أصابع الدجاج المقرمشة و الخفيفة


         وصفة : منى                 2011/01/10                 25 تعليقات
أصابع الدجاج المقرمشة و الخفيفة

بتمر سنة بحياتنا ورا سنة و كل سنة بطلع بحس أن ما في شي كتير كبير اتغير بحياتي , كله ماشي برتم واحد , نوعا ما . بس هلا بعد ما مرت اول عشر سنين من هل القرن , اطلعت شو اتغير بحياتي و الي شفته كان كبير , كبير كتير و على كل الاصعدة , في اشيا ايجابية و الاشياء السلبية ما بحب فكر فيها , بحب خليها تبقى على رف النسيان , محلها هونيك أحلى .

كتير اتغيرت نظرتي للحياة و عم تخطر ببالي افكار نهفة . مثلاً بالعادة لما كنا ندرس فيزيا و كيميا بالمدرسة , كنا نفكر بالمادة و الكتلة و المعادلات و العناصر الكيميائية , أما هلا لما بقعد بدرس جودي , عم لاقي طريقة شرحي و امثلتي كلها الها علاقة بالطبخ و المطبخ من بعيد أو قريب . يعني شرحتلها قانون بروست إلي بيقول ان الاتحاد بين عنصريين او مركبين ييتم دوما بنسب ثابتة و صحيحة مهما اختلفت طريقة التحضير , أنه نحنا منعمل القهوة دوما بنفس المقادير معلقة بن و فنجان مي , بقى في ناس بتحط البن و المي و بتخلطهم على البارد و بعدها بتغليهم و ناس تانية بتغلي المي و بعدها بتلقمها بالبن و بالاخير كله بيطلع معنا قهوة !!
و لما وصلنا على قانون لافوازيه , الي بيقول ان مجموع كتل المواد الداخلة في التفاعل هو نفسه مجموع كتل المواد الناتجة عن التفاعل , لما وصلت لهون أعجبت بأجدادي اعجابا شديدا و قلتلها لجودي , شوفي نانة نانتي الست رقية بتعرف هل القانون مو هن الي قالوا , إلى بتحطه بالدست بيطلعلك بالمغرفة .


و على سيرة الي منحطه بالدست بيطلعلنا بالمغرفة , كمان الي مناكله زيادة اليوم رح يطلعلنا بكرة اما بشكل كولسترول و شحوم و سكر لا قدر الله , أو بشكل كم كيلو غرام زيادة موزعيين هون و هون لهيك الاحسن أن الواحدة فينا تدير بالها على حالها و على عيلتها . مع هل الفكرة براسي صرت بحبش عن وصفات طيبة و بنفس الوقت خفيفة و سعراتها الحرارية قليلة أو مو كتيرة لحتى يصير الكلام أظبط . هي واحدة من الوصفات الريجيمية المتعددة المواهب . أول الشي طرية من جوى و عم تدوب دوبان و نكهة الخردل و العسل فيها بتجنن . تاني شي سهلة كتير كتير و ما في عجقة القلي , تالت شي ممكن تتحضر قبل بيوم إذا الواحدة كانت مستعجلة او مشغولة بشي شغلة , رابع شي سعراتها الحرارية قليلة , أخر شي إذا فرضا و جدلا زاد منها شي لتاني يوم بتعمليهم اطيب و أشهى سندويش .انا بحب صوص الهني مسترد كتير , إذا واحدة فينا ما بتحب هل الطعم او عيلتها ما بتحبها لهل الطعمة ممكن تستغني عن العسل و رح تبقى الوصفة طيبة .


بالصحة و الهنا


وقت الإعداد : 25 دقيقة , مع ثلاث ساعات لنقع الدجاج و يمكن نقعه قبل يوم
وقت الطبخ : 20 دقيقة
كمية تكفي : 4 – 5 أشخاص




ثلاث أرباع كيلو صدور دجاج
كوب و نصف إلى 2 كوب بقسماط , متبل بالقليل من الملح و الفلفل الأسود و الزعتر الأخضر
زيت رذاذ

صلصة النقع و التغميس :

2 ملعقة كبيرة ( 30 مل ) عسل , اختياري
ربع كوب (60 مل ) خردل
كوب (250 مل ) حليب
ملح و بهار أبيض
1 فص ثوم , مهروس
ربع ملعقة صغيرة فليفلة حمراء حرّة أو حلوة حسب الرغبة
3 ملعقة كبيرة (45 مل ) عصير ليمون أو خل حسب الرغبة
نصف كوب (125 مل ) مايونيز خفيف , أو مزيج من المايونيز العادي و اللبن






• يقطع الدجاج لقطع كتلك الظاهرة بالصورة بحيث تكون مسطحة نوعا ما و بأحجام متقاربة .

• يخلط الحليب و الخردل و العسل في حال استخدامه مع الملح و البهار و يقلب حتى يذوب العسل .

• يؤخذ نصف المزيج و يمزج مع الثوم المهروس و الفليفلة الناعمة و تنقع به أصابع الدجاج لمدة ثلاث ساعات .

• يحمى الفرن على درجة حرارة 200 مئوية و يثبت الشبك على الرف المتوسط .

• يضاف الخل أو الليمون لباقي مزيج الحليب و يقلب و يترك حتى تغميس الأصابع , ستلاحظين أن المزيج بدأ يسمك قليلاً .

• ترفع أصابع الدجاج من التتبيلة و تغمس في البقسماط ثم ترتب في صينية مغطاة بورق الزبدة . ترش الاصابع بلطف برذاذ الزيت ثم تخبز في الفرن لمدة 15 – 20 دقيقة أو حتى تنضج و تشقر و تقرمش .

• يضاف المايونيز أو مزيج المايونيز و اللبن على مزيج الحليب و يقلب و يذاق و يعدل الملح حسب الرغبة .

• تقدم أصابع الدجاج مع صلصة الهني مسترد و البطاطا المقلية و يمكن أن تحشى في الصمون مع الخس و شرائح البندورة .


فكرة :

- في حال لم يتوفر رذاذ الزيت يمكن أن تبلل قطنة بالزيت و تضغط بلطف و بسرعة على قطع الدجاج بعد تجهيزها .


التعليقات

  1. lolli 10 January 2011

    ممممممممم شي شهي كتير كتير
    :cry :cry :cry بس للاسف الدايت اللي متبعته خالي من النشويات تماما لذلك رح حاول جربها بلا البقسماط :upset
    على فكرة انا بكره القلي كتير بسبب ريحته و دهونه و انا بدور عالاكلات اللي ما بتحتاج لقلي
    ريتن يسلمولي هالانامل و شو بفرح لما بشوف الام مهتمة بدورس وولادها و بتساعدهم بنفسها بدل ما تجبلهم طقم اساتذة و انسات عالبيت :x
    الله يوفقكم و يسعدكم

  2. Mays 11 January 2011

    كل سنة و إنت و الموقع سالمين
    :)
    وصفة بتجنن ، و صلصة النقع أكيد حتكون مميزة
    أنا بالعادة بحضر الناجتس لأولادي بالفرن بس بنقعهن بشوية حليب حتى يطروا و يستووا بسرعة و هلق أكيد راح أجرب طريقتك
    يسلوا منوش.
    صحيح مجمعنك كذا وصفة مع صور و بدي ابعتلك يا هن بس و الله ما بعرف كيف عم يخلص اليوم
    الله ييسر و اقدر ابعتهم هالكم يوم
    بتفضلي ابعتهم ع الفيس بوك و لا ع الموقع؟ :?

  3. غيث 11 January 2011

    الله يسلم ايدك ميمو ويخليك لاولادك والله يعينك ويعيننا على الدراسة وووو المهم بدي اسالك هلق النقع بالحليب منشان يتشرب النكهة مع البهارات اللي فيه ولا منشان يطري الدجاج واذا منشان يطري الدجاج ممكن حيالله وصفة دجاج ننقعها بالحليب بدل الخل منشان يطرى لاني انا ما عبحب ريحة الخل لما عبنقع الدجاج فيه بالفروج ببطاطامثلا او غيره

  4. رنا 11 January 2011

    ايه شو هالانسة العظيمة والله فشروا كل المعلمات …ياستي بطريقتك بتقربي لبنتك المعلومة وبتاخدها بشكل ابسط من تعقيد الكتب …ياريتك امي بزمناتي ماكنت طيقها للفيزيا :grin بركي كنت خليتيني حبها مثلا :p
    منجي للوصفة الررررااااائعة …واللله انا بهب هالوصفات يامتى يلي بتنفد عالدجاج المقلي بس بوصفتك باستعمالنا لصدور الدجاج فقط رح يستووا ورح نخلص من شغلة اسلقيه نص سلقة وبعدين غطسيه وقليه …بتكاسل منه كتير وبقول لحالي لو ساويت محشي كان اسهل ع قد مابيطلع جلي وروائح المطبخ بتصير فظيعة
    ياستي رح جرب وصفتك بس رح غطسها بالكورن فليكس المطحون ..لانه باخر مرة حضرت الفروج المقلي غطسته بالكورن فليكس وكان تحفة . ;)

  5. رنا 11 January 2011

    ايه شو هالانسة العظيمة والله فشروا كل المعلمات …ياستي بطريقتك بتقربي لبنتك المعلومة وبتاخدها بشكل ابسط من تعقيد الكتب …ياريتك امي بزمناتي ماكنت طيقها للفيزيا :grin بركي كنت خليتيني حبها مثلا :p
    منجي للوصفة الررررااااائعة …واللله انا بهب هالوصفات يامتى يلي بتنفد عالدجاج المقلي بس بوصفتك باستعمالنا لصدور الدجاج فقط رح يستووا ورح نخلص من شغلة اسلقيه نص سلقة وبعدين غطسيه وقليه …بتكاسل منه كتير وبقول لحالي لو ساويت محشي كان اسهل ع قد مابيطلع جلي وروائح المطبخ بتصير فظيعة
    ياستي رح جرب وصفتك بس رح غطسها بالكورن فليكس المطحون ..لانه باخر مرة حضرت الفروج المقلي غطسته بالكورن فليكس وكان تحفة . ;)

  6. emerald 11 January 2011

    تسلم دياتك يا رب انت احلى ست بيت واحلى ماما الحمد الله انابنتي لساها صغيرة ويا دوبي عم بعلمها الأحرف وكم كلمة انكليزي وسور وأحاديث صغيرة على قدها……..الأكلة شكلها بيشهي بس أنا مابحب العسل فرح اجربها من دونه وكتير منيح انو بتنطبخ بالفرن لأني بكره القلي كتير مو لشي بيني وبينه لا سمح الله بس لاني مطبخي صغير وبيبلش يعرق وبيصير الجو العام مبهدل :grin بدي أسألك لو سمحتي بما أنك ساكنة بحلب ….بتعرفي شي روضة تكون كويسة لبنتي أنا شفت روضة العلماء الصغار-الحلم العربي وفي روضات كتير بس خارج حلب وزوجي رافض اني تكون الوضة بعيدة…..شكرا كتير الك بس انا بحكي كتير ومعروفة بكل العيلة السنة الماضية مرضت مرضى تقيلة وما بقى احسن احكي فصرت أكتبلو لجوزي على الورق ولما الحمد لله طبت قال لي رح اخذك عند الدكتور مرة تانية لحتى يوصفلك دوا مشان اسكت لأني صار حكيي مضاعففففففففففف

  7. karmen 12 January 2011

    تسلم ايديك

  8. إسراء 12 January 2011

    مرحبا كيفكن وكيفك ست منى
    منجي لاول شغلة انو عم تدرسي بنتك فيزيا لك انا الله وكيلك بعد ما طلعت من البكالوريا ودخلت ادب انكليزي نسيت كل شي اسمو فيزيا ورياضيات مع انو كانت بكالوريتي علمي ولما يجي حد من قرايبيينا مشان درسو يادوبني اتزكر القانون وضل ساعة لحتى وصللوا الفكرة بس ما شا الله عليكي انتي مافي منك الله يخليكي لاولادك
    تاني شغلة بعدني ماعم فكر اعمل ريجيم لسا ما صار سهم الميزان ل100 ههههه وان شا الله عن قريب رح طبق هالوصفة بس ينزل زوجي اجازة من عسكريتو رح طبقلو كم وصفة …. بتعرفي احيانا بجي اجازة اول شي بعملو بقللو يطلع على الميزان وباخر يوم برجع بزينه وبكون الفرق اما 3 او 4 كيلو خلال خمس او ست ايام !!!!! كللو من وصفاتك هههههههههه الله يعطيكي العافية ويخليلنا ياكي ولايحرمنا منك ياااارب ………اسراء

  9. منى 13 January 2011

    هلا لولي :)

    ييي , خسارة يلا بس انا بشعك ان تبقي قوية و اصلا ما بدها دموع , انت حاسمة امرك لحتى توصلي للي بدك اياه ;)

    شكرا كتير للدعوات الحلوة و رح استنى اخبار طيبة منك ان شاء الله

  10. منى 13 January 2011

    هلا ميوسة :)
    يا ريت تجرببيهم و ان شاء الله بيكونوا على زوءك , رح استنى رايك

    مممم , وصفات جديدة منك , يسلمون يا حق , ما بتفرق وين بتحبي ابعتيهم :zzz

  11. na3oom 14 January 2011

    وصفة حلوة والأطفال بحبوها كتييير وصحية راح جرب طريقة نقعك بس بدي ياك جربي طريقتي في البقسماط
    أنا بحط شوفان (ممكن نص الكمية وممكن كل الكمية)وحبة بركة راح تزيد قيمتها الغذائية وتزيد في الطعمة كمان
    يسلمو إيدك
    صعي طلع معاك شي مشان الخل
    يعني كبو ولا لأ

  12. Heba Abu Shaaban 16 January 2011

    الأكلة باينتها طيبة
    الله يعطيكم العافية
    بس حبيبتي حاولت اعمل نسخ ما نفع معي
    كيف أخد الأكلة عندي

  13. nabila 21 January 2011

    طيبة كتير مشكورة
    بس انا بعملها بهبرة فروج :)

  14. haya 9 February 2011

    يممممي شكلها رااااااااااائع واكيد طعمها راح يكون رائع ان شاءالله راح اجربها بما انه كل المواد متوفرة عندي تسلم ايدك يا منى ايوه هذه الاكلات اللذيذة

  15. منى 9 February 2011

    الله يسلمك هيا بانتظار ايك بعد التجربة ;)

  16. منى 22 February 2011

    هلا غيث حبيبتي :)
    ايه فيك تستخدمي الحليب لكل نقعات الدجاج و كمان فيك تستبدلي الخل بالليمون دوما اذ ما بتحبي ريحة الخل , الحليب بيعطي طراوة و نكهة ;)
    بس شوفي لوصفة متل الفروج ببطاطا ما بنصحك تستعملي الحليب , اما الليمون او بلا شي

  17. منى 22 February 2011

    هلا رنون :)
    و الله معك حق , انا ما كنت حبها و حبيت الانكليزي على ايد استاذي صالح شرابة الله يشفيه و يعافيه , استاذ ما بيتكرر و الله

    بيستوا على ضمانتي ان شاء الله و سهلة كتيررررر و خفيفة لهيك عمو الضمير بيبقى نايم و مرتاح

    صح متل ما قلتي بالكورن فليكس عم يطلع يممي , يلا جربيه و رح استنى رايك ;)

  18. منى 22 February 2011

    هلا emeraid:)
    ان شاء الله تعيشي و تربي و تشوفيها صبية و ملية عليك حياتك

    و الله انا كمان بكره القلي , مو تار بس يا اختي ريحة و وسخ و تنظيف وراها و بعده حمام :roll بقى هل الطريقة اسهل و اسرع و انظف و كمان اخف للاكل

    و الله معه حق زوجك , لان حرام لسا صغار نبعتهم على طريق سفر , انا حاطة ابني بالمناهل و الحمد لله مبسوطة منها كتير و في كمان المنزل الصغير , كتير من رفقاتي اولادهم فيها و مبسوطين منها

    ان شاء الله بعيد الشر عن البك , هههههههههههههههههههه فرطت ضحك و الله :grin

  19. منى 22 February 2011

    هلا كارمن :) الله يسلمك حبيبتي

  20. منى 22 February 2011

    هلا اسراء :)
    هو انا هلا بديانه شوف صعوبة و اتوقع هي اخر سنة , بقى ربي يسر

    و الله يا اسراء لازم ندور دوما على اكلات خفيفة حتى لو ما عم نعمل ريجيم للمحافظة على جسمنا و قلبنا

    الف الف صحة و هنا على البك و الب ابو الشباب ,ان شاء الله ربي يديمكم لبعض و تعيشي و تعمليله ;)

  21. ظلالي 23 February 2011

    شكراااااااااااا :)

  22. منى 23 February 2011

    شكرا الك اختي و منورة :)

  23. ladyincafe 19 May 2011

    مرحبا منى
    انا رزان من حلب مقيمة بقطر
    متزوجة من فترة قريبةوحالتي مع الطبخ لسا حالة
    امبارحة شفت موقعك بالصدفة وطاااااااااار عقلي فيه
    بدون ما اجرب شي حسبت انو اكلك بيجنن
    وتفاءلت فيه
    امبارحة بديت باول تجربة ع طريقتك عملت عدس بحامض وطلع طيب
    اليوم عم بعمل دجاج بالسويت اند ساور
    بس لسا ما بعرف النتائج الله يستر
    لانو رح انحبط اذا ما صار

    حبيت هاي الاكلة لان زوجي بيحب كتير الاكلات الي فيها هالنكهات سويت اند ساور او مسترد وعسل او اكل صيني او هندي
    لهيك رح جربهن كلهن على امل يظبطوا معي
    بس عندي سؤال
    بعد ماشويتي الدجاج قلتي بتضيفي المايونيز للحليب
    ما فهمت يعني هاي بتضيفيها مشان تكون صلصة جنب الدجاج؟
    والا بتحطيها للدجاج بعد ما ينشوى؟
    وبدي اسألك كمان
    بالنسبة للبن
    جربت عدة مرات اعمل ارمان او لبنية بس هون اللبن بقري وعم يفقس معي وبيطلع بيقرف
    حطيت بيض ونشا وما مشي الحال
    استعملت مرة حليب المراعي ومرة داندي وما ظبطو معي
    بقى شو الحل؟
    مع العلم اني قبل الطبخ خلطتو عالخلاط
    واثناء الطبخ كنت عم بخلط كمان
    بس ما فاد
    فشو بتنصحيني؟
    وشكرا كتير لالك ..
    على طبخك وموقعك المميز
    ورح خبرك بعدين نتائج الدجاج سويت اند ساور
    الله يستر

  24. sose 28 December 2011

    يسلمو هالايدين والله شكلا كتير طيبة :) لازم جربها بس ضروري الخردل بالوصفة؟؟؟ :p

  25. منى 29 December 2011

    بيعطي طعمة كتير طيبة هون و انصحك تجربي الوصفة متل ما هي:)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 4.00 out of 5)