عجينة أمي الذهبية


         وصفة : منى                 2007/09/08                 58 تعليقات
عجينة أمي الذهبية

هي العجينة عجينة ماما و اختي اية , كتير شاطرات بالعجاين ما شاء الله , و هل العجينة بالذات كتير سهلة و ميزتها انها رح تطلع مقرمشة , بقى كتير بتلبق للكروسانات لان بتعطي هرشة و قرشة بتجنن .

ميزة هل العجينة القرشة و القرشة ما رح تزبط معنا غير اذا استخدمنا سمنة نباتية حصراً , لا زيت و لا زبدة و لا سمنة عادية , بقى اذا جاي على بالك تجربيها , انصحك تتبعي الوصفة متل ما هي لتحكمي على النتيجة بنفسك .

عزمتني رغد علاء الدين لعندها و كانت محضرة كرواساناتها على طريقة ماما , و كان شكل الصحن بيجنن , لهيك صورته و هي الطبق وصفة أمي , تحضير رغود , تصوير منى , و الي أكلهن بعدها رغد و منى و قطاط رغد :)

بالصحة و الهنا




كيلو طحين
3 ملعقة كبيرة خميرة
3 ملعقة كبيرة سكر
3 ملعقة كبيرة حليب بودرة
1 ملعقة كبيرة ملح
2 بيض
نصف كوب لبن
نصف كوب سمنة نباتية ( مثل مازولا )
ماء ساخن حسب الحاجة





• تخلط المقادير الجافة مع بعضها البعض ثم تعمل حفرة في المنتصف .

• يضرب البيض قليلاً في صحن صغير حتى يمتزج البياض بالصفار ثم يوضع في الحفرة مع اللبن و السمنة و تفرك المقادير جيداً .

• توضع ركوة ماء على النار و تترك حتى تسخن ثم يضاف الماء بالتدريج حسب الحاجة و يعجن بعد كل إضافة حتى الحصول على عجينة طرية و متماسكة .

• توضع العجينة في وعاء كبير و يغطى بإحكام بورق نايلون لمنع وصول الهواء له و تترك حتى تتخمر و يتضاعف حجمها .

• تستعمل العجينة حسب الرغبة لتحضير الفطاير و غيره .

سر الطبخة :

سر العجينة هو استعمال السمنة النباتية و لا تستبدل بأي نوع أخر من السمنة كي تكون النتيجة رائعة دوماً .

التعليقات

  1. بدور 8 September 2007

    يا سلااااام شي مشهي فعلا الله يسلم ايديكي و ايدين ماماتك الحلوين لإنها جابت بنت متلك و اكلاتا طيبين كمان لاااااااا هيك كتير :roll

    والله على أد ما عبشوف وصفات طيبة بطلت أعرف اش ارد :p
    ضروري جرب هالوصفة ;)

  2. nidaa84 8 September 2007

    الله يسلم ايديك منظرها بشهى وانشالله بدى اجربها لانه هيك فطاير طيبين على السحوروالله هل الاكلات الموجودة عم احتار شو اعمل كل واحده منظرها بشهى اكثر من الثانيه الف الف شكر

  3. ام نور 8 September 2007

    الله يخليليك امك يا رب .
    :) العجينة روعة بتطلع اكيد بس ممكن نعملها لا الكروسان لان شفت كروسان بالصورة ولا عجينة خاصة

  4. منى 9 September 2007

    هلا أخت نداء :)
    الشكر ليك على تواجدك الطيب بالموقع
    نورتي

  5. منى 9 September 2007

    هلا بدور :)
    ان شاء الله رح تعجبك إذا جربتيها
    مية أهلا و سهلا

  6. منى 9 September 2007

    هلا أختي ام نور :)
    العجينة ممكن تستعمليها لاي نوع فطاير و تحشيها بشو ما بتحبي
    بس انا مو نسيانة وعدي بالكروسان , بكرة أو بعده إذا الله راد رح نزل لك الوصفة ;)

  7. ام نور 9 September 2007

    الله يبارك فيكي عم نعذبك بطلباتنا. :)
    بدي كمان اطلب منك اذا مجربة وصفة النعنع يابس خلصت نعنع يابس وبما اني في فرنسا لا اجد الا نعنع اخضر وانا كتير بستعمل النعنع فعم فكر اشتري اخضر ويبس بس ماني عارفي كيف :? الف شكر

  8. منى 9 September 2007

    بالعكس ام نور :)
    انا كتير مبسوطة فيك و بباقي الاخوات , الله لا يحرمني هل الطلة الحلوة ..

    النعناع أنا بحضره كل سنة , بشهر تموز لحتى تكون الشمس قوية .
    بتجيبي النعناع و بتنتفيه من الاعواد و بعدها بتغسليه كتير منيح و بتحطيه على مصافي لحتى ينشف .. بالنسبة الي أنا بجفف تقريباً 5 كيلو كل سنة من الورق الجاهز

    هلا بتمدي شرشف أبيض في أكتر محل في بيتك بتجيه الشمس و بتفردي ورق النعاع على الشرشف و بتخليه لحتى ينشف , بالكتير بياخد معي يومين
    بعدها بتحطي الورق الناشف على مصفاية و بتفركيه بين ايديكي و بتشوفي ان كله صار ناعم معك و بعدها بتحركي المصفاية لحتى يهر الناعم لتحت و تبقى الأعواد أو الاشياء الخشنة في المصفاية

    النعاع الناشف بتخزنيه في مرطانات بلور لوقت الاستعمال ..:)

    ان شاء الله تكوني فهمت علي , و اي سؤال تاني انا تحت أمرك أختي :)

  9. ام نور 9 September 2007

    الله يبارك فيكي كتير سهل والله رح اعمل متل ما قلتي انشالله

  10. arwen 22 October 2007

    موقع رائع جد ومفيد كتييييييييييير
    الله يعطيكم الف الف عافيه
    اختي بس بدي اسالك اللبن رايب يعني بصير لبن المراعي ونادك هدول العيران يعني؟

  11. منى 22 October 2007

    هلا فيك أختي arwen :) أخت جديدة و عزيزة

    كلك زووء اختي , و ألف شكر ليك على الرد الطيب ..

    أختي اللبن الذي يستعمل هو اللبن الزبادي و مش اللبن الرايب , و إذا مش متوفر استخددمي اللبنة و خففيها بشوية مي أو استخدميها من دون تخفيف كمان بيصير ;)

    أي سؤال تاني مية أهلا و سهلا فيك أختي :)

  12. arwen 22 October 2007

    تسلمي يارب 8)

  13. kuwaiti_girl 5 February 2008

    يعطيك العافية وشكلها جدا مشهي

    سؤالي هل الشورتنينغ يحل محل السمنه النباتيه؟؟

  14. منى 6 February 2008

    هلا فيك أختي :)
    ممكن أن يستعمل مكانه , بس في هل الوصفة لأ , إذا حابة تجربيها لا تغيري في نوع السمنة ما رح تطلع مضبوطة :roll

  15. kuwaiti_girl 6 February 2008

    شكرا جزيلا.. بجرب اشوف سمنه مازولا متوفره وبجربها ان شاء الله

  16. منى 6 February 2008

    إن شاء الله أختي و أنا أكيدة رح تعجبك ;) إن شاء الله , بس لا تنسي تدعي لأمي

  17. kuwaiti_girl 7 February 2008

    باذن الله بجربها اليوم وبدعيلك ولامك ان شاء الله :)

    صار روتين يومي ادش الصفحه واتجول فيها هههه[B]null[/B]

  18. منى 9 February 2008

    ان شاء الله :) كلك زووء حبيبتي و أتمنى كمان تجربي وصفات و تكون متل ما بتحبي ;)

  19. kuwaiti_girl 25 February 2008

    تسلمين يا غاليه واذا ما فيها تعب ابي طريقه فطاير السبانخ
    ابي مقدار للحشوة اللي تكون مع جوز وشكرا غاليتي

  20. منى 25 February 2008

    من عيوني التنتين , ان شاء الله هل الوصفة رح نزلها بالاسبوع الي جاي , معلش سامحيني رح اتاخر عليك شوي لان هل الاسبوع امتحانات ولادي :roll

  21. Eman 31 March 2008

    أختي الحبيبة منى

    اشتقت لك كثيرا،وأردت أن أبعثلك برد،لكن لا أعرف لماذا لا تظهر لي صور المنتدى :sigh .

    مابعرف شلون طلعت معي هلأ،يمكن لأنو هي الصفحة مخزنة بكمبيوتري ،إذا عندك فكرة تساعدني لأقدر أفتح الصفحة بشكل طبيعي ،يا ريت تسعفيني فيها :cry .

  22. منى 31 March 2008

    هلا أمولة :) حبيبتي ما كتير فهمت عليك , ممكن تشرحيلي أكتر , كيف يعني الصور ما عم تظهر و شو دخل الصور بالرد ؟
    بانتظار ردك أختي

  23. Eman 31 March 2008

    ما عم تطلعلي الصور ،يعني حتى صورة الكود الموجود فيها الرقم ما عم تطلع ،هي الصفحة مخزنة بالكمبيوتر عندي مشان هيك ما عم أقدر رد من غير هالصفحة،مابعرف يا ترى بس أنا عم عانى من هي المشكلة؟؟ :sigh

  24. منى 31 March 2008

    غريبة ايمان :roll ما حدا اشتكى من المشكلة ,..

    هلا حتى لو عملت تحديث ما عم تطلع الارقام ؟

    على كل الاحوال رح ابعت المشكلة للمهندس المختص و ان شاء الله بيبقى بيحلها , و من هون لوقتها فيك تردي على اي وصفة حابة تردي عليها على هل الصفحة بس اكتبيلي اسم الوصفة

  25. kuwaiti_girl 1 April 2008

    اخيييييييرا طلعت لي الصور والكود للرد

    اختي الغاليه كنت عاني من نفس المشكله … وهذا السبب اني لا اقدر ان اطبق او ارسل لك تطبيقاتي او حتى ارد على وصفاتك اللذيذه… وقد ارسلت لك رساله بذلك

    تسلمين لي يا رب على حل المشكله

  26. kuwaiti_girl 1 April 2008

    ملحوظه: هذه الصفحه الوحيده اللتي ااقدر ان اراها طبيعيا بالصور واقدر ان ارد عليها

  27. منى 1 April 2008

    هلا أختي كويتية :) أسفة أختي كتيرر على المشكلة الي عم تصير معك و مع ايمان و ان شاء الله بتنحل قريبا جداًعلى ما أتمنى :roll

  28. رنا 4 April 2009

    ولي شي بيطييير العقل عن جد كتير رائعين
    بس شو بدي قلك هلأ السمنة النباتية يعني بتصير الاصيل مثلا ؟
    طيب شغلة تانية ليش ماصورتيلنا اية وهي عم تلف الفطاير :zzz

  29. منى 5 April 2009

    هلا رنونة :)
    و الله شو بشتهي هل الصحن لكل اخت معنا بالموقع ;)

    السمنة اي نوع و ايا ماركة المهم ان تكون نباتية , و يا ستي بنهارتها ما كنت عرفانة راسي من رجلي , بقى شو صور و ما صور , الله ستر سمسومة اختي صورت السفرة و الا كانت راحت عليكم عزيمةالفطور الي رح نزلها بعد كم يوم :zzz

  30. عبير 5 April 2009

    الله يعطيك العافية يامنى ويسلمو ايديك وايدين اللي حضر وعجن وخبز واكل وصور كمان00000000000
    في عندي سؤالبشو داهنة الوش بحليب ولا بيض
    8) 8)

  31. رنا 6 April 2009

    الحمد لله يلي صوررت كم صورة والحق معك بهيك عجقة الواحد مابيفضى …الله يقويكي

  32. قهوه مُره 11 April 2009

    سلام منى …كيف حالك…كيفكم ياأخوات..أتمنى أن تكونوا كلكم بخير وصحه
    منى ..ممكن تعطيني بعض الحشوات يلي ممكن أحشي فيها هالعجينه ..ومشكوره كتير عزيزتي :)

  33. منى 13 April 2009

    هلا عبورة :)
    داهنة الوج بشوية حليب مع نسكافييه و هي فكرة من حورية المطبخ على فتافيت :zzz

  34. منى 13 April 2009

    هلا رنونة :)
    كلك زووء حبيبتي , ان شاء الله يعجبك الفطور

  35. منى 13 April 2009

    هلا قهوة :)
    انا بحشيها بجبنة لحالها و ممكن جبنة و بقدونس او جبنة و نعناع أو جبنة و نعناع يابس مع فليلفة حرّة , احيانا خلطة مناقيش الفليلفة و احيانا زعتر مع زيت زيتون و دبس رمان و ممكن جبنة كيري أو حلوم و كمان ممكن شوكولا :zzz و كتير بيطلعوا طيبين لمن بحشيهم بزيتون و فليلفة مفرومة مع دبس رمان و رشة زعتر اخضر و كمون , يممم

  36. نهى 13 April 2009

    هلا منى
    ياتري ممكن استبدل اللبن البودرة بشئ ولا؟؟ :?
    كمان ياريت اعرف ازاى لفتيها زى الكرواسون ولا ازاى؟؟ :?

  37. منى 15 April 2009

    هلا نهى :)
    الصراحة هيك الوصفة بدها , ما فيك تستبدليها بشي ,

    اللف متل الكروسان تقطعي العجينة كرات كبيرة شوية و ترقيها و بعدها تقطعي الدائرة لمثلثات متل البيتزا , تحشي اول طرف و تدوريها :roll

    ان شاء الله اذا صح الي رح صور الوصفة و تحضيرها و نزلها ;)

  38. حنان 18 April 2009

    :(

  39. منى 18 April 2009

    :roll

  40. نوارة 20 April 2009

    يعني انا دائما بشتهي اجرب وصفاتك وجربت كتير بس وقت قلتي انو هدول شغل اية تذكرت طعمتهم وقت رحنا لعندا ياي شقد كانوا طيبات جد اروع كرواسان
    بس انحف شوي بدي اجربهم اكيد

  41. منى 21 April 2009

    اتذكرتي يومتها نوارة :) ما بقى ااقوم من ادام كروسانات الفليلفة , يمممم
    يلا انحفي و جربيهم و ان شاء الله محمد رح يدعيلي و لاية و ماما كمان :zzz

  42. بشرى 23 May 2009

    الله يسلم إيديكي يا منوشة وإيدين الوالدة ويخليلك ياها ويحميا من كل شر ومكروه .. خلال هالسنة صار جربت 4 عجائن وكلون ما كانو يزبطو معي بس هي ما شاء الله حولها .. مقاديرا مزبوطة مليون بالمية ولا بتحتاجي أي إضافة .. ماشاء الله حولك وحول آية ومامتك .. يسلم إيديكن جربتها اليوم وطلعت ممتازة ورائعة وخيلة .. :zzz

  43. منى 24 May 2009

    الف الف هنا و عافية بشورة , ربي يخليك احبابك و الغوالي عليك
    كتير انبسطت انك جربتيها و عجبتك , هنا يا رب ;)

  44. رغد غسان علاء الدين 27 January 2011

    واووووووو عنجد خيلة..تسلم اناملك غنتي والوالدة..شي بيغرف القلب..رح جربها مع الجبنة..

  45. منى 27 January 2011

    ان شاء الله بتجربيها و تطلع متل ما بتحبي :zzz

  46. رغد غسان علاء الدين 22 February 2011

    النتيجة خطيرة..وسميتها أسلحة الدمار الشامل..فظيعــــــــة طلعت..وبصراحة منمون ولا تزعلي مني..يعني هالوصفة أزبط للكروسان..عنجد عنجد هديك حسيتها عقاب..عذاب.. :cry

  47. منى 23 February 2011

    لا رغود كل شي و اله شي , يعني هي الواحد بيعملها كل يوم , هديك شغل محلات احترافية و فن و بس ما الواحد جربها اول مرة رح يعرف انه مو كل هل الاد صعبة , بس بدها وقت ;)

  48. حنان 26 June 2011

    السلام عليكم اخت منى كيفك طمنييا عن احوالك وعن الوضع عندكم ان شاء الله تكونى بخيز يا رب ممكن نستبدل الحليب البودرة بالحليب سائل وشكرا اللك والسلام عليم ورحمتة وبركاتة

  49. منى 26 June 2011

    تسلميلي حنان , شكرا لسؤالك :roll

    الوضع الامني عنا منيح ……

    لا ما فيك , اذا عندك استعملي البودر و اذا مو متوفر استبداي المي بالحليب , مع ان الحليب البودرة رح تعطيها طعم طيب

  50. imabeer77 22 July 2011

    assalam alaikum sister Muna I have a question, do you use measuring cup in your recipies? and how many cups in one kilo? jazaki alla khairan

  51. منى 22 July 2011

    هلا حبيبتي :)
    اي بستخدمه و هو بيساوي 125 غ طحين لكل كوب من دون ضغط ;)

  52. imabeer77 26 July 2011

    يسلم ايدك ويجزيك كل خير يا منمن
    اليوم جربتها واستخدمت نصف المقادير
    ودعينالك انا وجارتنا الله يجزيك الخير
    طلعت على كيف كيفك :zzz
    انادهنتها بزيت الزيتون وحطيت عليها زعتر
    ودهنت اطرافها باللبن لحتى يحمر لونها
    ان شاء الله رح تكون هاي العجينة هي المعتمدة دائما عندي

  53. منى 28 July 2011

    صحتين و الف الف هنا حبيبتي :) على قلبك و قلب جارتك , حلوة فكرة اللبن , يممي ;)

    منورة

  54. Zubaida 11 August 2011

    السلام عليكم..
    عندي سؤال لو سمحت..
    بعد ما عملت العجينةبنفس المقادير وإضافة بعض الماء طلعت قاسية يعني لو ضغطت بإصبعي على العجينة ما بتدخل بسهولة وما بترجع لنفس الوضع، والوالدة قالتلي إنو السبب غالبا قلة الماء، أضفت ماء وصارت تتحسن وتطرى بس إنو بتلزق بإيدي بشكل يصعب معه التعامل معها. هل لأني ما عجنتها الوقت الكافي؟ ولا شو السبب برأيك؟

  55. منى 13 August 2011

    بتضيفي مي لحتى تصير طرية و ناعمة و بتعجني شوي , بعد شي 5 دقايق عجن بتحسيها اتماسكت و ممكن تزيدي شوية مي بس لازم تبقى طرية و ناعمة ;)

  56. رانيا88 2 February 2012

    مرحباست منى.تسلم ايديك والله حمستينا لنطبخ وشهيتينا.لوسمحت انت مانزلت صور طريقة اللف.انا جربت شوي من وصفاتك طلعوا طيبين.شكرا

  57. رفقة 23 December 2013

    رائعة أسعدكم الله دنيا و آخرة

    • منى 23 December 2013

      نورتينا و الف شكر على الدعوة الكريمة

تقييم الوصفة
عاديةقد أحضرهاجيدةممتازةأكثر من رائعة (3 votes, average: 4.33 out of 5)