ركفورد باستا


         وصفة : منى                 2011/04/12                 30 تعليقات
ركفورد باستا

في وصفات بس ما شوفها , بعرف حالي انو اذا رب العالمين راد رح اعملها , بقى اليوم , بكرة , بعده , بعد اسبوع شهر او حتى سنة , المهم بتعشش براسي و كل فترة بتنوي بالزيق للفت النظر , اما برد على التنواية , او بطنشها مع وعد قريب لنفسي اني رح جربها باقرب وقت .و الوصفة الي بتبقى بزيق راسي بهل الطريقة ممكن تكون هل الوصفة قريبة كتير على زوئي , او ممكن تكون بالعكس تماما لان من فترة لتانية بحب من اتحدى زوئي بشي جديد غريب كتير و ما اتقبله عقلي من اول نظرة , بهل الطريقة عم اتعرف على اشيا طيبة كتير كانت رح خارج نطاق دائرتي لولا هل الوعد الصغير بالتجديد .


هي الوصفة واحدة من بين الوصفات الي بقيت براسي من اول ما شفتها في مجلة bbc . مقاديرها مو راكبين على بعضهم , و كل التوليفة ما بتدخل عقلي . ركفورد و بركولي و سبانخ و كمان بندورة , لك صلوا على محمد , بس مع ذلك بقيت عم تنوي كل فترة و فترة , جربيني , انا طيبة , رح تحبيني . لحد ما اتوفرت عندي كل مقاديرها و جربتها اول هل السنة , و كانت اول وصفة في حياتي اطبقها حرفيا بالغرامات لان كنت حابة شوف شو الطعمة الي بدها يانا ندوقها مبتكرة الوصفة . طول ما كنت عم حضرها كان في ابتسامة شريرة على طرف تمي , و منى النقاقة جواتي صرعت راسي , انو شرفي يا خانوم شو اخرة هل التخبيص , زودي شوي حليب , كتير كميته قليلة , انو مشان الله انسي صلصة البندورة , طيب حطيلها بصلة صغيرة , بنتي بلاه القرنبيط مشان خاطري , بس منى الحبابة كانت قررت انو ما ترد على منى الشريرة و رح تجربها متل ما قالت خالة Jane صاحبة الوصفة .


حضرتها و لما دقت الصوص طلعت طعمته ممممم البلوتشيز مع التشدر ما اطيبها , طبقتها بالصحون الصغيرة و حسيتها رح تطلع شغلة طيبة و مميزة و تغير شكل , و كان التزامي بالمقادير عطاني شي جديد ما كنت رح اعرفه لو حطيت مقادير متل مو متعودة . تركتها لتاني يوم و خبزتها و بعدها نزلنا فيها , يممممم شو كانت طيبة , ما اتوقعت انو السبانخ و القرنبيط رح يطلعوا هيك يميي مع بقية التوليفة ” على فكرة دوما السبانخ مع الركفورد بيطلعوا شغلة طيبة كتير ” . حتى الي مو كتير اصحاب مع الركفورد عندي في البيت حبها , و اولادي حبوها كتير بالاجماع و هادا نادرا ما يصير , ما عدا القرنبيط . لهيك عم خليه بس بطبقي . هلا صارت الوصفة واحدة من الوصفات المفضلة عنا . و توتة توتة توتة خلصت الحتوتة .


صحي قبل ما تخلص الحتوتة , بالمرات التانية الي حضرت الوصفة فيها عملت كم تعديل صغير , انتصرت منى الشريرة بالاخير :) , هلا انا مو كتير صحاب مع البروكولي لهيك حبيتها بالقرنبيط اكتر , بس هادا راي شخصي , انت حضريها بالي بتحبيه . كمان كمية البلوتشيز بتختلف حسب قوة النوع الي عندي . انا عني عم استعمل حوالي 25 غ لان النوع الي عندي كتير طعمته قوية . و كمان لا تزيدي الخبز على الاطباق لحتى يبقى فيها من الصوص مو تنشف على الاخير , و اخر الشي رح ارجع نزل الاستفتاء الي نزلته في الفيس بوك هون , الاستفتاء بيقول :


يا ترى لما بيكون في الوصفة مقدار جديد عليك , غريب , ممكن ما استعملتيه من قبل .
هل الشي بيخليكي تغيري رايك و تلغي الوصفة و تجربتها من الاساس , و الا بيشجعك لتجربة اشيا مختلفة و ممكن تكون طيبة ؟

بالصحة و الهنا





250 غ معكرونة بني penne
رأس وسط قرنبيط أو بروكولي , 500 غ
ملعقة كبيرة زبدة
فص ثوم صغير , مهروس
750 غ سبانخ , مفروم و مغسول , ما يعادل 10 كوب
ملح و فلفل اسود
3 ملعقة كبيرة صنوبر , محمص

صلصة الجبنة :

4 كوب حليب
4 ملعقة كبيرة طحين
2 – 3 ملعقة كبيرة زبدة
ملعقة صغيرة مسطحة خردل , من النوع المفضل لديك
100 غ جبنة تشدر صفراء أو برتقالية , مبشورة
25 – 50 غ جبنة ركفورد , بلو تشيز , تقريباً قطعة بحجم جوزة صغيرة
جوزة الطيب

صلصة البندورة :

2 – 3 فص ثوم , مهروس
2 ملعقة كبيرة زيت زيتون
3 كوب بندورة , مقشرة و مفرومة





• تسلق المعكرونة بالماء المملح المغلي , بعد 5 دقائق يضاف القرنبيط او البروكولي و يترك لبضع دقائق اخرى او حتى يطرى من دون أن يفقد قوامه , يصفى الكل و يوضع جانباً مع الاحتفاظ بالقليل من ماء السلق .

• صلصة البندورة : يقلب الثوم بزيت الزيتون لبضع ثواني حتى تظهر رائحته , تضاف البندورة و يترك الصوص من 15 – 20 دقيقة او حتى يسمك . يتبل بالملح حسب الرغبة .

• صلصة الجبنة : يخفق الحليب و الطحين و الزبدة بمضرب سلك , يوضع الكل على النار و يقلب باستمرار حتى يغلي الصوص و يسمك لمدة 3 دقائق . يبعد عن النار و يترك قليلاً ثم يضاف الخردل و جوزة الطيب و اغلب كمية الجبنة التشدر و الركفورد . يترك القليل من الجبنة المبشورة للوجه .

• يقلب السبانخ و الثوم بالزبدة حتى يطرى و يجف مائه , يتبل بالملح و الفلفل الاسود و القليل من جوزة الطيب .

• يترك حوالي ثلث صوص الجبنة جانباً , تضاف المعكرونة المسلوقة و القرنبيط لبقية الصوص و يضاف القليل من ماء السلق اذا دعت الحاجة حتى يتغلف الكل بالصوص اللذيذ .

• تدهن 6 اطباق صغيرة , من الحجم الظاهر بالصورة , أو طبق كبير بالزبدة توزع نصف صلصة البندورة فيها ثم نصف مقدار السبانخ ثم المعكرونة بصوص الجبنة ثم باقي السبانخ و باقي صلصة البندورة . يوزع الصنوبر و يغطى الكل بباقي صوص الجبنة و بقية التشدر .

• تخبز الاطباق في الفرن المحمى على 180 مدة 15 – 20 دقيقة و تقدم فوراً مع سلطة خضراء و خبز الثوم .

التعليقات

  1. اياد 12 April 2011

    شكرا مدام منى على وصفتك الجديدة والمميزة

  2. farah 12 April 2011

    والله يا منوش شكلها هالأكلة طيبة وانا مجربة هيك وصفة بتشبهها بس ما تجرأت ضيف البلو تشيز لأني ما بحبها يا ستي تسل ايديكي :zzz

  3. MAIS911 12 April 2011

    مرحبامنى انا عضوة جديده بالموقع اسمي ميس هلا ماني جديده كتير لاني صرلي فترا عم ادخل عليهواخدمنو وصفات وجربهامن بعدما رفيقتي الله يذكرها بالخير دلتني عليه ونصحتني فيه وكانت هي احلا نصيحه ومن يومتها وانا عم ابدع بالطبخ هلا اناصرلي حوالي تلات سنين متجوزه وساكنه بكندا بطبخ طيب بس ما كتيير الي بقصص التزين والتنفنن واطباق الحلو والمعجنات كنت خاف منها بس من وقت ما تعرفت علا هالموقع الرائع وانا كل يوم بعمل شي جديد وبفاجئ فيه جوزي الي صار اكتر من ممنون الكون لانكون عم تعلمونا وتمشو معنا خطوه خطوه هي الاكله شكلها كتيير بشهي وبصراحه انا كتيير بحب جرب اشياء جديده وكل ما كانت الوصفه غريبه اكتر بحس انو طعمتها حتكون اطيب فكيف اذاكانت مضمونه و مكتوبه عندك بالموقع لانوما شالله ما جربت شي من عندك وما طلع طيب مابدي طول عليكي بس عندي سؤال زغير انا يوم الجمعه عندي عزيمة لبيت حمايه وحابه فاجؤن بمواهبي الجديده فبدي نصيحتك شو ممكن حضر اكلات سهله ومتنوعه ومنظرها يكون حلو علا السفرا عنجد بكون ممنونه منك كتيير والله يا منى انت صرتي بمثابة اخت النا بهل الغربه :)

  4. آرام 13 April 2011

    الحقيقة أخت منى .. ضربة معلم :)
    مو قصدي عالوصفة، قصدي فكرة الاستفتاء والتشويق المسبق وموقفنا تجاه الوصفات الغريبة … حطيتينا بخانة اليك ;)
    يعني بالنسبة إلي على الأقل، بصراحة ما كنت رح جربها لولا قصة الاستفتاء. صحيح أنو ثقتي فيكي خلتني أجرب كتير أشيا جديدة، بس عادة بتكون وصفات بسيطة، وهالوصفة بدها شوية شغل وبتاخد وقت. والأهم والأكيد أنو ما كنت رح جربها بسبب خليط الصوص الأبيض مع الأحمر، لأنه بيتعارض مع مبدأ أساسي في ذوقنا الحلبي حيث اللبن والبندورة ما بيجتمعوا (رغم أنهم بيجتمعوا عند جارتنا حماة مثلاً، وأشهر أكلة عندهم هي الباطرش وفيها لبن وبندورة، بس أنا ما قدرت أتقبلها).
    طبعاً هلأ رح جرب الوصفة بأقرب وقت، وأكيد رح خبرك النتيجة.
    وعلى فكرة، خفت تتأخري بالوصفة ويصير فيني متل وصفة الشوكي، فاشتريت سبانخ وسلقته وحطيته بالفريزر :)
    شفتي كيف أنو الاستفتاء كان ضربة معلم 8)

  5. منى 13 April 2011

    هلا اخي اياد , الشكر الك لتواجدك معنا بالموقع , مية هلا فيك

  6. haya 13 April 2011

    السلام عليكم ورحمة الله وبركاته

    مرحبا اخت منى والله هالاكلة شكلها كثير طيب ان شاءالله راح جربها وبرد لك خبر وباذن الله تطلع لذيذة مثل ما وصفتيها بس سؤالي الخردل اللي قلت عليه هو نفسه المستردة

  7. منى 13 April 2011

    هلا فروحة :)
    اذا ما بتحبي الركفورد فيك تلغيها من الوصفة , لان كمان صوص الجبنة كتير طيب و مميز و غني ;)

    بعد زمان القمر الحلو ما بان

  8. منى 13 April 2011

    هلا ميس :)
    مية هلا فيك حبيتي , ما بتعرفي اديه بنبسط لما بيصيروا الزوار العاديين فرد من العيلة , مية هلا فيك
    صحتين و الف الف هنا علىكل الوصفات الي جربتيها , ممنونة ردك و كلامك الحلو الي فيه و كمان شكرا لجوابك على الاستفتاء :zzz

    العزيمة ما الك الا فطيرة الشاورما , صار جربوها كتير كتير و الحمد لله مضمونة و طيبة و بتبيض الوج
    عندك كرات الدجاج و السلطة المقلمة او الفتوش
    ممكن تعملي يالنجي هادا بيتحضر قبل يوم و شغلته

    شو كمان , ممكن تفوتي على صفحة العزايم و تلطشي افكار منها الشي الي بيناسبك :zzz

    ايا سؤال تاني من عيوني

  9. منى 13 April 2011

    هلا ارام , و الله ما قصدتها تكون هيك طلعت عفوية , يمكن متل ما خليت حالي اتقبل و اقتنع الوصفات الغريبة , عملت نفس الطريقة هون لحتى ساعد الي ما كتير بيتشجع
    هلا فكرة الحليب و البندورة مو كتير غراب , شي قريب على اللازانيا , الغريب , بالنسبة الي هو القرنبيط و السبانخ و فوقه البندورة و الركفورد :eek

    ان شاء الله تجرب الوصفة و تكون مستاهلة و شكرا كتير لثقتك في , ممنوتك اخي ارام

    رح استنى اخبار منك , و لو صورة للتطبيق بيكون احسن و احسن :)

  10. منى 13 April 2011

    هلا هيا :)
    ان شاء الله تجربيها و تحبيها ;)

    الخردل هو المستردة نفسه و ايا سؤال تاني من عيوني 8)

  11. أم نوران 13 April 2011

    مبينتا طيبة هالاكلة انا كمان بحب هيك شغلات غريبة بس مو دايما يعني حسب ايش فيها وحسب مقاديرا وطبعا ازا حطتا اليت منى معناتا اكيد طيبة لانو ما جربتلك و لا وصفة وحدة وما طلعت طيبة و لا حتى شوي طيبة هههه :grin
    الله يعطيكي العافية ,,ايه على فكرة و صلتلك و صفة طاجين الفول؟؟كتبتلك ياها برد بوصفة الشوكي ان شاء الله تكون عجبتك …شكرا كتير الك و الله يحفظ سوريا الحبيبة من الفتنة و الله يحقن دماء المسلمين يا رب ديري بالك على حالك وعلى الكتاكيت :)

  12. omtasneem 13 April 2011

    السلام عليكم ورحمة الله وبركاته. كيفك منى ياستي وصفتك متحير ارنبيط مسلووق غريبة وجبنةرككفورد ماعرفتا من كتر ماعنا انواع جبن اذا مو متوفرة عندي فيني اعملا بالقشقوان وشغلة تانية الخردل فيني ماحطواااا ومشان الاستفتاء ياستي اذا وصفة شكلا مغري وخرج عزايم بعملا ومابتردد ويسلموا ايديك :

  13. dado 13 April 2011

    Mannoush
    this dish looks very yummi, Ill try it when possible. I love blue cheese.
    Regarding your question, I don mind any new ingredients.. specially if I found the recipe in your website, coz I trust your taste. Who knows, sometimes new flavours become favorites. Salam

  14. محبةالمصطفى ملك 13 April 2011

    منى رح أبعتلك الطريقة برسالة عالفيس بوك..أوكي؟؟؟
    طيب منوشة بدي أسألك عن شغلة صغيرة :roll
    أنا مرة سألتك عن السجق اذا بدي يطلع طيب متل الجاهز قولتيلي أجيب بهارات من عند أبو زيد الهلالي..بتتذكري؟؟
    المهم ربنا ما ييسر لي أشتري البهارات لليوم :p
    برأيك شأد أحط لكيلو كباب؟؟و أستغني عن الملح و البهار و الكزيرة و التوم؟؟؟؟؟؟
    الله يوفقك يا منووشة أنا بانتتظار ردك…………..

  15. منى 13 April 2011

    هلا ام نوران :)
    خليلي عينك , ان شاء الله تبقى هل الثقة دوما و يا رب تجربيها و تكون طيبة كتير
    ;)

    وصل الطاجين , رح نزله قريب , تسلم ايديكي يا رب و يحفظلك عيلتك كلها و يخليلك حبابك :)

  16. منى 13 April 2011

    هلا دالو :)
    مش معقول , انت في حينا يا مرحبا يا مرحبا ;)

    انا كمان بحبها كتير , و على اد ما جربت فيها وصفات , حتى الفطاير حطيتها معهن :grin يم يم يم

    ان شاء الله تجربيها و تحبيها و رح استنى رايك و شكرا لجوابك على السؤال ;)

  17. منى 13 April 2011

    هلا ملك :)
    رح استنى الوصفة ان شاء الله :)
    شو رايك جبلك معي , بكرة ان شاء الله رح روح للمدينة و عدي على سوق العطاريين , شو رايك اخسب حسابك و ابعتلك ياهن ايميل :grin

    بتحطي للكيلو معلقة كبيرة و بتتركي بقية المقادير متل ما هي ;)

    ايا سؤال تاني من عيوني

  18. نجمة 13 April 2011

    السلام عليكم كيفك أخت منى والله اشتئتلك كتيير بس سبحان الله ظروفي ما عبتسمحلي أدخل :cry الحمد لله على كل حال شكرا كتير عالوصفة باينتا طيبة ان شاءالله بدي جربها وبردلك خبر وبالنسبة لفكرة الإستفتاء كتير عجبتني وأنا بحب جرب وصفات جديدة خاصة إذا أنت مجربتيها لأنو بإذن الله أكيد مضمونةوطيبة يسلمو إيديك والله يعطيك ألف عافية :zzz

  19. محبةالمصطفى ملك 13 April 2011

    هلا فيك منوووش
    هلأ أولا الوصفة ما كتير وااااو مشان بس ما تتفاجئي بس برأيي طيبة
    و تسلميلي يا منى أنا اشتريت خلص :grin
    بس اي كل ما بتطبخي طبخة جديدة احسبي حسابي بايميل :grin
    تسلم عيونك :zzz

  20. gsm 14 April 2011

    هلا منى يسلمو ايديك على الوصفة بصراحة انا من النوع المغامر كتيير يعني دائما كل ما اروح على شي مطعم بتلاقيني طلبت شغلات غريبة عجيبة لك حتى ما بعرف شلون بتلتفظ لأنو بحب التغيير كتيير وبحب كل شي جديد عكس زوجي يللي ما بحب يدوق شي غريب عليه بس طبعا بخلينا انا ادوق بالأول هههههههههه كبش الفدا وعلى هل السيرة عجبتني كتيير هل الوصفة ومشتهية كتيير اجربها خصوصي ما سبق وأكلت او إستعملت الجبنة الزرقا لسى ما وصلنالها ههه على كل الشغلة الوحيدة يللي موقفتني حاسة الوصفة كتيير دسمة يعني جبة شيدر وصلصة باشاميل كتيير رح تكون تقيلة يمكن اخفف نسبة الزبدة بلكي بتطلع اخف وببقى بخبرك شو بصير معي :zzz :p

  21. محبةالمصطفى ملك 15 April 2011

    منى أنا بعتلك الوصفة..
    وصلت؟؟؟؟؟؟؟؟؟ :?

  22. آرام 16 April 2011

    أخيراً جربت الوصفة، لذيذة فعلاً ونكهة الركفور بالصوص رائعة.
    بالنسبة للصوص الأبيض مع الأحمر ما حسيت في تناقض بيناتن، وأصلاً صوص البندورة اختفى تقريباً.
    الوصفة ما أخدت كتير وقت متل ما كنت متوقع … بس طلع من وراها كومايات جلي :)
    بالنسبة للصور فالحقيقة ما عندي خبرة بالتصوير، بس صورتها بالموبايل ورح حمل الصورة على صفحة الفيسبوك.
    ألف شكر إلك أخت منى .. وبانتظار المزيد من وصفات الجبنة الزرقا 8)

  23. ام حسام 16 April 2011

    منى يسلمو ايديكي الطبق شكلو كتير حلو بس بعتلك رسالة على الفيس بوك منشان تخصيص صفحات خاصة بماكولات الرضع من عمر اربع شهور لعمر السنتين واذا عندك وجبات اسفينا فيها لاني محتارة شو طعمي بنتي وعمرها خمس شهور فيا ريت تردي علي بسرعة والك جزيل الشكر

  24. منى 16 April 2011

    هلا ام حسام :)
    عندي كتير افكار , بس مستحيل اني حطها لان هي القصة بدها طبيب مختص و كل طفل هو حالة خاصة , ما فيني اكتب وصفات لهل العمر الحساس , بقى بجد اسفة , ان شاء الله بساعدك بغير شي :zzz

  25. ام حسام 16 April 2011

    ما بظن الموضوع معقد كتير يعني الصعب هو الاربع شهور ولحد السنة ممكن لكن من السنة وفوق ما في مشكلو المشكطلة بس بالمقادير والتنويع وحتى العمر اللي عبتقوليلي انه حساس وبدو طبيب يعني امهاتنا وجداتنا كيف ربونا وما كان في طبيب ولا اخصائي تغذية وكان الناس تطلع صحتها احسن من هلق بكتير بقى انت لا تخافي ونزلي الوصفات اللي عندك والخيار للام ولما الام بتختار شي لابنها وما بينفعو هي المسؤلة وممكن الام اللي بدها تعطي شي لابنها من وصفاتك بتحسن تسال الطبيب قبل ما تطعمي ابنها منها واذا كانت ام ذكية بتعرف بالفطرة اللي ممكن يناسب العمر هاد او هداك والشغلة مو معقدة كتير وانت نزلي كام وصفة وشوفي راي القارئات اذا لاقى الاستحسان كملي واذا عمل مشكلة لحدا فبيكون اهمال من الام واكيد رح تخبرك ووقتها خيتو بطلي تنزلي وصفات من هالنوع فكري ورديلي خبر وشو ما كان ردك رح احترمو وشكرا كتير لاهتمامك

  26. منى 17 April 2011

    كلامك مزبوط , بس انا بخاف ااذي حدى حتى بطريقة غير مباشرة .
    طيب شوفي رح اسال دكتورة اولادي و استشيرها و بعدها بعمل حسب رايها ;)

  27. zina 18 April 2011

    عنجد بتجنن أنا مبارح جربتها وطلعت كتير طيبة عنجد الله يجزيكي الخير

    • منى 25 March 2014

      هنا و الف الف صحة ع قلبك , كلك زوء :)

  28. ديما 25 March 2014

    انا روح قلبي المعكرونة بكل انواعا البيني والفوتشيني والسباغيتي ….. الخ يعني عندي استعداد جرب معا اي نوع صوص بالعكس البندورة كتير طيبة مع الصوص الأبيض جربتا مرة بالبشاميل كتير طلعت طيبة شكرًا كتير عالأفكار الجديدة :)

    • منى 25 March 2014

      متلي تمام ديما , بموتت ع المعكرونة و هي كانت بالنسية الي توليفة كتير جديدة , بس يممي
      ان شا الله تجربيها و تحبيها :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)