طريقة حفظ البازلاء


         وصفة : منى                 2009/05/28                 28 تعليقات
طريقة حفظ البازلاء

مو كل شي نتعلمه من أهالينا بيكون صح ! و هل الشي ممكن نكتشفه بكير و ممكن نكتشفه متأخريين و ممكن ما نكتشفه أبداً . و كمان هل الشي بينطبق على العادات و على الأخلاق و حتى على الوصفات .

البازلاء من الخضرة الي بمون منها كتير , و انا ما بحب أحفظ كتير اشياء بالفريزر , بس البازلاء لا غنى عنها , لان بتلزمني كتير و ممكن أستعملها لكتير وصفات .

بالأول كنت فرزها على طريقة أمي , و هي اني بغليها مع مي و ملح و شوية سكر و ملح ليمون , و كانت الطريقة ماشي حالها , بس اللون ما يبقى أخضر و حلو بيصير على أخضر مصفر .

مرة شفت بازلاء مفرزة عند بيت حماي و كان لونها بيجنن , و كأنها تازة و بعد السؤال و الاستفسار خبرتني أم زوجي أنها بتشيلها للفريزر من دون أيا شي , بس تغسلها و تعبيها باكياس و على الفريزر , جربت طريقتها و صار لون البازلاء حلو كتير بس كانت تعزبني لتستوي , تاخد ساعة او أكتر بطنجرة الضغط و تصير طعمتها مو كتير طيبة .

أخيراً اكتشفت هل الطريقة و فيها بتصير البازلاء طرية و بنفس الوقت لونها بيجنن , و هي الطريقة الي معتمدتها من كم سنة و ان شاء الله تجربيها و تعجبك .
بالصحة و الهنا




كيلو بازلاء
1 – 2 ملعقة كبيرة ملح صخري
رشة صغيرة سكر





• يوضع مقدار ثلاثة أو أربعة لتر ماء على النار و يترك حتى يغلي .

• يضاف الملح و السكر و بعد أن يغلي الماء مجدداً تضاف حبات البازلاء و تترك لتغلي لمدة 8 – 10 دقائق أو حتى تطرى من دون أن يتغير لونها .

• ترفع البازلاء من الماء المغلي و توضع مباشرة في الماء المثلج لتحافظ على لونها الجميل ثم تترك حتى تبرد .

• تصفى البازلاء و تعبأ في أكياس ثم تحفظ في الفريزر حتى وقت الحاجة .

ملاحظة سريعة :

عند حفظ كميات كبيرة من البازلاء يراعى أن لا تغلى كمية كبيرة في كل مرة و الا فإن بعض الحبات ستنضج و بعضها سيبقى الأخر غير ناضج .
  • وصفات تانية ممكن تعجبك


التعليقات

  1. wedadswed 28 May 2009

    بصراحة أنا بعملها بنفس الطريقة بس بحب أطلع على شغلك لأنو دايما عندك جديد وإبداع

  2. wedadswed 28 May 2009

    انا بعلها بنفس الطريقة بس بحب شوف طريقتك لأنك مبدعة

  3. semo 28 May 2009

    يسلم ايديكي

    بس نحنا هون بالسعودية ما بتجينا بازاليا فريش

    بتجبنا مفرزنة جاهزة وكتير طيبة
    بس الوحد بيتعلم

  4. ام نور 28 May 2009

    سبحان الله يا منى اليوم اشتريت كمية بازيلا طبخت شوي و بدي جلد الباقي فتحت الموقع ولقيت البازيلا قدامي كتير انبسطت
    بس بالعادة بنقيون وبغسلون وبالاكياس عالفريزر ولا مرة واجهت مشكلة الاستواء الطويل لا البازيلا لا المجمدة ولا الخضرا
    يمكن لان نوعية البازيلا بتختلف بين منطقة والتانية ;) الله اعلم حتى باقي الخضرا دغري بيستوا بدون ضغط

  5. غيث 28 May 2009

    ايه والله يا منى صدقتي احيانا بكون متعلمة شغلة من امي او حماتي وبكون مستعجلة قام بعملها بطريقة اسهل للسرعة وبتكون النتيجة نفس الطعمة او اطيب عندها بقول لزوجي يا حرام امهاتنا ما بغيرو من طريقتهم ولو فيها لبكة وشغل زيادة خلص هيك الاصول على حسابهم والله يجزيك الخير على هالطريقة لان البازلاء كتير مهمة لكل الاوقات شكرا منى من القلب على افادتنا بخبراتك اللي تعبت عليها كتير شكرا لك يا صاحبة اطيب قلب واروع منى يالدنيا والله يخليك لزوجك ولاولادك ويفرحك بهم يا رب طولت عليك مو اسفة

  6. نور الأسلام 28 May 2009

    السلام عليكم انا من زمان حابه اتعلم طرق التفريز للبازيلا وغيرها شكرا كتير الك منى وسلم دياتك يا عسل ;)

  7. تورتاية بالكريز 29 May 2009

    تسلم ايدك ياقمر على الوصفةى اللي ان شاء الله مية بالمية سليمة وصحيحة لانو السخن بعديها بارد او متلج بيحفظ اللون والنضارة للخضار تسلمي والله على الوصفة المضبوطة البازلا شكل ولون وطعم بتغني وتميز الكتير من الوصفات زي الرز والسلطات وخضرة مطبوخة وانواع جراتان مختلفة يعني صديقة الكل مش بتزعل حد ;)

  8. آرام 29 May 2009

    مشكورة أخت منى على الوصفة .. وعلى التطبيق فوراً إن شاء الله.

  9. منى 30 May 2009

    هلا وداد :)
    هادا بس من زووءك أختي و مية اهلا و سهبلا فيك بالموقع شرفتينا و انستينا اختي :zzz

  10. منى 30 May 2009

    هلا سيمو :)
    و نحنا عنا جاهز , بس مو مفرز بيكون معلبات و طعمتها مو طيبة ابداً :sigh . بيصير بيوم تلزمك الطريقة ما بتعرفي شو بيمرق الواحد على راسه ;)

  11. منى 30 May 2009

    هلا ام نور :)
    اظن نوعية البازلا الها دور , و انا هلا ما بقى بعزب حالي , بسلقها و بشيلها و هيك بتكون جاهزة ايمتى ما بدي ;)

  12. منى 30 May 2009

    هلا غيوثة حبيبة قلبي :)
    كلامك مزبوط , لهيك التجربة اساس التعلم بالمطبخ برأيي , الف شكر الك للدعوات الغالية و الكلام الطيب , الك متل هل الدعوات و اغلى حبيبتي لكل اولادك و زوجك و عيلتك الحلوة واحد واحد

  13. منى 30 May 2009

    هلا نور :)
    كتير انبسطت انك شفتي الطريقة و ان شاء الله تستفادي منها أو تلزمك شي يوم ;)

  14. منى 30 May 2009

    هلا ام ياسمين :)
    و الله تشبيهك حلو كتير , بالفعل البازلا صديقة الكل و رفققيتهم ووين ما كانت بتجي على القلب :grin
    الف شكر الك للرد و التواجد الطيب و نورتي يا قمر

  15. منى 30 May 2009

    هلا اخ ارام
    ان شاء الله تجربها و تكون متل ما بتحب و الذ :)

  16. نور الأسلام 30 May 2009

    تسلميلي منى والله يخليكي اكيد هالوصفه وغيرها من الوصفات رح استفيد منها الانو انشاء الله رح انتقل لبيت جديد ولازم اكون اعرف كتير شغلات استفيد منها الي ولبيتي واسرتي واكون ست بيت شاطره 8) واكيد انتي قدوتي ادعيلي الله يتمم على خير :zzz

  17. نهى 30 May 2009

    انا فعلا زى ام نور باشيلها من غير ماء مغلى او اي شئ ولا بتتعب في السوا ولا اى حاجة!! :roll
    جزاكى الله خيرا

  18. منى 1 June 2009

    هلا نور :)
    شو هل الخبرية الحلوة , ربي يتم عليك بيسر و سهولة و يكون بيت السعد و الهنا كله حب و مودة و رحمة باذن الله ..

    ربي الف مبروك و اي خدمة او سؤال انا تحت امرك نور

  19. منى 1 June 2009

    هلا نهى :)
    بيجوز البازلا الي متوفرة عندنا تعبانة لحتى صار معي هيك , المهم انت وجدتي الطريقة الي بتريحك و هادا المطلوب ;)

    مية هلا فيكي نهى

  20. ام عمر 17 June 2009

    تسلم ايدك يا قمر :zzz

  21. منى 18 June 2009

    الله يسلمك أختي ام عمر :)

  22. الدمشقية 27 July 2009

    فعلاصر حبيبتي منى ونحن كمان هيك منفرز البزاليا بدون ما نعمل فيها أي شي أبداً
    تسلم ايدك يا غالية

  23. shado 19 August 2009

    مرحبا اخت منى انا بشكرك كتير على هاد الموقع اللي سهرني لين الصبح وانا بس عم بطلع على وصفاته اللي اكتر من حلوة انا مشيركه جديده وحابه ترحبوا فيني واتمنى انكم تقبلوني لانه كل المشتركين دمهم عسل وبجننوا :upset

  24. منى 20 August 2009

    مية اهلا و سهلا شادو:)
    نورتي الموقع و شرفتيه و اتمنى انك تجربي شي كمان من الوصفات و يكون على زووءك .

    اسمك حلو كتير ;)

  25. zsoukar 1 December 2009

    السلام عليكم . انا بدي قول الحمد لله يلي رجع الموقع .والله شو انزعجت لما صار بلوك للموقع .الله لايحرمنا هالطله الحلوه .كل عام والجميع بخير

  26. منى 22 April 2010

    و عليكم السلام و رحمة الله و بركاته , الله يسلمك و يحفظك و يخليك اختي و الله لا يحرمني من هيك اخوات :zzz

  27. marim 14 September 2010

    مرحبا مدام منى انا دايما بعزبك معي بس ممكن تنصحيني جوزي جايبلي فطر طازج وكمية كبيرة عندك شي فكرة عن طريقة حفظه الله يوفقك تردي علي بسرعة لانو من يومين جابهم وخايفي يخربو :?

  28. منى 16 September 2010

    بتنظفي الفطر بمنشفة مبللة و بعدها ممكن تسلقيه حبة كاملة و تحفظيه بالفريزر أو تقطعيه شرايح و تسلقيه و كمان تحفظيه بالفريزر , انا بفضل التقطيع و بعدها السلق

    ممكن كمان تقلبيهم بشوية زبدة و تخليهم بالفريزر لوقت الاستعمال بس مش اكتر من 10 ايام ;)

تقييم الوصفة
عاديةقد أحضرهاجيدةممتازةأكثر من رائعة (3 votes, average: 2.00 out of 5)