فولية بلحمة


         وصفة : منى                 2009/10/15                 28 تعليقات
فولية بلحمة

اليوم اكلتنا من المطبخ الحلبي , فولية بلحمة اكلة طيبة كتير و انا بتعنيلي الربيع الغض الطري , لما بيجي الربيع و بتنزل خضرته بتلاقي البياعيين عم ينادوا من الجناين يا فول , أخضر و طري يا فول , يا حيف عل اللحمة يا فول . كنت كتير استغرب هل القصة , يعني لشو يا حيف على اللحمة , و الله الفولية ما في اطيب منها و ما اتاريكم هل القصة قديمة قديمة من على زمن نانة نانتي . هي يا سادة يا كرام لما طلع العثمنلي من عنا و اجا بداله الفرنساوية طلعت هل المناداة و بيقصدوا باللحمة الحمرا العثمنلي على اعتبار ان لبسه كان احمر و الفول كناية عن الفرنسي الي كان لبسه اخضر , بقى ما دام هي اصل القصة و فصلها فأنا معهن يا حيف على اللحمة يا فول .

و من الامثال الحلبية بيقولوا : أكل فول و رجع للأصول .

ان شاء الله تجربيها و بالصحة و الهنا

-المقادير:

كيلو فول أخضر
نصف كيلو لحمة طرية
2 ملعقة كبيرة سمنة
4 فص ثوم , مهروس
ملعقة صغيرة كزبرة ناشفة
نصف ملعقة صغيرة بهار
ملح
- طريقة التحضير :

• ينظف الفول من العروق ثم يقطع حسب الرغبة , يتغير لون الفول بعد تقطيعه لذا يجب طبخه فوراً .

• تقلى اللحمة بالسمنة و تقلب على نار قوية حتى يتغير لونها و تمتص مرقها تتبل بالبهار و تقلب .

• يضاف الفول و تهدى النار و يغطى القدر و يقلب على نار هادئة مع التحريك بين الفترة و الاخرى حتى يتغير لون الفول و ينضج ببخاره , حوالي 20 دقيقة .

• يضاف الثوم و الكزبرة و الملح و يقلب الكل لبضعة دقائق .

• يضاف كوبان من الماء و تغطى الفولية و تترك حتى تكمل اللحمة و الفول نضجهم , لمدة نصف ساعة تقريباً . تقدم فوراً مع الرز المفلفل و اللبن المثوم أو عصير الليمون لمن يرغب

التعليقات

  1. آرام 28 May 2010

    يسلموا إيديك أخت منى
    الفولية بلحمة من أكلات الربيع اللذيذة جدا .. بس كمان الفولية بزيت ما بتشكي من شي، خصوصا مع رشة فليفلة حمرا حراقة وعودين ثوم أخضر.

    ظريفة قصة الخضار الفريش .. خصوصا الفاصوليا :)

  2. أم نوران 28 May 2010

    يمي يمي اكلة كتيييير طيبة الحقيقة ما في اطيب من الطيخ الحلبي يا خيتوووو بشهي و ناعم و اكابر علاوة على انه صحي ..يسلمو ايديك اختي منى

  3. semo 28 May 2010

    وأخيرا نزلت الوصفة من كم يوم كان عندي فول أخضر بس أنا طبختو بزيت زيتون وتوم وكزبرة كمان كتير طيب بس أنا كان بدي اللي بلحمةبس مصيب

    ان شاء الله للسنة الجاية

    بس منى بدي نبهك علي الوصفة نازلة بتاريخ 2009 مشان هيك مو موجودة أول وصفة

  4. نور الأسلام 28 May 2010

    :) السلام عليكم اي شو هالطبق اكلة كتير كتير طيبه انا بحبا مع البصل الاخضر واللبن العيران مممممممم ;) ;)

  5. غيث 28 May 2010

    والله انا ما عمري اكلت هالاكلة والان نسيانتا تماما ومتل ما قلتي سابقا ما باكلها وبقول يا حيف على اللحمة بقلب الفول بقى طلعت القصة غير شكل الله يعطيك العافية ما لي خبر بس والله جد رح اجربها قريبا ان صح لي فول مرتب منشان اولادي ياخدو نفعها من جهة وتغيير شكل عن باقي الطبخ من جهة اخرى الله يجزيك الخير رجعتيني لحلب واكلات اول بحلب الغالية شكرا منى ;)

  6. منى 29 May 2010

    هلا أخي ارام :)
    ممم , اكيد الفولية بزيت غير شكل مع خبز تازة و عصرة ليمون . انا دايما بفضل اكلات الزيت لان بحسها اخف و نكهتها مميزة.

  7. منى 29 May 2010

    هلا ام نوران :)
    ما في اطيب منه صح ,بس مو كتير صحي و خصوصا مع اليبارق و الكبب و الدهن للركب :grin

    مية هلا فيك ام نوران , منورة 8)

  8. منى 29 May 2010

    هلا سمسومة :)
    حقك علي يا عسل و ان شاء الله تجربيها لما بيصح الك و ان شاء الله تعجبك ;)

    سمسومة بعرف بقصة التاريخ , بس هيك صار :roll

  9. منى 29 May 2010

    هلا نور :)
    انا بحبه اكتر الشي مع عصير الليمون , ممم حامض و بيشهي

    فرط ريقي :zzz

  10. منى 29 May 2010

    هلا غيوثة :)
    لااا القصة غير ما كنا فاهمين و ان شاء الله تجربيها و تعجبك كتير و ترجعي تعيدي العلاقات الدبلوماسية معها :grin

    شكرا الك غيوثة لانك دوما هون , بوسات كتيرة للاولاد و ان شاء الله تعحبهن

  11. farah 30 May 2010

    والله يا منى هالأكلة من أكلاتي المفضلة بس طريقتنا بالشام مختلفة متل ما خبرتي بعطيكم فكرة موجزة عنها ان بنحط حب الفول مع ورق السلق بنفرمه الورقة والساق وباقي الطريقة تقريبا نفس طريقتك يسلم دياتك ومن زمان كانو يعملو هالأكلة بالفول اليابس بعد نقعه قبل بيوم انا شخصيا ما بعرفها الا بالفول الأخضر وألذ شي لما بتكون بلحمة الخاروف الظريفة وكلما طبخت هالأكلة تاني نهار بقلبها لأكلة تانية اسمها مشمشية مين يا شاطرين بيعرفها ؟؟ هي حزورة وبكرة بحكيلكم عنها :zzz

  12. منى 31 May 2010

    انااا بعرفها , احكي و الا نو ؟

  13. farah 1 June 2010

    حبيبتي انتي الك كل الصلاحية تحكي بلا استأذان ولووو :zzz
    لنشوف مين من رواد الموقع بيعرفها كمان ;)

  14. منى 1 June 2010

    لا خلص ما رح احكي , لنشوف مين رح يعرف :zzz

  15. سارونات 3 June 2010

    السلام عليكم و رحمة الله و بركاته

    عجيتني هالاكلة بسيطة و مبينتها طيبة ان شاء الله ببقى جربها

    اختي فرح ناطرة اعرف شو هي المشمشية

    بالتوفيق
    سلام

  16. منى 3 June 2010

    كتير سهلة و طيبة , ان شاء الله تجربيها و تعجبك ;)

  17. ميساء 6 June 2010

    يسلم ايديكي يا منى يعني هي الأكلة من أكلاتي اللي بحبها كتير وبدي جربها عالطريقة الحلبية باذن الله وبالنسبةلحزورة farah ولوووو يا حبيبتي هي المشمشية شغلتها شغلة وأكلة عن جد معتبرة بس يمكن يلي ما بيعرفها يستغرب بالأول لأنها فولية+كبة بلبنية :upset
    انشاالله كون أول وحدة حزرت الحزورة لأني هلأ شفتا للحزورة وامبارح كان عندي ضيوف وما صار لي فرصة طلطل على بيتي التاني الحلو اللي يخليلي صاحبتو القمر يا رب ويسعد أوقاتها ويوفقها ;)

  18. farah 6 June 2010

    برافو عليكي يا ميساء لو في ايدين بيصفقوا لصفقتلك :zzz
    عن جد هالأكلة هي كبة لبنية بتنضاف عليها الفولية الشامية بتصير اسمها مشمشية ولهلأ مشتهية اعرف ليه هيك مسمينها مع ان مالها علاقة بالمشمش لا من قريب ولا من بعيد :zzz

  19. منى 6 June 2010

    عن جد انا كمان متلك فرح مستغربة , لان لا باللون و لا بالشكل :roll

    برافو عليك ميوس , و يا ريت تجربي الطريقة الحلبية و تعجبك و كمان شكرا فروحة للحرزورة الحلوة ;)

  20. ميساء 7 June 2010

    شكرا farah الصفقة وصلت لعندي وبالنسبة لاسم الأكلةفعلا اسمها مالو علاقة لا بالشكل ولا بالمضمون بس يمكن لما طبخوها أول مرة كانوا بالسيران بالغوطة تحت شي شجرة مشمش قام هبت نسمة هوا وقعت كام حبة مشمش بالطنجرة وصارت مشمشية :grin
    شكرا ميمو وأكيد بدي جرب فوليتك الحلبية من تحت دياتك الحلوين :)

  21. منى 7 June 2010

    ميوس حلو تحليليك للاسم و عن جد ما تستغربي ممكن يكون هيك الاصل :grin

  22. farah 9 June 2010

    :grin عن جد حلو هالتحليل للأسم بس قولك شو طلع طعم هالمشمشية ساعتها؟؟ :zzz
    مين بيتجرأ وبيجرب هالتحليل الظريف ميوسة؟؟

  23. lulu37 19 June 2010

    انا من زمان بدخل عالموقع و بحبو كتير بس اليوم لاجا عبالي اشترك
    يسلمو ايديكي على هالاكل الطيب
    نحنا الفولية منعملا بنفس الطريقة بس بدل الكزبرة اليابسة منحط الكزبرة الخضرة

    • منى 17 April 2014

      مممم , بتوقعها بتطلع طيبة كمان مع الكزبرة الخضرة , تسلم دياتك و شكرا كتير ع الاضافة , منورتينا :)

  24. ليان 2009 25 November 2010

    يت سلام شو سهلة وشكلها بيشهي تسلم ايديكي يارب عنجد روووووووعة

    • منى 17 April 2014

      الله يسلمك ليان , بتمنى تجربيها و تعجبك و يا ريت تخبريني :)

  25. بشرى 14 April 2011

    منوشة يسلم إيديكي يارب .. هههههههههه بالنسبة إلي كنت عم دور على وصفة الفولية بزيت وما لقيتها ممكن تدليني وين أو تكتبلي رؤوس الأقلام هون عالسريع بليز.. لإني ما بحبا بلحمة يعني يا حيف عاللحمة يا فول :grin

    • منى 17 April 2014

      بشورة كتيررر سهلة , بتقلي الفولية بالزيت على نار هادية و بتغطي الطنجرة و بتروحي و بتجي و بتحركيها و قبل ما تستوي بتحطي ملح و توم و كزبرة و بتقلبيها شي عشر دقايق , بس :)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)