كبة اليقطين


         وصفة : منى                 2008/12/01                 18 تعليقات
كبة اليقطين


عجينة الكبة :

3 كوب و نصف يقطين مقطع لمكعبات صغيرة
2 كوب و نصف برغل ناعم أبيض
بصلة وسط
ملح و رشة بهار و رشة قرفة
ملعقة صغيرة نعناع ناشف
نصف رغيف خبز مقطع

الحشوة :

3 ملعقة كبيرة زيت زيتون
بصلة وسط مفروم ناعماً
2 فص ثوم
2 كوب سلق مسلوق
كوب حمص حب مسلوق
نصف ملعقة صغيرة سماق ( أو أكتر حسب الرغبة )
نصف ملعقة فليلفة حمراء ناعمة
حبة كبيرة ليمون
رشة ملح
نصف كوب بقدونس مفروم
ربع كوب صنوبر محمص أو جوز مجروش
2 – 3 ملعقة كبيرة فرط رمان ( اختياري )





الحشوة :

• يفرم السلق و يغسل و يسلق ثم يترك حتى يصفى من مائه , تحتاج الوصفة لكوبان من السلق .

• يقلى البصل بالزيت حتى يشقر ثم يضاف السلق و الثوم و يقلب لبضع دقائق .

• يضاف الحمص و عصير الليمون مع الملح و الفليلفة و السماق و يترك على نار هادئة من دون غطاء حتى يمتص كل العصير , تذاق الحشوة للتأكد من الحمض ثم يعدل حسب الرغبة و تبعد عن النار .

• تترك الحشوة حتى تبرد ثم تقلب مع البقدونس و الصنوبر و فرط الرمان .

الكبة :

• ينظف اليقطين و يقشر و يقطع لمكعبات صغيرة ثم يسلق بالماء حتى ينضج لمدة 20 دقيقة تقريباً و يترك حتى يبرد .

• يغسل البرغل عدة مرات ثم يوضع في طبق عميق مع البصلة و الملح و يغمر بالقليل من ماء سلق اليقطين و يترك لمدة ربع ساعة أو حتى تنتفخ حباته و يمتص أغلب الماء .



• يعصر البرغل و اليقطين المسلوق بين أصابع اليد للتخلص من أكبر كمية من الماء ثم يدعك باليد مع بقية البهارات و الخبز العربي .

• يدار البرغل و اليقطين على ماكينة فرم اللحمة مرتان ثم تدعك العجينة حتى الحصول على كبة طرية .

• تقطع عجينة الكبة لكرات ثم تقرص لأقراص بحجم متوسط باستخدام السبابة و كلما كانت العجينة أرق كلما أصبحت الكبة مقرمشة أكتر . تحشى الأقراص بحشوة السلق و الحمص .

• تقلى الكبة على نار عالية حتى تشقر بمعدل بضع حبات في كل مرة , ترفع على ورق ماص و تقدم ساخنة أو فاترة .

فكرة سريعة :

• يمكن تحضير الوصفة بشكل سهل و سريع بنفس طريقة الكبة بصينية . تمد نصف العجينة في الصينية ثم توزع الحشوة فوقها و تمد طبقة ثانية من العجينة فوقها و تقطع لمعينات ثم تدهن بالسمنة و تخبز في الفرن حتى تنضج .

• يمكن استبدال السلق في الحشوة بالسبانخ و يمكن استبدال عصير الليمون بدبس الرمان . و ممكن استبدال البقدونس بالكزبرة الخضراء .
  • وصفات تانية ممكن تعجبك


التعليقات

  1. souha 1 December 2008

    ريتن يسلمو هالديات :) شي بيشهي عالتجريب القريب إنشاء الله بس لحدا يحن علي و يجبلي يقطينة :roll
    بدي إسألكم منونة اليقطين بعد السلق ما بتعصري لأنو بيشرب مي كتير بخاف إذا ما عصرتو ينزعلي الوصفة :?

  2. منى 1 December 2008

    هلا سهى :)
    بعصره هو و البرغل مع بعض لحتى ما يبقى فيهن مي زيادة , اكيد لان هو متل السفنجة بتحسيه بيصير مجقجق ميات :grin

  3. ام نور 1 December 2008

    يا سلام يعني اسا الكبة بتنعمل من اليقطين :) شو هاليقطين هاد رهيب حرام يكون عالهامش ولازم كل العالم تاكل منو ويعطوا اهميتو وشو هاي كبة الرز منى رح تنزليا عن قريب مهاك :?

  4. منى 1 December 2008

    اي و الله ام نور :)
    انا الصراحة ما كنت حب اليقطين ابدا , لحتى اهلي ما بقى يطبخوا منه , بس هلا بعد ما عرفت فائدته صرت اكله و عم فتش دوما على وصفات جديدة لحضر اليقطين منها

    هي كبة الرز وصفة كانت طالبتها مني سلاف و هي من ايمتى مجهزتها بس ما عم يصحلي نزلها , ان شاء الله رح حاول خلص كل هل الوصفات الي عندي و نزلهم قبل العيد :)

  5. منامينو 1 December 2008

    وااوو :eek شكلها حلو وحشوتها غريبة :roll . تركيبة جديدة يعني. صار عندي فضول أجربها :roll قريبا ان شاء الله..

    تسلم هالأنامل المبدعة وهالأفكار الحلوة وصاحبتها يا رب :zzz

  6. Eman 2 December 2008

    ما بعرف .. قلبي ما ارتاح للوصفة ،بمكن لأنها غريبة علي .. ، و بخاف إذا غيرت على شي تاني ما نحبها ..يا ستي ومنكم نستفيد .. ويسلمو على هالابتكار أو التجديد للوصفة

  7. سلاف 2 December 2008

    امممممممم شيئ بشهي يامنى
    يسلم ايديكي انا كنت بدي اسألك شغله السلق والسبانخ ليش بتسلقيهن ياترى؟؟ أنا بالعاده بغسلهن وبحطهن فوق البصله والزيت فورا بدون سلق ثواني وبيدبلوو،، ليكون السبانخ والسلق هون غير سوريا؟؟ نحن الورق كتير صغير وبعدين انا بعرف انه اذا انسلق راحت فائدته كلها بالمي تبعت السلق منشان هيك مابسلقه وهو فورا بيستوى خلال ثواني لشو السلق ؟؟؟
    :eek
    ناطره جيب اليقطينه تبعت المربى يبقى بجرب هالكبه روح قلبي السبانخ والسلق
    هون بساوو كبة الدجاج وبيحشوها دجاج كمان طيبه تغير شكل عن اللحمه وحماتي بتساوي كبة السمك كمان طيبه وخفيفه اممممممممم شهتينا عالكبه ولساتي ناطره كبة الأرز والمربى
    يسلم ايدكي منى :) :zzz

  8. الدمشقية 2 December 2008

    الله يسلم ايدك حبيبتي منى ;) بس بصراحة نحن ماما لما بتعمل كبة اليقطين بتحشيها مثل حشوة الكبة العادية وممكن تساوي منها كبة مشوية بس نحن بالبيت ما نشويها عالفحم بنرجع وبنقليها بس الحشوة طبعاً بتكون غير ;) وممكن ماما تستبدل اليقطين بالبطاطاالمسلوقة

  9. أم الهدى 2 December 2008

    يا سلام شكلها بشهي ومعهم حق ولادك يتسابقو عليها
    ان شاء الله رح جربها قريبا،بس حبيبتي منى آسفة لأنو عم نق عليك بس شو صار بوصفة البروكلي لأنو بلش يتغير لونه يلي عندي لا تواخذيني عم نق عليك بس عنجد مالي ثقة غير بذوقك الحلو

  10. منى 2 December 2008

    هلا منامينو :)
    كلامك مظبوط , هي ما بتيه الكبة العادية الا بمنظرها
    و ممكن تحشي القلب باللحمة و المكسرات كمان بتطلع طيبة ;)
    ان شاء الله تجربيها و تعجبك و مية هلا حبيبتي

  11. منى 2 December 2008

    هلا امولة :)
    يا ستي القلب و ما يحب :grin , و على فكرة هي مو وصفتي
    هي وصفة لبنانية قديمة كتير بس نحنا ما نعرفها :zzz
    مية هلا أأختي ;)

  12. منى 2 December 2008

    هلا سلوفة :)
    يمكن معك حق , هنن ما بياخدوا وقت بس انا هيك اتعودت حضرهم من امي و ستي , و كلامك مزبوط ان الفوائد كلها بتروح
    طيب المرة التانية رح جهزهم من دون سلق ;)
    اليوم جبت اليقطينة و ان شاء الله بكرة أو يوم الخميس رح اشتغل فيها انا و حماتي الله يخليلي ياها و بعدها فورا على الوصفات , اذا الله راد الجمعة او السبت بنزل الوصفة ;)

  13. منى 2 December 2008

    هلا دمشقية :)
    اكيد الطريقة الي بتعملها ماماتك تناسبنا أكتر و بتطلع يممي ;)
    الوصفة الي منزلتها انا تناسب النباتين أو الي ما فيهن ياكلوا لحمة .

    ممم عجبتني فكرة البطاطا , الله يخليلك الماما و اخواتك و يديم عليكم النعم يا حق ;)

  14. منى 2 December 2008

    هلا ام الهدى :)
    مشان الله لا تواخديني و الله معك حق حبيبتي كنت واعدتك بالوصفات صار الي فترة , بس هلا ما بقى في حضرها و نزلها قبل العيد :roll انا كنت فاكرة عم تسالي عن وصفة مو لحتى تحضري فيهم بروكولياتك .دخيلك لا تأخذيني و ان شاء الله ببقى بعوضها الك مرة تانية ;)

  15. أم الهدى 2 December 2008

    ولا يهمك حبيبتي ، لابقى تعتذري والله خجلتيني ان شاء الله تسلميلي يا رب ، بس بصراحة وكلمة حق إنو موقعك غير شكل والله جد وشدني لإلو من بين كل المواقع يلي كنت زورها عدة أمور
    أولها إنك سورية وخاصة حلبية يعني ذوقك في الأكل قريب من ذوقنا ولما بتقولي على وصفة غريبة عنا إنها طيبة وقريبة لذوقنا بثق فيك ( مع احترامي طبعا لكل الأذواق وكل البلدان بس سبحان الله كل بلد وإلها طابعها الخاص والأكل تعويد)
    والسبب التاني إنك مزوقة كتير بتجاوبي على كل استفسار عنا إياه وما بتتأخري مو متل غير مواقع الطاسة ضايعة ومافي مين يجاوبك على بعض اسئلتك
    والسبب التالت إنو وصفاتك مجبرة وطيبة ( طبعا بعد ماجربت نسبة كبيرة منها )
    فالله يجزيك الخير فعلا ويخليك لأهلك وعيلتك

  16. منى 2 December 2008

    هادا بس من زووءك يا قمر :)
    الف شكر الك لكل الكلام الطيب الي قلتيه و ربي يديم المحبة و الخير دايما
    ان شاء الله الك متل هل الدعوات و اغلى أختي و منورة دايما
    :zzz

  17. muna.g.7 13 December 2008

    كبة روعه صحيه ولذيذة يعملونها في لبنان بالخضار او بالحمة مع الجوز ودبس الرمان ومعجون الفليفلة تسلمين اختي منى على تنوعك بالوصفات والدقة بالمقادير

  18. منى 13 December 2008

    هلا منونة :)
    الشكر ليك لتواجدك الطيب دوما حبيبتي , ان شاء الله تجربيها و تحبيها ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)