فطاير الوردة


         وصفة : منى                 2011/10/12                 19 تعليقات
فطاير الوردة

هي الفطاير من اشهى و الذ الفطاير الي رح تحضريها , العجينة هشة و طرية و جواها الجبنة البيضا السخنة و ريحة الزبدة و المحلب رح تخلي مطبخك مكان دافي و رح تخلي كل العيلة واقفة على الفرن بانتظار انو تطلع الفطاير منه لحتى يلقمشوهم , حضري الشاي او العصير قبل , لان ما رح يستنوه ..

شكل الفطاير حلو و بنفس الوقت مو صعب , اول واحدة او تنتين ممكن ما يزبطوا معك , بس بعدها بتاخد ايدك و لحتى يطلعوا معي كلهن نفس الحجم صرت قيس المستطيلات بايدي و طلع معي افضل قياس هو حوالي الشبر و نص , شو رايكم بهل القياس .

العجينة بتجنن , شايفين كيف عم مدها و اشتغل فيها من دون لا طحين و لا يحزنون , بتلاقي حالك عم تلعبي فيها لعب و اهما شي انك تعجنيها عشر دقايق لختى تصير ناعمة و مطاطة قبل ما تتركيها لتتخمر .

بالصحة و الهنا

كمية تكفي لحوالي 18 – 20 فطيرة من الحجم الظاهر بالصورة




مقدار من عجينة الزبدة
نصف ملعقة صغيرة محلب مطحون
جبنة بيضاء , مقطعة لمكعبات صغيرة

خليط الوجه :

فنجان حليب
ربع ملعقة صغيرة نسكافيه
قطعة زبدة , باردة




• تجهز العجينة و يضاف لها المحلب مع الطحين لاعطائها رائحة شهية و طعم لذيذ , تترك حتى تتخمر و يتضاعف حجمها ثم تقطع لعدة أقسام , يرق كل قسم حتى الحصول على مستطيل , توضع الجبنة على اول طرف .




• تغطى الجبنة بالعجبنة و يضغط لسد الاطراف و يقص الباقي من العجين .




• يلف الانبوب حتى تلتقي اطرافه و يضغط عليهما حتى يصبح لدينا حلقة , ترفع على الكف و تشق الاطراف بطرف سكين حاد بالشكل الظاهر بالصورة ثم توضع في صينة فرن غير لاصقة .




• تكرر العملية حتى انتهاء الكمية مع ترك فراغ مناسب بين القطعة و الاخرى , تغطى الصينية بورق نايلون لاصق و تترك حتى يتضاعف حجمها .

• يذوب النسكافيه بالحليب ثم يدهن وجه الفطائر بهذا المزيج بلطف .

• تخبز الفطائر على الرف المتوسط في فرن محمى سابقاً على درجة حرارة 180 درجة حتى تنضج و يحمر الوجه .

• تخرج الفطائر من الفرن و تمرر قطعة الزبدة بسرعة على الفطائر لاكسابها لمعة و طعم شهي , تقدم فوراً .

التعليقات

  1. ورد 12 October 2011

    شي بيشهي يسلمو ايديكي يارب بس بدي قلك شغله انه ماتتاخري علينا بوصفاتك لانه انا وحده من الناس اللي بتزل تفتح موقعك لحتى انتظر شو عملتي شي جديد وكمان لحتى اقرأ مقدمتك انا بعترفلك اني ماكنت اعرف اطبخ بس بسببك والحمدلله اني صرت بعمل كتير شغلات مستحيل كنت فكر اعملا ماتأخذيني طولت عليكي ويسلمو ايديكي ياحق

  2. nourm 12 October 2011

    سلامات ست منى الله يعطيكي العافيه
    ياترى فيني استغني عن المحلب؟ مو موجود عندي
    شكرا حزيلا

  3. gsm 12 October 2011

    بالفعل يا منى هل العجينة رهيبة وانا عملت منها هل الفطاير بس بصراحة طريقة تشكيلها ملفت للنظر وكتيير مميزة يسلموا ايديك يا رب اكيد رح ارجع اجربها قريبا جدا اليوم عملت فطاير جبنة ومناقيش زعتر بس الصراحة استعملت عجينة خبز بيدا التركي من باب التجريب وبالفعل طلعت ولا اروع ولا اطيب يسلموا ايديك يا رب ولا تتاخري علينا باكلاتك الطيبة

  4. غيث 12 October 2011

    يا سلام اجت بوقتها والله رح اعملها هاليومين بس بكرة رح اشتري محلب وزبدة لاني مفنشة منهم ورح اسويها قريبا يسلم هالايدين والله شي بيفتح النفس :zzz

  5. منى 13 October 2011

    هلا ورد :)
    شكرا حبيبتي لرد و الف صحة و هنا على كل شي جربتيه , كتير مبسوطة انك صرتي تتشجعي تعملي اشيا جديدة و عم تكون على زوءك

    بانتظار تواجدك و ردودك دوما , مية هلا فيك

  6. semo 13 October 2011

    ممممممممممممممم شي بيشهي المنظر بيطير العقل
    واكيد الطعم يمي يمممي :p

    واكيد المحلب رح يعطيها طعم كتير طيب وخصوصا لو حطينا مع الجبنة شوية سمسم او حبة البركة رح تطلع فريبة من كعك العيد مع كاسة الشاي ياسلااااااام ريتو الف صحة وهنا على قلوبكن

  7. om nabeel 13 October 2011

    يسلموا ايديكي منونة (بمون عليكي بهالاسم ) بتذكريني باختي
    الله يعطيكي العافية رح جرب الوصفة قريبا ان شاء الله
    انا تقريبا عملت نفس طريقة الوردة بس بدل الجبنة تمر هي فكرة للي بدو يغير وصحتين وهنا

  8. imabeer77 13 October 2011

    يسلم ايديك يا منمن
    please do not hibernate Muna… We need you ! ;)

  9. حنان 14 October 2011

    السلام علكيم كيفك يا اخت منى ان شاء اللة تكونى الف الف بخير ممكن نضع جبنة صفراء بدل البيضاء وشكرا وجزاك اللة خيرا :grin

  10. منى 15 October 2011

    هلا nourm :)
    اي فيكي تستغني عنه , مع انو بالمحلب رح يطلع مميز , بس انا احيانا ما بحطله و بيبقى يمم ;)

  11. منى 15 October 2011

    هلا غفران :)
    صحتين و عوافي يا رب , كلو مع العافية طيب و ان شاء الله المرة التانية تستعملي هل العجينة و تكون طيبة و على زوءك ;)
    تعيشي و تعملي و تخترعي افكار ;)

  12. منى 15 October 2011

    هلا غيوثة :)
    ان شاء الله تجربيهم و يكونوا على زووءك ..
    و رح استنى رايك و ان شاء الله دوما النفس مفتوحة والنفسية مرتاحة و الصحة تمام :zzz

  13. غيث 17 October 2011

    يا سلام شي ناهي الله يعطيك العافية روعة روعة لسى رح اعملها كمان باشكال تانية على نفس المقادير شكرا منى جزاك الله كل خير

  14. منى 18 October 2011

    جربتيها غيوثة :)
    صحتين و الف هنا و ان شاء الله عوافي بكل لقمة

  15. حنان 27 October 2011

    السلام عليكم يا اخت منى والله ما بعرفك انك ما بتردى على ضيوفك انا زعلانة منك كثير يعني مطنشطيني يلا الله يسامحك كل يوم بفوت بقول يعني ممكن ترد على العبده الفقيرة

  16. منى 27 October 2011

    و الله حقك علي , ما بعرفكيف هل الوصفة رايح عني اني رد عليها :roll

    انت على عيني و راسي و هي بوسة على جبينك ;)

    لا ما فيك تستعلي الجبنة الصفراء لان رح تسوح برى الفطيرة , للازم جبنة بيضاء ;)

    ايا سؤال تاني من عيوني و انت مو ضيفة انت من اهل البيت

  17. منى 29 October 2011

    هلا سمسومة:)
    اي و الله المحلب عاطيها طعم و ريحة غير شكل , بس مو قريبة على كعك العيد , غير شي ;)

    و على قلبك يا مزوءة , مية هلا فيك

  18. rela 9 September 2012

    بصراحة أول ما شفت الوصفة قررت اني جربها على طول ، وبالفعل جربتها وكانت رائعة . يسلم هالأيادي والله يحفظكم ويديمكم على هالعطاء والتفاني .

    أختكم لمى

  19. Mona 1 October 2012

    هنا و الف عافية لمى على البك و الب كل مين داقها :)

    نورتي

تقييم الوصفة
عاديةقد أحضرهاجيدةممتازةأكثر من رائعة (1 votes, average: 4.00 out of 5)