كارنيارك


         وصفة : منى                 2007/05/27                 22 تعليقات
كارنيارك

كارنيارك




2 كيلو باذنجان من النوع الصغير و المدعبل

الحشوة :

ملعقة صغيرة سمنة أو زبدة
نصف كيلو لحمة غنم مفرومة
حبة كبيرة بصل
حبة كبيرة فليلفة حمراء
حبة كبيرة فليلفة خضراء
نصف ملعقة صغيرة بهار مشكل

الصلصة :

نصف ملعقة صغيرة سكر ( اختياري )
كيلو بندورة ( 5 – 6 حبات تقريباً )
رشة بهار
ملعقة صغيرة فليلفة حمراء ناعمة
نصف كوب ماء

أو 3 كوب ماء مذوبة مع ملعقتان من رب البندورة

سمنة أو زيت لقلي الباذنجان





• تغسل حبات الباذنجان ثم تجفف , ينزع منها الجزر الأخضر ثم تقشر بشكل مقلم و يقلى بالسمنة أو الزيت حسب الرغبة حتى يشقر .

• يفرم البصل إلى مكعبات صغيرة , تقطع نصف حبة فليلفة خضراء أو حمراء إلى شرائح رقيقة ثم يقطع باقي الفليلفة ناعماً .

• تقطع حبة بندورة إلى شرائح رقيقة ثم تقشر باقي البندورة و تفرم ناعماً أو تعصر و تصفى .

• تقلى البصلة بالسمنة حتى تطرى ثم تضاف الفليلفة الحمراء و الخضراء و تقلب قليلاً و أخيراً تضاف اللحمة و تقلب حتى تنضج و يجف مرقها تماماً , تتبل بالبهارات و توضع جانباً حتى تبرد .

• توضع البندورة مع باقي مقادير الصلصة على النار و تغلى لمدة 5 دقائق . أو يذوب الماء و رب البندورة و يوضع جانباً .

• تأخذ حبة الباذنجان ثم تشق من طرفها لعمل فتحة فيها للحشوة مع الانتباه كي لا تبعد الأطراف عن بعضها البعض ثم تحشى بالحشوة المجهزة و توضع في صينية فرن و تكرر العملية حتى الانتهاء من كل الحشوة و الباذنجان .

• تغطى الفتحة التي وضعت فيها الحشوة بشرحة بندورة و شرحة فليلفة ثم تصب الصلصة بلطف و توضع الصينية في الفرن لمدة نصف ساعة حتى تنضج .

• يقدم الكارنيارك ساخناً مع الأرز المفلفل .



  • وصفات تانية ممكن تعجبك


التعليقات

  1. بدور 12 September 2007

    ممممممممممممم :p

    نحنا ما منعملها بس سمعت عنها كتير و فعلا حبيت أجربا :grin

    الله يسلم هالايدين الحلوين يا رب

  2. منى 13 September 2007

    الله يسلمك يا رب بدورة :)

    ان شاء الله إذا جربتيها تعجبك و تحبيها :)

    نورتي 8)

  3. Eman 10 October 2007

    يسلمو إيديك على هالطبخة الرائعة
    ،البارحة عملتعها وعملت جنبها فتة الباذنجان(لأني استغليت تشابه مكونات فتة الباذنجان والكارنياك) وعجبت الأكلة زوجي كتير ،بس هلكني وهو بيسألني عن إسمها،وأنا يا دوب حفظته.
    سلمت يداك

  4. منى 10 October 2007

    عوافي و صحة ايمان :)

    هي أكلة زوجي المفضلة الي منعملها يمكن كل عشر ايام بالصيف :)

    نور الموقع بوجود أخت جديدة و عزيزة :)

  5. DOUHA 3 July 2008

    واللله اشتهيت اليوم اكول شي بالبادنجان

    رح جربا منى
    مرسي الك

  6. منى 4 July 2008

    صباح الخيرات ضحى :)
    ان شاء الله تجربي شي وصفة و تعجبك و لاتنسي تخبريني

  7. سارونات 26 September 2008

    السلام عليكم و رحمة الله و بركاته
    اختي منى انا بدي جرب الكارنياك و امام بايلدي بس يمكن ما اقدر بهالفترة فكان بدي اسأل ازا فينا نقلي البادنجانات و نحطهم بالفريزر و لما بدنا نساويهم نساويهم ازا بينفع بيكون كتير حلو كمان شو الغرض من التقشير المقلم هل يخدم الناحية الجمالية فقط او في الو غاية تانية و هل فينا نقشرو كلو لان بعد ما ينضج بيصير لازم كل شخص يشيل القشة او هل يمكن تتاكل متل قشرة الفليفلة
    بالتوفيق
    سلام

  8. منى 28 September 2008

    هلا سارونات :) اختي انك تشيلي الاشياء و تفرزيها و هي مقلية مو منيح أبدا بيعمل سرطان الله يبعده عنا , و الطعمة بتنتزع , انا من جهتي ما بطيق الفريزر , وصفات قليلة ممكن تفرزيها و تبقى طعمتها طيبة ;)
    التقشير المقلم للشكل بالأول و كمان بتعطي طعم و القشرة اكيد بتتاكل عادي من دون تقشير , أنصحك تجربي هل الوصفة و إذا كانت عيلتك من محبي البانجان رح تعش هل الوصفة ;)

  9. سارونات 28 September 2008

    السلام عليكم و رحمة الله و بركاته
    :eek لا تقوليها بعرف انو التفريز مو كتير منيح بس ما فكرت تفريز المقالي بيوصل لهالدريجة انا ما بفرز مقالي ابدا بس بادنجان طيب لكان هلأ شو راح ساوي مشان الموساكا يعني ما بعملها غير بموسم البادنجان او في شي طريقة تانية تنفرز شرائح البادنجان و بعدين نقليها
    جازاك الله خيرا اختي منى على المعلومةالمهمة
    بالتوفيق
    سلام

  10. منى 29 September 2008

    أكيد أختي بس بموسمها , ما الاكل ما بيبقى اله نكهة اذا تحضر بخضرة برة موسمها , ما بعرف انا هيك بحس ;) و الخضرة بكل موسم عامرة و في الها الف وصفة و وصفة ;)

  11. farah 1 February 2010

    تسلميلي يا منى على هالوصفات صار لي ساعتين عم قلب بهالوصفات واكتشفت هالوصفة اللي اكلتها من حوالي 15 سنة من تحت ديات صديق زوجي تركي وقتها خجلت اسأله عنها ولما لقيتها اليوم رجعتيني 15 سنة الله يجزيكي كل خير يا رب

  12. منى 2 February 2010

    هلا فرح :)
    ما في اطيب منها و حتى الي مو كتير صحبة مع البانجان بيحب هل الاكلة , بقى ان شاء الله تجربيها و تكون متل ما بتحبي و اطيب :zzz

  13. larooo 4 October 2010

    أنا كتيير بحب هي الاكلة ..بس نحن مابنعمل الصلصة هيك بس بنحط صلصلة بندورة وشوية مي ..يعني شي عالسريييييييع ..بس اكيد بتطلع بهي الصلصة اطيب
    ان شاءالله رح جربها
    مرسي قوي قوي :)

  14. منى 6 October 2010

    و انا بمووت عليها , مع اني بصورة عامة مو كتير صحاب مع البانجان

    طريقتك الي ذكرتيها اغلب الستات بتعمها هيك , بس بما ان عصير البندورة متوفر باصيف لهيك بحب استعمله :)

    شكرا الك لاروش , ان شاء الله تجربيها و تكون يم يم

  15. roroo51 15 October 2010

    تسلم ايدك
    يشهي

  16. منى 15 October 2010

    الله يسلمك :) نورتي اختي

  17. lolli 17 October 2010

    احلى سلام مني لاحلى منى و احلى صحبة
    مع اني كتير بتصفح مواقع لما بكون عم دور ع طبخات جديدة بس للصراحة انو هالموقع فيو مغناطيس ما حسنت اقاوم اغراءه :grin
    و صار اساسي اني اتصفحه تقريبا كل يوم
    و اتعرفت عليه لما كنت عم ادور ع وصفة مربى القرعة على الطريقة الحلبية 8)
    جربته و طلع طيب بس لونه كان غامق كتير ماعرفت شو السبب

    المهم و باختصار الكارنيارك جربته و كان روعة
    وطار عقلي انو جوزي اللي ما بحب اكلات البانجان حب هالاكله كتير
    و لانو انا بالغربة وعندنا ببروكسل نادرا بلاقي بانجان صغير لهيك اضطريت اقسم البانجانات بالنص لأنهم كانو ضخمات كتير و كل نص شقيت بوسطه شوي و حطيت الحشوة عالوجه و صارو كأنهم قوارب و مع الصوص حطيت تقريبا نص مكعب ماجي مدوب
    http://www7.0zz0.com/2010/10/17/23/798885409.jpg

    انا بحمد ربي عالصدفة اللي جمعتني بهالموقع الخيال و يارب اقدر افيدكم بكم وصفة

    بس للصراحة انا مو شاطرة بالطبخ و بميل للحلويات اكتر
    بس يا ترى كيف فيني اشارك بوصفاتي؟؟ياريت تفيدوني :upset [B]null[/B][B]null[/B][B]null[/B][B]null[/B]

  18. lolli 17 October 2010

    نمنم http://www7.0zz0.com/2010/10/17/23/798885409.jpg

  19. lolli 18 October 2010

    فتت بالحيط و ما كنت اعرف كيف ارفع الصورة
    يارب التالته ثابتة

    [img]http://www7.0zz0.com/2010/10/17/23/798885409.jpg[/img]

  20. منى 25 October 2010

    يم يم يمممممممم , الصورة بتشهي طالعة مهك , يا ستي هل الاكلة من الكلات رقم واحد عندي :zzz

    ان شاء الله تبقي معنا على طول يا جميل

    مربى القرعة ممكن تكوني زودتي عليه بالغلي او ممكن احيانا يكون لون القرعة نفسه مو زيادة :roll

    يا ريت لو تبعتي الوصفات برد او عن طريق اتصل بنا و انا ببقى بنشرهم باسمك ان شاء الله :)

    شكرا كتير للصورة و لعذابك لحتى ترفعيها , بس مستاهلة العذاب , يسلمن

  21. tala11 7 November 2010

    يالله شو طيبة بدي قوم اعملا هلا
    وحابة فاجئ زوجي فيها لانو زوجي بحب الباذنجان كتير
    وخاصة لما اعملا هيك يممممممممممي
    يسلمون يامنى

  22. منى 8 November 2010

    الله يسلمك حبيبتي و ان شاء الله تحضريها و تطلع على زووءه للباشا :zzz

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)