براونيز بكريما الخمس دقايق السرية
في وصفات لما تحضريهن و تدوقيهن بتزعلي ع حالك لأن ما الك مكتشفتيهن من قبل , هي واحدة من هل الوصفات . صينية راس العصفور باللحمة على الطريقة اليونانية أو متل ما بيسموها اليونانيين ” يو في تسي Yiouvetsi ” وصفة تقليدية مشهورة كتير, سهلة كتير , طيبة كتير , تقريباً ما بدها تحضير , بس بتاخد وقت طويل في الطبخ , يعني كل الشغل رح يكون على الفرن , انت بس قلبي المقادير مع بعض و خلي الباقي على النار , و كمان بتنطبخ و بتتقدم بنفس الصينية , يا سلااام
بهي الوصفة رح نطبخ لحمة الغنم مع القرفة و الزعتر الأخضر على مهل لحتى تستوي اللحمة و تصير طريييية , رح نضيف بعدها معكرونة راس العصفور , لما تدوقيها رح تحسي انو هل الوصفة بتشبه شي نغمة حلوة سمعانتيها من زمان , بتعرفيها بس ما بتعرفي كيف أو ايمتى , بس الأكيد انو بتحبيها .
معكرونة راس العصفور أول مرة استعملتها في حياتي كانت بهي الوصفة , شكلها متل حبات الرز بس على أكبر شوي , رح اطبخها فوراً بالمرق من دون نقع او سلق , رح تشرب كل النكهات و رح تكون طعمتها مممم .
سر الطبخة هو طبخ اللحمة ع نار هادية وقت منيح لحتى تستوي ع مهلها , و البهارات القليلة , زعتر أخضر و قرفة و بس , كل فلسفة المطبخ اليوناني رح تشوفيه هون . بتمنى تجربيها و بتمنى تعجبك
بالصحة و الهنا
نصف كوب زيت زيتون
1 كيلو لحمة غنم مقطعة مكعبات متوسطة , يفضل لحم الكتف
2 حبة متوسطة بصل , مقطعة جوانح
ملعقة كبيرة أوريغانو مفروم , أو ملعقة صغيرة أوريغانو مجفف
نصف ملعقة صغيرة قرفة
عود قرفة
2 حبة كبيرة بندورة , مقشرة و مفرومة
6 كوب ماء
2 كوب معكرونة راس عصفور
جبنة بارمجان مبشورة للتقديم
1 - توضع اللحمة و البصل و الزعتر الأخضر و القرفة العيدان و زيت الزيتون في صينية ذات حرف مرتفع نوعاً ما , يقلب الكل حتى يغلف الزيت كل المكونات .
2 - توضع الصينية في الفرن و تخبز من دون غطاء على درجة حرارة 160 درجة مئوية على الرف السفلي لمدة 45 - 60 دقيقة .
3 - يضاف الماء و البندورة و القرفة الناعمة و يغطى الوعاء بشكل محكم و يخبز لمدة ساعة و نصف أو حتى ينضج اللحم .
4 - تضاف معكرونة راس العصفور و تقلب , يغطى الوعاء مرة ثانية و يترك لمدة 15 - 20 دقيقة أو حتى تنضج المعكرونة و تتشرب المرق .
5 - ينثر البارمجان على الوجه و تقدم الصينية فوراً .
-
وصفات تانية ممكن تعجبك
مبين عليها طيبة يسلمو دياتك بس انا بعرف انو هي المعكرونة اسما لسان العصفور في عالم بتحطا بالشوربة طيبة
اي ديما انا سمعانة كنت فيها سمع , و لا مرة ما جربتها , و لما صدفت و جربتها كانت هون , بس شو طلعت , شغلللة
منى انتي اذا بتطبخي حجار بيطلعو من تحت اديكي شغللللللللة
ههههههههههههههه بدي جرب ها
هون بليبيا بيستخدموها بالشوربة..الشوربة الليبية و في كمان شوربة لسان العصفور ، و انا بستخدمها مع الرز بدل الشعيرية
موني…اكيد راح اجربها هاليومين ان شاء الله…يسلم ايديكي كل وصفة الذ من التانية
مممم , حلويين كتير هل الافكار فوزة , شكرا كتير للاضافة روح قلبي
كيف بتعملي الشوربة الليبية ؟
يا ريت تجربيها و تكون نم نم و ع زوءك
هههههههههه
يسلمو ايديكي منى
حبيت اعرف شو بيتقدم جنيها
الله يسلمك يا رب
بيتقدم معها سلطة حامضة , يا ريت تجربيها و اعرف رايك
مرحبا منى
بس سؤال فني
المعكرونة اسلقا قبل ما حطا او حطا باخر مرحلة و بتتشرب مرئة و بتستوي
هي النقطة ما عرفت شو اعمل فيا
هلأ انا بمرحلة سوي اللحمة ان شالله توصلك وتلحقي تردي عليي
ان شا الله كون لحقتك
لا بستخدميها من دون سلق , بتخليها تستوي بمرقة اللحمة
ان شا الله تعجبك
رجعت قريت التفاصيل كنتي كاتبة انو بلا سلق ولحقت حالي
طيبة كتيييير يسلمن منى
عوافي و الف هنا و صحة
منمون كالعادة بكون واثقة من الأكلة من قبل ما دوقها … طلعت الأكلة عم تدوب دوبان … واحلى شي انو صبخها كتير اكابر يعني بتحطيها بالفرن وبتعملي ألف شغلة تانية وبعدين تشييكة بسيطة وبترجعي لشغلك … يعني الواحد طبخ بس ما ضل بالمطبخ … وبعدين مابتوسخ المطبخ كمان … مو معقول شو ظريفة… على فكرة انا ضفتلها ملعقة صغيرة صلصة بندورة لأن بندورتنا كتير شقرا هون…
تمااام نعوم , هادا هو التعبير الي عبدور عليه و ما لاقيه , طبختي بخة بس من دون ما تطبخي
الف هنا و صحة و شكرا ع الاضافة
يسلم ايديك كتيررررر طيبة عندي سؤال اذا ممكن بيصير استعمل باستا ريزوني بدال الاورزو لان الكمية اللي عندي مابتكفي او بيصير اذا خلطت اورزو و ريزوني مع بعض؟؟
و الله فرح ما الي مجربة الباستا الي قلتي عليها بقى ما بقدر فيدك