شوكي غراتان


         وصفة : منى                 2009/05/24                 27 تعليقات
شوكي غراتان

هل الشوكي ملون و فيه شي بيجلب النظر و بيفرح القلب قبل ما اتدوقيه .

حضرته بأخر عزيمة , و سألتني خالة حسناء على طريقة تحضيره . و قالتلي اوعى تقوليلي هادا غراتان , لأن خالة ما بتحب الوصفات الي بتنطبخ بحليب و بتصير غراتان . قلتلها هو في حليب بس حطيته بالأخير , يعني الشوكي انطبخ بالمرق و بعدها البيشاميل بس بالأخير . لهيك انا كاتبة اسمه شوكي غراتان بس بتحفظ , ما لقيت اسم أظبط منه

الحشوة ما بتأخد لحمة كتير لأن فيها خضار و نوع الخضرة الي ممكن تستعمليها عايد لزوءك , انا استعملت فطر و فليلفة حمراء و بازلاء

هل المرة ما رح حط مثل , رح حط شو بينادوا البياعين على الشوكي لمن بدهن يبعوه و يدللوا ان شوكياتهم طرايا و ما في أطيب منهم :

ع طابات الندى يا شوكي
ع الكماية يا شوكي

و لما بيقرب وقت الشوكي يخلص بينادوا :

تعا ودعوا يا شوكي
أخر طبخة يا شوكي
ع المونة يا شوكي

هي صورة تانية

ان شاء الله تجربيه و يعجبك و بألف صحة و هنا

شو لازمنا ؟
15 - 16 حبة شوكي مقشرة
ملعقة كبيرة سمنة أو زبدة
بصلة صغيرة الحجم مفرومة ناعماً
ربع كيلو لحمة غنم مفرومة
حبة صغيرة فليلفة حمراء مفرومة ناعم
تلت كوب بازلاء مسلوقة
تلت كوب فطر مفروم
نصف ملعقة صغيرة بهار مشكل
رشة صغيرة قرفة
2 - 3 كوب مرق

البيشاميل :

2 كوب حليب
2 ملعقة كبيرة طحين
2 ملعقة كبيرة زبدة
رشة ملح و فلفل أبيض و جوزة الطيب
ملعقة صغيرة مايونيز ( اختياري )

جبنة بارمزان أو قشقوان مبشورة
طريقة التحضير

• يقشر الشوكي و يوضع في ماء فيه ملح ليمون أو عصير ليمون حتى لا يتغير لونه حتى انتهاء تقشير بقية الحبات .

• يرفع من الماء و يجفف ثم يقلى بالزيت حتى يشقر , يرفع من الزيت على ورق ماص ثم يرتب في طبق بايركس .

• لتحضير الحشوة يقلى البصل بالسمنة أو الزبدة حتى يطرى , تضاف اللحمة و تقلب على نار متوسطة حتى تنضج و يجف مرقها .

• تضاف الفليلفة و الفطر و البازلاء و البهار و القرفة و يقلب الكل لبضع دقائق .

• تحشى قلوب الشوكي بالحشوة ثم يصب المرق بشكل لطيف كي تبقى الحشوة على الشوكي . يصب المرق بحيث يغطي قلوب الشوكي من دون أن يصل للحشوة .

• تغطى الصينية بورق ألمنيوم و تخبز في الفرن على درجة حرارة 180 درجة مئوية لمدة نصف ساعة أو حتى ينضج الشوكي .

• تجهز صلصة البيشاميل , تذوب الزبدة على نار هادئة , يضاف الطحين و يقلب الكل لبضعة دقائق .

• يضاف الحليب و الملح و البهارات بالتدريج مع التقليب بعد كل إضافة و يترك حتى يغلي و يسمك ثم يبعد عن النار و يضاف المايونيز في حال الرغبة باستخدامه . يمكن إضافة مكعب مرق و يمكن تحضير صلصة بيشاميل خفيفة السعرات الحرارية .

• بعد أن ينضج الشوكي يوزع البيشاميل على الحبات و ترش بالجبنة ثم يرجع الطبق للفرن و يترك لمدة ربع ساعة أخرى أو حتى تحمر الجبنة .

• يقدم الشوكي فوراً لوحده أو مع طبق من الرز المفلفل و السلطة الحامضة .

التعليقات

  1. سمسمة 24 May 2009

    ياعيني شو هالآكلة الطيبة الله يسلم هالايدين
    بوسيلي بنوتك التاجرة الصغيرة والله برافو عليها عرفانة حالها مدللة الله يحميها وبتشوفيها عروس

  2. منى 24 May 2009

    هلا سمسومة :)
    الله سلمك و ان شاء الله تجربيها و تعجبك .
    و الله متل ما قلتي عرفانة حالها قلبي معلق فيها , خليلي عيني ربي يفرحني فيها و باخواتها و يبارك فيهم و بكل الغوالي عليك يا حق ;)

  3. ام نور 24 May 2009

    السلام عليكم ورحمة الله وبركاته
    كيفك منى انشالله بخير الله يعينك عجمعة الامتحانات وينجح هالحلوين سلم دياتك عاهل غراتان اكتر من رائع رح جربو باسرع وقت بس بيصير ما ينقلا شو الفايدة من قليو :?

  4. منى 24 May 2009

    هلا ام نور :)
    شو أخبار عزيمتك ؟ ان شاء الله امورك كانت تمام , و اكلت همك و الله

    يا ستي انا متعودة ااقلي الشوكي قبل ما اطبخه , بحسه بيصير اطيب , و اذا انت متعودة ما تقليه فممكن تحضريه بالطريقة الي بتريحك

    ان شاء الله تجربيه و يكون على زووءك و بانتظار رايك حبيبتي ;)

  5. آرام 24 May 2009

    مشكورة أختي على الوصفة .. أنا في العادة أطبخ الشوكي بطريقتين فقط، إما بلحمة مع الرز المفلفل أو مقلي بالزيت، ومن ساعة ما شفت صورة الشوكي غراتان في العزيمة وأنا ناطر الوصفة! وبما أن موسم الشوكي صار بآخره تقريباً خفت أن تتأخر الوصفة فاشتريت البارحة شوكي للتفريز وكنت سمعت عن طريقة (التفوير) ولم أجربها سابقاً. لم أعرف المدة اللازمة للغليان فأجريت عدة اتصالات مع بعض قريباتي ومعارفي والطريف أن كل الأجوبة كانت ودون استثناء (غلوتين وبس)!!! لم أعرف كم تساوي هذه (الغلوتين وبس) وعندما سألت كانت الإجابة (غلوتين .. يعني أول غلوة والثانية)!!! ولم أعرف أبداً كم المدة اللازمة بالدقائق! والطريف أيضاً أني عندما سألت عن كمية ملح الليمون اللازمة كانت الإجابات كلها من قبيل (شوية زغيرة .. رشة زغيرة .. أتورة .. الخ)!!! بتعرفيها هي (الأتورة)؟!!
    في النهاية توكلت على الله وحطيت ربع ملعقة صغيرة ملح ليمون وغليت الشوكي عشر دقائق! ما بعرف طبعاً إذا كان صح ولا غلط المهم أن الشوكي الآن في الفريزر!
    عرفتي الآن أخت منى لماذا لا أستطيع أن أستغني عن (لقمة طيبة) أبداً!!
    لو تكرمت أختي أتمنى أن تشرحي لنا طريقة (التفوير) للخضار المختلفة (شوكي، بازيلا، فاصوليا، … الخ) خاصة أن موسم الصيف في أوله .. ومشكورة سلفاً لكل جهودك وتعبك معنا.

  6. سلاف 24 May 2009

    8)
    شو بستمتع وأنا بقرا مقدمتك بتقديم الطبق
    بس ياليت كنتي نزلتي كم رسمه للاموره فرح الله يخليها ويحميها 00 بركي في زباين بره بدها تشتري :)
    الله يخليلك كل اولادك يامنى وتشوفيهن متل مابتحبي
    ويسلم ايدكي على الشوكي منظرها بيفتح النفس
    كنت بدي اسالك الشوكي لازم يكون دوائر على حاله ولا بصير يكون مقطع اربع قطع ؟؟؟ :sigh
    الشوكي اللي باقي عندي مقطع بصير ولا مابصير ؟؟؟
    اذا قلتي مابصير بدك تنزلي الشوكي بلحمه :roll
    كني مابصير لان كاتبه مابصير يوصل المرق للحشوه :upset
    شكرا كتير منى وبوسيلي هالاموره فرح

  7. لموسي 24 May 2009

    بيعجبني يامنى فيك انك بتحبي تغيري وبتعملي وصفات جديه عكس اهل حلب اغلبهم مابيقتنعو بالجديدوهدا الطبق بعمله انا من سنين شفته بكتاب مصري واسمه جراتان الخرشوف عكل حلا تسلم ايديك مابقدر اقول غيرانك مبدعه

  8. نوارة 24 May 2009

    ابوس قلبها انا اللي غلا قلبي عليها ما شاء الله
    الله يبعتلها ايام حلوة الهاولباقي الشلة
    اما عن الشوكي جربتهامن قبل وطلعت طيبة بس ما خطرلي احطلها جبنة اكيد هيك اطيب بكتير لانو الجبنة مو بس بطيب الاكل وبتحلي الحياة كمان :)

  9. رنا 24 May 2009

    شي كتير طيب وخالتي مديرة مطبخ بالشام وبيعملو عندها هالطبق ودقته عندهن وبالفعل طيبة …بس متل ماقالت الاخت لموسي انه بعض الناس مابيقتنعو بالتجديد بالاكل خايفة يكون بيت حماي من هالناس ..يلا رح جرب اعمل كم وحدة بركي بس انزل عند اهلي لانه اجانا طبختين شوكي واختفى من الاسواق :grin

  10. رنا 24 May 2009

    نسيت قلك تبوسيلي فرووحة الصغيرة وعن جد حيل الصغار كتير بتضحك

  11. منى 24 May 2009

    هلا فيك اخي ارام
    الطريقة الي اتبعتها مظبوطة تمام , بس بزيادة شوي لملح الليمون , يعني لحوالي 30 حبة اضيف نصف ملعقة كبيرة ملح ليمون و رشة سكر مع ملح خشن صخري أو بحري .و اتركه يغلي لعشر دقائق
    أخي سمعت كتير ان الشوكي مو كتير منيح يتفرز , لهيك بعد ما كنت مون كتير , هلا عم مون حوالي 60 حبة و بيكون الاستهلاك لشهريين او تلاتة بالكتير
    تكرم عينك أخي , ان شاء الله رح نزل كل الوصفات المطلوبة و أولهم البازلا بهل الاسبوع باذن الله اسمو هلا وقتها
    ان شاء الله تجربها و تكون متل ما بتحب و أطيب

  12. منى 24 May 2009

    هلا سلوفة :)
    تكرم عينك , ببقى بنزل رسوماتها و بعمل عليهم مزاد علني :grin
    ممم , اتوقع بيصر بالشوكي المقطع , ممكن تجربي و بيطلع متل صينية لقمة تشكن , يعني الشكل شوي متغير :zzz
    بوساتك وصلوا و انتي كمان بوسيلي الاولاد الحلويين , أبضايات الحارة ;)

  13. منى 24 May 2009

    هلا لموسة :)
    لا هلا الجيل اتغير و الكل بيحب التجديد , زمن أول اتحول :zzz
    الف هنا على الشوكي و انبسطت كتير بردك و تواجدك

  14. منى 24 May 2009

    هلا نوارة ;)
    خليلي عينك نوارة , اامين يا رب و ان شاء الله تجربيها بالجبنة و تكون طيبة و متل ما بتحبي ;)

  15. منى 24 May 2009

    هلا رنونة :)
    ان شاء الله بيعجبهم , و كلام مظبوط و خصوصا الكبار بالسن :roll
    يلا جربيه بكم واحدة و اذا عجبهم ابقي كملي
    بوساتك وصلوا وان شاء الله دايما مبسوطة و ربي يقومك بالسلامة انتي و البي بي

  16. نور الأسلام 24 May 2009

    السلام عليكم كيفك منى تحياتي الك منظر الطبق بشهي انا ما بعرف الشوكي :roll بس بسمع عنو ولسل كمان ماجربت البشاميل النو مابحب الحليب وما بيجي عبالي اطبخ وصفات بالحليب لاتستغربي من كلامي هداالي صاير معي تسلملي الموره الحلوى فرح اذا لسل المعرض فلتح لاجي اتفرج واشتري ;) طالعين نتعشى عالبحر وابني صرعني وهو يلى بح يعني بحر :grin سلامي

  17. منى 25 May 2009

    له يا نور :) كيف لازم تتعرفي عليه قصدي على الشوكي و البيشاميل .
    كلامك مو مستغربته , خالتي متلك و ما بتطيق شي اسمه غراتان :roll
    الله يخليلك ابنك و تشوفيه شب يخزي العين عنه و تجي تزورينا بالمعرض انت واياه :grin

  18. سارونات 25 May 2009

    السلام عليكم و رحمة الله و بركاته

    تسلملي الاميرة الصغيرة فرح و الله يسعد ايامها و ايامكم جميعا,
    جازاك الله خيرا اختي منى على تنزيل الوصفة كتير عجبتني و ان شاء الله راح جربها بس انا ما راح اقليه فشو هي الطريقة البديلة للقلي

    بالتوفيق
    سلام

  19. منى 26 May 2009

    هلا سارونات :)
    الله يسلمك و يحفظلك احبابك كلهم بصحة و عافية .
    أختي اذا ما رح تقليه فممكن تطبيقه بالصينية و تعملي الوصفة عادي , بس بهيك انا مو مسؤولة اذا ما طلع كتير طيب أو اذا كانت طعمته عادية ;)

  20. ام دانية 29 May 2009

    يممممممممممم على منظر الصورة شي بيغرف القلب ياريتني كنت جنب الصينية لكنت قضيت عليها بسرعة :grin قديش حابة جربها بس هون مافي شوكي رح حاول جيب معي من حلب واعملها لانها خارطة مشطي كتيرررررررررر :p وعلى فكرة انا جهزت كذا وصفة من وصفاتك مشان اعملها بحلب مومشان شي مشان تقول عني حماتي اني شاطرة وست بيت ممتازة ههههههههه :zzz بس اكيد مع ذكر اسم الموقع ;)

  21. منى 22 April 2010

    لا دانية ما في داعي تذكري الموقع ابدا , انا بحب ينكر الموقع وقت لطش وصفة على النت اما في العالم الحقيقي , الطشي و على راحتك و لا تخبري حدى :zzz

    الف صحة و هنا مقدما و ان شاء الله تعجب الكل

  22. juman 17 October 2010

    مرحبا يا ستي هريتك تعليقات اليوم انا هلا قايمة اعملها وبخبرك شو بصير معي :?

  23. منى 25 October 2010

    بالعكس جمان :)
    انا بحب التعليقاات كتير , يلا رح استنى رايك يا جميل ;)

  24. juman 26 October 2010

    السلام عليكم,اسفة طولت بالرد عليكي ما صح اللي :roll يسلمو ايديكي ,كتير كتير طيب وعجب زوجي كمان, ما ننحرم من وصفاتك يللي بتبيض الوجه يا رب,, عندي طلب ازا في وصفات حلوة ومرتبة لكاتو اناناس ,يعني نفس الاناناس مو ميته ويكون طيب متل كات و التفاح,لانو قديش جربت وصفات قبلو كان يطلع طعم التفاح كانو مطبوخ بس وصفتك كتير روعة :zzz لانو بطلت اثق باي موقع تاني اخد منو, بس لقمة طيبة لان كل شي فيه مكتوب بامانة عالية,,سوري طولت عليكي ولا حرمنا جديدك :)

  25. منى 10 November 2010

    تكرم عيونك جمان :) ان شاء الله بنزل الوصفة قريب

    ريتو الف صحة وهنا على كاتو التفاح , عن جد فرحت كتير لان زبط معك , حسيت في اكتر من اخت ما طلع معهن تمام و هو وصفة يممي :zzz

    شكرا كتير لردك و كلامك و ربي يديم المحبة و المعروف

  26. منولة 11 May 2012

    عملتها مرة بس مع شوية اختلافات بالطريقة وما حبيناها لأنو طلع الشوكي شوي قاسي فيها.. بس رح أجربها بكرا بطريقتك.. وبخبرك عن النتائج ان شا الله :)

  27. منى 12 May 2012

    لقمة طيبة و بس و الباقي كله خس :grin

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)