محشي بطاطا جواهر


         وصفة : منى                 2008/11/29                 16 تعليقات
محشي بطاطا جواهر


2 كيلو بطاطا
2 ملعقة كبيرة رب البندورة
6 كوب مرق

الحشوة :

حبة صغيرة فليلفة حمراء
بصلة صغيرة
ثلث كوب ذرة
ثلث كوب جزر
ثلث كوب بازلاء خضراء مسلوقة
ثلث كيلو لحمة غنم مفرومة
نصف ملعقة صغيرة بهار مشكل
رشة قرفة و ملح





• تقشر البطاطا ثم تحفر حتى تصبح بسماكة نصف سنتيمتر تقريباً .

• تفرم الفليلفة الحمراء و الجزر و البصل لمكعبات صغيرة ثم تخلط مع باقي مقادير الحشوة و تدعك حتى تتجانس .

• تقلى البطاطا المحفورة بالزيت أو السمنة حتى تشقر ثم ترفع على ورق ماص للتخلص من الدهون الزائدة .

• تحشى البطاطا بالحشوة المجهزة و ترتب في طنجرة . تروب رب البندورة بالمرق ثم تغمر بها البطاطا و إذا توفر عصير بندورة طازج فيستعمل و يعطيها طعم و نكهة لذيذة .

• توضع البطاطا على نار متوسطة و تترك حتى تغلي ثم تهدى النار و يغطى القدر و تترك حتى تنضج و يسمك المرق لمدة 30 – 45 دقيقة .

• تقدم البطاطا ساخنة مع الرز بالشعيرية و المرق اللذيذ و الفجل و الرشاد و الجرجير .
  • وصفات تانية ممكن تعجبك


التعليقات

  1. ام نور 29 November 2008

    سلم هالديات يا منى فكرة كتير حلوة وتغير عن البطاطا بحشوة الرز واللحمة رح جربا بهل يومين انشالله بس عندي سؤال شو الهدف من تقلية لبطاطا المحفورة بالزيت أو السمن :? وممكن نستغني عن هالخطوة :? واذا قلينا كم سن توم مهروسين وضفناهون فوق المرقة شو رايك بيصير ولا نو

  2. منى 29 November 2008

    هلا ام نور :)
    انا بقلي البطاطا هيك اتعودت بتعطيها طعم اطيب
    اذا انت بتحضري محشي البطاطا من دون تقلية و بتحبي طعمته أكيد فيك تجربي هل الوصفة من دون قلي ;)

    مع الثوم بيطلع طيب , هي فكرة منك بجربها ان شاء الله المرة التانية يا عسل

    ان شاء الله تجربيها و تعجبك و لا تنسي تخبريني ;)

  3. تورتاية بالكريز 29 November 2008

    حلوة اوي الاسم جواهر وياحب الستات للجواهر والحاجات الحلوة
    تسلم ايدك وصفة جديدة ليه وجواهرك طلعين مرتبين وشكلهم ولااشهى ماشاء الله تبارك الله :zzz
    الله يسعدك ياسكرة حلب ويفرحك بكل الجواهرالحلوة دنيا واخرة

  4. منى 29 November 2008

    هلا ام ياسمين قمر مصر منورة :)
    الله يسلمك حبيبتي انبست ان الاسم عجبك
    ان شاء الله تجربيها و تعجبك كمان :zzz
    حبيبة قلبي دعواتك دايما من القلب و بتوصل للقلب , ان شاء الله الك متلهم و اغلى ;)

  5. منامينو 30 November 2008

    ما شاء الله عليكي وعلى هالإبتكار يا منى :eek الله يسلم إيديكي على هالطبخة المرتبة واللي بتفتح النفس. أنا بالأساس ما كنت أحب محشي البطاطا.. بس لا لا، هلأ غيّرت رأيي، :grin هاي مبينة غير شكل، خصوصا إنه النشويات فيها أقل شوي لإنه من غير رز. وكمان منظرها بيشهي وهن مرتبين بشكل حلو بالصحن هيك زي الصيصان جوة البيض. ;) خيالي واسع :grin

    أيييييوة!! هلأ بصير بدي أقعد أنقّي حبات البطاطا كلهن نفس الشكل والحجم عشان يطلعو حلوين مثل بطاطاتك :roll ;) .. الله يسهل
    :grin

  6. منامينو 30 November 2008

    عيوني ام نور، تسلميلي، ممكن تمري شوي على وصفة الصفوف تبعتك؟ عندي شوية أسئلة عليها. :roll الله يبارك لي فيكي وشكرا سلفا

  7. منى 30 November 2008

    ووواو منامينو , انا لهلا ما شفت حدا ما بيحب محشي البطاطا , هل الحباب الحلو محوشي البطاطامعقول حدا ما يحبوا :eek

    اكيد لازم نقيهم حبة حبة لزوم الاناقة و البرستيج :zzz

    خليلي عينك منوشة و اذا جربتيها ان شاء الله تعجبك و اكيد تبقى تخبريني :)

  8. Eman 30 November 2008

    يسلمو إيديك منوشة .. هالأكلة أخدتها من زمان من موقع لك وعملتها أول مرة على طريقتك المذكورة ، وتاني مرة ،قلت لحالي مو أطيب حط شوية بازيلا وفطر ؟؟ فحطيت والله كنوع من التغير ،وفعلا كانت طيبة ..وخضارك هالمرة أطيب مع الفليفلة والبصل رح تحطي نكهة أورع .. غن شاء رح جربها بحشوتك هي ، يسلمو يا غالية ..

  9. سلاف 1 December 2008

    ياسلام :)
    أول ماشفت اسم الوصفه قلت لحالي لازم بطاطا وفيها حشوه الوان
    فكرة كتير حلوه واكيد كل شيئ مع الخضره طيب غريبه منامينو مابتحب البطاطا والله مافي أطيب منها الصغار والكبار بحبوها
    يسلم ايديكي منى بس مايكون قريبافي اكلة بحشوة اللؤلؤ ;)
    مافي شيئ غريب عليكي ماشاء الله حولك مبدعه وشو ماعملتي طيب ورائع
    على فكره منى في اطباق منظرها بشهيكي تتغزلي فيها معك حق تتغزلي بشو ماعملتي لأن طعم ولون وصوره
    ان شاء الله رح جربها قريبا : 8)

  10. منى 1 December 2008

    هلا أمولة :)
    الله يسلمك , معك حق هي الوصفة بتشبه الوصفة الي كنت نزلتها بمطبخ لك من فترة , بس هديك على اصوبها و هي باضافة صغيرة
    الف هنا على المحشي الي عملتيه والي رح تعمليه ريتو صحة يا حق ;)

  11. ام نور 1 December 2008

    اي منى معك حق البطاطا مقلية اكيد اطيب انا كنت اقليا بالاول حتى مع الكفتة بالبطاطا والدجاج وبطاطا يعني هيك اصولا مقلية بس بامر من الطبيب بطلت وصرت ابتعد عن كل المقالي واطبخ او عالبخار او شوي بالفرن وتعودنا وكلو حسب العادة القرنبيط ما بقلي بعملو عالبخار وبحطلوا صوص علي او اشوي بالفرن مع نتفة زيت البتنجان بقلي لا المقلوبة بس وما بعملا الا اذا عندي عزايم اد ما بقدر خفف دسم عم خفف حتى الزبدة ما بستعملا الا لا الحلويات بالعيد وبجيبا بلا دسم هيك احسن وما عم اطبخ الا بزيت زيتون وزيت خالي من الكوليسترول والحمدالله سمنة ما في عنا الا عند محلات العرب

  12. منى 1 December 2008

    هلا سلوفة :)
    لو شوفيني فقعت ضحك على البطاطا محشي لولو , ليش لا , هلا عم فكر احشي البطاطا بالمغربية :grin
    كلك زووء يا قمر و ان شاء الله تعمليها و تطلع مستاهلة و تعجبك ;)

  13. منى 1 December 2008

    و الله ام نور معك حق , هيك أضمن للصحة و الواحد بعد فترة بيتعود
    هلا انا في الموقع بيكتب الوصفات على اصولها بس ممكن خفف شوية من كمية السمنة أو القلي , و زيت الزيتون صاير صاحبي
    عم استعمله لكل شي تقريباً , و عم يطلع طيب كتير كتير ;)

  14. بدور 15 January 2009

    يا سلاااااااااااام و يم يم يم :p
    و ما بعرف شو اقول كمان كتير كتير حبيتا

    شكرا كتير ميمو والله انت مافي متلك هلأ عبيطلع من عيوني قلوب حب الك :zzz

  15. أم عمر 26 May 2013

    يسلمو ايديكي مدام منى.. هل هذا الرابط ع الفيسبوك هو لنفس الموقع؟
    https://www.facebook.com/groups/186921974330/?fref=ts

    انا اليوم عملت هالاكلة بس حشيت البطاطا لحمة فقط.. شو رأيك؟
    وسؤال تاني: انا عملت البطاطا سميكة – يعني بالحفارة مرة وحدة بس حفرت وسحبت.. انتي رقيقة بطاطاتك جمب يلي عملتن – ف شو رأيك؟؟
    شكراً.. :)

    • منى 4 June 2013

      هلا ام عمر
      اي هادا جروب اللقمة على الفيس بوك و هي صفحة الموقع https://www.facebook.com/a.Delicious.Bite

      هلا الطريقة الحلبية بيحشوها لحمة بس , كتير طيبة , بس الطريقة الي فوق تغيرر , بقى انت و الي بتحبيه
      البطاطا مو حلو تكون كتير سميكة او كتير رقيقة , ممكن تحفريها اكتر من مرة لحتى تاخد حشوة اكتر , انت خبريني حبيتوها ؟

      مية هلا فيك يا قمر

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)