الملوخية على الطريقة الحلبية


         وصفة : منى                 2008/08/14                 25 تعليقات
الملوخية على الطريقة الحلبية


3 كوب من الملوخية المفروكة
2 ملعقة كبيرة سمنة
دجاجة متوسطة الحجم
6 كوب من مرق الدجاج
6 – 8 فص ثوم مهروس
2 ملعقة كبيرة كزبرة يابسة
رشة بهار
باقة عطرية

• تقلب الدجاجة بالقليل من الزيت حتى تحمر ثم تضاف الباقة العطرية و تغمر بالماء و يغطى القدر و تترك حتى تنضج ثم ينزع العظم و الجلد و تقطع لقطع مرتبة .

• تقلب الملوخية بالسمنة لمدة نصف ساعة أو أكثر على نار هادئة جداً حتى يصبح عض الملوخية أشقر فاتح جداً ثم يضاف الثوم و الكزبرة و البهار و تقلب لبضع دقائق إضافية أو حتى تظهر رائحة الثوم و الملوخية اللذيذة .

• يصفى مرق سلق الدجاج و يضاف للملوخية و يترك على النار لمدة 25 – 30 دقيقة أو حتى يصبح قوام الملوخية سميكا نوعاً ما ثم تضاف قطع الدجاج و تترك على النار لخمس دقائق أخرى .

• تقدم الملوخية مع الرز بالشعيرية مع الليمون أو السلطة الحامضة أو المخلل .
  • وصفات تانية ممكن تعجبك


التعليقات

  1. رنا 15 August 2008

    الملوخية من اطيب والذ واشهى الاكلات يعني اذا بتغدى وبتعشى منها شهر مابمل منها ..شكرا لالك على هالطريقة المرتبة بطبخ الملوخية اللذيذة ..بس في شغلة انه حماتي مابتفرك الملوخية ابدا بس بتخليها ورق وبتقليها كلها سوا بدون غسيل لانه هي مغسولة اصلا ..وهيك بتتكسر شي بسيط بالتقلاية وبتطلع ورق ولذيذة كتير

  2. منى 15 August 2008

    هلا رنونة :)
    أكيدة ما بقى بدها غسل , ما هي مغسولة و منشفة من قبل ما تنحفظ , و متل ما قلتي ان ممكن تنطبخ ورق بحالها و ممكن تنفرك و بعدها تنطبخ , و شو ما كانت تبقى نممي ;)

  3. غيث 15 August 2008

    يا عيني عليك يا منى على ملوخياتك الملوكيات فعلا يا ستي حيرتينا شو بدنا نطبق لنطبق المهم اليوم جربت الملوخية الخضراء ويا عيني عليك يا قلبي على هالوصفة الرائعةبالفعل ما بعرف شو اقول لك وكيف اشكرك هي هيه الوصفة اللي منتظرة من زمان اعرفها وخايفة اسال حدا عليها ويكون مو ثقة والمشكلة كنت صايمة اليوم وانا عبشم الروائح اللي بتجنن وخذي فرط قلبي لوقت ما افطرت المغرب ورحت في سباق مع الصحون وتغلبت وعيني بالاكل قلتله لزوجي المسا العشاء كمان ملوخية ما شبعت منها شكرا من القلب الى قلبي منى والله يطعمك مراد قلبك لاننا ما بقى نتعذب بالطبخ فورا مقادير مظبوطة ولذيذة والله وكاني دايقتها رغم كوني صايمة من كتر ما طيبة الله يعطيكم الف عافية ورمضان كريم على الجميع اسرة موقع لقمة طيبة :zzz

  4. منى 15 August 2008

    ريتو مية ألف صحة و هنا غيوثة ..

    حسيت فيك , ما انا لما حضرت الملوخية الورق , يمكن خلصت نص الطبخة و هي على النار grin

    الله يتقبل صيامك , اليوم كل البيت عنا صايمين الحمد لله , بس انا لسا ما الي جلادة على الصوم , الله يهون علينا و يتقبل منك و منا يا حق :zzz

    ان شاء الله رمضان كريم عليك كمان و على كل أهلك و حبايبك , هلا حبيبتي غيوثة

  5. نوريتا 19 August 2008

    السلام عليكم ورحمة الله وبركاتو
    اريدان اشكركم على هذا الموقع الاكثر من رائع ووفقكم الله
    بس لدي سؤال ماهي الباقة العطرية مم تتالف وشكرا

  6. منى 19 August 2008

    هلا نوريتا :) مية هلا نور الموقع
    الباقة العطرية مجموعة معطرات و بهارات تضاف لسلق اللحوم أو الدجاج لحتى تعطيها طعم طيب , ممكن تضيفي اي بهارات صحيحة موجودة عندك متل حب الهال أو أعواد القرفة و ورق الغار و الزنجبيل الصحيح و حب الفلفل الأسود أو الفلفل الحلو .. اضافة لحبة بصل كاملة أو كراث أو جزر , مو ضروري نضيف الكل , الموجود عندنا منضيفه ;)

  7. منامينو 29 November 2008

    حبيبتي منى، عندي كمية ملوخية ناشفة ومفروكة متورّطة فيها. كيف بتنعمل؟؟ لإنه أنا بالعادة بستعمل الملوخية الخضرا أو المثلجة.. بس ناشفة ومفروكة… هاي أول مرة. عمتفصل :cry النجدة ساعدوني :grin :cry

  8. منى 29 November 2008

    هلا منونة :)
    شو متورطة و ما متورطة نحنا بسوريا ما منعمل الملوخية بغير وقتها الا ناشفة و مفروكة ..
    اصلا لما عرفت ان في ناس بتستعملها خضراء صرت هيك :x بس لما جربتها حبيتها :grin

    المهم رح اقلك سر بيخلي ملوخيتك ما تفصل , أهم الشي انك تقليها على نار هادية , و لحتى تعرفي ان الملوخية صارت جاهزة لاضافة المرق بتحطي معها ملعقة صغيرة من الصنوبر أول التقلية و بتقلي الملوخية متل ما قلت الك على نار هادية كتير و انت عم تحركيها , يعني ما بتوقفي و لا لحظة , التحميص بياخد معك على حسب الكمية , أنا على طبخة عيلتي ممكن ياخد معي نص ساعة , و انت بس ما صار الصنوبر لونه أشقر معناها ملوخيتك صارت جاهزة لاضافة المرق .

    إذا أضفتي المرق قبل هيك رح تفصل و إذا كانت النار عالية أو تركتي الملوخية من دون تحريك أو كانت السمنة قليلة فرح تحترق ملوخيتك :roll

    الملوخية الناشفة هي أكلة ملوكية اذا انطبخت مظبوط , شو رايك تعزميني لعندك لحتى اطبخاك اياها , أضمن :grin

  9. منامينو 29 November 2008

    تسلميلي يا عسل ;)

    بجربها على طريقتك وان شاء الله ما تكون العواقب وخيمة :grin . الله يسلم هالإيدين يا رب :)

  10. منى 29 November 2008

    الله يسلمك و يحفظك , ان شاءالله تحبيها , انا عني بمووت عليها :zzz

  11. JoJo 9 June 2009

    تقريبا نفس الطريقة الفلسطينية وانا باموت عالملوخية حتي مرات باشرب اخر شي بيتبقي في الصحن :p

  12. منى 10 June 2009

    هلا جوجو :)
    و انا متلك و الله بتلاقيني بيطلع صحني فاضي و نظيف .
    ممم , ما كنت اعرف ان الفلسطينية بيعملوه بنفس الطريقة , الف شكر الك للمعلومة حبيبتي ;)

  13. آرام 5 July 2009

    مرحبا أخت منى .. الملوخية من الأكلات المفضلة جداً عندي .. وهي (بالإضافة لمنسفة الباذنجان والمامونية) ما بطبخها إلا بالسمن العربي وإلا ما بطبخها أبداً .. بحس هالأكلات التلاتة تحديداً حرام ينطبخوا بغير سمنة .. الملوخية ما بحبها مفروكة أبداً يمكن لأني تعودت عليها ورق .. وللأسف مو دائماً بتنجح معي لأنو متل ما قلتي بدها انتباه شديد ومعلمية كتير بالتحميص .. البارحة طبختها وجربت طريقة الصنوبر بالتحميص بس طلع تحميصها زيادة شوي .. بالعادة بحمص الصنوبر لحاله.
    في وحدة قريبتي مشهورة بأنها أشطر طباخة بالعيلة كلها .. أكلاتها كلها غير شكل وخصوصاً البامية والملوخية وما حدا بتطلع معه متلها أبداً .. فعلاً بحياتي ما شفت أطيب من ملوخيتها .. من فترة أعطتني سر عن الملوخية .. الثوم بتقسمه نصين .. نص بتحطه بالأول مع التحميص كالعادة .. والنص التاني بتحطه ني بآخر خمس دقائق وبعدين بتطفي النار .. جربيها شي مرة وادعيلي.
    آخر نقطة .. بالسطر الأول من طريقة التحضير مو مذكور بشكل واضح إضافة الماء لسلق الدجاج وممكن يلتبس الأمر على البعض إذا ما بيعرفوا الطريقة .. وبالفقرة الثالثة مكتوب ساعة بدل دقيقة .. وآسف للإطالة :)

  14. منى 7 July 2009

    و كمان اضافة للتلات الاكلات عندك الكبة بصينية و بقية الكبب الي المفروض ان تنطبخ بالسمنة, حرام الواحد يعزب حاله و بعدها يخبصها بالاخير و يطبخها بالزيت , اما سمنة معتبرة او نو ..

    انا عكسك , الملوخية الورق ما دقتها الا لمن كبرت لان ما حدا بعيلتي بيعملها , كمان هلا صرت حضرها و بتطلع طيبة كتير

    معلش سماح هل المرة لان ما زبطت معك تمام , و ان شاء الله المرة التانية بتحمصها متل مو متعود و بتطلع اطيب . و كل ما جربت اكتر بيصير عندك خبرة و معلمية اكتر

    مرة دقت ملوخية عند واحدة من قريباتي و كانت اطيب ملوخية بدوقها بحياتي كلها , و مع اني حسيت ان في ” ان ” بوصفتها بس هي ما عطتني و لا معلومة جديدة أو مختلفة عن طريقة ملوخيتي , بقى اتوقع ان اضافة التوم بالاخير هو السر , الف شكر الك للمعلومة و رح جربها قريب , لان حاسة حالي بدي طنجرة ملوخية كبيرة بعد كل هل الحكي الي بيجوع :grin

    رح عدل الوصفة اخي , الف شكر الك للتنبيه و انا انتظر ملاحظاتك و ردودك دوما .

    نورت

  15. ميديا 16 August 2009

    تسلم ايدك منى بس عندي ملاحظة صغيرة الفروجة لازم تنسلق هيك نحنا منعمل بحلب بحياتي ما سمعت انو تقلب بزيت عذرا وانا بحمص الملوخية بتوم وكزبرة وما في حدا اكلا عندي الا واخد طريقتا 8) تقبلي مروري

  16. منى 20 August 2009

    هلا ميديا :)
    مية اهلا و سهلا , نورتي و شرفتي أختي .

    هلا ممكن تسلقيها و ممكن تقلبيها بالزيت و بعدها تسلقيها , بالطريقتين رح تنسلق بس انا بشوف ان الدجاج و اللحمة اذا تقلبوا شوي قبل ما ينسلقوا بتصير طعمتهم أطيب :zzz

    أما اضافة التوم و الكزبرة من الاول , بحس ان ممكن يلتدع التوم اذا حمضته من الاول للاخير , لهيك بحمصض شوي الملوخية و بعد شوي بضيف التوم , و على كل الاحوال هل الاختلافات البسيطة لا تفسد للملوخية قضية ;)

  17. آرام 21 August 2009

    مرحبا أخت منى
    آسف للتدخل بس أعتقد أن الأخت ميديا فهمت من الوصفة أن الدجاج يقلب بالزيت فقط دون سلق .. وهذا بالضبط ما أشرت إليه في تعليقي السابق على الوصفة عندما قلت أنك لم تذكري بشكل واضح إضافة الماء من أجل سلق الدجاج مما قد يسبب التباس في فهم المقصود .. وأنت وعدت حينها بتعديل الوصفة :)

  18. منى 22 August 2009

    صح انا وعدت بس راح عن بالي , يلا هلا رح عدلها ان شاء الله :roll

  19. نادين 8 October 2009

    يالله يا منى انا كتيييييييييير بحب الملوخيه والليموت ممممممممم
    وعندي ملوخيه ناعمه وورق بس بخاف اعملها و ما تنجح ورح تكون الصدمه كبيرة لانو بحبها :cry

  20. منى 8 October 2009

    لا لا تخافي , سمي بالله و حطي الصنوبر مع الملوخية و حمصي على نار هااااااادية و بعدها ادعيلي ان شاء الله :)

  21. om nabeel 5 October 2010

    تسلم ايدكي منى على هالوصفة الرائعة
    فكرة الصنوبر كتير حلوة
    ورح اجربها قريبا ان شاء الله عندي سؤال الك بما اني جديدة معكم
    انتي حلبيةواعذري تطفلي

  22. zahraa.sh 16 November 2011

    مرحبا منى ..أنا مغرمة بالملوكية كتير خصوصا الخشنة مع الدجاج يمي يمي ولما سافرت ماما فرزتلي ملوكية :grin
    بس خلصت :cry ومشتهية عليها كتير ، أنا عندي ملوكية ناعمة مفروكة يعني وجاي عبالي أطبخها باللحمة لأنو مرة دقتها عند قرايبينا وحبيتا هيك كمان …”لحمة مدعبلة :grin ”
    هلأ السؤال الذي يطرح نفسوا اكيد الملوكية بدها تحميص بس انو اللحمة كيف منعملها ؟؟ :?
    وبدي ارفع طلب ، انو خصصيلنا قسم لأكلات الريجيم معلش لو بدها خبز منبقى مناكل خبز حنطة :roll زوجي على طول بيقلي طبخيلنا طبخة خفيفة بدنا نخفف هالكرش :grin وفوق منها انا كمان سمنت :cry
    وبس :) يسلمو مقدماً خيت 8)

  23. منى 16 November 2011

    هلا زهرة :)
    يا ستي عن جد معك حق ما تقولي الا ملوكية , اذا كانت على اصولها بتكون شغلة :roll

    اللحمة بتدعكيها مع ملح و بهار و رشة قرفة و بتدعبيلها و بعدها بتقليها بالسمنة و بترفعيها و بنفس السمنة بتقلي الملوكية

    في وصفات خفيفة هون و هون , و ان شاء الله بحطهم بقسم لحالهن

    مية هلا فيك , منورة

  24. sad 9 November 2015

    8 فصوص توم
    هي متومة

    • منى 25 November 2015

      حط الكمية الي بتناسبك

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)