرة ما مشي الحال باعتباري مو كتير شاطرة بالمعجنات

        بالنسبة لسؤال الصبية فرح ٢ القماشة بتتلقى بالسوبر ماركت بقسم ادوات المطبخ شفت منهااسما بالانكليزي قماشة الجبنة‎;)‎ cheese cloth

        • منى 21 April 2014

          اي انا كنت استعمل المصل لتحضير عجينة فطاير , ايا عجينة عندك ممكن تحضريها , تستبدلي السائل بالمصل الي بيطلع , بيقولوا كتير اله فوائد :)
          شكرا كتير للاضافة مشان القماشة , ممنونتك

  3. farah 20 April 2014

    تسلم ايديكي منى اكيد بدي جربها و بالريكوتا بس احزري شو ….
    بدي لاقي هالقماش الرقيق لهالتجربة ….

    • منى 21 April 2014

      قصدك ما في من هل القماشة ؟
      فيكي تستعملي قميص قطن عتيق :)

  4. نورطعمة 21 April 2014

    الله يسلم هالايدين يامنى الشنمليش من الاكلات يلي بحبون كتيرعالفطور.وهي الوصفة رائعة بهالغربة.شكرا الك كتير

    • منى 21 April 2014

      اي و الله نور اطيب اكلة ع الفطور و العشا , و حتى ع الغدا :)
      شكرا الك لرد و تواجدك , منورة

  5. منال 21 April 2014

    سلام عليكم كيفك ست منى اشتقنالك بعد زمان السوركي من الاكلات الي بعشقهابس عندي سؤال لو سمحتي قلت القريشة الي بتطلع من الزبدة قصدك بالتعبير السوري تبعنا امباريص لانو القريشة عنا الي بتطلع من مصل الجبنه ممكن اعرف انو بتقصدي وسؤال تاني لو سمحتي في ناس بتحط جوزة الطيب وهيل ومحلب بالاضافة للي بتحطيهم شو رايك

    • منى 21 April 2014

      و عليكم السلام منال :)
      و انا كمان اشتقتلك , بعد زمااان
      القريشة المطلوبة هي الي بتبقى من الزبدة , ما بعرف انو الها اسم تاني .

      لا لا شو محلب و هيل و جوزة الطيب , ابدا هل الاضافات مو من الوصفة , , ممكن يطلعوا طيبين , بس مو شنكليش

  6. ياسمين 22 April 2014

    الهي مولاي و جاهي يرضى عليكي يا منى و يعطيكي ليرضيك و يسر خاطرك و بالك

    • منى 22 April 2014

      خليلي قلبك ياسمين ع هل الدعوة الغالية الكريمة

  7. الساجدة لله وحده 23 April 2014

    ست منى ان حبيت اعمل القريشة بالبيت قديش بدي افرط كم كيلو حليب حتى يطلع كيلو قريشة ؟؟؟؟

    • منى 24 April 2014

      تثريبا كل كيلو حليب بيعطيك من 250 ل 300 غ قريشة , بس الافضل تفرطي لبن لحتى تطلع معك الوصفة تمام :9

  8. رانو 26 April 2014

    يسلمو كتييير يامنى …كتير مشتهية اعملا …بس لتخلص عندي السوركة اللي جابوها اهلي وقت اجو لعندي من سورية. :( بورح صورا ان شاء اله وحطا عالكرو …بس علمينا طريقة التصوير ..ماشاالله عليكي فنانة بكلشي

    • منى 26 April 2014

      ان شا الله رانو , رح استنى رايك و صورك يا جميل :)

      التصوير اله سر واحد و مهم , هو التصوير ع الضو الطبيعي , و كمان كل ما صورتي اكتر بتصير صورك أحلى ,. الله يجبر بخاطرك يا عسل

  9. Farah 29 April 2014

    مرحبا عن جديد يا ستي عملت الوصفة اليوم و من كتر مو طيبة ماقدرت استنى اكلت منها شوي قبل ما نشفا.يسلم ايديك و يجزيك الخير عنا صار صالعت كذا وصفة هل الفترة. سؤالي انو اذا بدنا نعملا بالفيتا كمان منستناها لتنشف؟؟ و شو اطيب نوع فيتا جربتيه؟؟ لانو لحد الان ما عم ارسى عنوع معين عبتمنى لاقي شي بيشبه اللي كنا ناكلها بالسلطة بمطاعم حلب ما عم لاقي

    • منى 29 April 2014

      هلا فرح , ريتو الف صحة و هنا ع قلبك و الشكر الاصلي لصاحبة الوصفة سها .

      و الله انا عبجيب الفيتا مو ماركة معينة , بدوق و بشتري و حسب التيسير و اكيد بدها تنشيف , بس مو كتير

      ايا سؤال تني من عيوني :)

  10. Farah 30 April 2014

    تسلم عيونك و ايديك و جزاك الله عنا كل خير عبالي انزل كم وصفة نباتية ان شا الله رح ابعتن قريبا بالنسبة للفيتا ما جربت اخدها مو مغلفة لذلك باخد حسبي رب العالمين و بخلص العلبةو بجرب غير نوع و هكذا

  11. رانو 25 May 2014

    كيفك منى …جبت لبن وفرطته بس ما مسك وماتكور معي …طبعا صبيته بقماشة وصفيته وحطيتله كلشي بس بقي فراطة ..شو اعمل ؟؟وين الغلط :( ؟؟

    • منى 25 May 2014

      اهلين رانو :)
      مممممممم عبفكر بس ما عبلاقي سبب لحتى ما يتجمع اللبن و خصوصيانو عبتقولي نشفتيه منيح ، طيب جربي حطي الفرط بمحضرة طعام لحتى يصير انعم بلكي بتنحل المشكلة

  12. رانو 24 June 2014

    عرفت السبب :) في وحدة كانت كاتبة عالكروب انو بتستعمل لبن القليل الدسم ..بس طلع الدسم هو اللي بيمسكه ..حطيتله شوية زيت ومشي حاله …بس الشي المهم اللي بدي اقلك ياه انو علمته لجارتي ..وطبعا كل شغلة بتعلما منك بدوقا لجارتي وبتقلي أكيد من منى .. وجارتي عملته وهي من جسر الشغور فضافتله اضافات كتييير حبيتا ..وعملت منه سلطة بصل وبندورة وهدول الشنكليشات .وهي اسما السلطة اللبنانية ..وطلعت يمممممممي الاضافات هي رشة صغيرة محلب وملعقة شمرا ويانسون مطحونين بالاضافة للزعتر والفليفلة شو رأيك :)

    • منى 25 June 2014

      مممممم راي انو كتير حبيتهن , هي ضافتهن للتبلة ؟ و المعلقة صغيرة و الا كبيرة ؟
      و شكرا كتير للمعلومة تبعة الحليب و كمان السلطة

      و صحتين و عافية ع الشنكليشلت :)

  13. رانو 26 June 2014

    الملاعق صغار ..هنن نكهة بسيطة بس لذيذة ..ونسيت اقلك انو حطت كمان بدال الفليفلة دبس فليفلة

    • منى 26 June 2014

      مممممم روعة , ع التجربة القريبة جداً ان شا الله , شكرا كتير رانو ع الفكرة

  14. hadule 30 June 2014

    يعطيكي الف عافية ست منى.. و انا كمان ضفت شمرا للتبلة و يانسون و كزبرة يابسة و شوي كمون طلعت روعة.. بس حابة اعرف ممكن اعملة كمان بل جبنة الفيتا و كيف؟ شكراا

    • منى 30 June 2014

      اهلا هدولة :)
      مممممم , ان شا الله اول ما يخلص رمضان رح جربها فورا , شكرا لاغناء الوصفة ..

      اذا حابة تحضريها بالفيتا تبلي الفيتا من دون تنشيف و كوريها و بعدها تابعي الوصفة متل مو مذكورة فوق, هلا ما رح تطلع شنكليش شنكليش, بس كتيررر طيبة

  15. هدولة 30 June 2014

    فهمت عليكي.. رح جربها نوع من التنوع.. سؤل تاني حبيبتي هلئ انا ساويت الشنكليش بلبن كامل الدسم.. و مو مجربتو بلقريشة بقى السؤال بس شو افضل و اقرب للشنكليش البن ولا القريشة؟ يسلمو كتير على جوابك

    • منى 1 July 2014

      الاصول انهن بيفرطوا لبن و بيعملوا منه الشنكليش
      انا بحبها بالقريشة اكتر لان ما بحب الحامض الزيادة :)

تقييم الوصفة
عاديةقد أحضرهاجيدةممتازةأكثر من رائعة (4 votes, average: 5.00 out of 5)