محشي البرغل


         وصفة : منى                 2007/09/12                 24 تعليقات
محشي البرغل



2 كيلو باذنجان حجم وسط

الحشوة :

ثلاث أرباع كوب حمص جاف
2 ملعقة كبيرة سمنة
نصف كوب برغل خشن
نصف كوب دبس رمان ( أو أكثر حسب الرغبة )
3 حبة كبيرة فليلفة حمراء ( نصف كيلو )
2 كيلو بندورة
باقة بقدونس
ربع كيلو لحمة مفرومة ناعم
1 - 2 ملعقة كبيرة رب البندورة
ملعقة كبيرة دبس فليلفة
ملعقة صغيرة بهار مشكل
ملح

المرق :

نصف كوب من عصير الحصرم
عصير ليمونة أو ليمونتان حسب الرغبة بالحمض ( اختياري )
ملعقة كبيرة رب البندورة
نصف ملعقة كبيرة نعناع جاف
4 فص ثوم مهروس
ملح

عظام خاروف





• يغسل الحمص و ينقى من الأوساخ ثم ينقع طوال الليل بالماء البارد .

• تحفر حبات الباذنجان بانتباه حتى تبقى قشرة رقيقة و يوضع جانباً .

• يغسل الحمص ثم يغمر بالماء و يسلق حتى ينضج , يغسل البرغل جيداً ثم يوضع على مصفاة و يترك حتى يجف .

• تذوب السمنة على نار متوسطة و يحمص فيها البرغل لمدة 5 دقائق تقريباً ثم يبعد عن النار و يضاف دبس الرمان و يترك جانباً , هذه الخطوة اختيارية و انا احضر المحشي من دون تحميص البرغل .

• تقشر البندورة و يتم التخلص من البذور و العصير ثم تفرم ناعماً , بفرم البقدونس و الفليلفة الحمراء إلى مكعبات صغيرة .

• تخلط البندورة و الفليلفة الحمراء و البقدونس و الحمص المسلوق و البرغل مع اللحمة النية و رب البندورة و دبس الفليلفة و الملح و البهار و يتم التذوق بطرف اللسان للتأكد من حموضة الحشوة و يضاف المزيد من دبس الرمان إذا دعت الحاجة , أصبحت الحشوة جاهزة .

• توضع الحشوة على مصفاة ثم تحشى بها حبات الباذنجان مع الضغط الجيد حتى تمتلىء الحبات بشكل كامل , يوضع العصير الناتج من الحشوة جانباً ثم يعاد ضغط الحشوة في كل حبة باذنجان و حشيها مجدداً .

• ترتب حبات محشي الباذنجان في طنجرة كبيرة فوق عظام الخاروف , يذوب رب البندورة بالماء ثم يوضع فوق المحشي مع النعناع و الثوم و عصير الحصرم و دبس الرمان و مرق الحشوة و يضاف المزيد من الماء حتى تغمر حبات المحشي .

• يغطى المحشي بطبق مسطح كبير ثم يوضع فوقه ثقل كي لا تخرج الحشوة من المحشي أثناء الطبخ .

• يوضع المحشي على النار و يترك حتى يغلي ثم تهدى النار و تغطى الطنجرة و تترك لمدة ساعة أو حتى ينضج المحشي .


• يرفع المحشي من الطنجرة و يرتب في طبق مسطح كبير و يقدم و بجانبه طبق من المرق مع الفجل .
  • وصفات تانية ممكن تعجبك


التعليقات

  1. ام نور 12 September 2007

    اكلة فعلا مميزة بس مع الاسف لا يوجد من هذا الباطنجان عنا
    وزوجي كتير بيحب الاكل الذي فيه برغل فممكن نفس المقادير والطريقة نستخدمها لا الكوسا يعني بدل الباطنجان كوساولا ما حدا عملا :grin

  2. بدور 12 September 2007

    يا ربي عبيطلعلي انو الكود غلظ :cry

    بسم الله الرحمن الرحيم
    أنا بحب هالمحشي كتير :p

  3. بدور 12 September 2007

    هييييييييييييييه يمكن مشي الحال :grin

    الله يعطيكي العافية منى شكلو مشهي كتير :)
    نحنا كتير منعملوا يعني بمعدل مرة أو مرتين بالاسبوع لإنو اخواتي كتير بحبو المحشي :zzz

  4. منى 13 September 2007

    هلا بدورة :)

    و أنا بحبه كتير , بس بده شغل لهيك بساويه بالكتير تلات مرات بالصيفيية ;)

  5. منى 13 September 2007

    هلا ام نور :)
    واحدة من صديقاتي ما بتحب الباذنجان لهيك جربته بالكوسا , بس على حسب قولها ما طلع طيب :roll

    ان شاء الله لما بيتوفر عندك الباتنجان تجربيه و يعجبك يا رب:)

  6. Eman 19 February 2008

    السلام عليكم ورحمة الله وبركاته،
    أختي منى الأمورة :)

    بدي أسألك، شو رأيك بالبانجان الصغير ،بيضير للمحشي ببرغل؟

    ما عندنا غير بانجان صغير أو كبير كتير،عادي يكون بالصغير؟

    سؤال تاني، إذا بدي أحشيها كيف أحشي الحبة ،متل الي برز ولا هاد غير؟ :roll

  7. منى 19 February 2008

    هلا أمولة :) البانجان الصغير بيصير للمحشي طبعا , بس أصوله بالبانجان الحجم العائلي , الله وكيلك المحشية الواحدة فيني اتغداها على يوميين :grin

    هلأ حشوة المحشي بالبرغل غير المحشي برز لأن هادا بيستحمل حشي كتير , يعني بتحشي و بتضغطي , طبعا لازم تنتبهي لحتى ما تنشق معك البانجانةو بعدها بتتركيبه شوي لحتى تصفي منه كل المرقة بترجعي بتضغطي الحشوة و بتشوفي إذا ممكن ينحشى كمان :zzz

    الظاهر عندك بانجان و حابة تعملي فيه شي وصفة ;)

  8. Eman 19 February 2008

    لا يا ستي ما عندي بانجان لأخلص منه ، بس أنا بحب كتير أكلات البانجان بجميع أنواعه. :zzz

  9. منى 20 February 2008

    صحتين و هنا , ايقي لا تنسي تخبريني شو جربتي يا عسل ;)

  10. Eman 2 March 2008

    يسلمو كتير على هالوصفة الحلوة، اليوم عملته وطلع كتر رائع 8) .
    الظاهر بهي الوصفة البرغل مو كتير ،يمكن هيك أصوله،بس أنا بحب البرغل يكون أكتر شوي. :roll
    الله يجزيك الخير ويخليلنا ياك ويحفظك إلنا ولأهلك.

  11. منى 2 March 2008

    هلا أمولة :) صحة و هنا و عافية يا رب , كتير انبسطت لان جربتيه و كمان عجبك ;)

    أما البرغل فمعك حق , لأن نحنا ما كتير منحط برغل مع الحشوة , و في ناس بتحب برغله أكتر, بس المهم المبدأ نفس الشي ;)

  12. ام نور 25 August 2008

    من يومين وجدت بالصدفة هالنوع من البتنجان وطيختون عطريقتك شو طلعوا اطيب من الرز :p فعلا اكلة مستاهلة الله يبارك فيكي حبيبة قلبي منى ويطول بعمرك
    في اخت حلبية قالتلي انو بحلب بتيبسوا لا الشتوية بس هي امها بتعملا ياهون يا ريت اذا مجربي هالطريقة تنزليا :)

  13. منى 25 August 2008

    هلا ام نور حبيبتي ريتو هنا يا حق , كتير انبسطت انه عجبك و حتى المحشي الي برز لما بينطبخ بالصوص تبعه بيطلع نممي ;)

    من عيوني رح نزل الك طريقته ان شاء الله دا انت تأمر يا جميل

  14. ام نور 25 August 2008

    تسلملي عينك خجلتيني :)

  15. منى 26 August 2008

    :)

  16. muna.g.7 30 August 2008

    يا سلام على هالوصفة زمان كانت مدرسة زميلتنا في المدرسة تعملهاوهي ايضا حلبية بس هي تقول هذي طبخه نسوانيه لا تقدم في ولائم الرجال صحيح :?

  17. منى 30 August 2008

    هلا منونة:)
    لا حبيبتي عادي بتتقدم , بس هو المحشي بشكل عام مو حلو كتير عنا ان نعمله في العزايم , نميل ان نعمل كبب و فريكة و أكلات فخمة هيك ;)

  18. محبة في الله 19 December 2008

    السلام عليكم

    كيفك أخت منى

    انا من زمان اتابع موقعك الجميل وحابه اكتبلك عن اعجابي بك وباسلوبك الجميل وبطبخاتك الروعة بس والله وقتي دائما ضيق واليوم وجدت نفسي على النت والاولاد ناموا فقررت الكتابه ولكني احترت في اي وصفة اكتب وثم قررت ان اكتب في اول وصفه عرفتني بك محشي البرغل فأنا لما بحثت عنه كان معي مقاديره من اخت حلبية على فكرة انا شامية اقطن في الشارقة المهم وجدته بنفس العيارات التي اخذتها فقررت ان اتجول لارى باقي الاطعمه التي اعرفها فانا والحمد لله اعجبك في الطبخ وايضا وجدت اكثر العيارات تشبه عياراتي فاصبحت من وقتها واثقة من صاحبة الموقع الاخت منى وصرت اجرب بعض الاطعمه التي لا اعرفها والحمد لله الاكثر منها نجحت وايضا كنت استمتع بحديثك الجميل وتعليقاتك الرائعة اشكرك على كل شئ

  19. منى 20 December 2008

    و عليكم أفضل السلام و أتم التسليم أختي محبة :)
    الف صحة و هنا على كل الوصفات الي جربتيها و نجحت معك و أسفة كتير على الي ما نجح :roll ازرعيها بدقني :zzz

    الشكر الك أختي على ردك و اهتمامك , و الله يخليلك الاولاد و يباركلك فيهم يا حق :)

    نورتي اختي و ان شاء الله متابعة على طول

  20. ام احمد الغالي 28 July 2009

    يسلمو ايديكي يا منى انا هالاكله ما بعرفها لانو امي من حماه وعشت برى سوريا كل حياتي بس دقتها مرة بلصدفه عند حماة اخوي
    كانت شي بيجنن بس بوقتها كنت شبعانه وما قدرت اقوامها فعلا طيبه كتير :zzz :eek :

  21. منى 18 March 2010

    هلا ام احمد :)
    متل حكايتي , هل الطبخة اذا كانت على اصولها ما ببتقاوم , يمم شو مشتاقة للشتوية لحتى ارجع حضرها عن جديد , مممم

  22. lailamh 18 March 2010

    thank u so much for all the wonderful recipes!

  23. منى 18 March 2010

    مية هلا فيك و الف الف صحة و هنا مقدما ;)

  24. بيان 11 April 2013

    ياالله شو دورت على الوصفة من سنة وما لا قيتها
    وهلأ بالصدفة لاقيتها
    والمشكلة إني انشغلت كتير وما بعرف إذا رح يصحلي ساويها
    لكن جربت كتير وصفات من موقعك وكتيييير عجبوني وأهم الشي اليلنجي
    وأنا متابعة قديمة لوصفاتك إلي بتجنن
    يارب يسلملنا هالإيدين
    .
    .
    .
    ومبارك التصميم الجديد للموقع وإن شاء الله يكون البحث فيو متطور لحتى يسهل علينا التنقيب عن وصفاتك الدهب

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)