السلمون المشوي بالفرن


         وصفة : Iman                 2008/08/12                 19 تعليقات
السلمون المشوي بالفرن



شريحة كبيرة من السلمون تقريبا 2 كيلو منزوع عنها العظم و الجلد فيليه
1 ملعقة كبيرة شطه أو دبس الفليفلة إذا ما بتحبوا الحر بس صدقوني الشطة بتعطي طعم خيالي
1 ملعقة صغير فلفل اسود لازم يكون مطحون خشن و مطحون فريش يعني نفس وقت الطبخ بيعطي فرق كبير بالطعم
1 ملعقة صغيره ملح
1 ملعقة كبيرة حبه البركة نعم لا تستغربي حبيبتي أنا بالأول حطيتا لأعمل كونتراست بالألوان و لكن مش معقولة الطعم شو ضبط
1 ملعقة صغير بابريكا
1 ملعقة صغيره سمسم محمص
4 ملعقة كبيرة زيت زيتون
حبة ليمون حامض

• تغسل السمكة بخليط من الماء البارد و الخل ثم تشطف و تجفف بفوطه ورق .

• تفرك بنصف ليمونه لكل وجه و تعصر الليمونة أثناء الفرك و القصد أن تتشرب السمكة العصير .

• تحضر صينية الفرن و تغطى بورق فضي و يرش عليها تقريبا 2 ملعقة كبيرة زيت زيتون .

• تدهن السمكة بمقدار 2 ملعقة كبيرة زيت زيتون بعد دهنها بعصير الليمون .

• تدهن بالشطة على الوجهين ثم تملح على الوجهين , لاحظي أن كل الدهن و التبهير على الوجهين .

• يرش الفلفل الأسود ثم حبه البركة ثم السمسم و بالأخير البابريكا .

• توضع شرائح ليمون رفيعة على الصينية بطول السمكة و القصد أنها تعطي طعم و تمنع السمكة من الالتصاق بالصينية .

• توضع في فرن محمي لدرجه 400 فهرنهايت لمده عشره دقائق لكن أنش من سماكه السمكة و لانو السمكة مش راح تكون سماكتها أكثر من أنش فعشره دقائق تكفي ثم بعدها تحمى الشواية و تحمر السمكة من الأعلى .

أفكار و تنويعات :


• ممكن رش نصف ملعقة كبيرة من البقدونس تحت السمكة و نصف ملعقة كبيرة من البقدونس فوقها بتكون الألوان خياليه .

• بعد تبهير السمكة , يمكن عمل شقوق بالعرض على طول السمكة و يحشى في كل شق بنصف شريحة بحيث تكون الشريحة واقفة بالشق بتعطي منظر سينمائي ههههه .
  • وصفات تانية ممكن تعجبك


التعليقات

  1. منى 12 August 2008

    مش معقولة أمونة , شي بيشهي و بيغرف القلب , الطريقة بسيطة كتير و سهلة و شكلها كتير رح تطلع طيبة …

    الريحة وصلت لعندي , يا ترى فيني حضر الوصفة يغير السلمون , مش متوفر دايما عندنا , بتعرفي حلب مدينة مو ساحلية :roll ..

    عم انتظر الوصفات التانية و إذا الله راد رح جربها بس تتوفر المقادير عندي ..

    سلم دياتك مرة تانية امونة , و من يد ما نعدمها :)

  2. Iman 12 August 2008

    منى ممكن حبيبتي تعمليها مع اي نوع سمك بس ما يكون بيفتفت على الشوي و لازم يكون فيليه علشان المنظر احلى و اذا كان لونه ابيض رشي عليه مكعبات صغيره جدا من الفليفله الحمرا بيعطي لون مع حبه البركه و البقدونس بستنا تجربيها و اشوف رائيك حبيبتي و شكرا على الكلام الحلو

    لك كل الحب :)

  3. غيث 12 August 2008

    يعطيك العافية اختي والله يا عزيزتي وصفتك كتير سلسة وما فيها تعجيق والله بكرة كنت رح اعمل لهم سمك مقلي ولما شفت وصفتك ضحكت كانها اجت بوقتها لانها بسيطة رح جربها وخاصة ان السمك اللي عندي هو فيليه كتير منيح المقادير كلها متوفرة عندي بس الفرق اني الفيليه عندي هو هامور وليس سلمون مع ذلك بدي جربه شو رايك ولا حصرا سلمون عموما شكرا لك انا ما كتير بعرف بتفنن بالسمك شاطرة بكل شي الا السمك هم عندي وباكله بس لفوائده يعني ما كتير بحبه وبالنهاية شكرا لك :)

  4. منى 12 August 2008

    إذا بيزبط فيليه عادي رح جربها قريب ان شاء الله لان الوصفة شكلها لذيذ كتير:)

    عم استنى الوصفات المتتمة الها باذن الله و الف شكر ليك أمونة ;)

  5. غيث 14 August 2008

    شكرا ايمان مع اني ارى انك لست متابعةبكثرة للموقع او على الاقل لوصفتك منشان تجاوبينا على اسئلتنابس ان شاء الله تقرئي تعليقي اللي حبيت اشكرك فيه على طبقك اللي جربته البارحة وكان لذيذ كتير وخفيف ولاقى استحسان .الله يجزيك الخير وانا عملته بالهامور فيليه ونجح الله يسلم ايديك وكمان كترت شوية من عصرات الليمون عليه طلع له مرقة خفيفة بس طيبة وفيهاهالحبة البركة والسمسم والاشياء التانية اللي بالمكونات اعطتها نكهة صلصة خاصة وحامضة و مقبلة وشكرا لك ولمنى اللي الفضل لها بتعرفنا كاخوات متحابات بالله ونستفيد من افكار بعض والله يخلينا ياها لاني لولاها ما تعرفت على وصفتك اللذيذة اللي حببتني بالسمك لانها سهلة وطيبة والله يجزي الجميع الخير

  6. منى 14 August 2008

    غيوثة لطفك و زووءك غمرني و الله

    ان شاء الله دايما أخوات متحابات و ربي يديم المعروف و الالفة ;)

  7. Iman 14 August 2008

    اهلين غيث حبيبتي و الله شفت موضوعك و كتبت رد لك ولكن حصل شيء مش عارفه كل ما احاول ابعته بيفصل و بيقول سجل دخول بسجل و بيرجع بيطلعي لحالو هههه مش عارفه ليش و بعدها كنت انشغلت كتير ما قدرت اتابع انا اسفه طولت عليكي بس كتير انبسطت انو عجبتك الوصفه الحمدلله و صحه و هنا على قلب اللي طبخ واللي اكل بس يا غيث لو بتشوفي كيف بتكون لو بتوفر عندكم سلمون الطعمه رهيبه مع انو انا مش من محبين السمك بس سبحان الله حبه البركه طعمتا شو زابطه مع السلمون على العموم شكرا حياتي على الكلام الحلو المزوق و نعم كلنا خوات هون و الشكر للمبدعه و الحبيبه منى و هالموقع المميز و انا كمان كتير عم بستفيد من هالموقع و عم بعمل اشياء بالعزايم عم بتبيض وشي ادام الناس فشكرا لموقع لقمه طيبه و لكل الاخوات اللي عم بيجودوا بالوصفات الذيذه
    لك كل الحب :)

  8. غيث 14 August 2008

    الله يسلمك اختي يا رب وتسلم ايدك مرة تانية وانا سالت عنك والحمد المانع خير مو مشكلةورح اعيدها لوصفتك ان شاء الله بالسلمون لانه كل شي متوفر هنا بحمد الله وشكرا لنصيحتك ورح جربها اذا راد الله

  9. منى 15 August 2008

    يا ستي جربتها اليوم و شو , عن جد تحفة .. و لا أسهل و الحلو الي فيها ان البهارات بسيطة و عطتني طعم كتير مختلف عن الطعم الي متعودة عليه , بس حسيت ان هي هي طعمة السمك ..

    الصورة ما عطت الوصفة حقها , ان شاء الله رح جربها بالسومون باقرب وقت و رح نزل صورة لتطبيقي الجديد ;)

    سلم دياتك أمونة على هيك وصفة مميزة

  10. Iman 16 August 2008

    منى انا كتير مبسوطه انك جربتيها صحه و هنا يا رب بالنسبه للصوره كتير منيحه اليوم رح خلي زينه تعلمني كيف بينزلو صور اذا عندك اكليل الجبل فريش افرمي شويه قدر ملعقه صغيره و رشيها على السلمون بدل البقدونس اذا بتحبوا تجربوا طعمه غريبه و جديده و اذا لا خليكي عالبقدونس سلم ايديكي يا منى و يعطيكي العافيه حياتي :)

  11. منى 16 August 2008

    بإذن الله رح اعمل بنصيحتك :)

    و عم استنى الصورة منك ;)

  12. Iman 17 August 2008

    العزيزه منى بعت الصور على الايميل ان شاء الله تكون عجبتك
    سوري ما بعرف كيف ابعتها بطريقه تانيه :roll

  13. منى 19 August 2008

    وصلت الصورة , سلم هل الديات ياحق أمونة , شي بيشهي :eek

    هي صورة لتطبيقي , و أكيدة بسيط كتير جنب الوصفة الاصلية

    [img]http://www.l2ma.com/images/stories/seafood/l2ma-grilled-fish-442.jpg[/img]

  14. ام سيمى 11 November 2008

    السلام عليكم
    اتمنى من حضرتك وصفة لتحضير السمكة الحرة
    مع جزيل شكري سلفا

  15. منى 11 November 2008

    و عليكم أفضل السلام و اتم التسليم اختي
    ان شاء الله اختي , هي وصفة واعدة فيها واحدة من الاخوات من فترة , باذن الله انزلها قريب

  16. JoJo 9 June 2009

    ما شاء الله شكله روعة واكيد الوصفة هتكون اروع
    يسلموو دياتك اموونة
    وانا باعشق الاسماك ولحومها

  17. Iman 10 June 2009

    شكرا يا جوجو على الرد الحلو. يا مزوقه. ان شاء الله بتجربيها و بتعجبك. :)

  18. Ruwshan 27 June 2013

    جربتها …..كثثييييييرررر طيب الف شكر علا المجهودكم

    • منى 27 June 2013

      هنا و الف الف صحة و عافية

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)