كاتو الشوكولا مع صوص مايونيز الشوكولا


         وصفة : منى                 2012/02/28                 34 تعليقات
كاتو الشوكولا مع صوص مايونيز الشوكولا

هل الوصفة اتعلمتها من بدور , مرت أخي , دقتها عندها باخر مرة كنا عندهن , و كان الكاتو ناعم و طري و عم يدوب بالتم دوبان و لما حضرت الوصفة اكتشفت انو كمان بيعطينا كمية كبيرة , و بتوفي مع عيلة متل عيلتي الي بتعشق الحلويات

و رح قدم معه صوص خطير , صوص سري , صوص كتير مميز . و حطي جنب مميز شي مية كتير لحتى يعطيه حقه , يمكن هي اكتر وصفة بحضرها بمطبخي , على الاغلب دوما عندي منها مرطبان جاهز لحتى قدمه مع الكاتو , و ممكن لعصرونية سريعة مع بسكويتات .

المايونيز على اد مو سهل ممكن اصغر واحد بالعيلة يحضره و انا عم خلي بنوتاتي يحضروه . انو بيفرحوا لان عم يساعدوا ماما بالمطبخ , و عم يحضروا شي يممي , و انا بكون مطمنة عليهن لان ما في نار أو شي ممكن يأذيهم لا سمح الله , كل المقادير بالخلاط و اضربي لحتى تفشي قلبك من شي حدا زاعجك , و رح تشوفي ادام عيونك سحر حلو , من شي سايل و سايط و ما اله قوام مع الخفق رح يصير صوص ناعم سميك و لمعته حلوة , كانو موجات صغيرة و شهية من الشوكولا عم تستنى حدى يسبح فيها

أنا عم استعمل كاكاو هولندية , هيك بمجرد ما تفتحي المرطبان بتحسي حالك قرطتي شي لقمتين من لوح شوكولا طيبة , انت استخدمي افضل نوعية عندك لان هي اساس الطعمة . شي تاني , الافضل انك تستعملي افضل نوعية زيت , لان مرة استعملت نوعية مدري شو , قام طلع الصوص شي بين الشوكولا و البطاطا المقلية :) , و لحتى يكون الصوص كامل الاوصاف , عم حط كل المقادير بمرطبان كبير و عم استخدم الخلاط العامودي , و بنفس المرطبان عم احفظ الصوص , تكتين و خلصنا .. ..

بالصحة و الهنا




5 بيضات
2 كوب سكر
فانيليا
بشر ليمونتان أو برتقالتان
3 كوب طحين
1 كوب حليب
1 كوب زيت , أنا استعملت مزيج من الزبدة المذوبة و الزيت
بيكنغ بودر
6 ملعقة كبيرة كاكاو

مايونيز الشوكولا :

نصف كوب سكر
نصف كوب حليب
2 ملعقة كبيرة كاكاو
ربع ملعقة صغيرة نسكافيه
رشة صغيرة قرفة ( اختياري )
كوب زيت , قد لا يستخدم باكمله




• يخفق البيض حتى يصبح هشاً , يضاف السكر و الفانيليا و بشر الليمون و يخفق المزيج حتى يبيض .

• يضاف الحليب و الزيت و يقلب ثم الطحين المنخول مع الكاكاو و البيكنغ بودر و يقلب المزيج بخفة .

• يصب المزيج في قالب مدهون بالزبدة و يخبز في فرن على درجة حرارة 180 لمدة ساعة أو حتى ينضج .

• يخرج القالب من الفرن و يدهن الوجه بثلاث أو أربع ملاعق كبيرة من مايونيز الشوكولا و هو لا يزال ساخناً , يترك حتى يبرد ثم يقطع و يقدم مع المزيد من المايونيز .

طريقة تحضير المايونيز :

• يوضع الحليب و السكر و الكاكاو و النسكافيه و القرفة في الخلاط و تضرب حتى يصبح المزيج ناعماً .

• يضاف الزيت بالتدريج مع الخفق المستمر حتى يشتد المزيج و يصبح لامعاً , قد لا تستخدم كل كمية الزيت .

التعليقات

  1. رنا 1 March 2012

    عجبني مايونيز الشوكولا لعدة اسباب السبب الاول هو انه عطاني ثقة بنفسي انه صايرة عبخترع وصفات ههههههههههههههههه انا بعمل هالصوص الي ذكرتيه بس مالي خبز انه اسمو مايونيز …بس انا بستعمل زبدة مو زيت …هالصوص لقيتو بملحق لعلبة كريما دريم ويب وفعلا رائع وصرت استخدمو وقت بكون ماعندي شوكولا
    عندي سؤال عالكيك …انه بيفرط وقت القسم يعني قصدي بيناسب انه احشيه كاسترد مع مايونيز الشوكولا ….؟؟
    يسلمو ايديكي الصورة بتموت من الجوع هههههه
    وبالنسبة للقصة الي قريتيها ممكن اعرف عنوانها …شوقتيني اقراها

  2. semo 1 March 2012

    وااااااو يامنى شو هادبغيب وبرجع بلاقي شي بيطير العقل ماشاء الله
    وعجبتني شغلة مايونيز الشوكولا كتير لان كتير احيان بحتار شوبدي زين الحلو
    بدي اسألك بيصير حضر المايونير بخلاط العصير ولا خلاط خفق البيض؟؟

  3. mai yas 1 March 2012

    عنجد وصفه رائعه كتير عجبتني قصة مايونيز الشوكولا وحسيتها اختراع مبتكر وذكي ^_^ يسلمو ايديكي يا رب يعطيكي كل الصحه والعافيه ويباركلك بكل شي
    شكرا كتير على كل الوصفات وهالموقع عنجد كنز ما في شي بعملو ما بزبط :zzz

  4. غيث 1 March 2012

    الله يسلم هالايدين والله فعلا شغلته بسيطة ومنظره وااااوبيجنن اكيد على قائمة التجريبات هيك اكلة لازم نجربها واكيد لاننا كلنا من عشاق الحلويات والكاتويات فما بالك بكونه سهل لهالدرج الله يجزيك الخير :)

  5. emerald 1 March 2012

    الله يسلم أيديك أنا بعمل هاد الكاتو دايما بس بحط بدل الزيت قالب زبدة وبعمل نفس الصلصة بس بالزبدة كمان. بس بعرف اسمه كاتو تركي والعيلة كلها أخذت الوصفة من عندي لأني كتير بيطلع طيب وكلهم حبوه وما صدقوا انو شغل بيت. احيانا بعمله بلا كاكاو وبدهن الوجه بقشطة وفوقها بسكويت سادة مطحون وكمان بيطلع شي لذيذ . أنا كتير بحبك وبحب طبخاتك الله يديمك النا ولعيلتك وأولادك.من وقت ما تعرفت على موقعك ما بقى ادخل على موقع طبخ غيره دلني عليه أخي بيكون رفيق ابن خالتك.

  6. مسك الايمان 2 March 2012

    ما بقدر احكي اي شئ سلم ايديك يا عسل وسلم ايدين الصدفه الي خلتني افوت على موقعك ويصير احلى صدفة بحياتي ما بستغني عنها :zzz

  7. منى 2 March 2012

    هلا رنونة :)
    اي ليش ما يكون عندك ثقة بنفسك , الي عم يكتشف و يخترع وصفات مو احسن :zzz
    على سيرة الاسم , كل شي بهل الدني دعاية و علان , بقى الوصفة لازملها شي اسم مميز لحتى يلفت الها الانتباه و خصوصي انو النت مليان وصفات و اغلبها بيشبه بعضه

    كتيررر حبيت فكرة الزبدة رح جربها باقرب وقت ان شاء الله ;)
    لا الكاتو ما بيفرط و بيبقى متماسك و شي قطاايف

  8. amoula 2 March 2012

    شو هالصووورة اللي بتخلي الواحد يترك اللاب توب ويركض عالمطبخ يعملو , الله يسلم ايديكي والصوص هالوصف شكلو بيدووب رح نجربها بأقرب فرررصة مشتهية على وصفة كاتو شوكولا تكون مميزة وهي هيك شكلها

    بس سؤالين قبل ما اعملها كمية 3 كوب طحين يعني بتطلع كميتو كبيرة ؟! والقالب بدو ساعة كاملة بالفرن مو كتير ؟ بالعادة اكتر شي 45 دقيقة ,ياا انبسطتت وصفة جديد بعد زمان :) ;)

  9. رنا 3 March 2012

    شو نوع الزيت النباتي الي بتستعمليه؟

  10. منى 3 March 2012

    هلا سمسومة :)
    ان شاء الله امورك كلها تمام , و هل الغيبات الطويلة عم تبقي بالي عندك :roll

    اكيد بيصير تحضريه بالي متوفر عندك , خلاط عصير او الخلاط العامودي كله بيزبط ان شاء الله ;)

  11. منى 3 March 2012

    رنون عم استعمل عافية او مازولا ;)

  12. omislam 5 March 2012

    هالوصفة ذكرتني بوصفة لاحدى الاخوات في موقع تاني اسمها كيكة شوكولا والصوص منها وفيها وهالكيكة فعلا هشة كتير ورائعة وسهلة التحضير والصوص اللي بيتاخد منها قبل اضافة البيض بيشبه كتير صوص المايونيز اللي مذكور هون وفعلا هالصوص طيب كتير ومو طبيعي انا ضفت عليه بعض التعديلات انو صرت بعد ماطالعه من الخلاط حطه على حمام مائي وهاد حسيته عم يعطيه طعم ولمعة اكتر واخر مرة دوبت معه شوكولا جالكسي فكان رائع ولمعته رهيبة بس طبعا (فول اوف كالوريز)
    الوصفة اذا بتسمحيلي اني اكتبها برد تاني اذا حبيتي او حدا حب يجربها؟

  13. semo 5 March 2012

    الله الايشغلك بال منوش بس بتعرفي مع البيبي الجديد كبرت المسؤوليات وكل شي جديد علي
    وعندي بيت حماي جايين لعندي زيارة من سوريا وكتير مشغولة الله يعين يارب ورح جربو لهالكيك عن قريب لحماتي وشوف شو رأيها حاكم مابيعجبها العجب :grin

  14. ورد 5 March 2012

    مسا الخير انا جربت الجاتو امبيرحه وطلع نافش ومنظرو كتير حلو ولكن عندي وصفة تانيه نفس الجاتو بيطلع ولكن اسهل بكتير بصراحه تعذبت فيه شوي لانو انا معتمده على وصفتي كمان فيني نزل هالوصفه لو بتحبي ………………..

  15. تورتاية بالكريز 6 March 2012

    حلوة الخدعة ياقمر والله طول ماعم بقرا اتخيل طعم المايونيز وكيف بيصير التقاء المالح بالحلو المايونيز مع الشيكولا راح عقلي لبعيد ذكائي بيخوني بعد يوم طويل وعريض من العمل برا وداخل البيت وحسيت اني تعبت من التخيل وخلاص بدوق بالصورة هههههههههه
    شكل الكاتو رائع ومشهي الف صحة وهنا
    كيك الشيكولا هو الكيك المفضل لياسمينتي الحبيبة
    وكل ماكان ريتش بالشيكولا والصوص حواليه كلما كانت باسعد حالاتها
    الصوص بحط بودرة شيكولا نوع خام ممتاز مع سكر وحليب وملعقة طعام واحدة زيت واضافة ملعقة طعام من العسل الاسود لطعم غني ورائع ويسمى ايضا قصب السكر الاسمر وهو غني بالحديد وهو ماضيفه ايضا لمزيج الكيك لتحصلي على طعم يشبه كاتو الكافيهات الراقية
    الف صحة وهنا يااميرة الكاتو الموقع ماشاء لله غني ومتجدد بوصفات الكيك المميز ماشاء الله ولا حول ولاقوة الا بالله

  16. منى 7 March 2012

    هلا ميسو :)
    اي شو ندبحلك , شو نكسرلك و اخيرا صرتي معنا بالموقع كمان :zzz

    منورة حبيبة قلبي , و ان شاء الله تجربيه و تحبيه و اشوف صورة لتطبيق الشهي , كالعادة

  17. منى 7 March 2012

    هلا غيوثة :)
    كتير سهل , يا ريت تجربيه و يكون شكله و طعمه متل ما بتحبي و اكتر و رح استنى رايك يا قمر ;)

  18. Iman 8 March 2012

    اهلين منى. كيفك حبيبتي? والله اشتقتلك و للموقع كتييييير. صارلي كام يوم جاي عابالي شي تشوكليت كيك او بلاك فوريست كيك. يعني هيك شي هش و خفيف. الوصفه ممتااازه. شكلو بيجنن ماشاالله! راح اجربه عن قريب باذن الله. يسلموا ايديكي يا حلوه. :)

  19. nosheenzaza 10 March 2012

    منى شو حجم القالب الي لازم حط فيه هي المقادير؟

    و إذا بقسم المقادير بالنص، حط بيضتين و لا تلاتة؟ و لا حسب حجم البيض؟

  20. nosheenzaza 11 March 2012

    منى قررت أحط تلت بيضات خاصة انو حجم الكاسة هون كبير. طلع الكيك حلة و لذيذ، و لو كنت أتمنى لو نفش شوية كمان. كأنو ما مذكور كمية البيكنغ باودر بالوصفة.

    بالنسبة لمايونيز الشوكولا كمان طلع كتير لذيذ، بس ما بعرف شلون لازم يطلع قوامو، حسيتو طلع شوي رخو، يمكن ما صبرت على الخفق، قمت مشان السرعة حكيت فيه نص موزة و مشي الحال بنكهة أخرى.

    رح أبعتلك الصورة للكروب، زينا الكيكة بزينة كتييييير مميزة، و فيها شيء من الشر!

  21. DOUHA 16 May 2012

    رائع جربتو من شوي
    يسلموا

  22. wafa0001 1 June 2012

    شكلهاكتييييييييييييييير زاكي :)

  23. Mona 2 June 2012

    هلا وفا من زوءك اختي :)

  24. Mona 2 June 2012

    صحتين و الف هنا ضحى :)

  25. hayat shab 10 June 2012

    مدام منى شكرا كتيييييييييييير هاي اول وصفة بجربا وكتيييييير طييييبة بس سؤال انا خفس وقت طالعتو انا اول مرة بجرب كيك وحبيت اسأل

  26. hayat shab 10 June 2012

    شكرا كتييييير مدام منى اول مرة بجرب اعمل كيك وكتيييير طيب بس بعد ما طالعتو خفس حبيت اعرف ليش

  27. Mona 10 June 2012

    هلا اختي منورة و مشرفة :)
    خفس معناها كان لازم تتركيه اكتر بالفرن , ممكن تخليه كمان 5 أو 10 دقايق

    صحتين و الف هنا و عافية

  28. نزيهة 21 July 2012

    حبيبتي قد ايه نحط بيكينج باودر و الصينية عندي مدورة مقاس 20 24 26 28 دي مقاس كم :sigh :?

  29. نزيهة 22 July 2012

    عم بستنى الاجاااااااااااابة :roll

  30. نزيهة 22 July 2012

    اسفة ماعندي20 عندي 22 والله تعبتك معايا :sigh :upset

  31. Mona 2 October 2012

    نزيهة كل كوب طحين بده ملعقة صغيرة بيكنغ بودر , اما بالنسبة للصواني فمو متذكرة على الظبط , بس اتوقع انو لازم تستعملي قياس 28 سم , بكل الاحوال ما تخلي مزيج الكيك و هو ني يملي اكتر من نص القالب ;)

  32. نزيهة 23 November 2012

    مرسي عالرد حبيبتي :) تعبتك معايا

  33. lara 28 December 2013

    شكلها كتييي ةاكية يسلموا :-)

    • منى 29 December 2013

      الله يسلمك لارا , جربيها و ان شاء الله بيعجبك

تقييم الوصفة
عاديةقد أحضرهاجيدةممتازةأكثر من رائعة (3 votes, average: 4.00 out of 5)