كبة نية


         وصفة : منى                 2007/08/26                 16 تعليقات
كبة نية

·          يغسل البرغل جيداً ثم ينقع في الماء البارد لمدة ربع أو نصف ساعة ثم يصفى جيداً .

·          يفرم البرغل مع البصلة و دبس الفليلفة و البهارات و الحبق و المردقوش في حال استعمالهما في ماكينة فرم اللحمة على الشفرات المتوسطة الحجم ثلاث مرات .

·          يدعك البرغل المفروم مع الهبرة حتى تتجانس الكبة ثم تمد على طبق مسطح و يمسد وجع الكبة باليد المبللة بالماء .

·          تستخدم السكينة أو الشوكة أو إبهام اليد لإعطاء شكل جميل لوجه الكبة حسب الذوق و التفنن ثم تزين بأوراق النعناع و أو البقدونس يسكب زيت الزيتون عليها و تنثر المكسرات ثم تقدم فوراً .  




نصف كيلو من لحمة الغنم الهبرة المدقوقة خصوصاً للكبة
كوب و نصف من البرغل الناعم
2 – 3 ملعقة كبيرة دبس فليلفة أو معجون الفلفل
رشة بهار
ملعقة صغيرة فليلفة حمراء ناعمة
بضع أوراق حبق و مردقوش طازج أو رشة من الحبق و المردقوش المجفف ( اختياري )

للتزيين :

زيت زيتون
بضع أوراق من النعناع الطازج أو البقدونس المفروم
جوز مكسر أو صنوبر ( اختياري )





• يغسل البرغل جيداً ثم ينقع في الماء البارد لمدة ربع أو نصف ساعة ثم يصفى جيداً .

• يفرم البرغل مع البصلة و دبس الفليلفة و البهارات و الحبق و المردقوش في حال استعمالهما في ماكينة فرم اللحمة على الشفرات المتوسطة الحجم ثلاث مرات .

• يدعك البرغل المفروم مع الهبرة حتى تتجانس الكبة ثم تمد على طبق مسطح و يمسد وجع الكبة باليد المبللة بالماء .

• تستخدم السكينة أو الشوكة أو إبهام اليد لإعطاء شكل جميل لوجه الكبة حسب الذوق و التفنن ثم تزين بأوراق النعناع و أو البقدونس يسكب زيت الزيتون عليها و تنثر المكسرات ثم تقدم فوراً .
  • وصفات تانية ممكن تعجبك


التعليقات

  1. linda 26 August 2007

    سمعانة بيلي بتشط ريالتو
    هيك انتي عم تعملي فيني

    اطيب اكلة عندي بس انحرمت منها من لما سافرت لانو عنا ما في لحمة تازة مدبوحة بنفس اليوم
    لان بيدبحو اللحمة الحلال بمكان معين وبعدين السيارات بتوزع للمحلات كل اسبوع مرتين او مرة

    جوزي بيحبا بس ما بيعرف شو فيها ههههههههههههههه
    لانو لو عرف عم ياكول لحمة مو مطبوخة بيعملي عرس غير شكل عن الامراض

    الله يسلم هل الادين يا رب :zzz

  2. منى 26 August 2007

    الله يسلمك ليندا :)

    معقولة ما بيعرف شوفيها :grin
    شوفي فيك تعمليها من دون لحمة , لان في كتير ناس ما بيحبوا يحطوا معها لحمة نية ,
    هلا بتطلع كمان طيبة كتير , بس أنا بحبها هيك أكتر ;)

    و رح نزلك الطريقة إذا بتحبي قبل رمضان إذا الله راد

  3. linda 27 August 2007

    ما بيعرف شو فيها لانو جوزي مو عربي و لا مرة شاف كيف بتنعمل لما كانو يحطوها بالمطعم مع المقبلات كان ياكول

    ايدي بزنارك علميني كيف بتنعمل بدون لحمة
    بس كيف بتصير طعمتها
    و كمان ما عندي مردكوش يالله

    بتعرفي
    كانت جارتي لبنانية تطحن البرغل و بهارات الكبة و تحطون بالصحن و تحط اللحم جنبون و ياكلو هيك

    الا أليلي عندك ولاد
    :roll
    طلعنا برات الموضوع

  4. منى 27 August 2007

    مممممممم

    بئى جوزك مو عربي :)

    ان شاء الله تتهنوا ببعض يا رب و يوفقكم و يخليكم

    تكرم عيونك التنتين الوصفة رح نزلها الك قريب
    بتطلع طيبة كتير و الصراحة أهلي كلهم ما بياكلوها الا من دون لحمة , بس أنا بحبها على أصولها ;)

    و إذا مو عندك المردكوش مو ضروري تحطيه

    الحمد لله نشكر الله عندي بنتين و صبيين الله يباركلي فيهم يا رب و أشوف منهم الخير الكتير :)

    و انت ؟
    عندك أولاد و الا لسا عروسة جديدة :)

  5. linda 27 August 2007

    الله يبشرك بالخير ازا بتطلع الكبة النية طيبة بدون لحمة وبدون مردكوش
    عم استنى الطريقة لا تطولي عليي الله يجزيكي الجنة

    انا عروس ايه بس قديمة :roll
    عندي ولد و بنت (جبريل وشام )

    الله يخلي ولادك و يرزقك برهم و يجعلهن من الصالحين

    عندي اسئلة عن الاكل ما بعرف ازا فيكي تساعديني
    بدي كيف ساوي الكبة يلي بالصينية بالفرن و كيف ساوي كبة مقلية وحطا بالفريزا
    وبيسوى حط يلانجي بالفريزا و لا بيخرب

    معلش اتحمليني بس والله شجعتيني بشطارتك اني اسألك
    و مشان دبس الفليفلة بس حط الفليفلة برا بالشمس باليل فوتون لجوا ولا خليهون برا

    و بارك الله فيك و جزاك الجنة

  6. منى 27 August 2007

    الله يباركلك في جبريل و شام يا رب و يكونوا من المسعدين في الدنيا و الأخرة :)

    ايه مو تكرم هل العينتان الحلوة ..

    نجي للأسئلة واحد واحد

    الكبة بالصينية و الكبة المقلية رح حط الوصفات خلال اسبوع إذا الله ;)

    هلا الكبة النية إلي من دون هبرة : بتنقعي البرغل حوالي 4 كاسات بالمي الباردة و بعدها بتصفيهم منيح و بتديريهم مع البصلة و الدبس فليلفة و البهارات على ماكينة فرم اللحمة شي 3 أو 4 مرات و فيك تديري معاهم حبة صغيرة بطاطا مسلوقة ..

    بعدها بتدعكيهم كتير كتير منيح و بتحطي زيت زيتون تقريباً نصف كوب و بتدعكي و إذا لزمك مي كمان بتحطي شوي و بالأخير بتقطعي جوز مكسر و بتخلطي شوي مع الكبة و شوي على الوجه و بس , ,
    عن جد طيبة كتير و أهلي دايما بيساووها

    اليالنجي فيك طبعا تحطيه بالفريزر و هي من الأشيا الي بجهزها قبل رمضان , بعد ما بتلفي اليالنجي بترتبيه في أكياس بالكمية الي بتناسبك و بتحطيه في الفريزر , و لما تجي تطبخيه بتطالعيه و بتخلي التلح يا دوب يفك عنه , من دون ما يدوب كله تمام , و بترتبيه بالطنجرة و هو لسافيه تلج و بتطبخيه عادي :) ..

    إذا تركتي التلج يدوب عنه بشكل كامل رح يفرط معك

    هلا دبس الفليلفة اتركيه في الشمس طول الوقت لحتى يصير جاهز , بس اذا ممكن ينزل عندك مطر فلازم تدخليه لأن إذا اجاه مي بيخرب .. نحنا عندنا ما في داعي لان شمسنا منيحة الحمد لله 8)

    و أي سؤال تاني أنا تحت أمرك ليندا :)

  7. بدور 28 August 2007

    ايه شو هالأحاديث والنصايح والدعوات الحلوة؟ :)
    الله يخليلكون ولادكون وكل أهلكون ويهنيكون فيون ويعطيكون مراد ألبكون يااااااااا رب وعفوا عالتدخل والحشرية بس والله حبيت أدعيلكون من كل ألبي :roll
    أنا مبارح أكلت كبة نية بس مو مزينة متل لمسات ميمو الحلوين الله يسلم هالإيدين :p

  8. منى 28 August 2007

    هلا بدورة :)

    كلك زووء و كلامك حلو و متل العسل ..

    و مية أهلا و سهلا و يا ريت كل الحشريين متلك 8)

  9. linda 29 August 2007

    شكر كتير منى
    اخر سؤال معلش انا فاشلة بالمطبخ
    لما انقع برغل الكبة أديش خليه بالمي لانو بينفش و بيغب كل المي الموجودة
    حابة ساوي هل الاكلة برمضان و تزبط معي جاينا ناس و الكل بيحب الاكل السوري واللبناني
    مشان ما يسود وجهي أدام الجماعة

    بدور الله يخليكي ويسلمك و شكرا عل الدعوة الحلوة
    جزاك الله خير

  10. linda 30 August 2007

    والله ما بعرف شو المشكلة يا منى

    انا ما عندي كي بورد عربي
    بكتب على صفحة من النت و بنسخها و بحطا هون

    عم قول لحالي ليش صار في ردين بعتون و ما طلعو :sigh

  11. منى 30 August 2007

    ممم

    صعبة كتير الكتابة بهل الطريقة :roll

    بالفعل في رديين وصلوا بالسنسكريتي :grin

    سعيدة كتير بوجودك :)

  12. منى 30 August 2007

    هلا ليندا :)

    أختي اغمريه بالمي الباردة و اتركيه شي ربع أو نصف ساعة و بعدها خليه يصفى تمام قبل ما تفرميه ;)

    ان شاء الله رح تضبط معاك و تبيض وجهك :)

    ليندا ردودك عم تجي أحيانا بأحرف مو عربية :roll
    متل ردك على الكبة بصينية !!
    شو القصة

  13. Eman 6 December 2007

    ناوية شي كم يومأعمل كبة نية لأني متوحمة عليها.

    عندي كم سؤال،إذا بدي حط قرون فليلة،كم قرن أحط؟ومو هدول بكونوا حدين كتير؟ شو اللي بيخلي الكبة يصير لونها على أحمر؟ وما بيلزمها معجون طماطم؟ بسمع إنو بيقلو البصلة وبيفرموها مع الكبة مشان تعطي طعمة زكية للكبة،شو رأيك؟

    آسفة وجعتلك راسك بأسئلتي.

    يسلمو حبيبتي .

  14. منى 8 December 2007

    هلا ايمان :)

    قرون الفليلفة مو شرط يكونوا حدين , حسب فليلفتك

    و هم الي رح يعطوا هل اللون الحلو للكبة ..و الكبة النية ما بيلزمها معجون طماطم أبدا , في ناس بيحطوا , بس انا بحسها بتغغير الطعمة ..

    الكمية حسب ما بتحبي لونها , تقريبا أربع أو خمس قرون كامليين و كمان على النظر

    البصلة بيحطوها للكبة بزيت يلي من دون هبرة , و أنا رح نزل وصفتها قريب لان في كتي أخوات سألوني عليها 8)

    الله يسلمك يا قمر و الله يقومك بالسلامة انت و البي بي يا رب

  15. razan83m 10 August 2010

    السلام عليكم
    انا بعملها بدون هبرة بتطلع مااشبا شي بس حاسة انو في اطيب من هيكبانتظار الطريقة ؟؟

    شكرا كتير

  16. منى 10 August 2010

    صارت الطريقة في الموقع و طريقتين عواض الواحدة :)

    ان شاء الله تجربي واحدة منهم و تكون يمممم

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)