حلاوة الجبن


         وصفة : haya                 2009/01/05                 18 تعليقات
حلاوة الجبن

عندي طريقة حلاوة الجبن و حابة تجربوها معي ، انا جربتها مرة واحدة و كتير زبطت معي بس ما كررتها مرة تانية ، هي مقاديرها





قرص جبنة عكاوي محلية من الملح و مقطعة لقطع صغيرة
ا كوب سميد ناعم
ا كوب ماء
قشطة طازجة
قطر





• نغلي الماء ثم نضع الجبنة حتى تسيح ( تذوب يعني) مع التحريك بملعقة خشبية من حين لأخر بعدها نضيف كوب السميد مع التحريك المستمر حتى تصبح مثل العجين

• نضع القطر في صينية ثم نفرد العجين فوقها أي نرقها ثم نضع القشطة و تلف ثم تقطع و تزين بالفستق و زهر الليمون و تقدم مع المزيد من القطر .
  • وصفات تانية ممكن تعجبك


التعليقات

  1. منى 5 January 2009

    ألف شكر الك هيا للطريقة هيا , انا بعملها بنفس المقادير تمام , قصدي السكر و المي و الجبنة بس بضيف بالأخير شوية ماء زهر و بحط الكل مع بعض من أول دقيقة , قصدي السميد و الجبنة و المي و ببقى بحرك لحتى تجمد و يصير تحريكها صعب بعدها بفردها بالصينية و بكوب داهنة الصينية بشوية صغيرة كتير قطر .

    و كمان الاخوات المغتربات الي مو متوفرة العكاوي عندهم ممكن استبدالها بالموزاريلا ,

    مرة تاني شكرا للوصفة اللذيذة و سلم دياتك حبيبتي :)

  2. haya 5 January 2009

    شكرا الك منى كثير انها عجبتك وان شاءالله الاخوات يستفيدوا منها يارب

  3. Iman 23 June 2009

    يسلموا ايديكي يا هيا على الوصفه. قريبه كتير من وصفتي. انا بحط مع قالب الجبنه ثلاثه ارباع كوب سميد مع نصف كوب ماء بس تاني مره راح اعمل مقاديرك. بس لما بفردا بحط شويه قطر على الكاونتر الرخام و بحطها على القطر و بكبسها بايدي شويه و بمسح الشوبك بالقطر و برقها مثل العجينه و بتصير مثل ورق السيكاره رقيقه و بعدين بحشيها. بس هديك اليوم كنت بعمل بحث على جوجل شفت باليو توب معلمين حلو في سوريا بعد ما يفردوها بيطووها مثل الفوطه و بيحطوها في الثلاجه و بيحشوها على الطلب. فكره كمان !!! وصفتك لذيذه هيا و شكرا كتير :)

  4. Amar 17 September 2009

    شكراً على هذا الموقع الجميل.
    لقد نفذت الوصفة وقسمت المقادير حيث استعملت قالب جبنة موزيريلا واحد ويساوي تقريبا أكثر من ربع كوب ونصف كوب ماء ونصف كوب سامولينا ناعمة وملعقة فانيلا .
    النتيجة أن العجينة لم تكن متماسكة كما يجب وعند محاولتي فردها بالصينية تشققت، ما السبب؟ هل لأن الوصفة خالية من السكر أم لأن الجبنة قليلة؟

  5. منى 17 September 2009

    ممم , اتمنى تقرا هيا السؤال و تساعدك , بكل الاحوال اختي قمر رح ااقلك مقاديري و انتي ممكن تعرفي شو الي ما زبط , انا استعمل كاسة مي مع كاسة سميد و حوالي الثلث كوب سكر أحطهم على النار حتى تغلي بعدها اضيف الجبنة المبشورة و المحلاية مع شوية ماء زهر و بحركها بملعقة خشب متل المهلبية لحتى تدوب الجبنة , هلا اذا انتي استعملتي ربع كوب من الجبنة لنصف المقادير فاتوقع هادا هو الغلط , بس المفروض انها تتماسك معك منيح :?

  6. Amar 27 September 2009

    ممكن أعرف وزن قرص الجبنة العكاوي المقصود بالوصفة؟

  7. ام رومل 21 November 2009

    اشو الجبنه العكاوي يعني الجبنه البيضه السوريه الحلوه

  8. haya 21 February 2010

    السلام عليكم ورحمة الله وبركاته

    مرحبا اخت قمر انا اسفة جدا على عدم الرد على سؤالك لكن كان عندي شوية ظروق بالافة انه كان عندي مشكلة بالنت

    بالنسبة لحلاوة الجبن انا بصراحة ما بعرف شو سبب انو شققت معك العجينة وانا بصراحة ما عملتها ولا مرة بالجبنة الموزاريلا انا عادة بعملها بالجبنة العكاوي التشيكي وبقطعها وبحليها بالماء والقرص يزن حوالي نص كيلو والعجينة ما فيها سكر ابدا لأنه القطر كافي
    هلأ لما بنعمل العجينة وبتزبط معك على طول بنكون مجهزين القطر وبنصب منه شوي على الرخامة او طاولة العمل ومباشرة بنفردها باليد او بالشوبك ما في مشكلة وبتكون رقيقة شوي وطبعا بهذا الوقت بنكون محضرين الحشوة اللي هي قشطة طازجة وبنحشي فيها العجينة وبنلفها وبنقطعها لقم صغيرة وبعدين بتزينيها بالفستق وممكن اذا زهر الليمون متوفر بيكون شكلها كثير حلو واتركيها تبرد بتطلع ازكي وطعمها لذيذ

    اتمنى اخت قمر اني اكون فدتك بالمعلومة وانا حبيت اراسلك مباشرة عشان تأخرت عليك بالرد وما بعرف اذا كنت عم تفتحي الموقع او لأ
    وانا بكرر اعتذاري عن عدم الرد

  9. Amar 24 February 2010

    أرجو تعديل الوصفه إذا لتكون المقادير نصف كيلو جبنه لكل كوب سميد.
    وشكرا على الرد حتى لو كان متأخر.

  10. haya 10 April 2010

    السلام عليكم اخت منى
    معلش انا عم عذبك معي بس بطلب منك اذا في مجال تعديل مقادير الوصفة اللي فوق مثل ما قالت الاخت قمر انو قرص الجبنة العكاوي يعادل تقريبا نصف كيلو
    وراح اكون شاكرة الك كثير

  11. AYAH 25 June 2010

    أنا كتبت تعليق بنفس الموضوع ولكن بالقسم المنسوخ
    بعدين قريت التعليقات هون
    شكرا

  12. haya 3 September 2010

    مرحبا اخت منى انا اسفة كثير كثير على تأخري بالرد بس ما عم بقعد على النت ابدا واذا قعدت بيكون بسرعة
    بالنسبة للجبنة العكاوي والله ما بعرف الها بديل وبالنسبة للحلوم ما جربتها فما عليك الا بالتجربة ويا بتصيب او بتخيب وان شاءالله بتصيب وما بعرف بريطانيا ابدا وشو فيها انواع اجبان، انا اسفة كثير ما قدرت افيدك ما عليك الا التجربة،
    واسفة مرة ثانية على تأخري بالرد عليك :)

  13. Aya 5 September 2010

    باين سهلة هالوصفة كتير مشتهية عالحلاوة بجبن
    بدي جربها ان شالله لما أفضة شوي
    تسلم ايديكي
    بس سؤالي حبيبتي
    جبنة العكاوي بتعرفي بديل عنها؟ أ, شلون بلقاها هون ببريطانيا
    انا لقيت جبنة حلوم بيمشي الحال؟
    شكرا كتير

  14. ام محمد 15 December 2014

    سلام اخت منى يعطيك العافية الف مره انا قبل سالتك عن حلاوة الجبن انو اذا بنفع لها الجبنة البقرية الي بنستخدمها للكنافة عنا بفلسطين اذا بتنفع ولا شو انا جربتها مره وما ساحت على الاخر ممكن المساعده والك الشكر

    • منى 19 January 2015

      اهلا ام محمد :)
      و الله انا ما عندي فكرة ، مو مجربتها قبل هلا و ما بقدر فيدك

  15. Haya 20 January 2015

    السلام عليكم اخت ام محمد
    هلا بالنسبة للجبنة العكاوي هي شبيهه بالجبنة النابلسية يلي نحن بنستعملها للكنافة النابلسية ولازم تكون بتسيح لحتى نقدر نشتغل فيها

    • منى 20 January 2015

      شكرا هيا للاجابة ، الله يعطيكي الف الف عافية

    • ام محمد 1 March 2015

      شكرا على الرد اخت منى واخت هيا وهي الجبنة بتسيح انا اول شي بتسيح معي بعدين بتشد وما بتقبل تدوب ما بعرف ليش والله يعطيكم العافية على هالموقع اللطيف

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)