الكبة المبرومة


         وصفة : منى                 2007/09/06                 31 تعليقات
الكبة المبرومة

تحضير العجينة  :  

·          يغسل البرغل ثم ينقع بالماء البارد مع البصل لمدة ربع ساعة تقريباً , يصفى بعدها من الماء تماماً و يكبس باليد للتخلص من الماء الزائد .

·          يطحن البرغل المنقوع مع البصلة على ماكينة فرم اللحمة ثلاثة مرات .

·          يوضع البرغل المطحون و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .

·          تدعك الكبة و الهبرة و البهارات لمدة  10 دقائق على الأقل  و يفضل أكثر و هذه الخطوة يسهى عنها كثير من من يعد الكبة و هي خطوة مهمة جداً , و يضاف القليل من الماء إذا دعت الحاجة حتى الحصول على عجينة رطبة و طرية و متماسكة, أصبحت عجينة الكبة جاهزة .

تحضير الحشوة :

 ·          يقلي اللحم المفروم خشن بالسمنة و يفكك بملعقة خشبية ثم يتبل بالملح والبهارات و يترك على النار مع التقليب حتى ينضج و يجف مرق اللحمة تماماً ثم ترفع اللحمة عن النار .

·          يحمص الفستق الحلبي بالفرن أو على الميكروويف حتى تظهر رائحته الجميلة من دون أن يتحمص بشكل زائد .

·          يخلط اللحم الني و المقلي و الفستق جيداً حتى الحصول على عجينة متجانسة , يجب استعمال كمية أكبر من الظاهر بالصورة و لكن أولادي ما بيحبوا الفستق لذا لم أستخدم كمية كبيرة   ,  أصبحت الحشوة جاهزة .

تطبيق الوصفة :

·          تدهن صينية فرن بالسمنة .

·          يفرد قسم من عجينة الكبة على ورق نايلون مبلل بالماء على شكل مستطيل متوسط الحجم بسماكة نصف أو ثلات أرباع سنتيمتر تقريباً .

·          يوضع قس من الحشوة في منتصف المستطيل .

·          يلف النايلون من أحد الأطراف فتلتف معها الكبة حتى تغطي الحشوة .

·          يملس السطح باليد المبلولة بالماء و تسد الأطراف بعجينة الكبة و تنقل بحذر للصينية المدهونة بالسمنة .

·          بهذه الطريقة حضرنا أول أسطوانة , تكرر العملية حتى تنتهي كل الكبة و الحشوة , و تصف الأسطوانة الثانية ثم الثالثة مع ترك مسافة بين الاسطوانات كي لا تلتصق الاسطوانات ببعضها البعض .

·          يبلل طرف سكين غير حاد بالماء ثم ترسم خطوط مائلة على وجه الكبة المبرومة لتحدد حجم القطع بحيث تغرز السكينة بشكل لطيف في الكبة .

·          يحمى الفرن على درجة حرارة 180 مئوية , تذوب السمنة على نار هادئة ثم يدهن وجه الكبة بالسمنة و توضع في الفرن, و تسقى الكبة من وقت لأخر بالسمنة حتى لا يجف وجهها و تترك حتى تنضج  , تحتاج تقريباً لمدة نصف ساعة .

·          بعد أن تبرد الكبة قليلاً تقطع في نفس مكان التحديد .

·          ترتب قطع الكبة في صحن التقديم و تزين حسب الذوق و تقدم مع السلطة أو الفتوش أو اللبن .

سر الوصفة : 

·          عند إعداد الحشوة استخدامنا نوعين من اللحمة حتى تبقى الحشوة متماسكة أثناء تقطيع الكبة بعد نضجها .

·          قبل تقطيع الكبة يجب أن تترك لتبرد قليلاً كي لا تتفتت أثناء التقطيع .
   


مقادير الكبة :

5 كوب برغل أسمر ناعم
كيلو لحمة هبرة عجل مدقوقة للكبة
2 بصلة صغيرة مقطعة أرباع
ملعقة صغيرة ملح
ملعقة صغيرة بهارات مشكلة

مقادير الحشوة :

ملعقة كبيرة سمنة
نصف كيلو لحم غنم مفروم ناعماً
نصف كيلو لحم غنم مفروم خشناً
فستق حلبي ( كمية كبيرة )
ملح
بهار مشكل
رشة صغيرة قرفة

للوجه :

4 – 5 ملعقة كبيرة سمنة ( و يفضل استعمال مزيج من السمن العادي و السمن البلدي )





تحضير العجينة :

• يغسل البرغل ثم ينقع بالماء البارد مع البصل لمدة ربع ساعة تقريباً , يصفى بعدها من الماء تماماً و يكبس باليد للتخلص من الماء الزائد .

• يطحن البرغل المنقوع مع البصلة على ماكينة فرم اللحمة ثلاثة مرات .

• يوضع البرغل المطحون و الهبرة في وعاء مسطح كبير ( و يفضل وعاء فخاري إن وجد ) و يوضع صحن ماء صغير على طاولة العمل لتبليل اليدان به أثناء العجن .


• تدعك الكبة و الهبرة و البهارات لمدة 10 دقائق على الأقل و يفضل أكثر و هذه الخطوة يسهى عنها كثير من من يعد الكبة و هي خطوة مهمة جداً , و يضاف القليل من الماء إذا دعت الحاجة حتى الحصول على عجينة رطبة و طرية و متماسكة, أصبحت عجينة الكبة جاهزة .



تحضير الحشوة :

• يقلي اللحم المفروم خشن بالسمنة و يفكك بملعقة خشبية ثم يتبل بالملح والبهارات و يترك على النار مع التقليب حتى ينضج و يجف مرق اللحمة تماماً ثم ترفع اللحمة عن النار .

• يحمص الفستق الحلبي بالفرن أو على الميكروويف حتى تظهر رائحته الجميلة من دون أن يتحمص بشكل زائد .

• يخلط اللحم الني و المقلي و الفستق جيداً حتى الحصول على عجينة متجانسة , يجب استعمال كمية أكبر من الظاهر بالصورة و لكن أولادي ما بيحبوا الفستق لذا لم أستخدم كمية كبيرة , أصبحت الحشوة جاهزة .


تطبيق الوصفة :

• تدهن صينية فرن بالسمنة .

• يفرد قسم من عجينة الكبة على ورق نايلون مبلل بالماء على شكل مستطيل متوسط الحجم بسماكة نصف أو ثلات أرباع سنتيمتر تقريباً .



• يوضع قس من الحشوة في منتصف المستطيل .


• يلف النايلون من أحد الأطراف فتلتف معها الكبة حتى تغطي الحشوة .


• يملس السطح باليد المبلولة بالماء و تسد الأطراف بعجينة الكبة و تنقل بحذر للصينية المدهونة بالسمنة .

• بهذه الطريقة حضرنا أول أسطوانة , تكرر العملية حتى تنتهي كل الكبة و الحشوة , و تصف الأسطوانة الثانية ثم الثالثة مع ترك مسافة بين الاسطوانات كي لا تلتصق الاسطوانات ببعضها البعض .

• يبلل طرف سكين غير حاد بالماء ثم ترسم خطوط مائلة على وجه الكبة المبرومة لتحدد حجم القطع بحيث تغرز السكينة بشكل لطيف في الكبة .


• يحمى الفرن على درجة حرارة 180 مئوية , تذوب السمنة على نار هادئة ثم يدهن وجه الكبة بالسمنة و توضع في الفرن, و تسقى الكبة من وقت لأخر بالسمنة حتى لا يجف وجهها و تترك حتى تنضج , تحتاج تقريباً لمدة نصف ساعة .

• بعد أن تبرد الكبة قليلاً تقطع في نفس مكان التحديد .

• ترتب قطع الكبة في صحن التقديم و تزين حسب الذوق و تقدم مع السلطة أو الفتوش أو اللبن .


سر الوصفة :

• عند إعداد الحشوة استخدامنا نوعين من اللحمة حتى تبقى الحشوة متماسكة أثناء تقطيع الكبة بعد نضجها .

• قبل تقطيع الكبة يجب أن تترك لتبرد قليلاً كي لا تتفتت أثناء التقطيع .
  • وصفات تانية ممكن تعجبك


التعليقات

  1. linda 6 September 2007

    :zzz
    يا سلام يا منى
    الله يعطيكي الصحة والعافية
    كتير منظرها حلو
    انا ولا مرة دايئتها و لا حتى شايفتها بس بسمع فيها سمع

  2. منى 7 September 2007

    الله يسلمك ليندا العسل :)

    أنا هل الكبة نوعي المفضل مع الكبة اللبنية ..

    و كل ما بيكون عندي جمعة لرفقاتي أو رفقات زوجي بساويها و الكل بيقول لي كتير ناجحة معي ;)

    إذا جربتيها أكيد رح تحبيها

  3. ام نور 7 September 2007

    عنجد شي ظريف كتير سلم دياتك اخت منى اسا في شي نوع كبة مشهورين فيها اهل حلب ولا هول هني ما شالله شي روعة

  4. ام نور 7 September 2007

    شكلها مع الفستق حلبي بتشبة المبرومة نحن منسميها نوع من انواع الحلويات بقلب فستق وملفوف بشعيرية

  5. منى 8 September 2007

    هلا اختي ام نور :)

    في لسا انواع كتير , بس هدول هم أشهر الأنواع تقريباً :roll

    بس انا رح حاول نزل كل الوصفات إذا الله راد

    هدا الحلو كمان بيحضروه عنا و بيتسمى المبرومة ..

    كنت فاكرة ان اسمه برما في لبنان

    أختي جربي الكبة و ادعيلي ;)

  6. ام نور 10 September 2007

    صح ناس بيسموها برما وناس مبرومة كتير طيبة بس شغلا صعب كنت شوف البابا لما يشتغل فيها . وبالنسبة لا الكبة شي بيشهي وبيستاهل التجربة الصراحة بس صرت محتارة شو جرب :?

  7. منى 10 September 2007

    الله يجبر بخاطرك ام نور يا رب :)
    كلك زووء , و ان شاء الله تجربي الوصفة و تكون على زوءك ;)

  8. أم عباده 14 January 2008

    أختي منى بدي أطلب منك طلب صغير إذا ممكن
    بدي لو سمحتي تنزلينا المعجوقه لانو لما بناكلها بالمطاعم من حبها كتير ومرةطلبت من شف المطعم المقادير بس ماطلعت تمام :cry

  9. منى 15 January 2008

    هلا حبيبتي ام عبادة :)

    من عيوني بس يا ترى قصدك أيا نوع , المعجوقة بحلب هي لحمة محشية بالجبنة و الفطر أما المعجوقة بالشام فهي نوع حلو :roll

  10. أم عباده 15 January 2008

    تسلم عيونك أختي
    لا بقصد المعجوقه الحلبية المحشيه جوز وفطر واللذي منو
    وبيعتبروها نوع كبه مع انو على ما بعرف مافيها برغل
    والف شكر عم نعذبك معنا

  11. kuwaiti_girl 7 February 2008

    هالكبه مره شفتها في موقع بالانترنت بس الصور ما كانت واضحه وما كنت مستوعبه شلون تكون الكبه ملفوفه

    شكلها جدا حلو.. بس اشعر شغلها صعب.. خاصه اني ما اعمل الكبه الا برمضان فيدي مو متعوده على فرد الكبه

    بجرب بيوم من الايام اعملها ان شاء الله

  12. منى 9 February 2008

    و الله اختي انا هل الكبة من أسهل الانواع علي و صدقيني مو صعبة و لا بدها شطارة :)

    يا ريت تجربيها عن جد ما رح تندمي أبدا ;)

  13. رندوش 15 April 2008

    عزيزتي منى سلم الديات عزيزتي
    كل اطباقك شهيه ومشجعه للتطبيق
    وانا كنت طبقتها للكبه المبرومه
    وطلعت بتشهي وصدقيني كل العائله بتسأل وبدعيلك
    تسلم الايادي

  14. منى 15 April 2008

    الله يسلمك رندوشة حبيبتي , و ان شاء الله هنا و صحة على قلبك و قلب كل العيلة الحلوة , و يا ريي الك متل هل الدعوات و أكتر ;)

  15. Eman 2 August 2008

    السلام عليكم ورحمة الله وبركاته،
    أنا عملت الكبة وضبطت معي ، بس المشكلة صارت وقت حطيتها بالفرن ، أنا كنت مفرزتها ودخلتها الفرن ولسه التلج عليها ، وتأخرت لحتى استوت ،فاضريت قطعها ورجعها للفرن ،فاستوت أكتر ونشفت، وبقيت أحطلها سمنة حتى ما تنشف لبين ما خلصت العلبة ،فصرت أحط زبدة :upset ، كتير انقهت لأنه صار هيك معي يوم العزيمة..
    يا ريت تنصيحيني كيف أعملها إذا مفرزة.. :?

  16. منى 3 August 2008

    ولي على قلبي , يلا معلش خيرها بغيرها

    لما بتفرزي الكبة بتطالعيهاو بتحطيها فورا على صينية مدهونةو بالفرن الحامي على طول و بتسقيها بالسمنة بس من دون تقطيع ..كان أخذت سمنة أأقل بكتير :cry

    على كل انا ما كتير بحب حط الكبة بالفريزر , بحسها بتنفش الحبة و ما بتبقى متل التازة ابدا ..

    يلا خيرها بغيرها و انا هلا اكلت هم العزيمة

  17. الدمشقية 14 October 2008

    تسلم ايدك يا منى فعلاً منظرها بياخد العقل
    إن شاء الله شي يوم بجربها
    نحن منعمل كل أنواع الكبة بس الحقيقة هي من زمان جاي على بالي ساويها وصورتك عنها شجعتني اكتر :zzz

  18. منى 14 October 2008

    مية هلا فيك اختي :) لسا الصور هي صور قديمة و من موبايل , لو تشوفي صور منيحة الها رح تجربيها فوراً :zzz مستاهلة كتير و الله

  19. souha 29 November 2008

    هلا منى 8)
    تسلم دياتك أنا و لا مرة ساويت كبة لحالي دايما مهمتي هي مساعدة ماما و تنظيف المطبخ و المهمة الأحلى هي إني أكل الكبة
    هلأ سؤالين :?
    1-قصدك بلحمةغنم مفرومة ناعم بالحشوة هبرة؟
    2-الصورة و إنت عم تلفي مستطيل الكبة مو واضحة كتير ما عم استوعب كيف بدو يقفل الممستطيل على بعضو :upset

  20. منى 30 November 2008

    هلا سهى :)
    انا كنت متلك بس بعدها صرت اعملها لحالي , هي بدها شغل بس بعدها مستاهلة , هلا انا صرت الخبير الفني بعيلتي لتحضير المبرومة :grin
    بقصد باللحمة المفرومة خشن لحمة ايما و اللحمة المفرومة ناعم هي لحمة كباب , انا كتبت هيك لحتى الكل يفهم علي ;)

    الصور مو واضحة لان تصوير موبايل , ان شاء الله بس ما اعملها مرةتانية ببقى بصورها بصور كبيرة و بنزلها ;)

  21. hajar 23 October 2009

    يمممممممممممممممممممممممم هي أكلتي المفضلة يسلمو منى

  22. منى 23 October 2009

    الله يسلمك هاجر , ان شاء الله تجربيها و تكون طيبةةةة ;)

  23. na3oom 28 March 2010

    منوش هالكبة بعزها كتير ومن زمان ما اكلتها نفسي أعملها انا شفت خالتي بحلب كانت شاطرة فيها
    هلأ أنا مو شاطرة بالكبة أو فيك تعتبريني مبتدئة فيها ونفسي أعمل شي نوع لعزيمة عندي ناوية اعملها الأسبوع الجاي
    فأي نوع بتنصحيني أعملها وكيف كريقة شوائها بحيث لما سخنها يوم العزيمة ما تنشف أو تستوي بزيادة

  24. منى 31 March 2010

    هلا نعوم :)
    هلا اسهل نوع هو الكبة بالصينية و فيكي كمان تعتبري هل النوع مو صعب .
    ما فيكي تشوي الكبة قبل بيوم لازم تشويها بيوم العزيمة , لان ما بتطلع طيبة الا تازة . فيكي تشويها الساعة 12 مثلاً و ترعي تسخنيها على خفيف بالفرن ;)
    لازم تكون عينك عليها لحتى ما تتقمر و اذا عم نحكي عن المبرومة لازم تقلبيها

    الله يسر العزيمة عليك 8)

  25. noura 1 January 2011

    مرحبى منى انا مشتركة جديدة بالموقع واشتركت على ئد ماشفت وصفات بتجنن لئلك حسيت ئنو لازم كون متواصلة معكن – بدي اسئلك بخصوص الكبة المبرومة لانو بصراحة بسمع كتير عنا بحلب وئنا كتييييير طيبي فمشتهية ئنو جربا بس خايفي من موضوع اللحمة النية خايفي ئنو ماتستوي مظبوط وشغلي تانية هلا مابصير ئنو ئطعا ئبل مافوتا عالفرن ؟؟بتصور ئنو هيك بينضمن سوي اللحمة -وشكرا كتير لئلك

  26. منى 1 January 2011

    هلا نورا :)
    لا لا تخافي ابدا من اللحمة لان رح تستوي باذن الله بالمية مية و على ضمانتي :zzz

    ايا سؤال تاني من عيوني , و منورة نورا , ان شاء الله تتواصلي معنا دوما ;)

  27. noura 1 January 2011

    شكرا كتير حبيبتي على ردك واهتمامك معلش رح تئل عليكي بسؤوال تاني لئت بطريئتك بالكبة عموما ئنك بديري البرغل 3 مرات لحالو نحنا بحمص منديرو مرة لحالو ومرة مع الهبرة سؤوالي ئني لما بدي ساوي المبرومة ساوي العجينة على طريئتنا ولا اتبع طريئتك بحذافيرا ؟؟؟ وبالنسبي للفستق انتي بالصورة حاطتي حبة كاملي من دون تئطيع صح ؟؟ واااااخر سؤوال هي طعمتا اريبي لاي نوع كبة؟وشكرا كتييييير لئلك :)

  28. noura 1 January 2011

    نسيت ئلك حبيبتي ئني جربت من وصفاتك كاتو التفاح بالصوص الدهبي طبعا رائع جدا ونكهة جدا راقيةوجربت كيك السفن اب بالليمون وعجينة امي الذهبية هدول التنين زكروني بنكهة ئديمة ئلي زماااان مادئتا خاصة العجينة -وكمان ناوي اعمل اللحم بالعجين ياترى بيطلع اريب ليلي منوصي علي

  29. منى 2 January 2011

    هلا نورا :)
    فيكت تعمليها بطريقتك مو مشكلة , و الفستق بحطه حب بيطلع منظره تحفة وقت التقسيم , اما عن طعمتها فهي مو قريبة على ايا نوع , نكهة خاصة فيها :zzz

    الف الف صحة و هنا على كل شي جربتيه ,
    اللحم بعجين بيطلع متل الجاهز و انظف و اظمن , بس بده شغل :roll

  30. r0sa_rimi2 20 May 2011

    عجبتني اكتر انواع الكبب الي هون مع اني نباتية بس بحب اعملها لزوجي ولولادي المهم بس في كبة اتعلمتها من ستي الله يرحمها وهي كبة غالية علي كتير لانو بتذكرني فيها المهم طريقتها سهلة جدا واهم شي ما فيها لحمة وهي عبارة عن برغل وطحين وريحان وبصلة مدقوقة وبهارات الكبة من كمون وفلفل اسود وبهار ابيض … بنعملهم هيك قراص زغيييييرة بس مش كتير صغيرة زي الشيش برك بنفس الحجم وبعدين بنغلي مي سخنة مملحة وفيها زيت زيتون بس مش كتير يكون في مي حتى تعقد مع قراص الكبة وبننزلهم فيها وبعدين بنزيدتوم مدقوق ولمون يعني حامض ونعنع يابس مع المي وبس تعقد المرقة وتستوي الكبة بنطفي تحتها في ناس بتسمي هاي الكبة برصاص عزرايل بس ما حلو هل الاسم انا بسميها متل ما كانت ستي الله يرحمها تسمهيها كبة الراهب وجربيها وادعيلي واترحمي على ستي

  31. r0sa_rimi2 20 May 2011

    بالمناسبة عندي كتييييييييييييير وصفات عن الكبة وغيرها ممكن اقدر شارككم فيها بس في مشكلة ما بقدر نزل الصور بلاقي الفيسبوك اهين بتحميل الصور يعني ممكن انزلهم هناك وانتو بمعرفتكم تنزلوهم هون واذا بدكم فيكم تنزلو الوصفة كمان وتعدلو عليها لو بدها اي تعديل ممكن؟

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)