الملوخية الخضراء بالدجاج


         وصفة : منى                 2008/08/13                 8 تعليقات
الملوخية الخضراء بالدجاج



كيلو من ورق الملوخية الخضراء المقطفة
2 ملعقة كبيرة سمنة
دجاجة متوسطة الحجم
باقة كبيرة كزبرة خضراء
6 – 8 فص ثوم
2 ملعقة كبيرة كزبرة يابسة
بهار و رشة قرفة
باقة عطرية

• تغسل أوراق الملوخية و توضع على مصفاة للتخلص من الماء الزائد ثم تفرد على شرشف أبيض طول الليل حتى تجف من الماء بشكل تام .

• تقلب الدجاجة بالقليل من الزيت حتى تحمر ثم تضاف الباقة العطرية و تترك حتى تنضج ثم ينزع العظم و الجلد و تقطع لقطع مرتبة .

• تقلب نصف أوراق الملوخية بثلاث أرباع ملعقة من السمنة لمدة عشر دقائق تقريباً على نار هادئة جداً ثم ترفع و يحمص النصف الأخر من الملوخية بنفس الطريقة .

• يصفى مرق سلق الدجاج و يضاف للملوخية حتى تغمر الأوراق و تترك على النار لمدة ربع ساعة .

• تفرم الكزبرة ناعمة و يهرس الثوم ثم يقلب على نار هادئة مع الكزبرة الخضراء و الكزبرة الناشفة و البهار و رشة القرفة بما تبقى من السمنة حتى تظهر رائحة الثوم و الكزبرة اللذيذة مع ضرورة الانتباه أن لا يحترق الثوم .

• تضاف دقة الثوم للملوخية مع قطع الدجاج و تترك على النار لمدة ربع ساعة أخرى .

• تقدم الملوخية مع الرز العادي أو الرز بالشعيرية مع الليمون أو السلطة الحامضة .




  • وصفات تانية ممكن تعجبك


التعليقات

  1. ام نور 13 August 2008

    شو هالملوخية هاي يا منى رهيبة فعلا اكلة غير شكل :p :p انا بعتبرا من اكلات المفضلة منعملا متل طريقتك بس منحط الحامض مع التوم وعند التقديم منفرم بصلة ناعمة بصحن صغير ومنضيف خل فوق البصلة ومنحمص خبز مقطع وبيصير كل واحد يحط بصحنو ملوخية برز وعالوج ملعقة بصل وخل ورشة خبز والحامض :p :p وكلي يا منى وكمان منعملا بزيت زيتون وبندورة لما تكون خضرا اسا شو طيبة بتطلع وسريعة

  2. منى 13 August 2008

    نمممي , فكرة أكيد بتاخد العقل :eek , يا اختي غير شكل الطبخ اللبناني

    كيف بتعملوها بالبندورة , ما كتير فهمت , الصراحة انا الملوخية لو يصحللي كل يوم أكلها ما بقول لا :zzz

  3. غيث 14 August 2008

    اه يا عيني عليكما انتما الاثنتان ما الذكما والذ افكاركمااليوم منى وام نور. اه يا منى على الملوكية منظرها بيجنن الله يسلم ايديك والله نحن بحلب بنعملها مجففة ورق وليست مطحونة ورائعة بتطلع اما هنا المجففة قليلة بس بتلاقي الخضرة متوفرة وخاصة المصريين شاغلين نصف المملكة وبيحبو الملوخية بالارانب وفروج بالبطاطس والحمام المحشي الله يهنيهم برجع لفكرتك بالملوخية الخضراانا بسورية ما ذقتها خضرا الا عند البنات الحمويات يا ستي كانت خيلة بس المشكلة انهم ما بيعرفوا طريقتها(طبيبات ما بيعرفوا يطبخوا بس بيعرفوا يدرسوا هههه) امهم كانت تزودهم بالطبخات المهم ما استفدت منهم بطريقتا بس طعمتها لهلق بفمي وانا كتير ممنونتك على هالطريقة اللي علمتينا ياهالاني مشتهية اساويها خضرة وخايفة ما اعرف اما الان فقريبا رح اجربها لانه هلق موسمها متل ما تفضلت يا مذوقة شكرا كتير كتير الك وببقى بخبرك شو بيصير لما بعملها .

  4. منى 14 August 2008

    هلا غيوثة :)
    ان شاء الله تجربيها لان انا لما اتعلمتها خطرلي انو كيف الحلبية فاتتهن هيك فوته و هنن مشهوريين بالنفس الطيب بس ما بيعملوها ..

    متل ما قلتي بحلب منعملها مجففة اكتر الشي اما مطحونة أو مورقة و كمان طيببة بالتجفيف , بس هيك تغيير

    ان شاء الله تجربيها و تكون متل الي دقتيها و تعجبك :zzz

  5. Iman 14 August 2008

    يم يم منى من الاكلات اللي كتير بحبا بس ما بعملا لانو زوجي و بنتي بيحبوا الناعمه بس بتعرفي يا ستي بكره بدي اعز نفسي و اعمل صحن لي لوحدي من زماااااان ما اكلتا ورق انا بحبا غماس مع الخبز لما بتكون ورق و على جاج كمان يا عيني يسلموا منى و الاخت العزيزه ام نور نحنا كمان مناكلا مع البصل و الخل و الخبز المحمص فامي لبنانيه و هذه الطريقه لبنانيه بتجنن كمان من زماااااان ههههه شو يا بنات فتحتولنا دفتر الذكريات مبين عليكون ههههه يعطيكون العافيه وصحه يا رب :)

  6. ام نور 14 August 2008

    الله يخليكي با اخت غيث :)
    انت ومنى كلكون ذوق هيدا بس من لطفكن انا الصراحة بحس الاكل خلق بحلب عندكون نفس طيبة بالاكل وفن وذوق وكتير الاكلة بتدعموها وبتهتموا فيا
    :)

  7. منى 14 August 2008

    هلا أمونة :)

    انا متلك لما العيلة عندي ما بتحب شي أكلة بعزم حالي عليها بصحن من القياس الميني ميني , شو بدنا نعمل قانون الاكثرية :grin

    الله يحفظلك ماماتك و عيلتك كلها , ان شاء الله رح جربها على الطريقة اللبنانية تاني مرة بحضرها

  8. منى 14 August 2008

    هلا حبيبتي ام نور :)
    هادا بس من زووءك , ان شاء الله بتبقى بتدوقي من أكلنا باول زيارة لحلب

    الف شكر ليك على الوصفة , رح طبقها باقرب وقت ان شاء الله , ممكن نزلها كوصفة مستقلة .؟

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)