رز بحليب مبطن


         وصفة : منى                 2008/02/05                 27 تعليقات
رز بحليب مبطن



2 ليتر حليب ( 8 كوب )
2 فنجان صغير رز مصري
فنجان صغير سكر
ماء زهر من نوعية فاخرة


بالوظة البرتقال :

2 كوب من عصير البرتقال المصفى
فنجان و نصف أو أكثر من السكر
ملعقة كبيرة مملوءة و نصف نشاء الذرة ( كورن فلاور )





• يوضع الحليب على النار و يترك حتى يغلي .

• يغسل الرز و يصفى جيداً ثم يوضع فوق الحليب المغلي و يترك الرز بحليب على نار متوسطة لمدة 40 – 50 دقيقة تقريباً أو حتى تنضج حبات الرز و يسمك الحليب قليلاً بفعل نشاء الرز .

• يضاف السكر و يحرك الرز بحليب لبضع دقائق حتى يذوب السكر تماماً ثم يبعد القدر عن النار و يضاف ماء الزهر , أصبح الرز بحليب جاهزاً يسكب في عشر صحون زبادي صغيرة ثم يترك حتى يبرد تماماً .

• يذوب السكر بالبرتقال في قدر صغير و يذاق للتأكد من حلاوته , يضاف المزيد من السكر حسب الرغبة إذا بقي العصير حامضاً .

• يذوب نشاء الذرة بالعصير ثم يوضع القدر على النار و يحرك باستمرار بمضرب سلك حتى تغلي البالوظة و تسمك .

• توزع طبقة رقيقة من البالوظة فوق أطباق الرز بحليب ثم توضع الصحون في البراد حتى وقت التقديم

• قبل التقديم يمكن أن تزين الأطباق بالفستق الحلبي المبشور أو تترك بدون زينة .

فكرة سريعة :

يمكن اعداد البالوظة بعصير البرتقال الدموي أو بشراب القمر دين أو بعصير الليمون أو حتى بلب المانغا , و بنفس الطريقة يمكن تبطين الرز بالحليب بالزردة .

سر الطبخة :

لا تسكب البالوظة فوق الرز بحليب إذا لم يبرد تماماً و إلا فإنهما سيختلطان ببعضهما البعض .



  • وصفات تانية ممكن تعجبك


التعليقات

  1. غيث 6 February 2008

    تسلم ايديك يا مذوقة على هالطبق اللذبذ من عند هالصبح والله شفت الصورة اشتهيت تكون الزبدية امامي لأتذوقهامع اني البارحة خلص من عندي الرز بحليب طبخاتك كلها طريقتها بتدل على انك معلمة وفنانة شكرا لك بتعرفي انا احيانا استعمل عصير البرتقال الجاهز لما ما بيكون عندي برتقال عصير بالبيت وكتير طيب عالطبخ كمان مثل البرتقال الفريش انا جربته اول مرة وانا خايفة بس طلع كتير طيب و ناجح وهو مفيد للي ما عندها وقت تعصر برتقال شكرا لك على جهودك المبذولة وتعاملك باخلاص مع الموقع

  2. omtasneem 6 February 2008

    :zzz السلام عليكم ورحمة الله وبركاته شي لذيذ ورائع مشكورة عزيزتي وتسلم دياتك

  3. منى 6 February 2008

    مية أهلا و سهلا فيك غيث أخت جديدة و عزيزة :)
    و الله فكرة مفيدة جداً , لأن أنا هل النوع ما بحضره إلا بالشتي بس هيك ممكن حضره ايمتى ما بيخطر على بالي

    الله يسلمك أختي , هاد بس من زووءك و لطفك :)

  4. منى 6 February 2008

    و عليك السلام ام تسنيم :) الله يسلمك حبيبتي و الشكر ليك على الرد الحلو ;)

  5. ea14812 9 February 2008

    تحياتي منى
    طبخاتك كلها لذيذة وحلوة :zzz

    إيمان

  6. منى 9 February 2008

    هلا فيك إيمان :) نور الموقع بردك أختي , و إن شاء الله تجربي وصفة و تكون على زووءك ;)

  7. linda 10 February 2008

    شكلو لحالو بيجنن
    و الطريقة جديدة عليي
    رح جربها بجوزي متل العادة :grin
    يسلمو و الله يعطيكي العوافي

  8. منى 11 February 2008

    لنوشة يا قمر من زمان القمر ما بان , شتقتلك كتير :)

    هنا يا رب مقدما , بس بتعرفي استغربت أنك ما بتعرفيها :roll ..

    الظاهر بالشام مو معروفة لان عنا بحلب كلنا منعملها ;)

  9. linda 11 February 2008

    والله يمكن بيعملوها بالشام
    بس محسوبتك يعني خلصت البكالوريا وهجت
    و لما كنت بالمدرسة ما تعلمت الطبخ و لا حتى اني حط فـطور
    بس لما تجوزت وصرت دور بالنت على اكلات سمعت بكتير شغلات
    اول مرة مرة بسمع عنها و كل ما اسأل امي تئلي ايه موجودة هل الاكلة شو ما بتعرفيها
    يا اما تكون امي عاملتها مرة و ما حدا حبها مشان هيك ما عاد تعملها مرة تانية وننساها

    و الله شتقتلك يا منى الله يشهد بس استنى عليي شوي يا بنتصر يا بجن
    حاكم ولادي يخزي العين و بلا حسد رح يجيبو اخرتي قريبا :upset

    بتعرفي اني ما عاد فتت على مواقع طبخ غير هاد
    الله يعطيك الصحة والعافية والهنا
    سلام

  10. منى 11 February 2008

    و هو المطلووب ليندا , لا موقع طبخ الا لقمة :grin

    سلامتك ربي , الله خليلك يااهم , و الله هل الاولاد شو بدهم صبر , بيعين الله

  11. muna.g.7 25 August 2008

    هذا الحلو المفضل عندي الحلويات العربية في رمضان لها طعم التاريخ والتراث برائحة ماء الورد والزهر اوالهيل والزعفران

  12. منى 26 August 2008

    هلا منونة :) عوافي يا حق على قلبك و الله يتقبل منا و منكم الصيام و نكون من عتقاء الشهر :)

  13. ريمو 27 November 2008

    ممم بجنن انا دايقته عند وحدة حلبية وكتير بحبه بس ولا مرة جربته بقى اكيد رح جربها بعد ماشفتها عندك بس بدي اسال انو البالوظة بتكون سخنة والرز بحليب بارد ؟ ولا البالوظة كمان لازم تكون باردة؟ شكرا كتير

  14. منى 27 November 2008

    مية هلا ريمو :)

    هلا وقته هل الرز بحليب , ان شاء الله رح يعجبك كتير .

    البالوظة ما رح تكون عم تغلي بس كمان مو فاترة و الا ما رح يصير وجهها مستوي :roll خليها كم دقيقة قبل ما تسكبيها على الرز بحليب البارد تمام ;)

  15. الدمشقية 6 January 2009

    حبيبتي منى هل الأكلة كتير طيبة :grin وطعم البرتقل فيها بيعطيها طعم غير شكل والله من كم يوم اختي ساوت ببيتها وجابتلنا سكبة
    وماما بتساويها كتير طيبة متلك طبعاً :) بس نحن بدون ماء زهر لأنه كلنا بالبيت ما منحبو زيادة
    سلم ايدك ويعطيك العافية حبيبتي منى

  16. منى 6 January 2009

    الله يعافيكي و يخليكي يا قمر و الف هنا و عافية على قلب كل العيلة , هي نفسها اختك الي كانت حامل ؟
    ان شاء الله تكون قامت بالسلامة ;)

  17. gsm 3 September 2009

    اهلين منونة كان بدي اسألك سؤال انا مرة عملته وطلع معي كتيير زابط بس في شغلة وحدة انا طلعت معي البالوظة لونها برتقالي اغمق من يللي بالصورة بس انا إستعملت عصير جاهز لأنو وقت الصيف وما في برتقال طازج يا ترى هادا السبب ؟
    ويسلموا إيديك يا رب

  18. منى 4 September 2009

    ايه اكيد هادا السبب , و ما في غيره لان اللون اله علاقة بالعصير ;)

  19. إسراء 9 January 2011

    السلام عليكم ورحمة الله وبركاته كيفكن جميعا وكيفك ست منى ان شا الله تمام ؟؟؟؟
    بصراحة هي الاكلة ما كنا نعملا عند اهلي وببيت حمايي اول ماتزوجت لما تساويها حماتي كنت اكل طبقة البرتقان لحال وبعدين بلش بطيفة الرز بحليب خوفا على المعدة ههههههه وقول لحالي يا الله شو بخبصوا ههههههههه ؟؟؟؟ المهم بلا طول سيرة شوي شوي صرت اكل المبطن بشكل نظامي وصرت اطلبو طلب من حماتي بس بدي جرب هالمرة انا اعملو بس خايفة ما يسمك الرز بحليب ويعمل طبقة على وشو بقا اذا فيني ضيف معلقة كورن فلاور مدوبة بشوية حليب وضلني عم حرك لحتى يسمك معليش؟؟ وفكرة تانية :مرة حماتي كان عصير البرتقان ماكتير غامق قامت حطت شوية بشر برتقان وصار حلو كتير حلو لونه وماعطا طعم مرار من البشرة ….. وشكرا كتيرررررررر لوصفاتك انا كتير عم جرب من وصفاتك واغلبن بطلعوا بجننوا بجد الله يعطيكي العافية

  20. منى 10 January 2011

    هلا اسراء :)
    شوفي اذا خليتي الرز بحليب على النار فترة كافية رح يسمك و تطلع طعمته اطيب و هي هي طريقة نانتي و نانتك و بيحضروها من شي الف سنة , بس اذا خايفة ممكن تضيفي شوية كورن فلور ;)

    مممم , فكرة طيبة كتير , مرة ماما عملتهم هيك و متل ما قلتي بتطلع نكهة البرتقال بتجنن ..

    انا بحبهاكتير لهل الوصفة و كمان امي ما كانت كتير تعملها بس لما تعملها يصير عنا احتفال :grin

    صحتين و الف الف هنا على الوصفات الي عجبوكي و الي نص نص حقك علي يا جميل

  21. umtareq 27 July 2011

    ولي على بعضي..اي شو هالمبطن ست منى..والله شكلو بيغرف القلب.. يسلم هالإيدين يارب. آآه بس لو مالي بالسرير هلأ من وجع ظهري لقمت بهالساعة عملتو :(
    بس أنا بعرف ست منى من الماما انهم كانوا يزيدوا حلاوة الرز بحليب شوي زيادة وما يحطوا أبدا سكر للخشاف..على أساس تبقى حموضة البرتقال ظاهرة
    شو رأيك بالفكرة من حيث المبدأ :?

  22. منى 28 July 2011

    عليك الف الف عافية يا رب , ما على قلبك شر :roll
    يا ستي انا اتعلمتها بالعكس , انو الرز بحليب ما اله سكر ابدا , بس المبطن اله ;) , بقى من ناحية الفكرة هيك اصولها , و انت جربي لحتى تعتمدي الطعمة الي بتحبيها:)

  23. آرام 5 November 2011

    كل عام وأنت بخير .. ولقمة طيبة بخير .. وبلدنا بألف ألف خير.

    هي أول مرة بعمل مبطن، مع أني كتير بحبه.
    إن شاء الله ألوانه الحلوة المشرقة تضوي على كل القلوب يا رب.

  24. منى 5 November 2011

    امين يا رب اخي ارام , و ان شاء الله العيد الجاية تكون الاحوال منصلحة و القلوب رايقة و بلدنا بخير :roll

    صحتين و الف هنا , هي من الوفات الي ما بقدر قاومها , ان شاءلاالله تكون طلعت تمام معك

  25. لينا 19 September 2013

    مرحبا منى بدي اسئلك سؤال وياريت تجاوبيني اول شي انا بهنيكي على هالموقع اللي اكتر من رائع لأني ماعدت اعمل ولا شي من غير ما ارجعلو وشوف وصفاتك اللي بتعئد وبتاخد العقل لدرجه اني صرت اول ما اصحا وافتح عيوني لازم اقعد اتصفح فيه شوي لحتى جرب كم وصفه صار كتيييييير جربت من وصفاتك والحمدلله بفضل الله وفضلك الكل كان بيجنن وراضيه عنو كتير ونجح معي بس هلا سؤالي بيصير احط للبالوظه نشاء بودره لانو انا حاليا بالصين وبالزور لحتى لاقيت نشاء بودره ومافي غيرو وارجو الرد وشكرا واسفه كتير عالاطاله

    • منى 9 October 2013

      اهلا لينا منورة الموقع و مشرفتيه و الله و بالعكس بنبسط بالردود الطويلة
      اي بيصير اكيد , هو المطلوب للوصفة نشا بودرة

      ايا سؤال تاتي من عيوني

  26. لينا 9 October 2013

    شكرا كتيييييير لزوئك عملتو وطلع بيجنن بس كان بدو كمان معلقة نشا لحتى يجمد اكتر انشالله رح ارجع اعملو مره تانيه متل مابدي وشكرا كتيييير لتعبك الحقيقي اللي باين بالموقع

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)