سجق رول


         وصفة : منى                 2008/04/15                 21 تعليقات
سجق رول

وصفة سهلة كتير و بتبيض الوج و بلمسة صغيرة رح ناخد طعمة قريبة على السجق الأصلي ببهارات موجودة تحت ايدينا كل يوم , السر بس انو نتبل اللحمة و نخليها تتخمر ع رياحتها و رح يطلع معنا أطيب سجق و أسهل سجق و كمان أنضف سجق , و إذا اتوفرت عندك بهارات من السجق ضيفي معلقة صغيرة لحتى تركزي الطعك أكتر .
بالصحة و الهنا

-المقادير:
مقادير السجق :

300 غ لحمة غنم أو بقر مفرومة مرتان
ملح
نصف ملعقة صغيرة بهار
ملعقة كبيرة دبس فليلفة (أو أقل حسب رغبة )
5 – 6 فص ثوم
نصف ملعقة صغيرة فليلفة حمراء ناعمة

علبة عجينة باف باستري
بيضة مخفوقة قليلاً

للتقديم :

كتشاب أو مايونييز أو كريم الثوم
- طريقة التحضير :

• تدعك مقادير السجق مع بعضها البعض حتى تمتزج جيداً ثم تترك لمدة أربع ساعات على الأقل و يفضل أن تحضر قبل بيوم لتتبل ببعضها و تختمر النكهة .

• تحتوي علبة الباف باستري على روليين من العجينة, ترق إحدى الرولويات رقيقاً ثم تقسم طولياً إلى قسمين .

• تقسم الحشوة إلى أربع أقسام , يشكل كل ربع لإصبع طويل و يوضع على العجينة المرقوقة ثم تلف عليه باقي العجينة حتى يغطيه .

• يقطع كل قسم إلى أربع أصابع صغيرة ( أو ستة قطع حسب الرغبة بالحجم ) ثم تصف في صينية مدهونة بحيث يكون مكان اتصال طرفي العجينة ملاصقاً للصينية .

• تكرر العملية مع باقي المقادير حتى تنتهي ثم تدهن القطع بالببيض و تخبز في الفرن المحمى على 180 - 200 درجة مئوية ثم تخبز القطع لمدة 15 – 25 دقيقة أو حتى تحمر و تنضج ثم تقدم حارة مع الكتشاب أو المايونيز .


أفكار لذيذة :

• يمكن إضافة ملعقة كبيرة من الأعشاب لخلطة السجق بعد أن تختمر مثل البقدونس أو الكزبرة الخضراء أو أي نوع مفضل أخر أو يمكن إضافة نصف ملعقة صغيرة من الأعشاب المجففة .

• فكرة لشكل رائع للوصفة , تقطع الحشوة لأصابع ثم توضع في البراد , تفرد العجينة رقيقاً ثم تقطع لأصابع طويلة بعرض نصف سنتيمتر تقريباً ثم يلف اصبع العجين على اصبع السجق و تصف الأصابع على صينية مدهونة بالزيت و يدهن الوجه بالبيض ثم تخبز حتى تحمّر و تنضج .

التعليقات

  1. رندوش 15 April 2008

    مشكوره عزيزتي منى
    طبق مقبلات شهي تسلم الايادي

  2. منى 15 April 2008

    الله يسلمك و يخليك رندوشة :)

    نور الموقع يا قمر 8)

  3. غيث 15 April 2008

    يا عيني عليك يا حلوة على هالاكلة اللذيذة انا كتير بحب رقائق البف لذلك رح يكون العشى عندي اليوم او بكرة بالكتير وصفتك هذه لانها سهلة وطيبةعن جد انك فنانة و مذوقة بالطبخ شكرا لك

  4. هيلين 15 April 2008

    شكلا رائع بصراحة منزمان جاييىعلى بالى السجق هون بالسعودية فى نقانق او هوت دوغ

    حبيبتى منى ممكن طريقة اللحمة بالصينية والبندورة

    سؤالتانى لو سمحتى
    عملت الصفيحة كانت الفطيرة طيبة بس القرص قاسية ما متل الصفيحةمناكلها متل السندويشة

  5. أم الهدى 15 April 2008

    الحمد لله مشي الحال وظبط التسجيل عدته 3 مرات لمشي الحال
    حبيبتي منى بصراحة ما شاء الله عليك حلبية مية مية وصفات كتير شهية وان شاء الله رح جربها
    انا من حلب ومقيمة في السعوديةحبيت وصفاتك ولهيك حبيت شارك معكم
    عندي سؤال قرأت مرة في وصفة المردكوش ماهو؟
    وألف شكر حبيبتي

  6. منى 16 April 2008

    هلا فيك غيث :) ان شاء الله بتعجبك لانها سهلة و طيبة و شكلها حلو ;)
    تسلمي على الكلام الحلو , و يا ريت إذا جربتيها تخبريني

  7. منى 16 April 2008

    هلا هيلين , مية أهلا و سهلا فيك أختي :) ان شاء الله تجربيها و تشوفي ما أسهلها و أطيبها و حتى فيك تحضري السجق و تطبخيه و و تحشيه بخبز عربي مع المخلل و البندورة و يمميي ;)

    يا ترى هي الوصفة اللحمة بالبندورة الي
    [URL=http://www.l2ma.com/content/view/163/2/]تقصديها ؟[/URL]

    اللحم بعجين معك حق في كتير من الأخوات صار معهم متلك , لهيك غيرت وصفة العجين , فيك تشوفيها و تعيدي تجربيها و إن شاء الله رح تعجبك ;)

  8. منى 16 April 2008

    هلا أختي ام الهدى :) مية اهلا و سهلا فيك نور الموقع أختي , مشكورة على الكلام الحلو ;)
    المردكوش هو عبارة عن عشبة بتشبه بشكلها الزعتر الأخضر و أكيد رح تلاقيها عند أي عطار و ممكن يعرفها باسم المردقوش كمان ;) أي سؤال تاني من عيوني

  9. هيلين 16 April 2008

    تسلمى اخت منى اليوم عملت السجق وما بعرف كيف بدى اشكرك بتجننننن جوزى انصدم قلى انتى عاملتيها ما صدق والله
    اللحمة بالصينية قصدى يلى غالبا تنعمل عند الفران بيحطولا معجون بندورة او طحينة

  10. بدور 16 April 2008

    السلام عليكم..

    يا الله أديش صرلي مو داخلة و مشاركة باسمي بالموقع والله شتئتلو كتير كتير..

    كنت كل فترة ادخل بس بدون ما طوّل بس اطمن عليكي و على الموقع الحلو و اطلع

    بس نشالله ما بئى انئطع كلهاد..

    الله يسلم ايديكي الحلوين يا ميمو والله هالاكلة كتير بحبا بس ما بدوئا غير بالمطاعم نشالله رح جربا شخصيا هالمرة :zzz

    والله بعد ما تعرفت على هالموقع صرت افرح على حالي عبعرف اعمل كم اكلة و السر كلو موقعك..
    صرت افرح على حالي اول شي ادام اهلي و صارت اختي المتزوجة جديد كلما بدا تعمل شي اكلة تسألني شي سؤال آل على اساس أنا كتير شاطرة :grin

    بس عنجد صار جربت عدة اكلات تعلمتون منك الله يسلم ايديكي يا رب و شكرا كتير على وئتك و نصايحك الحلوة ;)

  11. منى 24 April 2008

    هلا هيلين يا قمر :) هنا و عوافي و صحة يا رب

    و هو المطلوب ر, انك تنهري زوجك و ضيوفك و يلعلع اسمك بين صحباتك ;)

    اختي الصينية الي طلبتيها ما عرفتها , النوع الي بعرفه حطيت الك رابط اله :roll و كمان كتيررر طيبة

    مية اهلا و سهلا فيك نورتي

  12. منى 24 April 2008

    هلا بدورة :) و عليكم افضل السلام و اتم التسليم
    تشتاق لك العافية يا رب و هيك لازم تطلي علينا ايما ;)
    جربيها و الله كتير سهلة و طيبة و رح تعجبك ان شاء الله

    هنا و عوافي على قلبك وقلب كل عيلتك الحلوين , مية اهلا و سهلا بدور

  13. wedadswed 31 May 2009

    مساالورد ي ويسلمو على الوصفة الطيبة كتير ورح قلك قصتي معها ,كان عندي ضيوف عالسهرة وحبيت قدملهن شي مميز ووقع إختياري على كام وصفة من عندك ومن بينهم هالوصفة لأني متعودة دايما دور عالجديد والمميز وبصراحة بلاقي عندك طلبي دايما المهم خفت جربها بالضيوف وما تعجبهم وتوقع الشربة براسهم مع أني أشك بها الشي لأني ما جربت وصفة من وصفاتك إلا وكانت روعة لأنو بحس زوقك قريب من زوقي كتير , حاصلو أني جربتها يوم الجمعة يعني أول مبارح وعملت لزوجي أكلة تانية لأنو ذوقو صعب كتيرومابيحب التغير في النكهات إلا إذا كان شي طيب عماتلو عالعشى شورة عدس مع اللحة بعطمها وكانت روعة بس لما داق الرولات قللي حرام عليكي الأكلتين طيبين حيرتيني من وين بدي أكل ولكن ولدي ماخلولومجال للحيرة وكانو لاطشين الصينية بلمح البصر وما حصل المسكين غير القطعة اللي داقها فكمل أكلتو وسكت المسكين ولكني كنت محضرة وحدة تانية في الفرن وهو مابيحب يغير طعمة تمو إذا بدا بنوع معين وكانت الصينية التانية من نصيب الاولاد كمان المهم حبيبتي بلا طول سيرة, عبمزح ,عندي سؤال حسب ملاحظتي أنالأن ولادي وجوزي ما لاحظو شي من كتر ما عجبتن لاحظت أنو العجينة رقيقة وقليلة على إصبع اللحمة وطعمة اللحمة طاغية على طعم العجينة وخاصة إنك بتعرفي البف هشة كتير فيا ريت تنصحيني بيصير لفالعجينة تلات لفات بدل لفة وحدة متل ماقلتي أي حتى تغطى اللحمة وخاصة أني جربت حبتين متل ما قلت وطلعت أطيب والناس أذواق جاوبيني حبيبتي وأسفة عالإطالة وشكرا

  14. منى 31 May 2009

    هلا وداد :)
    ريتو الف صحة و هنا على قلب الاولاد الحلويين و زوجك و انت اكيد :) كتير انبسطت ان الوصفة عجبتك و لو انت حابة تزيدي كمية العجين اكيد بيصير و هادا الشي بيرجع للزوء , و اذا ممكن فيكي تصغري قطعة اللحمة أكتر لحتى توضح طعمة العجينة اكتر و كمان متل ما قلتي , هي شغلة زوء , الوصفة هيك باساسها و بعدها انت ممكن تتحكمي فيها لحتى تصير على زوءك و زوء أبو الشباب اكتر :zzz

    مية هلا اختي و سعيدة جدا بردك و تواجحدك الطيب في الموقع

  15. محبةالمصطفى ملك 11 May 2010

    هااااااااااااااااااااااااااااااي أنا هون كمان
    هههههههههههههههههههههههههه :grin
    بدي أسألك يا أحلى منى كم سؤال بس :p
    أولا أنا ولا مرة ما اشتريت عجينة البف باستري فمنوين أشتريها من أي سوبر ماركت؟؟
    و الها اسم شركة محدد؟؟
    و تاني شغلة أنا بعمل كبسات سجق بس بحط كمان مع الفليفلة و التوم كزبرة و بيطلعوا طيبين شو رأيك؟؟؟
    بس ما عبيطلع متل الحاضر.ما عندك طريقة الحاضر تمام؟

    و ألف شكر لأحلى منى

  16. منى 13 May 2010

    احسن عجينة بجيبها من عند العقاد الي ادام الفرنسسيكان

    اكيد بيطلعوا طيين لان الكزبرة من بهارات السجق ;)

    الحاضر بينشفوها , اذا جاي على بالك بتحضريها باول الشتوية و بتحطيها بمحل بارد كتير في شاشية بيضا و بتكبسيها و بتتركيها لحتى تنشف ميتها , بتطلع متل ما بتحبي , مع اني بشوفها بهل الطريقة اطيب :zzz

    ااااه لتكون المشكلة بالبهارات , من وين بتيبي بهاراتك ؟

  17. محبةالمصطفى ملك 13 May 2010

    امممم ما عرفتوا للعقاد؟؟

    و أنا بحط ملح و بهار و التوم و الفليفلة و الكزبرة(اليابسة) بس قصدك انت البهارات المشكلة ما بحطن لأن عندي كل نوع لحال بس ما عندي خلطة بهارات

    يعني عندي كمون بهار الخ…….

    اذا في ما بعرفوا ممكن توضحيلي؟

  18. منى 14 May 2010

    بيجوز من نقص البهار المشكل

    بكل الأحوال اذا صار الك نزلة للمدينة جيبي بهارات السجق من عند ابو زياد الهلالي او البوادقجي , بيطلعوا متل ما بدك ان شاء الله ;)

  19. محبةالمصطفى ملك 17 May 2010

    يسلمو يا منووووووووووووش

  20. om nabeel 29 November 2010

    حبيبتي منى الله يعطيكي العافية على الوصفة من فترة بدي اسالك عن السجق واليوم شفت الوصفة
    بس بدي اسالك عن عجينة البف
    انا بالسعودية ونحن عنا عجينة البف مربعات مو رولات
    كيف بدي اشكلها
    ويعني العجينة ما بتفقد من انتفاخها عند الفرد
    مشكورة وجزاك الله خيرا

  21. نورطعمة 24 December 2013

    ياريت تحطيلنا تركيبة بهارات السجق يللي على اصوله بالموقع لاني بقبرص ومابظن رح لاقيه هون واذارحت عتركيا بيلتقى هنيك وياريت تقليلي اسمه بالتركي اذابتعرفي.شكرا

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)