كيكة التيراميسيو


         وصفة : سها قمند                 2011/02/20                 25 تعليقات
كيكة التيراميسيو



5 بيضات بحرارة الغرفة
3 ملاعق كبيرة من الحليب
1 � كوب سكر ناعم
1 � كوب طحين
1 ملعقة صغيرة فانيليا سائلة
2 ملعقة صغيرة بيكن باودر
ذرة ملح
قطرات من الليمون
1 ملعقة صغيرة قهوة سريعة الذوبان + ملعقة كبيرة حليب

( السيروب )

1 فنجان سكر ( فنجان قهوة)
1 فنجان ماء ( فنجان قهوة)
1 ملعقة صغيرة قهوة سريعة الذوبان

( الحشو )

علبة جبنه مسكربوني بوزن 250 غ
� كوب سكر بودرة

(الكريما )

2 كوب كريما فريش أو ( علبة كريما شانتيه مع كوب حليب بارد )
� كوب سكر بودرة

( للتزيين )

أصابع ليدي فينغرز
2 ملعقة كبيرة كاكاو




لعمل الكيكة :

• ينخل الدقيق مرتان و في المرة الثانية يضاف البيكن باودر و الملح .

• افصلي بياض البيض عن الصفار و لاحظي خلو البياض من أية قطرة من الصفار ثم اخفقي البياض مع قطرات الليمون حتى يتكاثف و يملأ الوعاء و عندما تبدأ مضارب الخفق بترك علامات على البياض ( لاحظي الصورة ) ابدئي بإضافة نصف كمية السكر بالتدريج ملعقة ملعقة ( لا نضيف ملعقة سكر إلا بعد أن نتأكد أن الملعقة السابقة ذابت في البياض ) نستمر بالخفق حتى تنتهي نصف كمية السكر و يصبح المزيج لماعاً مثل الكريما .

• بوعاء آخر اخفقي صفار البيض حتى يبهت لونه ثم أضيفي السكر بالتدريج مع الخفق حتى يتضاعف حجم المزيج قد تستغرق العملية من 7 إلى 10 دقائق حسب الخفاقة ( و يجب أن يصل المزيج إلى مرحلة الشريط ) أي بمعنى أنه عند رفع المضارب يسيل المزيج منها على شكل شريط و هناك طريقة أسهل بأن ترفعي المضارب و ترسمي رقم ثمانية بالإنكليزية فإذا بقي الرقم لمدة ثانيتين فهذا يعني أن المزيج جاهز .




• ضعي بياض البيض فوق الصفار و أضيفي الفانيليا و الحليب و اخفقي قليلا لتتجانس المواد .

أضيفي الطحين على 3 - 5 دفعات و امزجي بملعقة خشبية أو سباتولا مطاطية بطريقة الطوي أي من أسفل الوعاء إلى الأعلى .




• اسكبي ثلث كمية المزيج في وعاء آخر و أضيفي إليه القهوة المذوبة مع الحليب و امزجي ثم اسكبيه في صينية قطرها 26 سم مدهونة بالزبدة و مرشوشة بالطحين و اخبزيه في فرن محمى مسبقا على درجة 180 لمدة ثلث ساعة أو حتى ينضج .

• اسكبي بقية المزيج في صينية بنفس القطر و مدهونة و مرشوشة أيضا و اخبزيه حتى ينضج .
عندما تنضج الكعكات تقلب مباشرة على شبك و تترك لتبرد و يفضل تحضيرها في اليوم السابق .


تحضير السيروب:

ضعي الماء و السكر و النسكافيه في وعاء على النار و حركي حتى يذوب السكر و يغلي لثواني .
اسكبي السيروب في وعاء عميق و اتركيه ليبرد

تحضير الحشو و الكريما:

• في وعاء نخلط الجبنة المسكربوني مع نصف كوب سكر بودرة بالخفاقة الكهربائية على سرعة منخفضة ( يمكن استخدام محضرة الطعام ) حتى يصبح المزيج ناعم ثم يغطى المزيج و يحفظ في الثلاجة .

• لعمل الكريما : تخفق الكريما الفرش على سرعة متوسطة حتى تبدأ بالتكاثف ثم نضيف السكر و نستمر بالخفق حتى تتماسك (لا تكثري من خفق الكريما الطازجة و إلا تحولت إلى زبدة ).

• اخلطي نصف كوب من الكريما مع مزيج الجبنة بخفاقة البيض .

تزيين الكيكة :

• اعملي شق صغير في الكيكة البيضاء ( كما في الصورة ) و هذا سيفيدنا في ترتيب طبقات الكيكة بعد قطعها لتحصلي على كيكة مستوية.

• بواسطة سكين منشار اقطعي الكيكة إلى طبقتين ( في الكيكات الإسفنجية لا يمكن استخدام تقنية الخيط ).

• على طبق دوار ( استخدمت لوح تقطيع البيتزا الدوار لأنه يساعد في التزيين ) ضعي طبقة من الكيكة البيضاء و قومي بتشريبها بثلث السيروب بواسطة الفرشاة.

• بواسطة ملوق ادهني أول طبقة بنصف كمية الحشو ثم ضعي فوقها طبقة الكيكة بالقهوة و شربيها بثلث كمية السيروب ثم ادهنيها ببقية الحشو .

• ضعي الطبقة الأخيرة و انتبهي إلى وضع العلامات فوق بعضعها و شربيها ببقية السيروب سيصبح لديك ثلاث طبقات كما في الصورة .



• ضعي كمية كبيرة من الكريما على سطح الكيكة و ابسطيها ثم مدي الزيادات على الجوانب.
ثبتي الملوق بيدك اليمنى بشكل عمودي و ملاصق لجانب الكيكة و ابرمي الصحن بيدك اليسرى لتحصلي على جوانب نظيفة و مرتبة .




• انقلي الكاتو إلى طبق التقديم و رشي الكاكاو على سطح الكيكة و اقسمي أصابع الليدي فينغرز و رتبيها على الجوانب و هذه فكرة أخرى للتزيين و بالصحة و العافية .


  • وصفات تانية ممكن تعجبك


التعليقات

  1. ام جنى عبيدات 20 February 2011

    وااااااو بجد حلو راقي شكلا وطعما… انشالله اول وقت فراغ بدي اعملها.. يسلمو ايديكي ويعطيكي الف عافيه بجد المنظر بشهي.. وعزيزتي منى اشتقنا:)

  2. bobo84 20 February 2011

    :) ماشاء الله عليك يا ست سهى اي شو هالكيكة اللي بتشهي فشرو محلات الجاهز يعملو متلاولا هالسفرة شي كتير مرتب ومذوق وكمان شكرا على الشرح الكافي والوافي يعني ما بقالنا حجة أكيد لازم نجربا ,انا ان شاء الله بأقرب فرصة رح جيب المسكاربوني وطبق الوصفة لأني بصراحة مومستعملتا من قبل وان شاء الله تزبط معي 8)

  3. منى 20 February 2011

    ام السوس عن جد الجمعة كانت حلوة كتير , انا بحب الجمعات الصغيرة لان بتلاقي الكل مع بعض , اما بالجمعات الكبيرة منكون متل الحمام الي مقطوعة ميتها :grin

    انا كان محلي استراتيجي جدا ادام اليالنجي و هو كان من اطيب اليالنجيات الي دقتها بحياتي , سلم دياتك و ديات الماما

    اما هل الكيك مو معقول , هلا انا بعرف انك شاطرة كتير بالحلويات و منفنفة , بس بصراحة ما خطر ببالي ان الطبق الي انحط ادامنا كان شغل بيت , ما شاء الله عليك
    اكيد الطعم مو ااقل من الشكل و بكل لقمة كنا عم نسبح سباحة يممممم :zzz

    سلم ايدك و انا ممنوتك لهل الوصفة المفصلة الي غير شكل و بانتظار بقية وصفات منك , و هذا يتضمن , من بعد اذنك , وصفة التارت الي بجنب هل الكيك لان كمان كان يميييي

    صحي سوسو , انت جبت الماسكربوني من هون و الا شو ؟

  4. lolli 21 February 2011

    مممممممم سلم هالديات سهى
    شكلها كتيييييييييييير شهي و طعمها اكيد طيب كتير كتير :p اضلا انا كتير بحب التيراميسو
    و عندي استعداد قضي نهاري بالمطبخ جرب بالحلويات اهون من اني جرب طبخة جديدة :upset هههههههه
    قريت الوصفة اكتر من مرة و في كم اشارة استفهام :? ياريت توضحيلي ياهم
    اول الشي لما جهزنا الكاتو و اخدنا تلت و خلطنا معه القهوة و حطيناه بالفرن سؤالي هو: القسم الباقي شو بيكون وضعه عم ينتظرو اول قسم ليطلع من الفرن لحتى يجي دوره بالخبز و هالشي ما بيخلي فقاعاته تروح و ما ينفش؟وخصوصا انو بعض الافران بتاخد وقت اكبر متل افران الكهربا
    هلئ تاني سؤال لما حطينا طبقات الكيك فوق بعضهم و بيناتهم الحشوة ذكرتي انو ننتبه للعلامات …. اي علامات :? :? :?
    اخر الشي
    انا بعمل كاتو اسفنجي بس بطريقة مختلفة عن طريقتك بدون فصل البياض عن الصفار و ذايما بينجح معي ممكن اعمله و حط نفس الحشوة :? :?
    هلكتك بأسئلتي سامحيني و هي اخر سؤال عالبيعة هههه
    اذا الطحين كان فاخر ضروري ينتخل 3 مرات ؟؟
    انا ولا مرة جربت انخل الطحين و ما اشتكيت من شي فبتسمحيلي اني ما انخله :upset على الاقل لحتى ما تبلش معي سلسلة التعطيس ههههه :grin
    الله يعطيكي العافية و شكرا كتير لانو قدمتي هالكيك بطريقة احترافية كتير كتير
    الله يوفقك اكتر و بانتظار جديدك
    و يسلمو يا منى لنشر الوصفة بسرعة و طالما قلتي انها طيبة كتير معناها خلص تم اعتمادها للعزايم الجاية 8)
    بالتوفيق للجميع

  5. منى 21 February 2011

    و الله لولو مو ناشرتها بسرعة , صار الها سهى زمان باعتتها , يعني بدي فلقة نظامية :roll

    صراحة كانت شكل و طعم و هي دايما اشيا بتكون عل طاولة سهى :zzz

  6. بسبوسة 21 February 2011

    عنجد شكله هالكاتو روعة
    يسلم ايدكي يا رب
    هلا انا سؤالي انه شو هيه القهوة السريعة الذوبان واش فرقها عن القهوة التركية اللي منشربها … والسؤال التاني الحليب اللي رح نستخدمه بودرة ولا عادي
    وشكرا كتير كتير

  7. رنا 21 February 2011

    سبحان الله ..من يومين كنت بدي اسألك عن سهى انه وينها ماعم نشوفها …وفكرت بالموضوع وقلت لازم اسألك عالفسفوس (هاداسم الفايس بوك عند جوزي )المهم شفت حالي بالمنام عم بسألك وبتقوليلي انها تجوزت … :grin واليوم منزلتيلنا قالب كاتو بيطير العقل ….ومن شغل ايديها ان شاء الله يكون في اخبار حلوة عالطريق
    منجي للوصفة انا كتيييير عجبتني لانها طريقة التيراميسو الاصلية بتكون بالكيك بس وقت شفتها بكاتو اسفنجي عصني قلبي هديك العصة :sigh ..بس ماشاء الله ياسهى ايه تقولي محترفة حلويات بهالشرح المفصل والصور الي مابتخلي عند الواحد ولا سؤال …بس انا شفت انه تطبيق الوصفة رح يكون صعب يعني بدها نهار كامل شغل …على فكرة اليوم عملت لازانيا وقلت لحالي وقت خلصت …ايه والله بدها شغل اشبن العالم مفكرينها معكرونة عادية ههههههه
    يلا ياستي يسلم ايديكم انتو التنتين وبركي بيزول الوهم عندي من تجريب الكاتو الاسفنجي واكيد رح تكون اول وصفة بجربها ;)

  8. منى 22 February 2011

    يا ست رنوش , شو لازم اعملك ليروح الخوف , بنتي هي كيكة عادية بس منفصل فيها الصفار عن البياض :roll

    لازم تجربيها باقرب وقت و تكسري الحاجز لان مو مستاهلة

  9. لارا مينا 24 February 2011

    الله يعطيك العافية ياسهى , دايما مميزة بالحلويات ولسا جاتو فيكتوريا و الغابة السوداء في بالنا :zzz
    ولاتحرمينا من وصفاتك الحلوة والمالحة :)

  10. souha 25 February 2011

    هلا منونة كيفك
    يا ستي مزبوط كلامك الجمعات الصغيرة أحلى و فيها فائدة أكتر ,و صحة و هنا على اليالنجيات كانو شغل الوالدة الله يديمها متميزة فيهن دوما هل بالنسبة للجبنة المسكربوني فتلللللللت حلب شقفة شقفة ما كنت شوف خيالها بس قلت لحلي بدي ساوي الكاتو يعني بدي ساوي ركبت دماغي يعني :grin لذلك رح قلكن سر تاني من اسراري عملت جبنة ريكوتا على إيدي و خلطت معها جبنة قطع متل لافاشكيري و مع هيك طلع الكاتو رائع و بعد فترة من عيد الميرد بالصدفة كنت طالعة على كارفور وشفت جبنة ماسكربوني بس بعد شو فات الأوان بس ما زعلت الحاجة أم الإختراع :zzz

  11. souha 25 February 2011

    هلا لولو
    و لا يهمك قد ما كترو الأسئلة أنا جاهزة
    نبلش من الأول لما حطينا أول قسم بالفرن القسم التاني رح يستنا دورو و لا تخافي الوصفة فيها بيكن باودر ورح يضمن ارتفاع الكيك إنشاء الله و أنا دايما بعمل هيك و الحمد لله بتنجح هلأ أنا فرني عرضه 44 سم يعني ما فيني حط قالبن سوا بالفرن بس إذا كان فرنك كبير ممكن تحطي القالبين سوا بس تنتبهي لازم يكون في 3 سم عل الأقل بين الصينية و جدران الفرن
    بالنسبة للعلامات كان في صورة أو بالأحرى صور أكتر في الوصفة بس ما كلها بعدتها لعدة أسباب منها خفت أكون مملة كتر ما حكيت كمان تحميل الصور عذبني كتيييير هلأ طبقة الفانيليا رح نقسمها اثنين فممكن أثناء قص الكيكة ما تطلع الطبقات سوية و هيك لما ترجعي ترتبي الكاتو بيطلع مايل لذلك بعمل علامة بشكل عمودي و بعدين بقص الكيكة و لما برجع برتب الطبقات بنتبه رتب العلامات فوق بعضهن و إذا نتبهتي على الصورة 5 بتشوفيهن بس دققي منيح
    فيكي تستخدمي أي طريقة للكاتو الإسفنجي بتنجح معك لأنو الكاتو الإسفنجي إلو طرق كتيرة
    الطحين :) بدك الحق ولا إبن عمو النخل ضروري مع الكاتو الإسفنجي يعني مو أقل من مرتين أنا هلأ صرت بنخلو مرة و المرة التانية على دفعات لما بدي ضيفو لمزيج البيض
    إنشاء الله تجربي و يعجبك ;)

  12. souha 25 February 2011

    هلا بسبوسة
    شو هالأسم الحلو :zzz القهوة سريعة الذوبان متل نسكافيه و الحليب بقصد حليب سائل

  13. souha 25 February 2011

    هلا أم جنى و بوبو شكرا لتعليقاتكن المشجعة إنشاء الله تجربوها و تعجبكن ;)

  14. souha 25 February 2011

    هلا رنا بعد زماااان اشتقتلكن كتير و شو هالمنام الحلو يعني أخبار جديدة ما في بس فال خير إنشاء الله
    هلأ بدي أحكي جوز كلام بركي بتشجعي و بتعملي الكاتو الإسفنجي أولا الكاتو الإسفتجي الأصلي ما فية بيكن باودر و لا حليب يعني هي نسخة متطورة عن النسخة الأصلية لذلك لا تخافي فيو بيكن باودر مارج يهبط معك بإذن واحد أحد و مشان تشجعي كمان أنا كنت أيام الجامعة أعمل كتويات عادية يعني بدون زينة و لاهم يحزنون و لما مر من قدام محل باتسري و شوف الكاتوهات أشكال و ألوان قول لحالي اميتا بدي صير أعمل متلون ( ما حدا يا رنا بيولد و هو بيعرف ) زمان لما كانت شي وصفة جديدة تفشل معي أموت من حرتي بس هلأ صرت بضلني وراها لتنجح يلا خليكي شجاعة عم أستنا أسمع منك سو صار ;)

  15. souha 28 February 2011

    مرهبا منى ألف مبروك على الوصفة رقم 800
    منونة ممكن تعدلي بالوصفة أنا كاتبة ضاف الطحين على دفعتين بس إذا شخص عم يعمل الكاتو الإسفنجي أول مرة بيكون كتير يعني 4-5 دفعات أفضل
    كمان عندي فكرة جديدة ما بعرف إذا رح يحبوها الصبايا إنو نعمل كرنفال للبسكويت يعني كل صبية تشاركنا بوصفة للبسكويت أو الكوكيز لأنو بحس كل بلدان العالم بتهتم بالبسكويت إلا نحنا يعني نادراً ما تزوري حدا بحلب و يضيفك بسكويت شغل البيت طبعا ;) يعني الكرنفال ما رح يكون مسابقة حابة يكون متل إحتفال
    سلام

  16. منى 26 March 2011

    و الله فكرة حلوة حلوة ام السوس , ان شاء الله صبايا يتفاعلوا معها لان متل ما قلتي البسكويت مهضوم حقه عنا :roll

  17. reema 29 September 2011

    تسلم ايديك على الوصفة
    أنا حابةأسأل من وين ممكن نشتري بسكوت الليدي فنغرز وجبنة المسكربون بحلب؟؟ بحثت عنهم كتير بس مالقيتهم..ياريت تجاوبوني الله يجزيكم الخير

  18. منى 30 September 2011

    و الله ريم الماسكربون ما اظن متوفر , ما لقيت منه ابدا ..

    الليدي فنجرز كنت بزمناتي وصي عليهم حانا , بقى هلا ما بعرف اذا لسة بيعملهم , صرت حضرهم على ايدي ;)

  19. souha 30 September 2011

    السلام عليكم
    هلا ريما بالنسبة لجبنة المسكربوني أنا لقيت منها مرة بالكارفور إذا ما لاقيتي ممكن تمشي الحال بجبنة كريم ما تكون مالحة كتير أما بالنسبة لأصابع اليدي فيينغرز أنا بعملها بالبيت ممكن تلاقي عند بماركت كنان إذا شفتي أخر صورة استعملت بسكويت رول تركي كمان الطعمة ظريفة بس بنصحك تعملي اليدي فينغرز بالبيت مو صعبين أبداً و فيكي تعملي كمية منيحة و تحطيهن بالفريزر لوقت اللزوم :zzz

  20. suha87 2 March 2012

    شكرا كتير عالوصفة جريتها طلعت روعة. ما عرفت كيف بدي ابعتلك الصورة؟

  21. منى 2 March 2012

    هلا اختي :)
    فيكي تحمليها على حسابك بالفيس بوك او على ايا موقع تاني للتحميل و بعدها حطي الرابط هون ;)
    عوافي و الف صحة و هنا يا رب

    • Souha Kamand 31 January 2014

      هلا suha
      كتير فرحت إنك جربت وحدة من وصفاتي إنشاء الله صحة و هنا
      حبيت شوف الصور بس للأسف ما فتح الرابط

  22. suha87 3 March 2012

    [URL=http://a1.sphotos.ak.fbcdn.net/hphotos-ak-ash4/423417_10151340051260284_537515283_22433788_715642398_n.jpg]Facebook[/URL]

  23. suha87 3 March 2012

    [URL=http://a1.sphotos.ak.fbcdn.net/hphotos-ak-ash4/423417_10151340051260284_537515283_22433788_715642398_n.jpg]Facebook[/URL]

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)