مربى بشر البرتقال و الليمون


         وصفة : منى                 2009/01/03                 25 تعليقات
مربى بشر البرتقال و الليمون

مربى بشر البرتقال و الليمون أو مرملاد البرتقال و الليمون , مربى سهل جداً و لذيذ جداً كله ألوان و نكهات طعمة . حموضة مع حلاوة مع نكهة بسيطة من المرار متل طعم الغريفون . حضرته من يومين لما نزل التلج أول مرة بحلب و عن جد دفى المطبخ بريحته و بلونه .

ممكن تقدميه مع التوست و الزبدة و ممكن تدهنيه على خبز عربي مع جبنة كريم و هلأ أنا عم أكل هل السندويشة , , ييمممي بتجنن مشتهيتكم كلكم معي .

لحتى يطلع المربى ناجح معك لازم تكون الفواكة الي استعملتيها ناضجة و بوقتها , لهيك انصحك دوما ان تحضري هل المربى بنص الشتوية او اولها أما اذا حضرتيه بالاخير ممكن يطلع الك المربى شوي مر .

بالصحة و الهنا

-المقادير:

كيلو برتقال ( تقريباً برتقالتين كبار )
حبة ليمون
2 كوب و نصف سكر
3 كوب ماء
- طريقة التحضير :

• يغسل البرتقال و الليمون و يفرك جيداً ثم تبشر القشرة على المبشرة على الطرف الخشن ,ينقع البشر بالماء و يغير عليه عدة مرات للتخلص من المرار .

• يتم التخلص من القشرة البيضاء لليمون لانها تحمل مرار , ثم يبشر البرتقال و الليمون بالمبشرة على الوجه الخشن يوضع البشر و السكر و الماء و البرتقال و الليمون المبشور على نار متوسطة و يترك حتى يغلي ثم تهدى النار و يترك حتى يعقد مع التقليب كل فترة و أخرى . احتاج المربى ما يقارب 30 - 45 دقيقة .

• يصب المربى في مرطبانات و يحفظ في البراد .

فكرة سريعة :

بعد بشر البرتقال و الليمون تبقى قطع يصعب بشرها , وضعت هذه القطع مع كوب من الثلاثة أكواب من الماء في الخلاط و مزجت الكل حتى أصبح المزيج ناعماً ثم وضعته مع باقي المقادير في القدر و تابعت الوصفة كالسابق .

التعليقات

  1. فرح 3 January 2009

    اعشق هذه الانواع التي يختلط فيه الحامض بالحلو لكني لم افهم بعد بشر البرتقال والليمون ماذا نفعل هل تقشر البرتقال وناخذ اللب ام نضع البرتقالة كاملة بعد بشرها في الخلاط وجزاكي الله خيرا

  2. سمسمة 3 January 2009

    يسلموا هالأيدين منى كنت فايتة أسألك ليش مومبينة كان الموقع نشيط أكتر صايرة عم تتأخري علينا عم نشتاق لآكلاتك وحكياتك

  3. منى 3 January 2009

    هلا سمسومة :)
    و الله معك حق , هلا فايتة بفترة السبات الشتوي , يعني بتعدي علي فترة كل شهرين أو تلاتة بكسل فيها و ما كتير بشتهي فوت للمطبخ و هلا انا عم مر بهل الفترة :grin

    سالت عليك العافية دايما سمسومة و ان شاء الله برجع متل قبل بعد ما تخلص امتحانات الاولاد ;)

  4. muna.g.7 3 January 2009

    الله يعطيكي العافيه على هالوصف الحلو شهيتيني على سندوتش من المربى مع زبده تدفيني في هالبرد ترى انا مثلك شهور بيتي مليان ضيوف وانا مثل النحله ما ادري النمله ايهما اكثر نشاطاوالغاز ما يطفي من الطبخ واحيانا نجيب اكل من بره والمطبخ ما اعرف طريقه واكتفي اني احلم بالاكل الطيب

  5. منى 3 January 2009

    ان شاء الله دايما بيتكم عامر , ما في احلى من لمة الاهل و الاصحاب و الحباب :)

    ان شاء الله تجربي هل المربى منونة كتير كتير بحبه , و ما بده شغل كتير ;)

  6. ام ناصر 4 January 2009

    الله يعطيكي العافيةشكله بيشهي

  7. منى 4 January 2009

    الله بعافيكي ام ناصر :) هادا بس من زووءك حبيبتي ;)

  8. الدمشقية 5 January 2009

    منى شهيتيني من غير شي أنا بالوظيفة وجوعانة بدي شي سندويشة أكلها :grin
    حبيبتي باين عليه لذيذ كتير إن شاء الله بدي جربه رغم أنه الكل عم يقلي هاليومين صحانة بس مو عرفانين أنه السبب هي منى وأكلات منى :grin
    تسلم ايدك يارب

  9. منى 5 January 2009

    هلا دمدومة :)
    و الله لو كنت قريبة كنت بعتلك سلة سندويشات مشكلة , خسى الجوووع :zzz

    مشان الله ديري بالك , هي الصحة بتجي بس ما بتروح بسرعة , و هنااا على قلبك يا رب على كل شي 8)

  10. سلاف 5 January 2009

    شيئ بشهي
    يسلم ايدكي منى00 انا حاطه بالاولويه كنت جرب مربى الفريز بما انه هلا فيه فريز وبعده البرتقال00 بتعرفي منى يسلم ايديكي مقاديرك كتير بتعجبني كميتها مابتكون كبيره يعني اذا فشل شيئ لا سمح الله مايزعل الواحد كتير لان الكميه قليله
    منشان مربى القرع القرعا ساويت فيها اكتر من اكله من مهرجان القرع وماساويت المربى00 مابعرف بس لما خلصتي الطريقه شفتها بدها شغل كتير لان ماما ماكانت تساويه هيك بقى الشغله بدها ترويييي رح جربه ان شاء الله عالاسبوع الجاي وبقلك النتيجه
    :zzz سلام ياغاليه

  11. منى 5 January 2009

    هنا على قلبك على كل الاكلات الي جربتها , و متل ما قلتي انا بقصد تكون المقادير قليلة لان كل شي تجربة و ممكن ما ينجح من اول مرة ;)
    ان شاء الله تساوي القرعة و تعجبك و تبقى تخبريني شو بيصير معك

  12. souha 9 January 2009

    هلا منونة :) تسلم دياتك وصفات لذيذة و بتشهي
    بس بدي إسألك إذا بشرنا البرتقال مع القشرة يلي بتلمع يعني ما بيعطي طعمة مرار لأني بعرف أنو مربى الرتقال القشور بس بيبشروها لأني بدون بشر ما بتحلى
    سلام

  13. منى 10 January 2009

    معك حق و انا فكرت نفس الشي لما اتعلمت الوصفة , بس المهم في الوصفة شغلتين ان تكون البرتقال و الليمونة مستويات و الشغلة التانية ان يكون عندك شجاعة تجربيها و خصوصا ان الكمية مو كبيرة , انا بالبيت بيموتي عليه و هو فيه طعمة مرار بس خفيفة كتير و طيبة كتير , شو رايك دوقك الي عاملته احسن ;)

  14. souha 10 January 2009

    تسلميلي منونة :) أكيد طيب
    أنا سألتك هالسؤال لأني مرة تعلمت كاتو بالبرتقال منستعمل فيه كل البرتقالة القشر بالكامل مع اللب فقالتلي إمي إلو طعمة مرار خفيفة كتير و في ناس ما حسو بهالطعمة و هو طيب كتير
    أنا حابة جرب المربى لأنو خطرلي بينفع نحشي فيه الكاتو و السويسرول بدال الكريما ;)
    سلام 8)

  15. منى 10 January 2009

    تمام , بينفع و بيعطي طعمة طيبة , ان شاء الله تجربيه و يكون على زووءك و لامات و بوسات لماماتك :)

  16. souha 12 February 2009

    هلا منونة
    المربى حاليا عالنار و لسى ما طفيت تحتو طعمتو طيبة كتير تسلم دياتك بس أنا غشيت شوي بالوصفة لأنو حطيتلها قطر زايد عندي من مربى الكباد بس ياترى لازم القطع الكبار شوي بالمربى يختمو و لا ما بيأثر :?
    إنشاء الله برجع بخبرك شو النتائج
    سلام

  17. منى 13 February 2009

    هلا ام السوس :)

    ان شاء الله كون لحقتك لان لازم خبرك ن ل المربى ما بيصير يبقى كتير على النار و الا رح يعطي طعمة مرار :roll

    مو ضروري يختموا المهم انك تحسي ان المبرى صار سماكيته منيحة , بس ما صار متل المرملاد او المربى العادي بتبعديه عن النار , انا منالمرات خليته كتير قام صار متل الجيلو بسماكيته و قلت يا عيني شي منظوم , بس لما دقته طلع مر فظيع فرجعته للنار مع شوية مي و هيك انحلت المشكلة ;)

  18. souha 15 February 2009

    هلا منونة
    أنا تركت المربى شوي أكتر ع النار بس كنت عاملة حسابي من فبل و بشرت المربى ع الخفيف حتى اضمن إنو مايكون مر زيادة :zzz
    بالنسبة للسماكة طلعت كويسة و أصولية هلأإلو طعمة مرار خفيفة كتير متل ما قلتيلي من قبل بس الحمد الله نجح
    الله يعطيك العافية ;) سلام

  19. منى 16 February 2009

    هلا سهى :)
    منيح ان ظبط معك و حبيتيه و الف صحة و هنا على قلبك ;)

  20. سارونات 16 February 2009

    السلام عليكم و رحمة الله و بركاته
    كتير عجبتني فكرة المربى و قريبا جدا راح ساويه ان شاء الله
    اختي منى منبشر البرتقال على الخشن او الناعم
    كمان لما راح نبشر لب البرتقال و كمان اللي ما انبشر نحطو مع ماء بالخلاط تحتى ينعم منيح بحس هيك راح يطلع سائل كتير قبل ما نحطو على النار يعني راح يكون متل العصير شو قولك لان هالنقطة مخوفتني
    كمان اذا بدي اتخلص شوي من المرار هل فيني ابرش القشرة شوي و يعدين شيل الجزء الابيض المر و واصل برش اللب على الاقل بالنسبة لليمونة
    شو قولك
    كمان قديش حجم الليمونة يعني صغيرة او كبيرة او متوسطة
    بالتوفيق
    سلام

  21. منى 16 February 2009

    اختي اسئلتك كلها رح تنحل بالصور و انا حابة ارجع حضر الوصفة لان رح تخلص من عندي , شو رايك تستني علي يوميين لحتى نزل الصور ;)

    الليمونة حجم وسط و اهم الشي بالنسبة للمرار انك ما تخليه كتير على النار و انا ماااااا ببره , كله على بعضه بحطه :zzz

  22. سارونات 16 February 2009

    السلام عليكم و رحمة الله و بركاته

    يخليلي ياكي اختي منى اي اكيد راح انطر تحتى تحطي الصور و كلنا نستفيد منها
    بالتوفيق
    سلام

  23. سارونات 25 February 2009

    السلام عليكم و رحمة الله و بركاته
    اختي منى بدي اسألك ما بياثر اذا بعد ما خلصنا المربى نخليه في الطنجرة اللي كان فيها او لازم نشيله منها و هل الافضل و هو لساته ساخن نغطيه او نخليه مفتوح
    بالتوفيق
    سلام

  24. منى 26 February 2009

    هلا اختي :)
    ما بتفرقر شو ما عملتي , الاحسن اكيد ترفعيه فورا بس انا احيانا بتركه و ما بياثر

  25. منى 14 March 2010

    مية هلا فرح :)
    معك حق لان بيعطي طعمة راائعة .

    أختي شوفي بتغسلي البرتقالة و بتبشريها و تخلي البشر على جنب , الليمونة ت بشريها و تحطي البشر مع بشر البرتقالو بتحليهم , بعدها تبشري البرتقالة كلهاو بتقشري القشرة البيضاء من الليمونة و كمان تبشريها, بتبعدي البذر و بس ما حلي البشر بتحطيهن كلهن على بعض على النار :)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 4.00 out of 5)