كرات اللبنة بزيت الزيتون ( اللبنة المكبوسة )


         وصفة : منى                 2007/06/09                 39 تعليقات
كرات اللبنة بزيت الزيتون ( اللبنة المكبوسة )
كيلو و نصف لبن غنم أو بقر ( زبادي )
ملح حسب الحاجة
حبة بركة ( اختياري )
• توضع قماشة بيضاء رقيقةعلى مصفاة ناعمة , يصب اللبن عليها و يغطى بباقي القماش و يوضع في البراد لمدة يوم كامل , بعد بضعة ساعات يغطى القماش بطبق و يوضع عليه ثقل خفيف للتأكد من تصفية اللبن من الماء بشكل جيد .








• يوضع اللبن المصفى في وعاء مسطح و يضاف الملح و حبة البركة حسب الرغبة , تقلب بلطف حتى تتوزع حبة البركة في كل اللبن , الكمية حسب الرغبة , انا أحب أن تكون الكمية كبيرة لذا اضيف حوالي نصف ملعقة كبيرة .

• تغطى صينية مسطحة بقماش قطني رقيق , باستخدام ملعقة كبيرة يؤخذ مقدار من اللبن ويضع على القماشة الرقيقة بحيث تكون القطع جنب بعضها البعض , تكرر العملية حتى انتهاء كل الكمية . يغطى اللبن بقماشة أخرى و توضع في البراد لمدة يوم أو أكثر حتى يجف اللبن تماما و يصبح بقوام جامدجداً . تشكل قطع اللبن لكرات و تغطى بالقماش و تترك لمدة 12 ساعة اخرى .








• يملىء ربع مرطبان زجاجي بزيت الزيتون , تصف كرات اللبن في المرطبان ثم تغمر بزيت الزيتون حتى تتغطى تماماً. هذه الكمية تكفي لمرطبان واحد من الحجم المتوسط الظاهر بالصورة . .

• تترك اللبنة في زيت الزيتون لمدة يوميين تصبح بعدها جاهزة , تقدم على الافطار او العشاء مع الخبز العربي و قطع البندورة و الخيار . .
  • وصفات تانية ممكن تعجبك


التعليقات

  1. ام نور 1 December 2007

    اخت منى معناها كتير سهلة هاللبنة لان انا كنت جيبة معي من لبنان كانت امي تعمل الكور وتشمسون عالسطح ويصيروا ناشفين تماما ولما اوصل على فرنسا اضعهم بمرطبان واضيف فوقهم الزيت :sigh طريقتك ما بدا تشميس وممكن اعملا هون وفي اي وقت اريد لان اللبن هون ما بيتغير نفس النوعية صيف ولا شتي ونوعية ممتازة فشو رايك بجرب بهذه الاوقات على طريقتك :?

  2. منى 1 December 2007

    هلا ام نور :)

    جربيها و على ضمانتي ان شاء الله

    من زمان كنا نشفها بالشمس ..

    بس كمان من زمان ما عدنا نشفناها غير هيك

    جربيها و ان شاء الله تكون من لبنة ماماتك :)

  3. ام نور 7 December 2007

    اخت منى انا عم صفي اللبن وانشالله غدا رح اعملو كرات بدي اسال ممكن استبدل زيت الزيتون بزيت المازولا :? وكمان لما بعمل الكور بغطسون بالزعتر وبعدين اضعهم في الزيت ولا عند الاكل بشيلون من الزيت واغطسهم بالزعتر :? عم عذبك باسالتي بس هيدي اول مرة بجربها لان

  4. منى 8 December 2007

    مية أهلا و سهلا أم نور :)

    أختي أنا و لا مرة ما جربت حضره بغير زيت الزيتون :roll
    أكيد الطعمة أطيب بزيت الزيتون ..
    مع ان العلب الجاهزة الي ممكن الواحد يلاقيها بالسوق بتكون كلها مغمورة بزيت عادي .

    لما بيكون عندي زعتر أخضر , بنقيه و بشيل منه العود و بعدها بغمس كرات اللبنة فيه , بهيك رح يتخلل الزعتر الأخضر بالزيت و رح تاخد اللبنة من طعمته
    بس اذا مو متعودة على هل الطعمة بيصير ما تحبيها

    الله يخليك ام نور , لا بقى تقولي عم تعزبيني , اختي انت بتامري أمر و أي سؤال أنا بخدمتك أختي
    ;)

  5. ام نور 11 December 2007

    اختي بدي اسالك سؤال انا عملت اللبنة وحطيتون بمرطبان وحطيت علي زيت ولا اروع واسهل شغلا طلع بس لازم خلي المرطبان بالبراد ولا ما بيهم :? وبخلي مسكر اقل شي 10 ايام ولا ما بيهم فيني دوء كيف :?

  6. منى 11 December 2007

    هلا ام نور :)

    حبيبتي فيك تدوقي على كيفك و تفتحي المرطبان على كيفك و ما بدهم براد بس بشرط أن تكون الكرات كلها مغمورة بالزيت لحتى ما تعفن ..
    بس هي ما بتحمض مضبوط إلا لبعد شي اسبوع ;)

  7. ام نور 11 December 2007

    يعني لازم تحمض معناهاوفي حال حمضة طبيعي لان اكلت قطعة بتحسيا لبنة كتير جامدة فيا نكهة الزعتر ما خطرلي لازم تحمض

  8. منى 11 December 2007

    ما كتير فهمت عليك ام نور :roll

    بس المهم هي بدها شي اسبوع لتصير جاهزة , متل المكدوس كيف منتركه شي اسبوع ليصير حامض و جاهز للأكل ;)

  9. ام نور 13 December 2007

    الف شكر انا فهمت عليكي خلص صرلون 3 ايام رح انطر اسا 7 ايام وشوفون وبقلك كيف :p
    بدي اسالك انتو بحلب بتعملو شي اسمو شنكليش :? هاك بيسمو عنا ما بعرف شو بتسمو بسوريا

  10. منى 13 December 2007

    مسا الخير ام نور :)

    ان شاء الله بيصير و بيكون على زوءك :)

    الشنكليش هيك اسمه عنا بسوريا و هو بيعملوه أطيب الشي بالساحل عنا باللاذقية و مرة بجبلة دقت أطيب شنكليش بحياتي ..

    بس أنا ما بعرف اعمله :roll , مرة واحدة من جاراتي ببيتي القديم حكتلي انها بتعرف تعمله , بس لما سالتها عن طريقته صارت تتهرب و بالاخير فهمتني بأسلوب لطيف انها ما فيني تعلمني :(

  11. ام نور 14 December 2007

    مسا النور يا اختي
    غريب امر جارتك واذا علمتك شو بتخسر :x انا نانتي بتعملوا بس كمان كيف ما بعرف بس كتير شغلو صعب وما بيعملو الا الستات الكبار لان نوعو قديم بس طيب طيب مع زيت زيتون اصلي يممممممممممم

  12. منى 15 December 2007

    ما بعرف و الله ام نور :roll

    على فكرة في كتير ستات هيك , لما بيكون عندهم شي وصفة حلوة ما بيحبو يعلموا لحدا ..

    أنا كتير بحبوا لما بيكون على اصوله مع بندورة مفرومة و بصلة و زيت زيتووون كتير , يممم يممي

  13. ام نور 1 January 2008

    الله يمسيكي بانوار النبي يا اخت منى بدي اتشكرك على هالوصفة فعلا نجحت معي وطلعت شي بيشهي ورح ضل اعملا عطول انشالله بس المرة اقادمة رح اعمل شي 6 كيلو لبن لان 2 كيلو كتير قلال بدي اسالك ما بيهمون اذا ضلوا بالزيت مغمورين وقت طويل :? ولا الاحسن كل مرة اعمل 2 كيلو اضمن :?

  14. منى 2 January 2008

    لا بالعكس ام نور اعملي قد ما بدك :)

    انا كاتبة هون كمية قليلة بس لحتى إذا الواحد جاي على باله يجرب لحتى إذا ما كانت على زوءه ما يتورط بكمية كبيرة ;)

    صحتين و هنا يا رب :)

  15. بطبوطه 22 January 2008

    اعجبتني كثيرا … باذن الله سوف اقوم بتطبيقها لايوم بعد ان اشتري قماش لفعلها

  16. منى 22 January 2008

    هلا بطبوطة :)

    إن شاء الله تجربيها و تكون متل ما بتحبيها ;)

  17. Eman 14 February 2008

    حبيبة قلبي منى :)

    مابعرف شلون ماشفت هالوصفة من قبل، زعلت كتير لما لقيتهاهلأ بعد فوات الأوان :cry

    كنت كتير مشتهية أعمل لبنة على إيدي، وأنا مابعرف شلون بتنعمل ، بس بعرف لما تنشف المي تبعت اللبن بتصير لبنة،بس شلون بتنشف مابعرف.

    بلا طولة سيرة،جبت اللبنة وليفتها بشاش وحطيتها بمصفاية بالبراد ،بعدين انتظرت أسبوع ،ماصارت لبنة :sigh ،قام قال لي زوجي لأنها بالبراد، طالعيها لبرا بتصير لبنة بسرعة، ومن شوي وجدت الفاجعة :eek ، اللبن عفن :upset

    المهم ،عملتها هلأ بطريقتك ،بس حسيت الملح ظاهر ،مابعرف برأيك بيخف بعدين؟

    ولازم حطها بزيت ،ولا بصير أكلها بس صارت لبنة؟

    ولا مرة عملنا طريقة غمرها بالزيت ، بس إذا أطيب وأحسن بعملها،شو رأيك؟

  18. منى 14 February 2008

    هلا أمولة :)

    كله طيب ايمان اذا غمرتيها كتير طيبة و بتبقى معك أكتر من اللبنة العادية شي تلات أو اربع شهور , و اذا ما غمرتيها كتير طيبة ..

    الملح ما رح يخف و هي رح تكون شوي صغيرة مالحة لحتى تنحفظ منيح بالزيت :)

    أنا بحبها هيك و بحبها هيك , جربي مرطبان صغير بالزيت مو خسرانة شي , اكيدة رح يعجبك ;)

    على فكرة ما فهمت ليش ما ظبطت معك لما حطيتيها بالشاش بالبراد :roll

  19. Eman 14 February 2008

    شكرا لردك أختي .

    أعتقد ما ضبطت معي لأنو ماحطيتها بمصفاة ،وما حطيت ثقل فوقها ، والشاش حطيته على وجه اللبن بس ،وماحطيت ملح للبن، مشان هيك ما فقست المي من اللبن ، مو هيك؟ :roll

  20. kuwaiti_girl 15 February 2008

    سويت اللبنه وشلت جزء وخليته بالصحن مع زيت زيتون ونعنع والجزء الاخر كورته ووضعته بزيت الزيتون وناطره السواء

    بس حتى وهي بالصحن طعمتها لذييذه… وصار افطاري المفضل مع خبز السمسم

    وهنا الصورة

    [img]http://www.l2ma.com/images/stories/application/5.jpg[/img]

    واشكر الغاليه مس انجيل على تصغير الصور ووضع اسم الموقع فيه :)

  21. منى 16 February 2008

    يا كويتية شو هل اللبنة الطيبة هي :zzz شي بيشهي و لا أطيب منظرها..
    انا كتير بحب اللبنة متلك مع نعناع و فليلفة حمراء ناعمة و رشة كمون و غمسي بالخبز مع كاسة شاي سخنة … جعت هلأ :grin

    صحتين و هنا يا رب , و ان شاء مطرح ما بسري يمري

  22. منى 16 February 2008

    امولة ما عملتي شي صح بهل اللبنة :grin
    الملح مو ضروري من دون ما تحطيه بس ما حطيتي اللبن بمصفاية على مصفاية و فوقه تقل رح يمشي حاله ;)

  23. سارونات 23 February 2009

    السلام عليكم و رحمة الله و بركاته

    كتير عجبتني الفكرة و بهنيكي على طريقة التقديم بينو كانهم بيض في عش ما احلاهم
    بس بتاخذ كمية كتير كبيرة من زيت الزيتون يعني هي راح تتشربو او لا و بس يخلصو اللبنات شو منساوي بالزيت يعني فينا نستعملو للطبخ مثلا

    و لكم يوم فينا نحفظها بالبراد من غير زيت و منغطيها او لا لما ما منحطلها زيت

    بالتوفيق
    سلام

  24. منى 23 February 2009

    هلا أختي :)
    اللبنة ما رح تشرب الزيت , الزيت رح يغمرها و تعطيها من من نكهتة و كمان اللبنة رح تعطي الزيت من نكهتها .

    ما فيك تحضريها بلا زيت , الزيت ضروري لحتى يعطي للبنة طعمة حموضة خفيفة , و الباقي من الزيت فيك تستعمليه للسلطات , ما اطيب السلطة بتصير لمن تبليها فيه

  25. gsm 2 September 2009

    لك يسلموا إيديك يا منى شو هاد انا كتيير بحب اللبنة بالزيت انا دائما بعمل اللبنة بالبيت وبشفها بالشاش بس ما بصفيها كتيير لدرجة إنو تتكور معي وما بحطلها تقلة من شان هيك رح اجرب اعملها على طريقتك بس بلكي بعد ما ارجع من السفر وببقى بقلك شو صار معي يسلموا إيديك يا حلو

  26. منى 3 September 2009

    ان شاء الله بتجربيها و بتشوفي شو سهلة و ما بدها شي و رح تصير وصفة معتمدة عندك باذن الله :)
    تروحي و ترجعي بالسلامة ;)

  27. منى 3 September 2009

    ان شاء الله بتجربيها و بتشوفي شو سهلة و ما بدها شي و رح تصير وصفة معتمدة عندك باذن الله :)
    تروحي و ترجعي بالسلامة ;)

  28. gsm 8 October 2009

    السلام عليكم منونة انا من شوي دعبلت هل اللبنات وحطيتن بقلب المطربان وغمرتن بالزيت بس نسيت نسوة ما ضفتلهن حبة البركة مع إنو طلعتها وجهزتها لحتى أضيفها بس ما بعرف ليش نسيتها على كل إن شاء الله تطلع طيبة وتزبط وهلق عم استناها لتستوي هل اللبنات ببقى بخبرك على النتيجة يا قمر 8) :p

  29. gsm 20 October 2009

    السلام عليكم منى انا كتيير متحمسة لحتى اخبرك عن نتيجة اللبنة المكبوسة :zzz يا ستي بعد مرور 10 ايام بالتمام والكمال فتحنالك هل المطربان ودقنا من هل اللبنة ويا الله شو طلعت طيبة عن جد كتيييييير طلعت طيبة بتشبه اللبنة يللي كنا نجيبها مكبوسة بالسوق بس طبعا طلعت معي اطيب لأنو استعملت زيت الزيتون اما اللبنة الكبوسة يللي بتوصلنا اغلب الزيب بكون زيت نباتي بس يسلموا يا ستى على هل الوصفة وصارت من وصفاتي المعتمدة صحيح اكلتلك كم كرة لبنة يعني اكلتن عنك ما تاكلي هم :grin :grin :grin

  30. منى 21 October 2009

    و عليكم السلام و رحمة الله و بركاته :)
    ان شاء الله الف صحة يا رب , يا ستي شغل البيت غيررر , انظف و اضمن و احلى بكتير , الله يعطيكي العافية و هياته النونو عم ياكل على كل درس لون :zzz

    هلا اهم ما في الموضوع انك اكلتي حصتي , و انا عم قول لحالي ليش ما قدرت افطر منيح , تاريني فطرانة عندك :grin

    حبة البركة مو مهمة لنجاح الوصففة , بس هي كانت رح تعطي طعمة طيبة لهيك فيكي ترشي شوي على اللبنة بس ما طالعيها .

    الف الف صحة اختي على البك و الب كل العيلة الحلوة

  31. ام رومل 21 November 2009

    الشنكليش نانتي بتسويه بس الماده الرئيبه فيه اسمها شنكليش وهي احد مشتقات الحليب ما بعرف شلون يصنعوه بالساحل بالربيع بس بينزل عالسوق بيشتروه بيضيفوله الزعتر الاخضر الناشف و حبه البركه والفليفله الحمرا و بيدعبلوه وفيه طريقتين الي كان يحطوه بغربال و يعلقوه على شجره بالظل حتى ينشف بعدين يلفوه بورق ويحطوه بقطرميز ويسكروه حتى يعفن و يصير ريحته مقرفه معناتو صار جاهز للاكل او انه يدعبلوه و يحطوه بالزيت متل طريقه اهل حمص يضل تازه و بدون الريحه المعروفه اياها تعرفو من زمان كان خالي بالسعوديه يقول انو يحط الشنكلي اول الاغراض بالطبونه متى ما فتح الجوازات لحتى يفتش يشم الريحه و يدوخ و يبطل تفتيش

  32. ورد 13 May 2011

    مرحبا ست منى يسلم هالايدين على اللبنة بس انا الي عتب عليكي كتير عبحط ردود او اسئلة ومابتردي علي
    وبدي اطلب منك طلب ولو بدي عذبك ياريت لو تنزلي طريقة التنشيف للبن بالصور لانو مافهمتا حاولت كتير بس مامشي الحال وكتير انا مشتهيه اعمل اللبنه ههي لانو انا بفرنسا ومافي متل لبنتنا بسوريا ويسلمو ايديكي مرة تانيه على هالوصفات الطيبة

  33. ورد 13 May 2011

    وفي سؤال تاني شو هو نوع القماش مثلا قطن ولا شي نوع تاني عم كتر غلبه بعرف الله يعطيكي الف عافية

  34. منى 15 May 2011

    هلا فيك اختي :)
    لا تزعلي مني , بتعرفي اديه بقدر كل الاخوات هون و اديه بفرح لردودهم و تواجدهم , بس و الله يا اختي الظروف كلها مخربطة و انا ما عندي نفس لايا شي

    المهم بالنسبة للوصفة , تكرم عيونك ان شاء الله بحط الصور قريب لما حضر اللبنة مرة تانية , القماش انا استعمل قماش قطني , ممكن قميص نظيف و عتيق شوي , ممكن شاش ابيض و ما دام حضرتك بفرنسا فاتوقع انو متوفر عندكم شي اسمه…cheesecloth و هادا خصوصي لصناعة الاجبان و الالبان :)

  35. oum hisham 15 July 2012

    شكرا ع هل الوصفات الطيبه اخت منى,من شي سنه و انا بتابع وصفاتك و بقول ليوم و بكره بسجل ليوم شديد الهمه,لأنو فعلا اشتقت للبنه لبنان هن بالسعوديه اللبنه مش طيبه ابدا,جربت كتير اشياء من وصفاتك و كانوا طيبين كتير.

  36. Mona 15 July 2012

    الله يسلمك اختي ام هشام و نورتي الموقع بطلتك الحلوة :)

    يا ستي متل خضرة بلادنا ما في الله يديم علينا النعم و لا يحرمنا منها ..

    هنا و الف صحة و عافية على قلبك يا حق

  37. نسرينa 17 July 2012

    شكرآ عالوصفة الطيبة

  38. Mona 18 July 2012

    الشكر الك نسرين :) يا هلا فيك

  39. ام شهلا 19 July 2012

    الف حمدلله انو رجع الموقع قبل رمضان كتير كنت اكلة هم حسيت حالي ضايعة بدونو دخيلك يامنوش لا تقطعينا مالنا غيرك
    :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)