البامية بالزيت


         وصفة : منى                 2008/06/01                 21 تعليقات
البامية بالزيت

·          تقمع البامية و تغسل و تنشف  .

·          يقلب الثوم و زيت زيتون قليلاً ثم تضاف البامية و تقلب على نار هادئة حتى لا تلتصق و تقلب حتى تنضج . 

·          تبشر البندورة و تضاف للبامية مع كوب ماء  و تترك حتى تتسبك و تتبل بالملح و الفلفل .

·          تضاف الكزبراء الخضراء في حال استخدامها و تتترك لمدة دقيقتين ثم ترفع عن النار و تترك حتى تبرد ثم تقدم مع الخبز العربي و مع فليفلة خضرا و خيار . 

 




نصف كيلو بامية
4 فص ثوم
نصف كاسة صغيرة زيت زيتون
4 حبة بندورة
ملح و فلفل
كزبراء خضراء مفرومة ( اختياري )





• تقمع البامية و تغسل و تنشف .

• يقلب الثوم و زيت زيتون قليلاً ثم تضاف البامية و تقلب على نار هادئة حتى لا تلتصق و تقلب حتى تنضج .

• تبشر البندورة و تضاف للبامية مع كوب ماء و تترك حتى تتسبك و تتبل بالملح و الفلفل .

• تضاف الكزبراء الخضراء في حال استخدامها و تتترك لمدة دقيقتين ثم ترفع عن النار و تترك حتى تبرد ثم تقدم مع الخبز العربي و مع فليفلة خضرا و خيار .


  • وصفات تانية ممكن تعجبك


التعليقات

  1. منى 1 June 2008

    ما قدرت قاااوم و أضفت الوصفة باسمك لا تزعلي مني , نم نمممي

    لنوشة أنا بعملها قريب من طريقة ماماتك الله يخليلك ياها بس بحط معها بصل و بالخير شوية حمض ..

    أهم الشي انك ما بتضيفيلها مية بندورة , بحسها كتير بتغير الطعمة و خصوصاً لطبخات زيت الزيتون .

    بس ما قلتيلي ايمتى بتضيفي الكزبرة ؟ أنا كتيررر بحب اكلات الزيت , ان شاء الله ببقى بجربها على طريقتك و ببقى بخبرك شو بيصير معي

  2. linda 1 June 2008

    الله يسامحك
    صدمتيني يعني اول ما فتحت الموقع لقيت بامية بالزيت
    انا كتبتها عل السريع و المقادير يعني تقديرية
    بس ان شالله بتعطي نفس النتيجة

    منحط الكزبرة اخر شي قبل بدقيقتن من طفي النار مشان تضل خضرا و ريحتها قوية
    و حتى لو ما حطينا كزبرة طيبة كتير

    صقالله يا منى ايام ما كان جدي عاييش
    ما في نوع خضرا او فواكي بيخطر على بالك الا موجود بالمزارع تبعو
    ما كنا نشتري شي الا الخبز و شوية مواد اولية متل السكر والشاي
    و حتى الخبز كنا نعملو من القمح يلي زارعو جدي

    بس هلء ما عاد حدا زرع شي ونشفت الاراضي
    لا حول و لا قوة الا بالله

  3. منى 2 June 2008

    اتوقع المقادير مضبوطة , و اكيدة بتعطي نتيجة لذيذة ..انا بموت على اكلات الزيت

    الله يرحم جدك و يرحمنا كلنا يا رب ,بتعرفي انتي هل القصص نقطة ضعفي ..
    ان شاء الله كل شي بيرجع متل اول و احسن :roll

  4. ام نور 3 June 2008

    سلم دياتك يا ليندا على هالبامة ذكرتيني بالذي مضى الي شي 6 سنين ماني اكلة البامة خضرا بس بتذكر كانت امي تعمل نفس طريقتك على شرط تشتري البامة حبة كبيرة لا الزيت والصغيرة لا اللحمة :)

  5. linda 6 June 2008

    اهلين ام نور
    و حتى انا امي كانت تشتري الكبيرة للزيت و الصغيرة للحمة
    يا اما نقطف من مزرعة جدي و نوزعهون قسمين
    الكبيرة طيبة طتير ازا كانت طرية

    كنا كمان نقليها و ناكلها مع ملح وفلفل
    وقت مرة ساويت هيك و شافني جوزي
    قلي انتي غريبة الاطوار
    :eek

  6. منى 15 June 2008

    جربتها لنوشة :)

    مقادير مضبوطة تمام التمام و اكلة ما في اطيب منها ;)

    انا حطيت بصلة مفرومة مع الثوم و اذا الله راد رح جربها شي مرة بالكزبرة ..

    تسلملي هل الديات الحلوة ;)

  7. ام نور 15 June 2008

    اسا بالكزبرة الخضرا بتطلع شي غير شكل بتعرفي منى انا بعشق الكزبرا بالاكل ودايما عندي كزبرا ا مجلدة واكتر الاكل بحطلو كزبرا :p شو بتعطي نكهة لا الاكلة ولا اطيب

  8. منى 16 June 2008

    نحنا بحلب ما منستعملها ابدا , و اخد معي وقت اني اتعود عليها , بس هلا صرت بحبهااا كتير

    كيف يعني بتجلديها ؟ انا مرة جربت جلدها , بس ما عجبتني لما طالعتها من الفريزر و رميتها :roll ممكن تعلميني الطريقة الصح ام نور ;)

  9. ام نور 16 June 2008

    تكرم عينك يا منى ما بدا شي كتير سهلة انا تعلمت هالطريقة من الاخوات المغاربة كمان بيستعملوها كتير بتغسلي الكزبرا وبتفرميا وبتعبيا باكياس خاصة لا الفريزر وتبقيها بالفريزر عند الحاجة تاخذي الكمية المطلوبة وترجعي الباقي الى الثلاجة اذا بقيت في الخارج بتسود وهيدي هي كل القصة حتى البقدونس والكرفس هيك بجلدون بس لا الطبخ اكيد البقدونس ما بيعود يصح لا التبولة لا الشوربا لا الطاجين ,,,

  10. منى 17 June 2008

    ممم طريقة مفيدة كتير كتير , و الله رح اعملها دايما , بتعرفي انا طالعت الكزبة و تركتها , فصار منظرها ما بيشهي ابدا و فكرت انها فسدت , هلا هيك

  11. ام نور 17 June 2008

    لازم لما اطالعيها دغري تحطيا بالطبخة ميشان تبقى منيحة وبتلاحظي انها بتصير خضرا كأنها طازة :)

  12. Eman 26 February 2009

    ما حدا قال لي بدها كزبرة !!! جبتها اليوم على اساس أعملها بزيت بس ما خطرلي جيب الكزبرة لها !! يالله هالمرة رح ناكلها بلحمة ومرة تانية بجربها بطريقتك ليندا ..

  13. آرام 25 May 2009

    من مميزات هالموقع بالنسبة الي هو أكلات بالزيت ما كنت سامع عنها من قبل .. جربت الفاصوليا بيضا بالزيت والجزر بالزيت والكوسا بزيت وكلها من ألذ ما يكون .. وناوي إن شاء الله أجرب الباميا بالزيت قريباً. بس سؤال أخت منى .. شو الحمض الي بتستخدميه بطريقتك، ليمون ولا حصرم ولا دبس رمان؟ ولا تنصحيني أجربه على طريقة الأخت ليندا بدون حمض؟

  14. منى 25 May 2009

    هلا اخ أرام
    الوصفة الاساسية بحمضها بليمون و أحيانا أستخدم دبس رمان و مع دبس الرمان وأزين الوجه بجوز بس اللون بيطلع شوي غامق , أما الحصرم فما أستعمله لا لهل الوصفة و لا غيرها من وصفات زيت الزيتون , أستخدمه بس للسلطة و للطبخ

    ممكن تجرب الوصفة الي بتحس حالك مرتاح الها , انا بضيف الحمض بأخر دقيقة من الطبخ

    ألف هنا و صحة على كل الوصفات الي جربتها و اكيد لسا في وصفات كتير لزيت الزيتون جاية على الطريق

  15. آرام 21 August 2009

    مرحبا أخت منى
    أخيراً جربت هالوصفة .. كنت عارف من الأول أنها لذيذة جداً .. ومتل معظم أكلات الزيت حبيتها أكتر من البامية باللحمة .. سهلة ولذيذة وخفيفة على المعدة.
    على فكرة ما حطيت معها حمض لأن حموضة البندورة وحدها كانت كافية. وطبعاً ما استخدمت الكزبرة .. لأني (متل كل الحلبية) ما قدرت أتقبلها أبداً رغم أننا بنموت بالكزبرة اليابسة ونستخدمها بكل شيء.

  16. منى 22 August 2009

    هنا و الف عافية و صحة على كل لقمة و منيح ما ضفت الحمض قبل ما تدوقها , لان هي شغلة زوء ..

    على فكرة ممكن تتقبل الكزبرة الخضرا اذا بديت باضافتها بكمية بسيطة كتير , ممكن ملعقة و شوي شوي بتتعود عليها , انا عني هلا صرت كتير بحبها مع اني اول مرة جربتها كان بشوربة البندورة و كانت بكمية كبيرة , رميت كل الشوربة هيك حسيت صارت طعمتها متل الصابون :grin

    هلا دوما عندي كزبرة اما فريش و اما بالفريزر

  17. منى 22 August 2009

    هنا و الف عافية و صحة على كل لقمة و منيح ما ضفت الحمض قبل ما تدوقها , لان هي شغلة زوء ..

    على فكرة ممكن تتقبل الكزبرة الخضرا اذا بديت باضافتها بكمية بسيطة كتير , ممكن ملعقة و شوي شوي بتتعود عليها , انا عني هلا صرت كتير بحبها مع اني اول مرة جربتها كان بشوربة البندورة و كانت بكمية كبيرة , رميت كل الشوربة هيك حسيت صارت طعمتها متل الصابون :grin

    هلا دوما عندي كزبرة اما فريش و اما بالفريزر

  18. لارا مينا 2 September 2009

    والله لذيذة جدا جدا البامية بزيت وأنا أضفت لها بصل مثلك والباقي مثل الأخت ليندا ,,والبندورة بعد مابشرتها صفيتها من الماء إلي فيها وعملت بنصيحتك أخت منى علشان الطعم مايتغير وطلعت ماشاء الله ألف شكر منى وليندا وتسلم الأيادي .

  19. هنادي 28 September 2009

    منوش عزيزتي
    أنا بعملا بحطلا : زيت زيتون – رب البندورة-بندورة خضرا مكعبات-كزبرة خضرا-بصل شرائح-ثوم حب و مهروس-عصير التمر الهندي الحامض تبع الطبخ مو تبع الشرب- و البامي طبعاً.

    كل هاد تطبيق فوق بعضه ني و ممكن قلي البامي قبله أو تشويحها بسرعة و بالفرن و يا سلام لما تستوي و تنشف…غير شكل…

  20. منى 28 September 2009

    هلا لارا :)
    هنا و الف صحة يا رب , عوافي على كل لقمة اكلتيها انت و كل الاهل يا قمر ;)

  21. منى 28 September 2009

    هلا هنادي :)
    ممم , طريقة جديدة و اكيد طيبة , ان شاء الله يصحلي جربها قبل ما تخلص البامة و ببقى بخبرك شو صار معي :zzz

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)