كبة مقلية بدون هبرة


         وصفة : منى                 2013/12/25                 20 تعليقات
كبة مقلية بدون هبرة

كتير اشيا ما عادت متوفرة متل قبل , او بالاحرى قليل من الاشيا الي صارت متوفرة متل قبل , بس نحنا قدها و قدود , دوما عنا حلول للمشاكل الي بتصير .

المعبر مسكر و ما في هبرة , الكهربا مقطوعة و ما في ماكينة كبة , معنا ما في يأس و كل شغلى إلها حلة و دوبارة , و هل الوصفة سميناها في البيت كبة الحصار , لان جكارة بالي عم يحاصرنا و الي عم يقطع علينا الكهربا نحنا ااقوى منكن انتو الاتنين و نحنا أهل البلد بقيانين هون و انتو رايحيين ..

بالصحة و الهنا

شو لازمنا ؟
عجينة الكبة :

2 كوب برغل أبيض ناعم
1 كوب ماء
1 كوب طحين
ملعقة صغيرة ملح , كمون
ربع ملعقة صغيرة فلفل أسود مطحون طازج

الحشوة :

2 ملعقة كبيرة زيت
1 حبة متوسطة بصل , مفروم ناعماً جداً
350 غ لحمة غنم , مفرومة
نصف ملعقة صغيرة بهار
ربع ملعقة صغيرة قرفة و ملح
نصف كوب جوز , مفروم
طريقة التحضير

1 – تحضر عجينة الكبة : يغسل البرغل جيداً على مصفاة ناعمة و يوضع في وعاء , يضاف الملح و الفلفل الأسود و الكمون و كوب من الماء البارد و يدعك باليد جيداً ثم يترك جانباً حتى يطرى البرغل و يمتص الماء و ينفش . يضاف الطحين و تدعك الكبة حتى تصبح حبة البرغل ناعمة تحت يدنا أثناء الدعك , و يضاف القليل من الماء إذا دعت الحاجة .

2 – تحضر الحشوة : يقلب البصل بالزيت حتى يصفر , تضاف اللحمة و تتبل بالملح و البهار و القرفة و تقلب على نار قوية حتى تنضج و يجف مرقها . تترك جانباً حتى تبرد ثم يضاف الجوز .

3 - تقطع عجينة الكبة إلى كرات أصغر بقليل من حجم حبة الجوز . تبلل اليدان بخفة بالماء البارد , تمسك أول كرة باليد اليسرى و ترق باستخدام سبابة اليد اليمنى حتى الحصول على تجويف صغير, تحشى بحشوة اللحمة و الجوز ثم تسد الفجوة . تصف القطع المجهزة على صينية كبيرة مغطاة بورق نايلون .

4 – توضع الكبة في الفريزر لمدة ساعتين , تقلى على نار متوسطة الى قوية حتى تشقر , ترع على ورق ماص و تقدم مع المخللات و السلطة حسب الرغبة .

التعليقات

  1. أم نوران 25 December 2013

    الله ينور عليكي يا منى من نوره اولا و بالكهربا تانيا انتي وكل اهل حلب الصامدين.
    شو كنت مشتهية هيك وصفة خصوصي وانو كل ما بدي اعمل كبة بشحد الماكينة من حماتي هههه بس هلأ صار فيني ساويها ببيتي و لحالي :)
    جزاك الله خيرا يا منى ,بس استفسار بسيط بصراحة ما قهمت طريقة الدعك يعني متل العجن ولا شلون ؟؟

    • منى 25 December 2013

      امين ام نوران يا ام العسلات , ان شا الله بتجربيها و تكون على زوءك و متل ما بتحبي

      مندعكها متل وقت مندعك الكبة تبعة الهبرة بشكل عادي , تحت الكف مو عجن , هيك لحتى تطرى حبات البرغل , و ما بتاخد وقت يا دوب كم دقيقة

      ايا سؤال تاني من عيوني

  2. omomara 10 June 2014

    ياااااااااي عن جد شكرا كتيييير وتسلمي على هالوصفة..
    صار لي بهالبلد قريب 3 سنين ما عملت فيهم كبة إلا بعد ما شفت هالوصفة
    وبالبداية كنت متوقعة انو ما تنجح وانو مو معقول تصير الكبة بدون هبرة ، وحتى لو نجحت رح تكون ما طيبة..
    بس وقت عملتها طلعت شي غراااام ،، صح الطعمة مختلفة شوي صغيرة بس طيبة طيبة

    ايه ياحلوة عندي سؤالين صغار
    أول شي بتصير بالبرغل الناعم الأسمر ؟؟
    ما متوفر عندي أبيض ناعم عندي بس خشن وخوفا من فشل المغامرة وعدم نجاح الكبة إذا عملتها بالبرغل الأسمر فشو عملت؟؟
    حطيت البرغل الأبيض الخشن بالخلاط قبل ما أغسله وطحنته شوي لوقت شفت الحبات تكسروا وصغروا شوي قمت وقفت وكملت الشغل حسب الوصفة ..

    هذا السؤال الأول ،، والثاني
    بصير بعد عملت العجينة أشكل الأقراص بالقالب ؟؟
    أو أديرها بالماكينة وأستخدم العصاية المعروفة تبعت الكبة ؟؟
    والا ما رح تنجح ، هي الوصفة مفصلة خصيصا للظروف السورية الحالية !!
    الله يفرجها من عنده يارب

    وتسلم ايديك مرة تانية
    ودمت بخير

    • منى 8 July 2014

      الله يسلمك ام عمارة الغالية ، ان شا الله مليون عافية و صحة يا رب و كتير مبسوطة انها زبطت معك و كانت ع زوءك

      بالنسبة للاسئلة أنا مو مجربتها بالبرغل الاسمر و لا مرة ، ما بعرف اذا بتزبط فيه ، بس حابة جربها فيه شي مرة , بس فكرتك عبقرية ، براافو عليك :)

      بالنسبة للسؤال التاني لازم تصير ع الماكينة ، انا كمان مو مجربتها ، بس نظريا بتزبط

      الله يسلمك و يخليك و يحفظك و ممنونة كتير تواجدك الطيب في الموقع

  3. سوزان 25 June 2014

    سلامات منى.. الله يعطيكي العافية يارب.. وصفة بتشهي وانا بحبها اكتر من يلي بينحط فيها هبرة.. انا بالغربة كتير قليل لاقي هبرة تماما بدون دهنة مشان هيك كنت دائما اعمل الكبة المقلية بس برغل.. استعمل انعم نوع برغل وبمحضرة الطعام تمسك ومأحلاها..انا بحطلها شوية دبس فليلفلة بيجي شغل سوريا كمان بس بسبب الظروف صرت لف المحلات عليه ومالاقي.. مشكورة كتير على هالموقع لمرتب والاحترافي..

    • منى 26 June 2014

      صحتين و الف عافية سوزان , حبيت الدبس فليفلة معها

      شكرا كتير على التعليق الحلو و الاضافة للوصفة :)

  4. ORUBA 3 July 2014

    ست منى رح جربهاا اليوم … ان شاء الله تنجح معي ورح خبرك بالنتيجة
    بس ضروري وضعها بالفريزة قبل القلي ؟؟

    • منى 4 July 2014

      ان شا الله بتنجح و بتكون ع زوءك :)
      اي الافضل لحتى تمسك ، لا تختصري و لا خطوة و ان شا الله بتزبط معك تمام

  5. ORUBA 4 July 2014

    ياستي جربتها و طلعت طيبة كتير
    جربت حطيت قطعة وحدة بالفريزة و بعد كم ساعة قليتها و قليت من اللي مو محطوطين بالفريزة طلعو نفس الشي ولا فرطت و لا صرلها شي
    ممممم يمي
    يسلم ايديكي عالوصفة ^_^

    • منى 8 July 2014

      يا سلاام ان شا الله الف صحة و هنا و عافية ع قلبك يا حق , شكرا ع الاضافة :)

  6. omomara 9 July 2014

    تسلمي يارب وشكرا جزيلا
    والله يحفظك ويحميك من العين

    • منى 10 July 2014

      الله يخليك يا قمر ، شكرا الك :)

  7. أم محمد 12 July 2014

    حزاكي الله خيرا
    عمات الخطوات و بدقة وحطيتا في الفريزر لعدة أيام وطالعتا من الفريزر وقليتها مباشرة
    ولكن طلعت قاسية جداً ولا تؤكل
    وين الغلط ؟

    • منى 12 July 2014

      أهلا و سهلا ام محمد :)
      أكيد زدتي عليها كتير بالقلي ، المفروض تطلع عبتقرش قرش بس مو قاسية ، يا ترى قليتيها كتير لحتى تتأكدي انو التلج فك عنها ؟

  8. rania 15 September 2014

    رائعة منى رائعة بكل شي بتعمليه

    • منى 28 September 2014

      شكرا رانية ، ام الزوق و اللطف
      نورتي :)

  9. هلا عربي 24 November 2015

    مرحبا منى كيفك… تسلم دياتك عالوصفة رح جربها نشالله لانو ما عندي لا ماكينة ولا هبرا :)

    بس سؤال يا ترى فيني أعمل فيا باقي أنواع الكبب.. متل كبة صينية؟ أو كبة دراويش مشان لبنية او سفرجلية؟

    • منى 25 November 2015

      اهلا هلا نورتي .
      مالي مجربة فيها غير الكبة المقلية ، ما فيني اقلك اي او لأ .. جربي كمية صغيرة اذا بتحبي وخبريني .
      عوافي مقدما

  10. اية عباسي 17 March 2016

    حبيبتي متى تسلم ايديكي.

    بدي اسألك مع العجينة ما بينحط بصلة صغيرة؟
    يعني بالكبة بشكل عام قصدي…… واللا مو موجودة بهالوصفة بس
    شكرا الك

    • منى 22 March 2016

      مرحبا :)
      بالكبة في ، بس لهي الوصفة ما حطيت لان هي بتتحضر على السريع

تقييم الوصفة
عاديةقد أحضرهاجيدةممتازةأكثر من رائعة (17 votes, average: 4.12 out of 5)