براونيز بكريما الخمس دقايق السرية
سلطة اليوم هي نسخة الخريف عن سلطتي الفواكة و بحضرها لما بتكون نازلة اكتر خضرة مفضلة عندي و الا هي المنجا أو الخرما او ما بعرف شو اسمها الحقيقي , المهم انها شي اورانجي قلبها طري و حلو و وقتها بالخريف و ريحتها و لونها بيذكروك بشهر ايلول … و هي اطيب فاكهة عندي , بوقتها بفطر منها و باكل قطعة بعد الغدا و بتعشى منها و بايام حملي كنت فيق الساعة 3 بالليل و اكل منها , بس هلا بطلت لفيقة نص الليل
من فترة كنا عند امل و اكلت عندها سلطة فواكة و كان حاطة معها عصير رمان عواض عصير البرتقال أو الأناناس , عجبتني الفكرة كتير و خصوصي انو الاناناسات كان صاير لونهم فوشي و اول ما شفتهم قلت الها لاية انو هل الاناناس ما بيصير هيك لونه الا اذا كان منقوع بمرقة مخلل اللفت , جربته مع سلطتي و كان خيلة , و ما دام عم حضر السلطة الي و لملذاتي الشخصية فبفضل ما حط الها معلبات , بس وقت الضيوف بلغي البرتقال و بحط عواضه اناناس ..
بالصحة و الهنا
4 حبة كاكي , خرما , مقشرة و مقطعة
2 حبة تفاح أحمر , مقطعة
2 حبة برتقال أو علبة أناناس , مقطع
3 – 4 موز , مقطع شرائح
2 حبة كبيرة رمان حلو , مفروط
1 – 2 حبة كبيرة رمان حلو , معصور
سكر أو عسل حسب الرغبة
2 – 3 ملعقة كبيرة عصير ليمون
• يقلب الموز و التفاح و عصير الليمون سوياً لمنع تغير اللون .
• تضاف بقية المقادير و تقلب حتى تتجانس , يضاف السكر أو العسل للتحلية حسب الرغبة .
يسلمو ايديكي منوش ..انا كمان كتير بحب هالسلطو خصوصا بوقت الرمان يا سلااام بس دايما بحطلا برتقان وفكرة كويسة الاناناس راح جربها ان شاء الله ..انا اوقات برش عليهن شوية سكر بني و شويية مي و بحطن بالبراد و بيطالعو مي يعني ما بحطلن لا عصير و لا شي ..
شكرا على الوصفة
يا ستي شكلها لذيذة ومنعشة وبالذات انا من عشاق الرمان
انتي كل شي بتضيفيه مميز واله نكهة بتميزه
انا عادة سلطة الفواكه بضيفلها بالآخر قطرات قليلة من ماء الورد او ماء الزهر بخلطه بعصير الليمون المضاف للسلطة كتير بيعطي لمسة فريش و شرقية وعلى وجهها كم حبة مكسرات نية بس تكون منقوعة بالماء البارد قبل كم ساعة ويفضل اللوز والفستق الحلبي بتطلع ضيافة مفتخرة وبالصيف كنت ضيف طابة بوظة فانيليا عليها و وذوقي وادعيلي
ممممم
شكلها بشهي لونها روعة هو الرمان معجزة عظيمة بطعمته ولونه وكل شي فيه حلو وبحبو بكل نكهاتو
والمنجا ياسلام بتلاقي جوزي عبدور عليها دوارة وبيعرف يجيبها بتكون طيبة حلوة وما الها لفة لاني ما بحبها
تسلم ايدك على هالابداع وان شاء الله كل ايامك حلوة وتدوم حلاوتها دائما
هلا ام نوران
ان شاء الله تجربي عصير الرمان معها و تحبيه , كان كتير طيب و اشتهيت الحبايب ..
حبيت فكرة السكر البني كتير ,كراميل من دون توفي , بس يا ترى كيف بيطلع اللون
هلا فروحة
من زووءك حبيبتي و انت وصفاتك كمان ما شاء الله اول ما الواحد بيعملها بيصير ادمااان معه
يمكن الطريقة الي زكرتها متل هل[URL=http://www.l2ma.com/content/view/494/2/]الوصفة ؟[/URL]
حبيت كمان فكرة البوظة , يممم , ان شاء الله رح جربها باول ما يصير وقتها مناسب
هلا ام نبيل
ياااي عن جد معجزة من رب العالمين , في انواع فواكهة بيحتار الواحد كيف يوصفهم و الرمان و الزيتون من بيناتهم
شو اسمها للمنجا عندكم ؟
الله يسلمك و يخليك و يديم علينا نعم رب العالمين و يعرفنا اياها بدومها و يقدرنا نشكرها متل ما بيحب رب العالمين
سلامة منوش الله يسلم ايديك يا حق يا ستي الرمان ملك وكل شي فيه رمان رائع ما في شك بدي اقلك اسم المانغا هنا بالسعودية بيكتبو عليها كاكااما المانغا اليمني وغيرو فهي المانغا الحقيقية غير الكاكا اللي نحن السوريين نسميها مانغا بالخطـأشكرا منى لكل جديد
كتير حبيت الفكرة واليوم جبت شو ناقصني لاعملها اليوم جربت مهلبية الرز وعجبتني كتير. ومهلبية الشوكولا بس طلع سكرها كتير وقريبا رح لجرب الريكوتا ادعيلي
سلطة الفواكة
فطور خفيف ماشي
ضيافة ماشي
عصرونية ماشي
وجبة اخر اليل لما الواحد بيطول السهرة وبيجوع مرة تانية بعد العشا ماشي
لك وين ما حطيتيا ماشي
وبكل فصل الها فواكة مناسبة
امااحلى شي لما تجينا طريقة جديدة لتغير والتنويع فيها
تسلم ايدك يا رب
أحلى شيء بالدنيا سلطة الفواكه
وأكثر تعليق عجبني تعليق جوجو,
السلطة وين ماحطتيها بتبيض الوجه,
وعندنا الفاكهة مشهورة باسم كاكا ,أما المانجا
فهي المنجة أو المانجو المعروفة ببذرتها الكبيرة ,
والكاكا عادة نجيب كرتون في الصباح , الساعة 7 المساء مابيكون له أي أثر , كنز مابيتفوت…
و عصير الرمان فكرة جديدة ومميزة ,وفيه حاجة دايما بسمعها, إن الناس الكبار في السن يقولوا للشخص لما ياكل رمان إنه ياكلها لوحده وما يخلي أحد يشاركه فيهالأن بداخلها حبة من الجنة والله وحده أعلم.
وبتلاقي الواحد فينا ماسك رمانته وصحنه بالأحضان
وبيكون يوم أغبر لو أي أحد طلب يشاركه فيها :grin :grin
هلا غيوثة
بتذكر اول مرة قلتلها لوحدة من رفقاتي انو اسمها كاكا :grin انو رح تاكلني بلا ملح و اكيد اني غلطانة
شكرا غيوثة للتوضيح و شكرا الك للتواجد الدائم و الدافئ و الصادق
يا سلام على المنجة (أو الكاكي). و الشي الي بيضحك انو هون بتكون أرخص شي لما بتكون مستوية. يمكن بيفكروها مفعوسة و خربانة. و بالحالات العادية بيجيبوها يابسة و ما بتتاكل. طبعا بكيف لما بشوف جايبين دفعة مفعوسة و صالحة للأكل.
هلا مرمور
عوافي و الف صحة يا رب على كل شي جربتيه و ان شاء الله بيعجبوكي بقية الوصفات الي حاطة عينك عليها
و الله جوجو صح , ماااااشي و على الاربع و عشرين كمان
ان شاء الله تعجبك هل الطريقة و بتمنى اسمع منك اذا جربتيها :zzz
هلا لاروش
نفس الكلمة الي كانو يقولولنا ياها , لهيك بتلاقيني لما كنت صغيرة افحصن حبة حبة ايا واحدة يا ترى من الجنة :zzz
هلا نحنا منسميها منجا , منعرف انو مو اسمها الحقيقي بس هادا الدارج و مؤخرا صاروا الناس عم يسموا الاشيا باسماءها
المهم اتمنى تجربيها و ان شاء الله بتكون على زوءك 8)
هلا نوشين
بس منيح انها بتجي على زوءك و بسعر منيح :zzz
انا ما بحبها لينة ابدا , بحبها يا دوب مستوية و سبحان الله الدني ازواء
كتير طيبة هالاكلة قضيت 15يوم كل يوم عم اعملها لزوجي وكيف عليها بتفكري من مكوناتها عادية بس هي كتير مميزة لما بتحليها بالعسل
الف هنا و الف صحة على قلبك و قلبو لابو الشباب , و العسل مع عصير الرمان عم يعملو طعمة طيبة هون
شكرا الك لان جربتي الوصفة و شكرا على ثقتك في