امبطن ليبي


         وصفة : منى                 2011/11/20                 23 تعليقات
امبطن ليبي

الوصفة اليوم وصفة مقبلات شعبية تراثية ليبية , مو معقول لما بتتحضر على اصولها اديه بتكون طيبة و نكهة الحشوة مع البهارات بتاخد العقل , اليوم اكلناها و اكلنا صوابعنا وراها الحمد لله اللهم ادمها نعمة و لا تجعلها الى زوال .
يمكن هي من اكتر الوصفات اختفاءا كل ما بحضرها و أكتر الشي بتتحضر بالبطاطا , بس كمان باالقرنبيط طيبة كتير و بالفليفلة كمان بتكون يمممي , انا عادة بحضر اكتر من نوع اذا متوفر و اولادي بيموتوا على هل الاكلة و نوعهم المفضل البطاطا , لهيك دوما بس ما ابدى ااقلي و تطلع الريحة الطيبة بتلاقي الكل ركض على المطبخ انو شو اليوم عاملتيلنا اليوم ماميتو , مممم


اذا زاد لتاني يوم ممكن نغمرها بصلصة حمرا و نرجع نسخنها بالفرن , كمان كتير طيبة و مستاهلة كل تجربة بس انا مبطن البطاطا ما بحبه مع الصوص الاحمر . اما القرنبيط و الفليفلة بحبهن بالطريقتين .


تحياتي لليبيا و شعبها و ان شاء الله دوما الشعب الليبي في القمة

بالصحة و الهنا




يمكن اختيار أحد أنواع الخضار التالية :

3 حبة كبيرة بطاطا , رأس قرنبيط متوسط , 3 أو 4 حبة كبيرة فليفلة حمراء أو خضراء , الكميات تقريبية و حسب الحاجة
سمنة

الحشوة :

نصف كيلو لحمة غنم , مفرومة خشن
3 – 4 ملعقة كبيرة بقدونس , مفروم ناعم
بصلة متوسطة , مفرومة ناعماً جداً
نصف ملعقة صغيرة فلفل أسود , مطحون طازج
ملعقة صغيرة فليفلة حمراء ناعمة , حرّة أو حلوة حسب الرغبة
ربع ملعقة صغيرة من كل من الهال و الفلفل الأبيض و القرفة و جوزة الطيب مطحونة و الزنجبيل

للتغميس :

نصف كوب طحين
2 – 3 بيض

الصلصة الحمراء :

2 ملعقة كبيرة معجون بندورة
2 كوب ماء
ملعقة صغيرة فليفلة حمراء ناعمة , حرّة أو حلوة حسب الرغبة
ملح و رشة فلفل أسود








• تجهز الخضار , تقشر البطاطا و تقطع لشرائح رقيقة نوعاً ما , تقطع كل شرحة لقسمين باستخدام سكين حاد بحيث تبقى الشرحتان على اتصال في احد الأطراف كما في الصورة , ترش بالقليل من الملح . الشرائح يجب أن غير سميكة كي تنضج عند القلي . تقطع الفليفلة لدوائر بسماكة أكثر من نصف سم بقليل . يقطع رأس القرنبيط لزهرات ثم تقص كل زهرة في المنتصف بحيث تبقى متصلة من أعلى الزهرة .



• تمزج مقادير الحشوة بلطف ثم تحشى البطاطا أو القرنبيط أو الفليفلة .



• يضرب البيض مع القليل من الملح و الفلفل الابيض و الفليفلة الحمراء .

• يحمى الزيت على نار متوسطة , تغمس الخضار المحشية بالطحين ثم بالبيض و توضع في الزيت و تقلى حتى تشقر , ترفع على ورق ماص و تترك لبضع دقائق . الزيت يجب أن تكون درجة حرارته متوسطة الى قوية كي تنضج البطاطا من الداخل و الخارج .

• يصف المبطن في طبق فرن , يوزع القليل من السمنة على كل قطعة باستخدام فرشاة , يوضع الطبق في الفرن لمدة 10 – 15 دقيقة في فرن على درجة حرارة 180 في الرف الوسط حتى يبدأ القليل من الزيت بالتجمع تحت كل قطعة , اضافة السمنة اختيارية و يمكن الاستغناء عنها .

• يقدم المبطن فوراً مع نوع من السلطات الحامضة كنوع من المقبلات اللذيذة .

• يمكن تغطيه المبطن بالصوص الأحمر , تخلط كل مقادير الصوص على البارد حتى تتمازج , يدهن المبطن السمنة ثم يوزع عليه الصوص الأحمر و يدخل للفرن لمدة 20 دقيقة أو حتى يتشرب كل الصوص و يقدم المبطن كطبق رئيسي .


التعليقات

  1. أم نوران 20 November 2011

    ماشاء الله عليكي يا منوش ما بعفرف اشكرك على المقدمة ولا على الوصفة؟؟الله يعطيكي العافية سؤال عن الوصفة : معلش ازا استعضت عن السمنة بزيت الزيتون او الزبدة؟؟يعني مشان الكولسترول ههه..
    اما مشان المقدمة فوالله كأنك حطيتي ايدك على الجرح,للأسف نحن ما منتحمل يكون الشخص مختلف عنا,,خصوصا في الدول العربية,لما كنت عايشة بالمانيا كان في عرقيات كتير و ناس من كل الجنسيات فالناس كانت كلا تتعلم من بعضا و بتقدر الاختلاف في الثقافات و غيرو,,لما جيت على المغرب لقيت كتير مشاكل ,,مثلا انا ما بشرب مع حدا من نفس الكاسة لو اموت حتى مع اخوتي و لا اني اكل مع شخص نفس السندويشة ..حالا حكمو علي اني وحدة شايفة حالا و ما بيعجبا العجب و رفيقتي بالمدرسة بعد ما صارت رفيقتي قالتلي انو كلياتنا كنا نحسبك شايفة حالك لانو عم تتصرفي غير عنا!! :eek :sigh وانا تفاجات يعني منطلق احكام بس لانو هداك الشخص مختلف عنا,وبلا ما احكي عن الجدالات على مواضيع تافهة مع الاصوات العالية و اللعاب المتطاير و الشرر الطالع من العيون على شغلات اتفه من شغلة الكبة و يمكن حتى يقتلو بعضن :grin ما منفهم انو الاختلاف لا يفسد للود قضية و انو كل واحد من حقو يعبر عن رأيو,ويسمع رأي التاني طولت عليكي بس فشيت قهري شوي خخخخخخخ :(

  2. منى 20 November 2011

    لا و الله يا ام نوران ما طولت و لا شي , هادا هو الواقع
    و حتى لو انا هلا رح اعمل متل مو كاتبة بالمقدمة و الصق بطاقة علينا انو ( عرب ) , انو نحنا هيك الشعب العربي , برايي هادا الطبع ممكن يتغير و اول التغير انو نعرف انو فيه مشكلة و ان شاء الله انا متفاءلةانو رح نتغير بس بدنا شوية تدريب :zzz

    ابوسك ما بتوقع ممكن حدى يقول عليك شايفة حالك :eek

    فيكي تلغي السمنة من اساسه مشان الكولسترول , بس الوصفة الاصلية لازم تكون فيها طعمة و نكهة السمنة , هلا أطيب بس من دونها كمان بتاخد العقل

  3. Iman 20 November 2011

    اهلين ممنمون. يعليكي شو حكياتك مهضومين. انا بتفق معاكي على طريقه النقاش عنا. لازم يعلموا فن النقاش بالمدارس من واحد و هو صغير. كتير بيوفر تعب عكبر. هون هيك كانوا ولادي ياخدوا فن النقاش بالمدارس. و انا كمان اشتقتلك منى و للموقع. صار اشياء كتيره شغلتني عن الموقع. اجاني حفيد و الحمدلله. زنزونه صارت ام. و زوجت ابني والحمدلله. عقبال اولادكم يا رب. وصفه كتير حابه اجربا من زمااان. يللا هيك شجعتيني. تسلم ايديكي على كل هالوصفات الطيبه. سلام كتير لك و لجميع الاخوات. :)

  4. منى 20 November 2011

    , الله كتيررر مشتاقتلك , انو هيك اختفيتي فجاة :roll

    الف مبروك العرسان و البي بي الجديد , ما بسدق ان صار عندك حفيد , ما شاء الله عليك باينة اخت بنتك :zzz

    اتوقع انو هادا هو اول خطوة بالحل , انو نعلم الاولاد و نوجههم في المدارس لحتى نفهم اصول النقاش , و شفت مرة برنامج انو بمدارس يمكن بالسويد في عندهم حصص لتعلم النقاش , بيتعلم فيها الطالب مو بس احترام راي الاخر , كمان استجماع افكاره و الطلاقة بالحديث و اشيا كتيرر تانية

    ان شاء الله تجربيها و تكون يمممو رح استنى رايك ;)

  5. jojo30 20 November 2011

    تسلم ايدك بالنسبة للوصفة علم وسينفذ قريبا جدا بس سؤال ممكن ابدل لحم الغنم بلحم البقر لانو بماليزيا لحم الغنم يكاد يكون معدوم واذا توفر بيكون مو طيب متل لحم بلادنا واذاممكن فشو هي افضل اجزاء من لحم البقر لهيك وصفات ؟
    اما بالنسبة للمقدمة اييييييييه انا الاتيكيته تبعي هي مفزلكة ومفلسفة ومفكرا حالي ام الفهم ههههه على الله
    هلا طبعا في امل والامل هلا اكبر من قبل كتيييير لانو هلا كل يمعي على ليلاه يعني بلشنا نكتشف انو في اكتر من شكل للتمعاي
    واذا بدك راي الحل سريع للمشكلة هو انو نبطل كبر نفس وراس فما يعود عندنا اي مشكلة انو نتبع راي الشافعي
    مفزلمة مو ؟
    وتسلم ايدك

  6. منى 20 November 2011

    لا بالعكس حبيتها كل يمعي على ليلاه :grin

    انا راي انو مو قصة كبر نفس و راس , هي شي رضعناه من اول ما بدينا نقول واااء , بتلاقي اذا الولد فتح تمه و عطى رايه ممكن بيكون رد الفعل من شي حدى كبير انو انت خراس , مين طلب رايك ؟
    بدناوقت و فت خبز , بس شي مو مستحيل

    فيكي تستعملي لحم البقر اكيد , بالغنم رح يطلع معك النكهة الأصلية بس اممكن استعمال المتوفر ;)
    لهل الوصفة او الوصفات الي بدها لحم مفروم فافضل نوع هو مكعبات الهبر الي داخله شوية دهن و ممكن تختاري من الرقبة او الخاصرة , هدول فيهم نكهة كتيرر طيبة و لما بينفرموا بيستوا بسرعة ;)

  7. لارا مينا 20 November 2011

    تسلم إيدك وصفة روعة, أنا كنت أعمل البطاطس بنفس طريقتك بس الطبخة تصير جاهزة بمجرد قليها يعني خطوة الفرن ملغية ,, بس حاسة طريقتك أحسن خصوصا بالصوص عجبتني كثير كثير وفكرة الفلفل والقرنبيط روووعة, بس ماأجيب اللحم المفروم عالتجربة مباشرة….

    سؤالي هو :

    كاتبة في الوصفة تحشى الفليفلة والقرنبيط
    الفليفلة كيف بتنحشى في حال قطعتها دوائر سميكة؟

    والقرنبيط الجذع السفلي يكون مثل ماهو والزهرة من فوق نفتح فيها فتحة بسيطة يعني رح تنحشى بكمية قليلة مقارنة بالبطاطس مزبوط ولا لأ ؟

    وبالنسبة لموضوعك جدا رائع

    أنا كنت من الأشخاص إلي بيتمسكوا برأيهم لدرجةحسيت البعض صار يتحاشى النقاش معي , ولما يكون الطرف الآخر يتكلم كنت أحاول لحظتهاأشغل مخي بأشياء ثانية حتى ماأسمع رأيه وكان واضح على وجهي اللا مبالاة.

    وشوي شوي صارحتني أكثر من صديقة وأهلي إن أسلوبي غلط ولازم أخفف منه, والحمد لله السنوات الأخيرة إتغيرت 360 درجة حتى الطفل إلي عمره 4 سنوات صرت أحترم رأيه وأفكاره وفي غاية الإنصات والإستماع ,واحاول أغيره بالتفاهم والأسلوب مش فرض الرأي والتزمت.

    أما الأشخاص يلي مجربتهم قبل , وعارفة إن مخهم ياحجارة ياصخر , أحاول ماأتناقش معهم أبدا أبدا أبدا إلا وقت الطوارئ ولما تقرع أجراس الإنذار .

    واتخذ شعار إن الصمت حكمة, والصمت عبادة من غير عناء , وكمان الحكمة عشرةأجزاء تسعة منها في الصمت .

    ممكن تقولوا في أنفسكم ماهن كانوا مثلك قبل ماتتغيري , بس لأ ؟ فيه ناس متعصبين لرأيهم بس ممكن تتحاوري معهم بطيبة ومحبة وتطلعي بنتيجة أحيانا كويسة وأحيانا لأ ,,

    وفيه ناس بمجرد التحاور معهم يبغالك تاخذي حبة من عند طبيب نفسي مشهور لحتى تنسي مناقشتك معهم و ومنهم مديرتي في العمل .

    آسفة للإطالة :zzz :zzz :zzz

  8. laraye 20 November 2011

    مرحبامنوش
    كل عام و انت واهلك وعيلتك و كل احبابك بخير يارب
    ما تواخذيني لسى ما لحقت اقرأ الحكي و الوصفة و التعليقات لاعلق بس فايتة اقول كلمتين اول الشي الله يجزيكي كل خير عالموقع شوفي حالك فيو و نيالو اللي عرفوا وتعرف عليكي… اكيد عمتقولي شو صرلا لارا … لا بس بصراحة من كم يوم نزلت ابليكيشن لوصفات منال العالم و ماشاء الله شي بيشهي بس مو مشروح متلك بمحبة وامانة الموضوع كتييييرررر تجاري الصور عندا بتشهي بس لانو هون بعرف انو انتي بايدك اللي عم بتصوري و بتأخرجي الصورة فبحبا و بقدرا اكتر لان هنيك في وراها كذا شخص. و الموقع الوحيد اللي بحبو من بعدك هو موقع ايطالي واحبانا فيو فيديو بس كمان هنيك في كذا شخص بالقصة فبلنتيجة انتي غيررررررر و لا يمكن تتقارني و الله… بقى كتيرررر اعتزي بهالنقط.
    الشي التاني .. شوي حزين لانو جربت اعمل السمبوسك مرتين مرة بيعجينتك و مرة بيعجينة رفيقتي كمان هي الطبخ عندن شغلة بس السمبوسك ما عم يتسكر معي منيح الا بالف زور و بعدين بيفتح بالطبخ لسى اليوم ع طريقة رفيقتي نفشو. طريقتها ( 2 كاسة طحين 2 ملعقة لبن شوية ملح بيضة ربع كاسة مي فاترة و نص كاسة زيت) ما بعرف شو السر و شربوا زيت بالحالتين مع انو حميتو عالبطيء يا ريت تساعدني و الي تعليق تاني باذن الله

  9. farah 20 November 2011

    كيفك يا عزيزتي منى والله اشتأتلك وللموقع انا متابعة بس ما كتير عندي وقت للتعليق حتى صرت عاملة كم وصفة من وصفات الباتنجان يمكن علقت على وحدة منها والتانية صورتها على اساس انزل الصور وما كنت اعرف انزلهم من الكاميرا للنت :roll
    الله يعينا ويعينكم بس بطمنك الاكلات طلعت روعة سلطة الباتجان مع الفيتا والروكا مممم ولا يهودي ومسافر والله نسيت شو عملت كمان وهالاكلة اليوم من زمان عندي وصفة بتشبهها اخدتها من مطبخ منال العالم بس ما تجرأت جربها لأن حسيتها رح تشرب زيت كتير بالقلي , يا ترى انتي بتقليها بزيت عميق ولا تقلاية على زيت خفيف؟؟ :?
    بالنسبة لموضوع المقدمة فنحن يا عزيزتي عرب وهذا ما يميزنا عن الغرب الجدل وتضييع الوقت بالمهاترات والاخد والصد والشاطر اللي نفسه اطول وبيسكت التاني ليثبت لنفسه انه انتصر وانه على صواب وحق بعد ما يكون الطرف التاني انقطع نفسه ومل من كتر الجدل واستسلم ليس مقتنع ولكن عجز عن استمرار العيييي!!!
    لو نرقى شوي بافكارنا وبحواراتنا لسبقنا الغرب آلاف السنين نحن التهينا بالجدال و الكلام الفاضي وهم قاموا بنهضة العمران والتقدم والرقي لا حول ولا قوة الا بالله مع اننا قوم اعزنا الله بالاسلام ولأننا ابتغينا العزة بغير الله فهذا حال بلادنا العربية هذه الايام …
    اعذروني بس البي محروق من اللي عم يصير ببلدي الله يفرج عن البلاد والعباد

  10. gsm 20 November 2011

    ما شاء اله عليك يا منى المقدمة كتيير رائعة وموفقة كتيير خصوصي بهل الأيام يللي عم نمر فيها الله يلطف يا رب ببلدنا واهلها يا ستي بالفعل انا معك إتنو ليش يعني لازم الكل يحب اليبرق ويأكله مثلا انا ما كنت أكل اليبرق لفترة كبيرة بعمري لا هو ولا الكبة ما كنت اطيقن هلق وبعد الزواج صرت اعملن وأكلن بس مو اكلتي المفتخرة بس لسى اخي ما بحط اليبرق بتمه وما بحبه وما بيأكله وإذا إسترجينا نتحكي هل الحكي لحتى فورا بيسحب منها الهوية السورية الحلبية بشكل خاص وإنو إنت ما بتعرف طعمة تمك يا اخي طيب الدنيا اذواق في ناس بتحب الأكل الخفيف ما بيزبط معها الدسم إيييييييييه تركيها لالله هادا غيض من فيض يا ريت توقف على قصة أكل وشرب بس الحمد لله على كل حال نجي للمفيد وهية الطبخة اليميم يللي عم اشوفها قدامي هلق انا إستوعبت كيف ممكن احشي البطاطا بس القرنبيط هي شلون صارت بقى كيف ممكن احشيه واغمسه بالبيض واقليه ؟ما قدرت اتخيل الوضعية بصراحة انا دقت هل الأكلة من اخواتنا الليبين هون وبالفعل طيبة وظريفة كتيير بس كانت بطاطا لذلك حبيتها كتيير مع إنو مقلية واان مع احاول اخفف المقالي بس بالفعل لا تقاوم بس وقتها خجلت اسألها عن الطريقة بس هلق ما دام الطريقة عندي رح اعملها قريبا جد بإذن الله يسلموا إيديك يا احلى طباخة بالدنيا كلها يا رب

  11. آرام 21 November 2011

    يسلموا إيديك أخت منى .. على الوصفة اللذيذة .. وعلى المقدمة الألذ.
    واضح أنك عزفتي على وتر كتير حساس هالأيام، وفتقتي جروحات العالم، فانفتحت قريحتهم عالكتابة.

    دائما بيخطر ببالي أنو في شخص بأوروبا اسمه فولتير قال من شي 300 سنة: (رغم أني أختلف معك تماماً في الرأي، لكني مستعد للموت من أجل أن تقول رأيك بحرية)

    تحياتي.

  12. منى 21 November 2011

    هلا لارا :)
    برافو عليك , مو المهم انو يكون الواحد عنده مشكلة , المهم انو يعرف انو عنده مشكلة و يبدى يحلها .. لهيك رفقتك و اهلك كانوا جزء من الحل ;)

    انا بهل الفترة عم لاقي كتير من هدول الي عقلهم صخر و حجر و على اد ما عم العي البي باشيا بتكون المفروض انها بديهية قررت اني اعمل متلك و ما ادخل بنقاش و هو باين انو رح يصير جدل من اوله , يمكن غلط بس من هون حتى اشعار اخر انا هل القرار ريحت راسي فيه :zzz

    منرجع للوصفة ;)
    شرايح الفليفلة رح تتملى باللحمة و رح تصير قرص كانو , اما القرنبيط فمو مهم طريقة قسمه لان بمجرد ما تبعدي الزهرات عن بعضها رح تشوفي في فراغ كبير رح يتملى من الحشوة و لو كانت كميته ااقل من البطاطا
    ان شاء الله بحاول صور الخطوات بطريقة اوضح لما بحضرها مرة تانية
    رح استنى رايك بعد التجربة

  13. nosheenzaza 21 November 2011

    كتير حلوة المقدمة،و الوصفة كمان.

    ما بعرف يمكن اليوم مخي سميك شوي، لسا ما فهمت شلون بتتقطع و تنحشى الفليفلة.

    كمان شلون بينلفظ اسم الوصفة؟

  14. منى 21 November 2011

    هلا لاروشتي :)
    مشتاقتلك كومات و كل ما بشوف مريم بيغلي قلبي انو من ريحة الحبايب ;)

    الله يبعد الكبر و شوفة الحال بيكفي انو صار عني رفقة و خوات متلك , ما بتعرفي اديه بعتز بمعرفتك و رفقتك و دوما على بالي لولو

    شوفي لاروش جربي نصف كمية عجينتي مرة تانية و اشتغلي فيها و هي لسى دافيه شووي , لزقي القطع و بس ما خلصتي كل الكمية ارجعي اضغطي عليهم , بس مو هون المشكلة , اتوقع انو المشكلة سببها انك عم تقلي على نار واطية متل ما فهمت من ردك , النار لازم تكون وسط مايلة للعالي و هيك بتمسك القطعة اول ما تسقطيها بالزيت و كمان لا تكتري الكمية , هلا ما دام عم تتعزبي جربي 3 او 4 قطع بكل وجبة و شوفي شو بيصير معك …
    لاروش العجينة المفروض انها تلزق بسهولة , بقى انت لما عم تلزقي القطع عم يصير معك مشكلة و الا بس وقت القلي ؟

    بوسات و اشواق و حب ;)

  15. منى 21 November 2011

    هلا نوشين :)
    شوفي منقطع الفيفلة عرضيا , بيصير عنا كذا قطعة منعبيهم باللحمة و منسوي الطرفين لحتى يصروا متل القرص ..
    خلص بس جيب فليفلات رح صور الخطوة خصوصي , انو ما اتوقعت ما رح ااقدر وضحها مزبوط :roll

  16. منى 21 November 2011

    هلا فرح :)
    صحتين و هنا و الف عافية على كل الوصفات الي جربتها , المتذكرة اساميهن و الي نسيانتيهم ;)
    انا بقلي المبطن قلي غميق و ما رح يشرب زيت , متله متل ايا شي تاني بتقليه

    و الله يا فرح ما في حدى قلبه مو محروق , المشكلة انو نحنا التهينا مو بس باللعي , بكتير اشيا , واقفين بمحلنا و لما فقنا و خلصنا التفتنا حوالينا و ما لقينا حدى , كلهم سبقونا :roll

    بس لا حياة مع الياس و لا ياس مع الحياة , و ان صفينا النية رب العالمين ما رح ينسانا

  17. منى 21 November 2011

    و الاسم بيلتفظ متل مو مكتوب ( ام-مبطن )
    دخلنا بالصوتيات :grin

  18. منى 21 November 2011

    هلا غفران :)
    قولتك يا ريت توقف بس على قصة أكل و شري كانت هانت , بس عن جد انت ما بتحبي الكبة و اليبرق ؟؟

    :grin

    نعني العرق دساس خيت ما بقدر هلا الا حط عليك اتكيتة ( ما بتحب الكبة و اليبرق )

    هلا حطي الزهرة ادامك و اعملي فيها شق بالسكينة و بهل الفراغ احشيه لحمة و اللحمة كباب رح تلزق تخلي الطرفين يلزقوا ببعض و بعدها بيصير تغميسه كتيررر سهل ;)

    ان شاء الله تجربيه و يكون نممممم و متل الي اكلتيه عند رفقتك و رح استنى رايك

  19. laraye 25 November 2011

    الله يخليلكي يا منى ع اخلاقك الحلوة … ما قصدت ابدا الكبر بس حلو انو الناس تقدرلك.
    يا ستي السمبوسك كا بصعوبة عم يسكر و يفتح بالقلي اكتر بالمرة التانية من الاولى و الزيت بشعل تختو عالواطي مدة 25 دقيقة و باخر خمس دقايق عمعلي للوسط يمكن كمان هدا غلط رح ارجع جرب قريبا انشالله

  20. منى 25 November 2011

    هلا اخي ارام :)
    هنن اشتغلوا على هل القصة من اكتر من 250 سنة . اتعلموا الف باء الحوار و احترام راي الاخر شو ما كان … اتعلموا تقبل الاخر كجزء طبيعي من ايا مجتمع طبيعي و لهيك هلا عم يالفوا قواميس, بس مهم نعرف انو قواميسهم منتعلم منها و منستفيد منها , بس ما فينا نطبقها حرفيا عنا لان لكل مجتمع خصوصية

    منرجع للطبخ , ان شا الله تتشجع تجربها و تكون طيبة

  21. violet 27 November 2011

    كيف بتتاكل بالخبز واللا بالشوكة؟؟؟؟

  22. منى 3 December 2011

    بالشوكة ;)

  23. منى 19 December 2011

    هلا لاروش :)
    ممكن تنقصي شوي طحين للعجينة لحتى تلزق معك بشكل اسهل ;) و طريقةالقلي مو مزبوطة ابدا , حمي النار على الوسط شي 5 دقايق و بعدها ضيفي كم حبة و ان شاء الله رح تزبط معك تمام

    الله يقومك بالسلامة و بانتظار اخبار البي بي الجديد :zzz

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)