براونيز بكريما الخمس دقايق السرية
هي من أطيب انواع الكبة عندي , الحامض و الحلو في طبق واحد فيه فن و ابداع و ابتكار و مغامرة , متل ما قال أرام , هي جوهرة التاج في المطبخ الحلبي … بدنا كتير لحتى نقدر نبتكر اكلة بنفس اصالة هل الوصفة …
دائما هل الكبة حاضرة باول ايام العيد الصغير و الكبير مع الكبة الدراويش و الكبة الصينية , ريحتها من ريحة ذكريات العيد و اخوالي عم يفيقونا الساعة 5 الصبح انو قوموا من النوم احسن ما تطير بركة العيد , تكبيرات العيد , و ماما معلقة على السفرجلية من الصبح لحتى اللحمة تاخد راحتها و تستوي على نار , بوقتها , و لما كنت صغيرة كنت استغرب من الناس الي بتقول انهم ما بيقدروا يفطروا الا على بسكويتة أو قطعة كاتو , انا كنت بقدر افطر على سفرجلية , او بالاحرى دوما كنت بفطر على سفرجلية لما بتكون ماما محضرتها …و هادا سر صغير ما حدى بيعرفه عني .. الا انتو 
بالعادة بيكون شكل الكبة غير هيك , بس من فترة شفت خالة زكية شبارق محضرة كبة سفرجلية و كانت عاملة الكبة على شكل كرات , كتير حبيت شكلها و لطشت الفكرة من عندها..
بالصحة و الهنا
1 كيلو لحم خاروف , يفضل أن يكون جزء منها مع العظم
1 كوب عصير رمان حامض , أو أكثر حسب الحاجة
ملعقة كبيرة نعناع
5 فص ثوم , مهروس
4 – 6 ملعقة كبيرة معجون بندورة
2 كيلو سفرجل , حوالي 4 حبات
ملعقة كبيرة سكر
أقراص كبة مجهزة , مقداريين
• توضع اللحمة في قدر كبير و تغمر بالماء و صلصة البندورة و عصير الرمان و الثوم و النعناع , توضع على نار قوية حتى تغلي , تهدى النار ويغطى القدر و يترك حتى تقارب اللحمة النضج .
• في هذه الأثناء يغسل السفرجل جيداً , يقطع لأرباع و يتم التخلص من البذور ثم يقطع لمكعبات , لا يقشر . يضاف السفرجل و الملح و السكر للقدر و تترك السفرجلية على نار هادئة حتى تنضج حبات السفرجل لمدة نصف ساعة تقريباً .
• تذاق السفرجلية و تعدل النكهات و يضاف المزيد من عصير الرمان أو السكر أو معجون البندورة حسب الرغبة .
• تضاف أقراص الكبة المجهزة بلطف على السفرجلية و تترك لمدة عشر دقائق حتى تنضج . يبعد القدر عن النار و تسكب السفرجلية بلطف في طبق عميق و تقدم فوراً مع الفليفلة الحرة و الفجل .
• يمكن سلق أقراص الكبة بماء مملح مغلي و تقدم جانب السفرجلية في طبق مستقل . و يمكن أن تقدم السفرجلية مع الكبة المقلية أو الكبة بالصينية عوضاً عن أقراص الكبة .
-
وصفات تانية ممكن تعجبك
ماني دايقتها بحياتي
بس يمكن طعمتها قريبة ع ابو بسطي
وبما انو انت عاملتيها فاكيد شغلة
لا رشوش غير شي و غير طعمة و ما بتقربلها و لا بشي :zzz
يا ريت فيني دوقك ياها , كتير طيبة
يسلم إيديك أخت منى .. وصفة استثنائية بتستحقي عليها شهادة دكتوراه مع مرتبة الشرف في فن الطبخ الأصيل .. الكبة السفرجلية جوهرة التاج في المطبخ الحلبي.
بعدين لازم تفتخري بذكريات طفولتك مع السفرجلية بدل ما تخليها سر .. لأن لولا هيك طفولة ما وصلتي لهيك مرحلة من الذوق والفن والإبداع المطبخي
ممم مممم مممممممم
الله وكيلك انا من جماعة البسكوتة بالصبح وما بحسن اتخيل شلون بيتقبلو ياكلو زفر عند الصبح
بس حاليا عندي استعداد آكل منها اذا صارت قدامي
لأني الصورة بتشهي وشط رويلي مممممم
وخصوصا اني ما بعملها بالكبة لأني لحد الآن ما تشجعت وعملت كبة ولا مرة
مع كل المشجعين والمطالبين
وبعدها شو هرمنا ما هرمنا بزعل منك والله شباب اكتر من مئة صبية
تسلم ايديك على نشر هذه الوصفة الرائعة اللي بتثير فضول كتير عالم لاني نكهتها غريبة عليهن وانا برأيي مميزة كتير
الله يعطيك العافية ويحميك ويقويك
وشكرا الك كتير
الله الله على حلب وطبخات حلب وعيد حلب اللي ما في احلى منو بالدنيا واسالي مجرب تغرب وماعاد حس لا بعيد ولا بطعمة العيد خيتو بحلب غير غير انا من زمان اول ما جيت لهون عالسعودية وكنت عروس (يا حسرة ههه) راحت علينا الان هههه المهم استغربت مالك منزلة السفرجلية ملكة اكلات العيد بموقعك وكنت بدي اطبخها هون طبعا رجعت للتليفون وللماما الله يخليلي ياها ونسفنا الفاتورة والشحن على طبخة سفرجلية بس محرزة تروحي لها الشحنات المهم متل طريقتك بالضبط واش طلعت اكلة مرتبة يا ميمو مع انو اول مرة لسع بطبخ هيك اكلات الله يسلم هالايدين والله طبقك خطر لي احطو خلفية للشاشة عندي قد ما بيشهي القلب وبعدين اذا الوحدة بالثلاثينات اجمل سن بالمراة عم تقول هرمنا فبالستينات شو بتعمل الله يسامحك بعدنا شباب والله يديم الصحة والعافية عالكل
هلا ارام ,
حبيت كتير تعبير جوهرة التاج , و كتير صح لان في كتير وصفات مشتركة بين المطبخ الحلبي و بقية بلاد الشام , صح نحنا منعملها بغير طريقة , بس بالاجمال الفكرة نفسها … ما عدا هل الوصفة , ما في منها الا هون ..
من زوءك ارام , شهادة من زواق , اعتز فيها
هلا ام نبيل
انا كمان هيك صرت , للأسف , هلا صار كل شي محسوب …
بجد الكبة همها اكبر منها , هو صح بدها شغل , بس متلها متل غيرها , و بس ما كسرتي الحاجز اول مرة رح تصير شغلى عادية …
اضافة صغيرة , انو يا سلااام على الكبة من تحت ديات ماماتك , جد أطيب كبة اكلتها عندكم .. بقى الي عنده هيك معلمة ما لازم يضيع الفرصة و لازم يتعلمها على اصولها من ست الحبايب
رح استنى اخبار طيبة منك ان شاء الله
هلا غيوثة
الغربة صعبة , بس الاصعب واحد يكون متغرب و هو بين أهله و ناسه و بنص مدينته … كمان اسألي مجرب .
ازرعيها بدقني فاتورة الموبايل و ان شاء الله ما في طبخة رح تنقص بس شوي شوي
بعدها مين قالك بالتلاتينات , هلا صح انا أعلاتي كبار بكل شي , بس عند قصة العمر ما بينحكى معي , انا لساتي باول العشرينات , ما بتزحزح يوم , و ايا كلام تاني فهو مجرد اشاعات مغرضة من الحساد و العزال :grin
صحتين و الف هنا على السفرجلية , تعيشي و تحضري لعيلتك و الله يديم العافية في القلب و البدن على الكل
اهلا غيث
صحة وهنا على قلبك انا متلك من عشاق السفرجلية
بس حسبت حساب الفواتير واخذت الطريقة من ماما قبل ما اجي عالسعودية
انا بالرياض
يا ترى انت بأي مدينة اذا ما في احراج
حبيت اتعرف عليك بنت بلدي ومدينتي مشاركتيني الغربة
اهلا ام نبيل الله يسلمك وصحة وهنا على قلبك ان شاء الله والله انا كمان بالرياض بمنطقة عليشة بشرفني اتعرف عليك منى الغالية عندي اكلة كاتو الشوكولا بصوص المايونيز ما عبتفتح الصفحة شو القصة من عندي ولا من عندكم السبب مع الشكر
عن جد اجرام بحق الانسانية مافي كلام هههههههه يااختي راعوا شعور انه بركدن الواحد فتح الموقع بالليل وشاف عالشوفة ومافي بالبراد الا كم قرص عجة بايتة هههههههه ….الله يديمها معمة علينا ويحفظها من الزوال …
ياستي انا من جماعة البسكوتة الصبح وعالعشا مابقدر اكل هالاكلات …بس بتذكر مرة قرايبة بابا وهي شرواكي بالخير نفسها بياخد العقل عهالاكلات …رحنا لعندها عأساس زيارة ولا بتطلع عاملة محشي ببرغل وسفرجلية ..ومتل هالصحن الي ساكبتيه فوق لكل شخص …يعني مالها ساكبة طبق رئيسي والعالم بيسكبوا ….لاااا كل صحن لحمتو مع سفرجلاتو وكباته يعني مافي مهروب نهائيا …بتذكر بيومها اكلت هالاكلة ورحت عالنوم بس بليلتها حسيت انه قربت نهايتي وبلشت تطلع روحي ومن وقتها الكعك والجبنة اصدقائي عالعشا
يسلم دياتك ابدعتي بتقديمك لهالسيمفونية لانه فعلا فيها تناغم من كل النكهات …الله يديم علينا الطبخ الحلبي واللقمة الطيبة وبلا صيني وبلا هندي المطبخ الحلبي وبعدو لايبقا اكل هههههههه
غيوثة ما في مشكلة من عندك , المشكلة من عندي بعد ما حطيت الصورة على الصفحة الرئيسية ما قدرت كمل الوصفة , هلا بنزلها ان شاء الله ..
ام نبيل أخت رفقاتي و من عضام الرقبة
هلا رنونة:)
يووووهشو هل الموقف المحرج , بكل الاحوال لو كنت مكانك ماكنت اكلتها , انو ما بقدر اكل هيك شي على العشا , قلنا هرمنا :grin
خليلي عينك رنوش , بعد زمان لو اعرف انو السفرجلية رح ترجعك للموقع كنت طبختها من زمااان
والله يامنى مالي غنى عن الموقع نهائي …ودوما بدخل عليه بس تلصص ههههههه لانه غالبا بكون مو كاتبة كلمة السر …وفي شغلة تانية …انه انا والموقع صرنا عشرة عمر ,,,يعني وصفاتو انحفرت بقلبي وعقلي وماعاد كل مرة اضط{ ارجع للمقادير …بس مابستغني بالمرة
اهلا غيث
اولا ما تواخذيني اتأخرت بالرد لعطل فني :p بالانترنت طبعا
والله فرحتيني وان شاء الله لازم انشوف طريقة نتعرف فيها ونتواصل
وتسلمي كتيير يامنى عنجد كتير عبتخجليني والله من زوقك ولطفك
وعنجد منيح انك اتكاسلتي اتنزلي الوصفة هيك عملتيلها دعاية وصار الكل يترقب نزولها على الأسواق :grin
وبالنسبة للكبة انا حاطة الفكرة ببالي من كم شهر وعم نسعى بالموضوع
بس عملتها بقلك على النتيجة ان شاء الله
يسلموا كتير السفرجليه لا يعلى عليها