براونيز بكريما الخمس دقايق السرية
اذا كنت جديدة على الطبخ فاكتر شي ممكن تخافي منه هو اما المعجنات أو الحلويات , و انا كنت خاف من المعجنات , و لما شوف ماما أو أية عم يشتغلوا فيهم و هنن نايميين , قول لحالي بحياتي ما رح صير متلهم , و لاحكي الحق انا كنت عم احكي حكي نظري , يعني مو انو جربت و فشلت , لا هيك عندي حاجز بيني و بين المعجنات و بس . و كل ما يكون عندي جمعة و بدها معجنات أتصل بـ 911 و قلها , بتذكري لما كنت بنتك ( أو أختك حسب الشخص ) , فورا تقلي خير ان شاء الله كم كيلو عجين بدك .. هيك علموني على الكسل و بمساعدتهم الي كبر الحاجز بيني و بين المعجنات .
بعدها كنت سهرانة مرة برمضان لحالي انا و الكتاكيت و اشتهيت فوت على المطبخ حضرلي شي شغلة , و كنت بيومتها شايفة وصفة للتوست في موقع لك , الوصفة كانت بسيطة كتير فاتشجعت و حضرتها … و لما جهزت و طلعت ريحة الخبز في البيت و اتجمعي القطط حوالي و هن انو شو هل الماما الخطيرة , حتى التوست بتعمله بالبيت ..
هل ردود الافعال شجعتني كتير كتير و الكل على اد ما انبسطوا اتحمست و صرت جرب بهل المعجنات و هيك بديت .
كانت بداياتي ان ااقسم المقدار لحتى اوصل لاصغر شي بقدر عليه , يعني مثلا ثلاث ارباع كاسة طحين و ما كنت افهم ليش ماما تقلب على ظهرها من الضحك كل ما تسمعني عم لت و اعجن بشوية طحين , تقلي لك بنتي هدول برشهن انا رش على العجينة , و الله بيلزقوا بايديك مو مستاهليين . بس انا كنت خاف كبرها , و الحمد لله صرت جرب شي جديد من فترة لفترة و صار يطلع معي شي , بس مو لدرجة اني أثق بنفسي بالمعجنات مثلاً و حضرهن لجمعة كبيرة
بعد بفترة , صار عندي صبحية نسوانية صغيرة و كان من بين الضيوف ستات رح يزوروني لاول مرة و كمان كان من بينهم ست مشهورة بعيلتنا بالطبخ و الحلويات و كمان مشهورة باللئامة , يعني ما بتعطيك طريقتها و مقدارها لو بتطلع عينك و اذا صدف و عطتهم فبتكون غلط ! يا ربي اعمل و الا ما اعمل , يلا يا موني حضري عجينتك و شوفي شو رح يطلع معك , و كنت بوقتها متوصلة لعجينة القطنة من جديد , حضرت كم نوع . الحمد لله على اد ما انبسطوا الضيوف و حبوا الفطاير عرفت ان المعجنات الي بتعملها الست على ايدها سحر خاص و شي بيضيف كتير الها و على فكرة الست اياها سالتني عن طريقتي , بس طبعا مو بطريقة مباشرة و انا لحتى احكي الحق طلع شرشبيل براسي و قالي اعملي متلها و طنشي , بس بعدها قلت بقلبي و لا و الله , اصلا مو بشطارتي اتعلمت , رب العالمين هو الي يسر , الحمد لله الذي علمنيه من غير حول مني و لا قوة . و عطيتها طريقتي على التكة و هل الحكي قبل الموقع بشي 5 سنين .
, هلا الحمد لله صار عندي اريحية بالتعامل مع العجين , و ممكن حتى حضر عجينة و تطلع روعة من دون مقادير , يعني على النظر متل ماما حبيبة قلبي , و هيك ما حدى بيعلم أكتر من التجربة لهيك بتمنى انه نحكي و نجرب و نشجع بعض لحتى كل واحدة هون تصير شطارتها متل ما بتحب و تتمنى .
الوصفة اليوم وصفة جديدة للبريوش , و الطريقة بسيطة و نكهة الزبدة بتجنن فيها , أنا حشيتها بالنوتيلا و ما رح خبركن ردود افعال الاولاد عليها , صحة و الف هنا على البهم . انت فيكي تحشيها بالي بتحبيه و لو علي ما بحشيها غير جبنة بيضاء مع كاسة شاي بتطلع يمممي .
بالصحة و الهنا
2 كوب طحين
1 بيضة كبيرة , مخفوقة قليلاً بالشوكة
نصف كوب ( 125 غ ) زبدة طرية
ربع ملعقة صغيرة ملح
نصف ملعقة صغيرة بيكنغ بودر
2 – 3 ملعقة كبيرة سكر
فانيليا
التخميرة الأولية :
ملعقة صغيرة خميرة
ربع كوب حليب دافئ
ملعقة صغيرة سكر
الحشوة :
شوكولا نوتيلا
للوجه :
صفار بيضة مخفوقة مع بضعة حبات نسكافييه
للتلميع :
قطر
• تذوب الخميرة مع الحليب و السكر , تغطى و تترك حتى يتضاعف حجمها و تظهر عليها فقاعات و رغوة .
• يدعك الطحين و الملح و البيكنغ بودر و السكر و البيضة و الفانيليا مع الزبدة و مزيج الخميرة . يضاف المزيد من الحليب ( غير مذكور بالوصفة ) بالتدريج حسب حاجة العجينة و يعجن لمدة 10 – 15 دقيقة حتى الحصول على عجينة ناعمة جدا و ملساء .
• تغطى العجينة بشكل محكم و توضع في مكان دافئ و تترك حتى يتضاعف حجمها .
• تغلف صينية دائرية صغيرة بقياس 22 سنتيمتر بورق الزبدة , تقطع العجينة الى كرات صغيرة , تبسط الكرة قليلاً على راحة الكف و تحشى بالشوكولا ثم تغلق و تصف في الصينية . تغطى الصينية بورق نايلون لاصق بشكل محكم و تترك حتى تنتفخ من جديد و يتضاعف حجمها و تسد كل الفراغات بين الكرات .
• يحمى الفرن على درجة حرارة 180 درجة مئوية , يدهن الوجه بصفار البيض ثم تخبز في الفرن المحمى لمدة 30 دقيقة أو حتى تنضج و تشقر .
• تخرج صينية البريوش و يدهن بالقطر و هو لا يزال ساخناً ثم تترك حتى تبرد . تقدم مع العصير أو الشاي أو القهوة .
ماشاء الله تبارك الحمن لا و الله شطووووورة الله يبارك فيكي ..انا كتير بحب البريوش و بحب المعجنات و خصوصا ريحتها بالبيت بتعطي دفء و حميمية ,انا الحقيقة متعودة اعجن لانو امي علمتني اعجن من و انا عمري 12 سنة لانو بابا الله يخليلنا ياه بحب خبز البيت الطري .. بس انا تعلمت كتيييير من و صفاتك ست منى الله يجزيكي كل خير,يعني كلما احتار ايش اطبخ حالا على لقمة و بغوص بعالم الوصفات الرائعة وبنسى انا اساسا ليش دخلت :grin
والله اني على كل طبخة بدعيلك لانو هادا اللي بيطلع بايدي :roll
سؤال كالعادة : الخميرة اللي استعملتيها خميرة الحبيبات و لا خميرة العجن العادية ؟؟
والله لا يردلك دعوة ..جزاك الله خيرا
ان شاء الله يسلموا هالايدين والله يجزيكي الخير على هالوصفات الرائعة .
مابتتصوري شقد سهلتي عليناالحياة فيهم :grin خصوصي نحنا بالغربة بس لما بدخل على موقعك بحس حال بحلب
هلا مزهرة
الله يسلمك حبيبتي و ان شاء الله حياتك كلها خير و برطة و يسر
منورة اختي
السلام عليكم ورحمة الله وبركاته. كيفك منى والله اني حابة شوفك على قد مالي حاسستك مذوقة ومنفنفة شكلا الوصفة شغلة رهيبة بس متل ماقلت عندي خوف من المعجنات رح جربا وخبرك إن شاء الله فيني احشيا كيري؟؟؟وسلامي لالك
تطبيقك اكتر من رائع ..وانا كنت متلك واكتر بقصة المعجنات كتير بخاف لسه الي خلاني اتكاسل اكتر انه جوزيي شغلته العجاين والفطاير وعجينتهن ماشالله رائعة وكل مابدنا نعمل فطاير بيجيبولنا كبتولة وبقولوا تسلوا فيها …بس الي كسر عندي حاجر الخوف هو عجينة العشر دقايق لانه ولا مرة لفشلت معي وصرت استخدمها لكل شي تقريبا ……….شكرا الك منى الوصفة بتشهي ولو بضل مية سنة مابطالع متل الي ظاهر عندي بالصورة …ليكون عم تعدليها عالفوتوشوب :grin بس بتعرفي انا بتكاسل من الاطباق يلي بدها تخمير على دفعات هلأ انتي قديش اخدت معك لتضاعف حجمها بأول مرة ؟؟
الله يعطيكي العافية ست منى .. بس بدي اسالك ايمت منستعمل الخميرة الحبيبات و ايمت منستعمل الخميرة الفريش؟؟؟ نحن بالمغرب غالبا منستعمل الفريش خصوصا بخبز البيت بس انا بجيب الحبيبات مشان عجينة العشر دقايق و لانيها بطول بالبراد اكتر ..وطبع عجينة العشر دقايق اخدتا من هون من عندك
انا رفيقاتي كلن خبرتن على الموقع وكتييير عم يعجبن وبسهل عليهن الطبخ ..
يامجيني تقلت عليكي و الله يجزيكي كل خير
هلا ام نوران
يا ريت تعلمينا طريقتك
ما شا الله عليك من عمر 12 سنة بالمعجنات معناها هلا خبزاتك قطايف
ابوس روحك على الدعوات , ان شاء الله الك متلهن و اكتر يا رب
يا ستي الخميرة حبيبات , بس اذا متوفرة عندك الخميرة الفريش احسن و احسن
كتيييييير مكوناتها بسيطة وسهلة كنت مفكرتها أطعب من هيك .
أختي كانت عايشة بألمانيا وتعلمت هالوصفة هونيك و الوصفة قريبة من هي
من عجينة البريوش بتمدها وبترش عليها سكر وقرفة وبتلفها متل السويسرول وبترجع بتخمرها وبهالوقت بتحرق سكر للكراميل .. وبعد ما تتخمر بتدهنها بالبيض وعالفرن وبعد الخبز بتقلبها على صحن التقديم والكراميل عم يشرشر منها هههههه :grin
lما شاء الله شي روعة خلص ان شاء الله من كل بد رح اجربها بس رح احشيها جبنة بس سؤال على السريع هلق كيف لازم يكون قوام العجينة متل عجينة ال عشرة دقائق ولا لحتى العجينة تبطل تلزق بالصحن؟وياريت لو تحطيلنا كمية الحليب بالزبط يعنى لحتى عرف النسبة على المزبوط يسلموا ايديك وعك استنى ردك لأنو ناوية اعملها بلكي بكرا ويعطيك الف عافية :zzz
صحيح كان بدي اسالك اخت ام نوران انا فيك تقولي من احلامثي انو اخبز خبزاتي بالبيت وجربت شي خمسين طريقة وما في شي زبط معي بقى لو تتكرمي علينا وتنزليلنا طريقة الخبز المنزلي اكون لك من الشاكرين :roll
اختي عليا الطريقة اللي بتستعملا اختك هي طريقة السينامون رول يعني رول القرفة كمان كتير طيبة و في اللي بيحط كراميل على الوج و في اللي بحط ايسنج وفي اللي بيحط توفي انتي و رغبتك
وفي رابط بالموقع لهي الوصفة :
http://www.l2ma.com/content/view/735/2/
وعلى فكرة كتير شهيتيني عليها :grin
أختي ان شاء الله بنزل الطريقة ليستفيد منا الجميع بس الخبز اللي منعملو بكون شوي سميك يعني مو رقيق متل الخبز العربي ..
بس مو شي صعب عن حد ابقي تحضري نفسيا لحتى ابعت الوصفة للست منى :grin
عم استنى الوصفة على احر من الجمر يسلموا اختي ام نوران
ممكن تكون نفس المبدأ بتغييرات بسيطة وشكلها بيكون حلزوني غير الرول ..
والله وأنا كمان مشتهية عليها :cry
السلام عليكم منى عم احاكيك من الحدث في موقع الحدث حاليا البريوش صار بالفرن بعد ما خمرته للمرة التانية وجهزت القطر الله يستر ببقى بخبرك شو بصير معي :grin :grin
ياي على هالوصفة يتجنن وبكرة ان الله راد بدي جربها رايحة احشيها تمر اكيد بيمشي الحال بس بدي اسالك بحسن اعجنها بزيت بدل الزبدة لانو بحس الزبدة بتعطي نشفان للعجين
:eek :eek
هلا مريومة
اي بيصير , انا بحس بالزبدة تعطيها طعم طيب و غني , بس فيك تستعملي الشي الي بيناسبك
هلا غفران
اتاخرت عليك , بس الحمد لله ماشي حالك
يا ستي العجينة لازم تكون متل عجينة العشر دقايق بس على انعم و اطرى و الحليب حوالي النص كاسة اضيفها بالتدريج
يلا رح استنى اخبار منك
وااااو :eek ما شاء الله لا قوة إلا بالله..شي بيغرف القلب..تسلم إيديكي..بس كان لازم تسميها خلية النحل بالنوتيلا :grin
السلام عليكم كيفك منى ياستي الله يسلم ايديكي كل مرة بتشجعينا اكتر واكتر بس مرة انا جربت اعمل فطايربالجبنةوما نجحت معي ومنا ما عدت قربت عالمعجنات بس هلء بدي جرب هالبريوش اكيد منظروا بيجنن انا كتير بحب البريوش الله يجزيكي عنا كل خير يامنى ويعطيكي العافية
سلام عليكم منى تأخر عليك ما تواخذيني بس والله كل ما بجي بدي أرد عليك إبني الله يسلمه بيعملي شي مغامرة من مغامراته وتعي إركضي وراه الله يسلمه بهل العمر كتيير بدن ركض :grin يا ستي نجي على البريوش عملته وساويته متل قوام عجينة ال عشر دقائق بس انا على قد ما كنت آكلة هم زنخة البيض كترت الفانيلا وصارت طعمتها واضحة كتيير وشغلة تانية لما حطيت النسكافيه مع البيضة حسيت اللون غمق كتيير عم افكر المرة الجاي ما أحط نسكافيه بس أحط البيضة على وجها بس بشكل عام طلعت طيبة كتيير
بس بدي أسألك
ما في مجال أستغني عن الزبدة بالزيت يعني بتبقى أخف شو رائك؟ :roll
لك شو هلاإبداع كله منوووشة و الله رح يطب قلبي عالصورة..و عم أكتبلك الرد قبل ما أعرف تفاصيل الوصفة بس إن شاء الله تكون سهلة لاني متل ما قلتي بخاف من المعجنات :roll
صباح الخير منوش ..وكل الصبايا
امبارح جربت الوصفة العظيمة هي ..والشكل طبعا طلع راااائع .. بس العجينة حسيتها ناشفة شوووووي مو كتير .. يمكن كمان حسيتها كان لازم اعجنها اكتر مشان تطلع انعم ..كمان سؤال ..هلأ انا دهنتها بالعسل بدل القطر ممكن يأثر .؟؟ يعني السبب من القطر لمعة بس ولا مشان يمتص منه وماتطلع ناشفة ؟؟
بس ان شاء الله بدي ارجع عيدها لأنو بتستاهل
الله يجزيكي الخير منوش
هلا لاروش
صحتين و الف عافية يا رب , ممكن العجن يكون سبب , اذا حاببتيها تكون اطرى فيك بس ما طالعتيها من الفرن و خفت حرارتها تغطيها و تتركيها شوي .
ما اله علاقة العسل او القطر , لان هو بس للمعة
ان شاء الله تجربيهال و تطلع متل ما بتحبي
لاروشة اشتهيت اني شوفك باخر زيارة , يلا ان شاء الله خيرها بغيرها , اشتقتلك كتير :zzz
هلا ملك
لا الوصفة سهلة كتير , ان شاء الله بتعجبك و تكون يمييي
هلا غفران
فيكي تسستغني عن النسكافيه بس بيعطيها لون حلو و ما بيخلي للبيض ريحة , و كمان فيك تستبدلي الزبدة بالسكر , بس ما رح تصير بريوش بريوش
صحتين و هنا يا رب
منووش ..شكلك خربطي بيني وين حدا تاني :grin :grin
بس فال خير بلكي بنجتمع سوا شي يوم ..أهلي مقيمين كمان حاليا بحلب
منى بدي أسألك..
القطر 2سكر و 1 ماء و لا قطر مخفف؟
و الشكل لازم يطلع البريوش ملزق سوا و لا مو ضروري؟
صباح الخير منوشة وكل الصبايا .. الله بيعلم شو اشتقتلكن .. بس غيبتي كانت لظروف وهلظروف حلوة كتير الحمد لله .. أول شي بعد كم شهر رح صير ماما.. وتاني شي إني هالسنة تخرج إن شاء الله ونتائجي كانت ممتازة بأول فصل .. حابة بشركم مع إنو ما بتعرفوني بس نحن أخوات بإذن الله ..
نجي بقى لوصة منوشة الخيالية .. غرف قلبي على منظرها الله وكيلك من أول نظرة .. وهلأ عم إستنى العجينة لحتى تتخمر .. بس عندي سؤالين , لما نشيف الحليب أثناء العجن هل هو ضروري ؟ لإنو ما حسيت العجينة محتاجة سوائل زيادة بالمرة .. يعني كانت ناعمة وطرية وممتازة .. وسؤالي التاني هو نفس سؤال رنا , شقد لازم نستنى بأول مرحلة من التخمير ؟ رح خبرك بالنتيجة الحلوة إن شاء الله .. وناطرة ردك للمرات الجاية ..
عفواً نسيت سؤالي إنو شقد لازم ننطر لكل مرحلة تخمير ؟
هي تطبيقي للوصفة .. تسلم إيديكي يا منوشة .. المقادير مزبوطة بطرقة مريحة كتير والعجينة كتير حلوة وسهلة وطرية .. زمان ما زبطتت معي هيك عجينة بهالروعة ..
وما أحكيلك عن الطعم .. يمييييي .. بقي أربع قطع بس :grin
وهي صورة التطبيق [img]http://www.theittihad.com/newupload/qjcqtibwydtb.jpg[/img]
يالله يامنى انا حزينة كتييير :cry :cry
هلأ رجعت جرب الوصفة مرة تانية وعلى اساس بدي انتبه تمام وتطلع احسن من هديك المرة ..وبعد ماعجنتها وخليتها شي 3 ساعات واذذذذذذ اكتشفت اني نسيانة البيضة برا وماحطيتها
بقى قولك كيف ممكن تطلع ومانفشت كتير اكيد :sigh :sigh
بس رح كملها هلأ شو بدي اعمل
لاروش و لا يهمك , بتطلع منيحة , بس ما دام ما نفشت معناها لسا بدها تخمير كمان , يا ترى في مجال تضيفيها هلا , قصدي العجينة ناشفة شوي و بتتحمل و الا نو ؟؟ اذا حاسة انو بيمشي حالها ضيفيها و اذا شايفة انها رح تعزبك اتركيها
لا ماكأنو خرج حطلها بيضة بتصير يمكن طرية كتير .. رح قوم احشيها مشان تلحق تتخمر مرة تانية واخبزها قبل مانام
بس ان شا ءالله خير ..انا متفائلة
و انا كمان
منووشة أولا اذا عملت البريوش سادة بدون حشوة بصير؟؟؟
و تانيا عبستناك بصفحة الكاسترد ..يلا لحقيني خيت..
و بصفحة كيك تمر بدون بيض..
و بصفحة بطاطا كوينز..
(ولي ملك كل هدول) :eek
تسلم ايدك يا منى
حابة قلك انو يا ريت تحطي كل وصفاتك بالخطوات المصورة اذا ما فيهاتعب :zzz وبنكون ممنونين الك
السلام عليكم اختي منى الله يعطيكي الف عافيه والله وقت شفت الصوره مسكت ايديي مشان ماانسى وحك جسمي لاني حامل :roll
انا عملت خلية النحل مرتين وطلعت كتير طيبه تصوري وقت عجنتها قبل بيوم من جية صدقاتنا عالفطور عيرت الساعه عالسته الصبح عجنتها عجنه تانيه بعدين عيرتها عالتمانه وشكلتها كرات وخبرتها طار عقلن فيها الحمدلله 8)
بس هي باينتها اسهل وكمان اكيد طيبه خلص بدي جربها قريبا لان رح شوفها بنومي اذا ماساويتها.
على فكره انا بشكر كل الاخوات على اسالتن وبشكرك على اجاباتك لان السؤال بفيد الجميع.
فرح
السلام عليكم
تسلم ايديكي يامنى من زمان وأنا حابة جرب معجنات خفيفةوطرية وانشاء الله بهل اليومين رح جرب وأكيد بما انها من ايديكي فأكيد ناجحة باذن الله
هلا ام تسنيم
انتي الي مزوءة و عسل :zzz
ان شاء الله تجربيها و تحبيها و فيك تحشيها بالي بيجي على بالك
فكره حلوه وسهلة جربتها وكانت كثيرررر طيبة وخصوصا اطفالي حبوها وعندي بنتي عسل تعشق شي اسمه نوتيلا.. تسلم ايديكي وانشاء الله دوووم تزودينا افكار حلوه
السلام عليكم الله يعطيك العافية ست منى أنا من عشاق المعجنات ومن زمان ناوية جربها وفي ليلة من الليالي وبعد ما نيمت الولاد وأبوهن قررت أعملها وبتكون جاهزة ياكلو منها الصبح ولأنو عن جد التيسير قبل التدبير متل ما بيقولوصحي ابني الصغير(7أشهر)وخدي على نقنقة ونغوجة لصلاة الصبح وأنا صرت اشتغل كل طلقة براحةوما لحقت ياكلوها الصبح وما قدرت اخبزها لبعد ما راحو بس اللي واساني انو طلعت ولا أطيب ومنظرها رائع فشكرا كتيير الك وسوري عالمغامرة الطويلة :zzz : :cry
السلام عليكم ورحمة الله وبركاته:
كيفك أختي الله يعطيكي العافية وتسلم ايديكي
وأخيرا وبعد طول انتظار جربتهاوطلعت طيبة بس ناشفة شوي
بس أنا وقت يلي كنت عبعجنها ماحطيت غير شوية حليب لأنك مالك كاتبة المقدار عجب هذا السبب وأنا خفت أكتر فأخرب العجينة
عبستنى ردك لأني أكيد رح جربها مرة تانية
[B]السلام عليكم ورحمة الله وركاته [/B]
كيفك ست منى ان شا الله بخير يارب
جربت هالوصفة وطلعت كتيررررررررررر طيبة وكتير سهلة حسيتها اسهل من الكاتويات بكتير ونتيجتها مضمونة اكتر
الله يعطيكي العافية وينولك مراد قلبك يارب
صورة البريوش ع صفحتي ع الفيس بوك
…………إسراء
صحتين و الف عافية اسراء
الحمد لله انها عجبتك
يا ستي الفيس بوك مو فاتح عنا , يعني رح شوفها ان شاء الله بس حتى اشعار اخر :roll
هلا رهف
العجينة لازم تكون طرية شوي بس متماسكة , بقى يمكن انت قللت شوي من الحليب
جربيها و ان شاء الله بتطلع المرة التانية على زووءك تمام
هلا bobo
بالعكس حبيت ردك كتير حسي حالي معك و عم وطي صوتي احلى ما يفيقوا :grin
صحتين و الف الف عافية يا رب و شكرا لمشاركتك الحلوة
هلا ام عسل
بنتك اسمها بيجنن , اكيد عسل على عسل
صحة و الف الف عافية يا رب و يخليلك ياها هي و اخوتها و يبارك فيهم
منورة
السلام عليكم اختي
بالنسبه للبريوش جربتو وطلع كتير طيب يسلمو ايديك على هل الوصفه
السلام عليكم
شكرا كتير لالك وامبارح عملت السمك بالتتبيلة المغربية وطلع طيب ورح جرب كتير شغلات أكيد
انا عضوة جديدة بيناتكن وبتمنى تعتبروني وحدة من اسرتكم وعلى فكرة أنا حلبية وأكلاتك الحلبية كتير بتشبه طريقتنا وبصراحة معجبة كتير بتطبيقك وتصوريك للطبق لانوبيجنن وبيدل على زوؤك وبدي قلك انو
هلأ طلعت البريوش من الفرن وطلع بيجنن