كيفية تحضير اللبن


         وصفة : منى                 2008/02/26                 24 تعليقات
كيفية تحضير اللبن

تحضير اللبن بالبيت شغلة مو صعبة , و بالنسبة الي شفت فيها متعة , خصوصي لما تفتحي الوعا و تشوفي الحليب اتختر و سمك و صار لبن , شي متل السحر .
اللبن رح يطلع شوي امرق من لبن الجاهز لان بالعادة الحليب الي منشتريه بيكون مغشوش , بس ممكن نحل هل القصة بتنشيف اللبن شوي بعد ما يجهز .
ممكن تتحضر الوصفة بالحليب الجاف أما الحليب المبستر فما بيزبط معنا لان الخماير الي حتساعد الحليب يتحول للبن بتكون كلها عطتك عمرها بعملية البسترة
بالصحة و الهنا

شو لازمنا ؟
ليتر حليب كامل الدسم طازج
2 - 3 ملعقة كبيرة لبن
طريقة التحضير

1 - يغلى الحليب في قدر لمدة خمس دقائق ثم يترك ليبرد حتى يصبح بالإمكان ادخال اصبع اليد فيه و تحملها لمدة عشر ثواني أي أن تكون ساخنة من دون أن تحرق اصبعك .

2 - يذوب اللبن بالقليل الحليب الساخن ثم يضاف لباقي الحليب بلطف , لا يحرك الحليب . يغطى وعاء الحليب بشكل جيد .

3 - يلف الوعاء بحرام صوفي سميك و يوضع في مكان معتدل الحرارة لإتمام عملية التخمير و يترك لمدة ست إلى ثمان ساعات , يراعى أن لا يحرك الوعاء الذي يحفظ فيه اللبن في هذه المرحلة أو أن يفتح عليه الغطاء و الحرام , و هذا الوقت يقل في فصل الصيف حيث تكفي أربع ساعات لتخمير الحليب و تحويله للبن .

4 - أصبح اللبن جاهزاً بعد ذلك يوضع في البراد حتى يبرد تماماً قبل استعماله , و يستعمل حسب الرغبة أو يمكن تحضير كرات اللبنة منه .


فكرة مفيدة :

أخر مرة حضرت اللبن خمرته في وعاء بلاستيكي ( tupperware ) لسهولة لفه و إحكام إغلاقه .


  • وصفات تانية ممكن تعجبك


التعليقات

  1. تورتاية بالكريز 28 February 2008

    روعة الوصفة والاروع تفاصيلها عمري مجربتها بس نفسي اجربها لاني نفسي اعمل لبنة بيتية كمان لو بتعرفيها اخت منى ياريت تنزليها الله يرضى عليك وجزاك الله كل الخير يارب

  2. منى 29 February 2008

    هلا ام ياسمين , جربيا و حتشوفي بنفسك قديه سهلة :)

    أما وصفة اللبنة بتشوفيها[URL=http://www.l2ma.com/content/view/87/2/]على هل الرابط[/URL], بس الفرق انك ما تخلي اللبن ينشف كتير كتير ;)

  3. linda 1 March 2008

    جوعتوني موت شفت وصفة اللبنة كمان يا سلام على اكلاتنا ما اطيبها
    بدي اعملها خلص صممت لا تحاولو تقنعوني

    بتعرفي منى و انا صغيرة امي كانت على طول تعمل اللبن بالبيت و تبعتني مرات اشتري ((روبة)) يعني شوية اللبن يلي منحطون فوق الحليب

    صقالله هديك الايام

    هلئ ازا بدي ضيف وصفة مع الصور كيف اعمل

  4. منى 2 March 2008

    هلا ليندا :) ان شاء الله صحة و هنا على قلبك و قلوب الحلويين الصغار مقدما , يا اختي شو نقنعك ما نقنعك .. انت كلمتك واااحدة :grin

    ليندا يا عسل ازا بدك تضيفي وصفة بتبعتيها برد عادي و الصور لازم تحمليهم على شي موقع تحميل و كمان بتبعتيهم مع الوصفة ;)

    الله يعطيك مية عافية و ألف صحة لولو و انا عم استنى طباخاتك ;)

  5. haya 1 December 2008

    مرحبا يا اخت منى والله معك حق انو ستات البيوت عم يستسهلوا شراء اللبن الجاهز انا بعمله مثلك ونفس الطريقة وتسلم دياتك على يارب

  6. منى 1 December 2008

    هلا هيا :)
    هو احيانا الواحد بيشتريه , بس مع ذلك تجهيزه بالبيت أمتع , بالنسبة الي ;)
    الله يسلمك أختي و نورتي الوصفة

  7. هدوء أنثى 27 January 2009

    :zzz مشكورة أخت منى وززكرتيني بالماما نفس طريقتها :zzz

  8. منى 27 January 2009

    هلا يا اختي نورتي و نور الموقع فيك و بتواجدك , ربي يخليلك الماما بصحة و عافية و على قلب واحد ;)

  9. soma 17 February 2009

    السلام عليكم
    أنا كل يوم عم حاول جرب وصفة و عنجد و لا وصفة بتخيب كلهم عم ينجحوا
    مبارح ساويت لبن بالحليب البودرة و نجح كتير و بعدين صفيته و ساويته لبنة المهم انه عجب جوزي كتير يسلموااديكي على هالوصفات الرائعة

  10. منى 18 February 2009

    هلا سوما :)

    الف هنا و عافية يا رب على قلبك و قلب زوجك , كتيررر انبسطت ان الوصفة نجحت معك و عجبتك

    و ان شاء الله كمان بقية الوصفات تكون على زووءك :zzz

  11. JoJo 9 June 2009

    ماشاء الله وصفة رائعة كثير وانا باحبه للبن كثير ان شاء الله هاجربها في اقرب وقت :)

  12. منى 10 June 2009

    ان شاء الله جوجو تجربيها وتعجبك و بانتظار رايك ;)

  13. shoq7 23 July 2009

    يسلمواناملك غاليتي منى

    وصفاتك جدا رائعه وسهلة

    واتمنى ان تقبلوني اخت لكم في هذا الموقع الرائع

  14. منى 23 July 2009

    الله يسلمك يا شوق , ترحيب خاص فيك و كبير , نور الموقع فيك و اتمنى تجربي شي وصفة و تكون على زووءك ;)

  15. eman tiseer 30 June 2010

    مرحبا كيفك مني انا سجلت جديد هون هلأ لسة بس بدي ائلك انا عملت اللبن وخليتو 5 ساعات بس ضل سائل ما جمد وريحتو مش ريحة لبن ريحة حليب عادي

  16. منى 1 July 2010

    هلا فيك اختي بالموقع , نورتي و شرفتي :)

    أتوقع أن درجة حرارةالحليب ما كانت مناسبة لان ما صار لبن , ممكن يكون الحليب بارد زيادة او ساخن زيادة لهيك اما ما اشتغلت الخميرة او بطلت من السخونة .

    شو صار معك ؟

  17. Eman 3 December 2010

    السلام عليكم ورحمة الله وبركاته ، يسلمو إيديك منى على الوصفة
    من كم يوم جربت اللبن بس بطريقة مختلفة شوي ، غليت 4 لتر حليب بعدين تركته ليدفي مثل ما قلت ، وطبقت نفس طريقتك بس أضفت كاسة لبن مروبة بنفس الحليب للأربعة ألتار، وبعدين تركته 24 ساعة بالخزانة (مو كتير دافي المكان) بس اختمر وصار كثيف وبعدين تركته كم ساعة في البراد وصار لبن جامد وطيب ، للأخوات اللي ما جمد معهم ممكن يزيدوا اللبن المضاف للحليب أكتر شوي ويتركوه يختمر أكتر ، بجوز لأن اللبن عنا بقري ومبستر بده وقت أكتر ، بس بغض النظر عن نوعه ، هالطريقة استخدمتها للحليب البقري والمبستر ونجحت.

    في أمان الله

  18. منى 3 December 2010

    شكرا كتير ايمان على الاضافة رح جربها ان شاء الله

    صحتين و عافية على اللبن ;)

  19. نور من قبرص 23 January 2014

    يعطيكي الف عافية على كل شي ,أنا بحضر اللبن نفس طريقتك,بس ليش قلتي مانحرك اللبن مع الحليب انا بحركه ومابياثر عالنتيجة ,شوالسبب من عدم تحريكه احسن يعني

    • منى 24 January 2014

      أهلين نور :)
      الفكرة لحتى يطلع على الوج قشرة سميكة , طبعا اذا حركتيه ما في مشكلة بيزبط , بس ما بيطلع وج للبن متل مو متعوديين

  20. أميرة أميري 23 September 2014

    اتمنى قبول انضمامي وشكراً

    • منى 28 September 2014

      اهلا و سهلا شرفتينا

  21. ام محمد 22 March 2016

    يسعد مساكم انا عندي مشكله كيف اصلح لبن طلع معي سائل جامد خفيف وشكرا

    • منى 26 March 2016

      اهلا وسهلا
      ما فهمت المشكلة والله

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.33 out of 5)