الحبوب


         وصفة : منى                 2007/12/06                 32 تعليقات
الحبوب



طريقة الاستحلاب :

نصف كيلو من حب القمح المقشور
2 كيلو و نصف حليب
6 كوب ماء
4 فنجان صغير سكر
ماء زهر من نوعية ممتازة

الطريقة العادية :

نصف كيلو من حب القمح المقشور
3 كيلو حليب + كوب أو كوبان حسب الحاجة
6 كوب ماء
5 – 6 فنجان صغير سكر
ماء زهر من نوعية فاخرة


للتزيين :

قرفة ناعمة
جوز مكسر





• يغسل الحبوب جيداً ثم ينقع بالماء البارد طول الليل .







• في اليوم التالي يوضع الحبوب في طنجرة الضغط و يغمر بالماء ثم يضغط و يسلق لمدة ساعة كاملة .




• تترك الطنجرة مغطاة و يترك الحبوب لمدة 4 – 5 ساعات , بعدها سيكون القمح قد تشرب كل الماء و تضاعف حجمه و تفتحت حبات القمح , بعدها يحضر الحبوب حسب احدى الطريقتان التاليتان :


طريقة الاستحلاب :

• بعد أن يبرد الحبوب يؤخذ مقدار صحن صغير منه و يوضع جانباً ثم يوضع باقي الحبوب على مرحلتين في خلاط العصير مع الحليب و يمزج حتى يصبح المزيج ناعماً تماماً .

• يوضع مزيج الحبوب و الحليب على مصفاة ناعمة و يدعك للتخلص من قشور حبة القمح و الحصول على ما يسمى المستحلب .

• يوضع المستحلب على نار متوسطة و يترك حتى يغلي ثم يضاف صحن الحبوب الكامل و تهدى النار و يترك يغلي حتى يسمك مع التحريك بين فترة و أخرى , سيعلق المستحلب قليلاً بقاع الطنجرة , لا تقلقي .

• بعد أن يصل المستحلب للسماكة المطلوبة و يصبح جاهزاً يضاف السكر و يحرك قليلاً على النار حتى يذوب السكر .

• يبعد القدر عن النار و يضاف ماء الزهر و يحرك الكل ثم يسكب الحبوب في أطباق صغيرة و يرش بالقرفة و هو لا يزال ساخناً .

• توضع الأطباق في البراد حتى وقت التقديم و عند التقديم يزين الحبوب بالجوز المكسر أو يترك من دون جوز حسب الرغبة و يقدم بارداً .



الطريقة العادية :


• يوضع الحبوب على مرحلتين في خلاط العصير مع الحليب و يمزج حتى يصبح المزيج ناعماً تماماً .

• يوضع المزيج على نار متوسطة و يترك حتى يغلي ثم تهدى النار و يترك يغلي حتى يسمك مع التحريك بين فترة و أخرى , سيعلق الحبوب قليلاً بقاع الطنجرة , لا تقلقي .

• بعد أن يصل الحبوب للسماكة المطلوبة و يصبح جاهزاً يضاف السكر و يحرك قليلاً على النار حتى يذوب السكر .

• يبعد القدر عن النار و يضاف ماء الزهر و يحرك الكل ثم يسكب الحبوب في أطباق صغيرة و يرش بالقرفة و هو لا يزال ساخناً .

• توضع الأطباق في البراد حتى وقت التقديم و عند التقديم يزين الحبوب بالجوز المكسر أو يترك من دون جوز حسب الرغبة و يقدم بارداً .



سر الطبخة :

في حلب , يكون حبوب ست البيت الشاطرة له طعمة تشويط خفيفة , للحصول على هذه الطعمة اللذيذة اتركي كوب من الحليب جانباً و بعد أن يجهز الحبوب و يسمك أضيفي كوب الحليب و اتركيه يغلي مجدداً و بعدها سيكتسب الحبوب تلك الطعمة المحببة .







  • وصفات تانية ممكن تعجبك


التعليقات

  1. Rino 7 December 2007

    الله يعطيكي ألف عافية (شي ناهي )
    أنا بعمل الجبوب بالطريقة التانية بس مو بسبب سهولتها و إنما بهدف الإستفادةمن قشرالقمح لأنو الجزء الأغنى بكل الحبة و لهيك ما بيجي مني أرميه رغم أنو الطريقة الأولى بكون فيها لون الحبوب ناصع البياض و فعلا كتير طيب بس بها الأيام صرنا نركض ورا الفائدة لأنو خيرات الأكل اللي عم ناكلو معظمها مفقودة
    بكل الأحوال ما نعدم هالإيدين يا حق

  2. رغود 7 December 2007

    الله يسلم ايديك منى :) و كمان بالشام بيحطوا للحبوب حمص و فول مقشور و فاصوليا بيضا،بيطلع طيب بس هلأ ما عاد حدا عذب حالو و عمل هالأكلات الطيبة ، تسلمي عم تذكرينا فيها 8)

  3. منى 8 December 2007

    هلا رغودة :)

    ممم , بس خسارة و الله , لا نحنا بحلب بيحضروه دايما ;)

    الله يسلمك يا قمر , و نور الموقع بوجودك :)

  4. منى 8 December 2007

    و الله معك حق رينو
    هلأ أنا بحضره بطريقة الاستحلاب بس لما بيكون عندي ضيوف ..

    اما بشكل عادي بحضره بطريقة أمي ;) مشان فوائده ..

    نورتي رينو :)

  5. نهى 14 November 2008

    فعلا انا باحب الطبق ده جدا جدا ودايما اقول انى باعمله علشان مغذى للاطفال بس اعتقد انهم ما بيلحقوا منه كتير بسببي :grin
    بس انا خدت بالى انك بتعمليه بدون نشا..
    فعفلا ح يتماسك بدونها لو سبته على النار؟؟

  6. منى 18 November 2008

    الطبق ده رائع .أنا بموووت عليه :zzz و أكيد رح يتماسك بفعل القمح ..

    إذا انتبهتي اختي لما تسلقي القمح لوحده بالمي تحسي أن المي تبعة السلق تصير سميكة , صح ؟
    هادا لأن النشا مستخرج من حبوب القمح

  7. haya 10 December 2008

    تسلم ايدك يا اخت منى على هالوصفة شكلها رائع ولذيذ شجعتيني اروح اجيب قمح واعملها وبعدين كلها فوائد ان شاء الله بجربها :)
    بدي أسألك اخت منى اذا بتعرفي طريقة عمل حلاوة الجبن

  8. منى 11 December 2008

    هلا هيا :)
    عن جد طيبة كتير و متل ما قلتي كلها فوايد ;)
    و الله هيا ما جربت و لا مرة حضر حلاوة الجبن على ايدي , بس ممكن بالايام فكر و اكيد ببقى بنزل الوصفة :zzz

  9. روح الجمان 5 May 2009

    ما شاء الله تبارك الله طبق حلو كثير غاليتي تسلم يديك [B]null[/B] :grin

  10. منى 5 May 2009

    هلا و مية هلا جمان :)
    نور الموقع بأخت كريمة و غالية و جديدة و الصدر الك و العتبة النا :zzz

    هادا بس من زووءك و ان شاء الله تجربيه و يكون متل ما بتحبي

  11. gsm 7 February 2010

    سلام عليكم منى انا كتيير مشتهية احضر هل الوصفة بس في كذا إستفسار انا عندي كيس من الحبوب مكتوب عليه قمح مقشور يا ترى هو نفسه بينفع للحبوب
    وبعدين شغلة تانية
    انا ماما بتعملها حبوب من غير حليب ابدا
    يعني مي وماء زهر وقرفة وجوز على وجها المشكلة ماما ما بتعملها بالمقادير وانا ما بعرف أعمل شغلة خصوصي حلويات إلا إذا كانت بالمقادير يا ريت تفيديني بهل الموضوع وأكون من الشاكرين
    عم أعذبك معي لا تواخذيني من شان الله

    :roll

  12. منى 8 February 2010

    اذا حابة فيك تجربي نفس الوصفة من دون حليب , استبدليه بالمي و انا بعرف ناس هيك بتحضره ;)

    القمح المقشور هو المطلوب للوصفة .

    الله يسامحك شو عذاب و ما عذاب , ان شاء الله دوماانا بالخدمة و جاهزة لاي سؤال :zzz

  13. gsm 8 February 2010

    يسلموا ايديك يارب خلص بكرا ان شاء الله رح اجربها للوصفة وبخبرك على النتائج الله يعطيك الف عافية

  14. منى 9 February 2010

    رح استنى :)

  15. semo 1 June 2010

    منوشة حبيبتي هلأ عم اقرا الوصفة صار فيني هيك :upset
    أنا من فترة مشتهية الحبوب مع انو الدنيا صيف بس مابعرف ليش اجت عبالي هالوصفة وقلت مالي الا منى دخلت وشفت الحبوب وكتير انبسطت بس لما شفت المقادير انصدمت الظاهر كتير بتختلف الطريقة الحموية عن الحلبية نحنا بحماة بنحط شمرا ويانسون مطحونين وبدون ماء زهر ومن دون حليب بس مي وبنحط رز وتقريبا كل أنواع الحبوب بس الأساس رز وقمح وشمرا ويانسون وأبدا ما بنطحن الحبوب بنخليها متل ماهي بتطلع كتييير طيبة

    فصرت بحبش هون وهون واسأل لحتى أخدت الطريقةوعدلت عليها وكان الها الفضل الكبير بعد رب العالمين ديمة بمدونة زهر البرتقال هي اللي ساعدتني الله يعطيها ألف عافية
    بس عم فكر جرب طريقتك كمان أكيد جوزي رح يحبها لأنو من هواة الحليب اللي بينضاف الو ماء زهر

  16. منى 1 June 2010

    يا سلام يا سمسوم , اكيد الزصفة الي حضرتيها طيبة كتير , و اذ ما فيها سقالة علوا تعلميني ياها ;)

    الحبوب فوق على الطريقة الحلبية , هيك بطلع القوام النهائي متل المهلبية بس الطعم اطيب بكتير .

    انا من اسبوع تقريبا حضرته , هي وصفة لا تعترف بالفصول :grin

  17. AYAH 6 August 2010

    منى تسلم ايدك عالوصفة فعلا اجت بوقتا بس عندي استفسار
    انا ما عندي طنجرة ضغط يا ترى أديه بدها على النار؟
    وشغلة تانية أنا بحس انو ازا انضربو الحبوب نص ضربة أطيب ما ينهرسو كتير ما بعرف شو رأيك
    تسلمي كتير

  18. منى 7 August 2010

    هلا اية :)
    ممكن ساعتين أو ساعتين و نص على نار هادية و الطنجرة مغطاية و تنتبهي ما يعلق ;)

    قصة الحبة في الحبوب على الذوق و كل واحد بيحبها شكل . و انا على اد ما سمعت ناس عم تحكي عن الحبوب اقتنعت ان كل واحد بيحبها بطريقة و كل واحد بيفكر ان طريقته اطيب الشي و الصراحة انا كاه دقته و كله طيبببببب :zzz

  19. AYAH 7 August 2010

    يسلمو منى عالرد والله أنا امبارحة نقعت شوي واليوم سلقتون وضربتون بالفود بروسيسر عملتون قريب للمهروس بس مو تمام
    بس بما انو لايصة وعندي تسليمي الكبير وباخد الماستر :zzz :zzz :zzz :zzz :zzz
    عقبال عند قطاقيطك يا رب
    حطيت الحبوب بكيس وفرزتون بتزكر ماما كانت تسلق كتير وتفرز
    يسلمو ايديكي والله نحن جايينا رمضان مع دخول الشتا..مع انو ما اجا الصيف
    والبرد زكرتي فهالأكلة

  20. رغد غسان علاء الدين 5 February 2011

    مممم ما أطيب هالأكلة..يالله قديه بتطلع طيبة مع إمي..خيلة ..لك حتى الجوز اللي بتحطو غير شكل..في ناس بتتميز بأكلات معينة..إمي عندها هالأكلة خطيرة..كل ما عملت منها..بعسكر عندهن :grin
    يوم الأربعاء رح يجي الحلّاب انشالله..باخد ست كليات وبعملو بإذن الله وبخبرك عالنتيجة :)

  21. أم عابد 16 May 2011

    أنا بستخدم شوفان الكويكر وبيطلع معي بيعقد على قول زوجي :) ;)
    وحقيقة جهد كبير ومرتب
    تشكروا عليه 8)

  22. sweet candy 6 April 2012

    الله يسلم إيديكي ويعطيكي العافية..
    أنا اليوم كنت مساوية حبوب بس الحبوب عنا بدمشق
    مختلفة عن حلب واليوم اكتشفت إنو أكلة الحبوب مو أكلة وحدة
    نحنا بنعملها بمجموعة حبوب ( القمح – حمص – فول مقشور – فاصولياء حب صغيرة )
    وفي طريقتين بإضافة الحلو للأكلة إما بالسكر فقط
    أو بدبس التمر والسكر معاً وهاد بيعطيها لون الكراميل وبنحطلها شمر وبانسون مطحون بيعطيها نكهة مميزة وبتتزين بالآخر بجوز الهند والجوز.. وصحتين :zzz :eek :?

  23. لينا 28 April 2014

    مرحبا منى كيفك شو اخبارك بتمنى تكوني بخير
    بدي اسئلك حتى لو سؤال غليظ شوي هلأ انا مو بحلب انا حالياً بالصين وكتيرحابه اعمل حبوب بس انا مابعرف كيف لازم تكون الحبه انت كاتبه مقشوره هلأ انا اشتريت حبوب بس لأني مو عاملتو من قبل مابعرف اذا اللي اشتريتو حبه مقشوره ولا لأ ياريت بس بتعرفي كيف بدي اعرف اذا مقشوره او لأ قلت بلكي بتعرفي وبتفيديني ياريت تقدري تشوفي تعليقي وتردي عليه واسفه كتير للإطاله

    • منى 29 April 2014

      اهلييين لينا :)
      بعد زمان حبيبتي , ان شا الله تكوني بخير
      مممم , أحسن حل اني صورلك ياه , هلا بس تطلع الشمس بصورلك الحنطة المطلوبة لحت تقدري تعرفي النوعية الي عندك

  24. لينا 29 April 2014

    مرحبا منى
    انا بخير وكتير منيحه بتعرفي والله اني خجلانه منك كتييييير كتيير لأني مقصره كتييير بتعليقاتي بس هاد مابيعني اني ماعم ادخل كل يوم عالموقع وجرب من وصفاتك اللي بتجنن والله يامنى صار جربت اكتر من ١٠٠ وصفه من وصفاتك عنجد حقك علي لأني ماعم اكتب تعليقات بالوصفات اللي جربتا بس يشهد علي ربي انو ولا وصفه فشلت معي كل الوصفات اللي جربتا مو بس كانت رائعه هي الكلمه ولا شي ادام الطعم اللي عم تعطيني ياه وصفاتك عنجد انت احلى واروع منى بالعالم وتسلم ايديكي اللي عم تخترع هيك وصفات وانشالله الله بيحققلك كل اللي بتتمنيه لأنو تعبك وجهدك بالموقع مابيتقدرو بثمن واسفه لأني بحكي كتير وطولت وانا ناطره الصوره وشكرا كتير لذوئك

    • منى 29 April 2014

      الحمد لله :)
      بالعكس و الله انا الي ممنوتك انو عبتردي , كتير بيجرب و بيمشي و حتى ما بيعطوا ملاحظات ليستفاد الباقي

      ألف هنا و الف عافية ع قلبك , و شكرا يا غالية ع هل الدعوات الطيبة الي ما بتطلع الا من قلب طيب

      هي صورة القمح المقشور , حاولت وضحها , ان شا الله تكون باينة عليك

      القمح المقشور

  25. لينا 29 April 2014

    وحابه اسئلك كمان اديش رح خليه عم يغلي تقريبا بعد ما اضيف صحن الحبوب اللي شلتو ع جنب بدون طحن يعني قصدي تقريبا اديش لازم يبقى عالنار لحتى يسمك الله يعطيكي الف عافيه يامنى ويخليكي لبيتك وولادك

    • منى 30 April 2014

      اهلين لينا :)
      هو المفروض يكون سمك قبل ما تحطي الحبوب , الحبوب الكامل اخر شي , يادوب عشر دقايق او ربع ساعة بالكتير و بيكون جاهز

      خليلي ياكي و الله يحفظلك بيتك و عيلتك و كل غالي ع قلبك

  26. لينا 29 April 2014

    مرحبا يا اروع منى بالعالم الصوره واضحه وتمام التمام حتى مابتوقع في اوضح من هيك وشكرا كتير يامنى عنجد مابعرف كيف بدي ردلك المعروف وطلع اللي عندي نفس اللي بالصوره تبعك رح جربو وائلك كيف رح يطلع بس اكيد رح يطلع بيجنن متلك شكرا كتييييير لذوئك

    • منى 19 May 2014

      الحمد لله ان قدرت فيدك ، تكرم عيونك هلا و دوما :+
      ان شا الله يطلع يممي
      رح استنى رايك لينا

  27. لينا 1 May 2014

    مرحبا منى عملت الحبوب ونجح معي ولسه ما احكيلك عالطعم مممممممم شي بيجنن انا نفسي ماصدقت انو طلع معي هيك وانا مابعرف شي عن الحبوب ابدا لك حتى شكلو ماكنت بعرفو ههههههههههه وهاد كلو بفضل وصفاتك وتعبك معنا الله يعطيكي الف عافيه والى اللقاء مع وصفات جديده شكرا كتير

    • منى 26 June 2014

      صحتييين و الف الف هنا لينا , ن شا الله تكوني اكلتي عني كم صحن , هادا واحد من اطيب الوصفاات عندي

      عوافي يا قمر و ممنونة كلامك و ردك و ثقتك في

تقييم الوصفة
عاديةقد أحضرهاجيدةممتازةأكثر من رائعة (4 votes, average: 3.75 out of 5)