أسهل طريقة لزراعة اكليل الجبل


         وصفة : منى                 2014/03/12                 16 تعليقات
أسهل طريقة لزراعة اكليل الجبل

اكليل الجبل واحدة من أكتر النباتات الي بحبها , ريحتها بتخلي هدوء و أمان ينبت جواتي , و بتحسسني انو الهوا نظيف و منعش , لهيك قعداتي طول الصيف جنبه ,

معروف بكتير أسماء , منها :

اكليل الجبل
حصى البان
ندى البحر
حشيشة العرب
روزماري

هلأ ممكن نعتبريها عشبة أكتر منو شجرة , مع ان ممكن يوصل طولها لأكتر من متر إذا كان الجو المزروع فيه مناسب الها , و إذا ما كان بالك طويل , او ما كتير بتحبي العناية بالزرعات و بدك شي زراعته و العناية فيه سهل , أو ما عندك مساحة كبيرة و بدك شي حلو و بأصيص صغير , فبنصحك تبدي بهل النبتة .


- شو هي أهم فوائدها ؟


- تنشيط الذاكرة و تقوية النشاط العقلي , لهيك مناسب في حالات النسيان أو قبل الامتحانات و ممكن استعماله للوقاية من مرض الزهايمر .
- فنجان صغير من منقوع اكليل الجبل مفيد كتير لتهدية الأعصاب و تنظيم الهضم .
- كتير مفيد كغسول للبشرة لان فيه مواد حافظة بتأخر ظهور التجاعيد , و الاستعمال بيكون انو تنضفي البشرة مرتين باليوم باستعمال قطنة نظيفة و منقوع اكليل الجبل . ممكن كمان تعملي حمام بخار لبشرة وجك , رح تعجبك النتيجة و تصير بشرتك مذهلة :)
- في الطبخ ممكن تبلي فيه اللحمة أو الشوربة أو البطاطا , المهم استعماله بكمية قليلة لان نكهته قوية و لاسعة


كيف فيني استخدمها ؟

كل الفوائد الموجودة في اكليل الجبل بتكون مركزة اول الربيع , وقت تطلع زهراته , و الأوراق الي المفروض نستعملها هي الغضة الطرية الي لونها بيكون قوي و مشرق . بهي الفترة ممكن نقطف الأوراق و نجففها و نستعملها ايمتى ما بدنا .
و لحتى نحضر منقوع اكليل الجبل منقطف مقدار ملعقة صغيرة من الورق الغض , منحطهن في وعاء اله غطا و منصب عليهن كاسة مي مغلية , منغطيه فوراً و منتركه 15 دقيقة قبل الاستعمال . يفضل ما نشرب أكتر من كاسة واحدة منه بالنهار . و ممكن نحضره باستخدام اكليل الجبل المجفف .

كيف ممكن أزرعها ؟


بشهر كانون التاني أو شباط أو أول شهر أذار قصي أغصان من اكليل الجبل بطول 15 – 20 سم , و اغرزيهن في تربية رطبة لحتى يكون داخل على التراب حوالي 5 سم من الغصن , , إذا حتزرعي أكتر من شتلة , المفروض يكون الفرق بين الواحدة و التانية 15 سم . ممكن كمان تزرعيهن بالبذور , انا شفت انو طريقة الغرس اسهل و أضمن , المهم بس مراعاة التوقيت لان اذا اتاخرتي ممكن ما تنجح عملية الزراعة معك ..


- في شي نصيحة معينة للعناية فيها ؟


شغلتين حطيهن براسك وقت العناية فيها , انو هل الزرعة بتحب الشمس و ما بتحب الرطوبة . المفروض تحطيها بمكان توصله الشمس المباشرة شي اربع خمس ساعات , و ما تسقيها الا وقت تشوفي تربتها بديت تنشف

إذا كنت بتعيشي بجو بارد فالأفضل تزرعي اكليل الجبل في اصيص و تدخليه لجوى البيت وقت الشتي و تحطيه جنب شباك بتدخل منه الشمس . اما اذا كانت منطقتك معندلة او دافية فما داعي تعملي شي , رح تنبسط الزرعة عندك كتيررر

التعليقات

  1. Souha Kamand 12 March 2014

    كتير حلوة المعلومات منى جزاك الله خيراً
    من كم شهر هدتني جارتي أغصان إكليل الجبل غسلتن و نشفتن بعدين طحنتن بودرة متل الزنجبيل البودرة و النعناع مشان سهولة الاستخدام بالمطبخ بس عجبتني مشان البشرة أكيد رح جربها خاصة هلق بالربيع و بعد مرور الشتوية بحس البشرة بدها عناية

    • منى 12 March 2014

      أهلييين ام السوس :)
      جربيها و ما بتندمي , اكليل الجبل فيه كتير مضادات أكسدة , و تقريبا كل كريمات البشرة لازم يكون فيها نتفة منه , و اذا انتبهتي هلا رح تلاقي مليان منه بالشوارع , اقطفي غصن و ازرعيه عندك و ما بتندمي

      رح استنى نتيجة تجاربك يا عسل

  2. Souha Kamand 12 March 2014

    و الله يا منونة أنا مو كتير إلي بال ع الزراعة بس جربت زرعت توم أخضر و نجح كتير و حالياً زرعت بقدونس لسا هلق عم يطلع ورقات بيبي بقدونس إنشاء الله إذا صحلي بجربها بأصيص صغير

    • منى 12 March 2014

      وااااو , كيف زرعتيه للتوم ؟ كتير بحب اتعلم هيك اشيا انا , روح قلبي

      زرعت البقدونس من سنتين , بس ما وفت معي ابدا , يعني يا دوب خرج واحد يستخدمه للتزين , لان بصحن تبولة هيك اده بيروح كل المحصول :D

      منورة سها

  3. Souha Kamand 13 March 2014

    تسلميلي منونة
    القدونس ما رح يطلع متل السوق لأنو البذور الموجودة بالسوق بتحسيها بذور زينة حتى كاتبين على الكيس الصورة تمثل النوع فقط
    للتوم بس خدي راس توم فصلي الحبات عن بعضها و غرسي بالتراب بس بعدين شوي شوي بتشوفي العرق الأخضر بلش يطلع من فرحتي صورتو و كنت زرعتو بكاسات استعمال مرة وحدة قعدت اتسلى ما كنت متوقعة يطلع بس مشي الحال

    • منى 13 March 2014

      اي صح , و حتى انا اول سنة طلع العرق رفيع كتير , كاانو معو نقص فيتامينات و فقر دم :D

      ايمتى زرعتي التوم ؟ يا ترى هلا بلحق و الا راحت علي , و لشو عبتستعمليه ام السوس , متل التوم الاخضر العادي و الا في شي معين , و شكرا كتير للمعلومات الي عبتقوليها

  4. Souha Kamand 13 March 2014

    التوم زرعتو من فترة و بدي نزلوا على Tea & Cake بتلحقي تزرعي و بتستخدمي متل ما بتستخدمي التوم الأخضر فرمي مع السلق المقلى أو أي وصفة بدها توم جربيها منونة صرت كل ما أطلع ع البلكون دلعن و دندشن :D

    • منى 13 March 2014

      راااايحة هل الدقيقة نكش و ازرع ان شاء الله , الطريقة انو افرط التوم و هو بقشره و حطهن بالتراب , بس ؟

  5. Souha Kamand 13 March 2014

    إيه منونة بس فرطي التوم و لا تقشري و ازرعي مباشرة و اسقي و كلما نشفت التربة بتسقي و هو بيحب الطقس المائل للبرودة ما بتواتي الحرارة ممكن تشوفي الصورة على غروبي مشان تتشجعي و إنشاء الله بينجح معك و بتاكلي منو و بتدعيلي

    • منى 13 March 2014

      اي هلا بفوت ع الجروب و بشوف الصورة , يسلمن ام السوس , رح ازرع و فرجيك شو بيطلع معي

  6. وفا 16 March 2014

    طيب انا ساكنة بجدة بيواتيها الجو .. يعني بقدر حطا جوا البيت بس الشمس يادوب بتفوت لعندي ساعة الصبح .. بتنجح يا ترى .. انا كتير حابة ازرع هيك شغلات متل الروز ماري والنعنع والزعتر الاخضر والطرخون لأنو ما بلاقي منن هون للأسف بس بدي حدا يدلني عالطريقة الصح وازا بينجحو بها الجو ولا لأ
    يسلمن ست منى

    • منى 16 March 2014

      مممم , بدها شمس كتير اربع ساعات ع الاقل , ما بتوقع بيواتيها الجو :(

  7. Um zaid 9 July 2014

    ريحتو كتير حلوه احنا بنستخدمو في سلق الدجاج بعطي طعمه حلوه واهم شي مستحيل تطلع زفره للدجاج

    • منى 9 July 2014

      و الله مو مجربتو و لا مرة مع سلق الفروج ، حبيت الفكرة كتير ..
      يا ترى بتستخدميه تازة و الا مجفف ؟

  8. حماده 3 October 2014

    شكرا للمعلومات المفيده انا عنديحصا البان والو اكترر من سنيت مزروع ف الان صار يذبل وينشف ويكت مثل جو خريف مع العم اول مره بتنشف ف لحتا الان لا اعلم لما خلل هذه ارجو مساعده للعنيه في مزروعات حصا البان

    • منى 27 October 2014

      اهلا اخ حمادة ، ممكن تكون عبتسقيها كتير مدام كل الظروف بقيت نفسها ؟

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)