فريكة باللحمة


         وصفة : منى                 2007/12/26                 14 تعليقات

آخر تصويت


آخر تعليق

فريكة باللحمة

فريكة بلحمة ملكة العزايم , ملكة السفرة , و الأحلى من هيك أنو تحضيرها من أسهل الوصفات , لو حضرتيها ع طريقتي , من أول مرة رح تشوفي اديه ناجحة و زابطة معك , مفلفلة و مبهرة و طعمتها و لا أروع .
أول سر من أسرار تحضير الفريكة أنها ما بتنغسل , لأن طيابة الفريكة بنكهة التشويط , و وقت نغسلها بتروح كل الطعمة و بتصير الفريكة بتزعل :(
لهيك اختيار الفريكة كتير مهم , لازم نختار الحبات الي لونها أخضر غامق و تكون الحبات مو مكسرة , و ريحتها قوية و بتذكرك بريحة الأرض , و تكون نضيفة ما فيها عيدان أو حجر . و قبل الاستخدام بتحطيها ع طبق كبير مدور و اله حرف , متل صينية مثلاً , و بتنسفيها , لحتى إذا في شي ناعم أو عواد بيعودوا بيطيروا .
السر التاني , اتعلمته ماما من واحدة من بنات العشاير , بتعرفوا أهل العشاير مشهوريين بمناسف الفريكة العرمرمية , , و السر ما في أسهل منه , بس هو الي بيعمل كل الفرق , بعد ما تنسفي الفريكة و تحطيها بطنجرة الطبخ بتفركيها بالدهنة و السمنة شوي , و بتخليها ع جنب شي ربع ساعة , هل الفركة رح تخلي الفريكة مفلفلة و طعمتها و لا أروع .
السر التالت بقى أنو لازم ننقع الفريكة بمرقة اللحمة , يعني أنا طابخة 3 كاسات فريكة مثلا , نسفتها و فركتها بالدهنة و السمنة و خليتها ع جنب شي ربع ساعة , هلا بنقعها بش كاستين من مرق سلق اللحمة و بخليها ع جنب لترتاح و تشرب كل المرقة , و بهل المرحلة بضيف البهارات , و بس
خلصت طبخة الفريكة و لو تشوفي كيف رح تطلع معك ما بتعودي تحضريها الا بهي الطريقة ..
إذا عندك طنجرة ضغط فيك تستعمليها لطبخة الفريكة
بالصحة و الهنا

-المقادير:

3 كوب فريكة
4 و نصف كوب مرق
3 ملعقة كبيرة سمنة ( يفضل استعمال سمنة بلدية أو مزيج من السمنة العادية و البلدية )
كيلو لحمة غنم مقطعة لقطع كبيرة نوعا ما
ملعقة صغيرة بهار مشكل ( أو أقل حسب الرغبة )


للتقديم :

ربع كيلو أو أقل لحمة مفرومة ناعماً
القليل من السمنة
رشة بهار
كوب أو كوبان من الأرز المصري
مكسرات حسب الرغبة ( كاجو , لوز مقشور , فستق , صنوبر )
زيت عادي لتحميص المكسرات

الباقة العطرية :

3 ورقات غار
8 – 10 حبات هال صحيحة
حبات فلفل أسود و فلفل حلو
حبة جوزة الطيب
حبات صحيحة قرنفل
- طريقة التحضير :

طبخ الفريكة :


• تذوب ملعقة و نصف من السمنة على نار متوسطة إلى قوية في طنجرة الضغط ثم تضاف قطع اللحمة و تقلب حتى يختفي اللون الأحمر و يجف مرقها تماماً .

• تغمر اللحمة بالماء المغلي و تضاف الباقة العطرية ثم تغطى الطنجرة و تضغط و تترك اللحمة حتى تنضج و ذلك حسب حجم قطع اللحمة .

• يضاف الملح و تترك اللحمة لتغلي لبضع دقائق اضافية كي تمتص الملح ثم تصفى قطع اللحم من المرق و تقاس الكمية اللازمة من المرق و تعاد المرقة لطنجرة الضغط و تترك حتى تغلي مجدداً .

• تضاف الفريكة و باقي السمنة و البهار و تترك حتى تغلي المرقة مع الفريكة ثم تضغط الطنجرة و تترك حتى سماع شارة الضغط .

• بعد سماع الشارة تهدى النار و تترك الفريكة لمدة نصف ساعة تقريباً أو أقل بقليل بعدها تبعد الطنجرة عن النار و تترك مغطاة لمدة نصف ساعة أو ساعة حتى تتفلفل حبات الفريكة و يمكن تحضير الفريكة قبل ساعتين أو ثلاثة ساعات من موعد التقديم و تترك مغطاة في طنجرة الضغط لتحتفظ بالحرارة .

تطبيق الفريكة و طريقة التقديم :


• يطبخ الأرز بشكل عادي ثم يترك مغطى لمدة ربع ساعة كي تتفلفل حباته .

• تحمص المكسرات كل على حدة بالقليل من الزيت و يجب رفع المكسرات من الزيت قبل الوصول للون المطلوب لأنها ستغمق قليلاً بعد رفعها عن النار .

• تقلى اللحمة المفرومة بالسمنة و تتبل بالبهار و الملح و تترك حتى تنضج و يجف مرقها تماماً .

• تسكب الفريكة في طبق كبير ثم تغطى بالرز ثم اللحمة المفرومة ناعماً ثم ترتب قطع اللحمة المسلوقة و أخيراً تنثر المكسرات فوقها .

• تقدم الفريكة فوراً مع اللبن العيران أو السلطة و المخللات حسب الرغبة .


تنويعات و ملاحظات :


• إذا لم تتوفر طنجرة الضغط يمكن طبخ الفريكة بطنجرة عادية , لكل كوب فريكة يضاف كوبان و نصف مرقة أو أقل بقليل , تترك حتى تغلي ثم تضاف الفريكة و بعد أن تغلي مجدداً تغطى بورق ألمنيوم بشكل محكم و تترك حتى تنضج الفريكة , لا تحرك الفريكة أبداً أثناء طبخها .

• في حلب لا تغسل الفريكة أو تنقع قبل طبخها , و إلا بتروح طعمة التشويط على قولة أمي , و لكن أنا أغسل الفريكة قبل طبخها و ذلك أمر عائد لرغبتك .

• بعض ستات البيوت تحمص الفريكة بالسمنة لبضع دقائق قبل اضافة المرق المغلي .

• يمكن تحضير الفريكة بالدجاج عوضاً عن اللحمة بنفس الطريقة و نفس الخطوات , بعد سلق الدجاج يقطع و يوضع على وجه الفريكة .








التعليقات

  1. nidaa84 30 December 2007

    والله الله يسلم هل الايدين على هل فريكة بتشهى بس اول مرة بسمع انه طبخ الفريكة بطنجرة الضغط والله فرجة انشالله المرة القادمة بدى اعملها بطنجرة الضغط الف الف شكر على هل وصفات

  2. منى 30 December 2007

    هلا فيك نهال :)

    عن جد لو تجربيها و بتشوفي ما أسهلها و أطيبها ..

    أصلا أنا بحضر فريكة كل ما بكون ما عندي وقت إلا لطبخه سريعة ;)

  3. Eman 30 December 2007

    السلام عليكم،كل سنة وأنتم سالمين.

    يسلمو أخت منى على طريقة طبخ الفريكة المبتكرة ،وأشكرك على استجابتك السريعة.

  4. منى 31 December 2007

    هلا ايمان :)
    ان شاء الله تجربيها و تكون على زوءك أختي ;)

    مية أهلا و سهلا

  5. ام نور 31 December 2007

    شو شهييتوني على صحن :p انا كتير بحب لفريكة اكلة مفيدة ومميزة بس مع الاسف غير متوفرة في محلات العرب في فرنسا وخلصت مونة :(

  6. منى 31 December 2007

    واااخ :sigh

    لو بقدركنت بعتلك هلا صحن سخن مع سلطة خيار بلبن غيرر شكل ;)

    يلا ان شاء الله لما بترجعي للبنان بتموني و تجربي هل الطريقة يا عسل :)

  7. بطبوطه 22 January 2008

    اشكرك على الوصفه. لاني من عشاق الفريكه بجميع انواعها واسعر انها اسهل الحبوب هضما للمعده

    ولقد اشتركت بهذا الموقع لاشكرك على الوصفات الحلبيه التي اعشقها ولا اجد فرص كثيره لاكلها

  8. منى 22 January 2008

    مية أهلا و سهلا فيك أختي أخت كريمة و جديدة معنا في الموقع :)

    الله يخليك يا رب و الشكر ليك على ردك الجميل ;)

  9. Eman 9 March 2008

    البارحة عملت فريكة بلحمة،وطلعت الحمد لله رائعة بطريقتك،ما شاء الله عليك فنانة بكل الأكلات. ;)
    كان زوجي طول اليوم عم يمدح بطبخي والفضل يعود لله، ثم لك حبيبتي. :)
    خطرتلي أكلة تانية،شو رأيك بالعجور بفريكة؟عندي كوسا وحابة أعمل منه شوي برز، وشوي بفريكة،كم كاسة فريكة بحط لكيلو كوسا؟ :?

  10. منى 10 March 2008

    صحة و هنا يا رب أمولة :) كلك زووء و الله حبيبتي

    العجور غير الكوسا أمولة والكوسا ما بينطبخ بالفريكة لحالها أبدا , شو بيفرط قبل ما تستوي الفريكة :roll

    بس إذا بتحبي ممكن تعملي نفس طريقة محشي كوسا باللبن و الحشوة تحطيها نصفها فريكة و نصفها رز و بيطلع كتير طيب :)

    رح نزل لك طريقة العجور التمام إذا الله راد , هلأ انا ما بعرف شو اسم العجور بالانكليزي , عرفت سؤالك من قبل ما تسأليني :grin

  11. haya 8 November 2008

    تسلم ايدك اخت منى على هالطريقة والله طلعت ممتازة وكثير زاكية انا كنت بعملها بس كانت اما انها ماتستوي الفريكة معي او انو يطلع عليها ماء كثير بس لما جربت طريقتك عن جد كثير زاكية شكرا لك وتسلم ايديك على هالوصفات الرائعة والمقادير الدقيقة

  12. منى 8 November 2008

    مية هلا هيا :)
    كتير انبسطت انها ظبطت معك و عجبتك , و الكلام هادا بس من زووءك و لطفك ام جودي :) بوسات لجودي الحلوة

  13. ام عبدو 15 February 2009

    يسلمو إيديك عهالوصفة يا ست منى أنا جديدة عالموقع الرائع والمفيد
    الله يعطيك ألف عافية يارب

  14. منى 15 February 2009

    هلا ام عبدو :)
    نورتي أختي و ان شاء الله تبقى معنا دايما و تستفيدي وتجربي وصفات و تعجبك :zzz

    مية اهلا و سهلا اختي

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)