مربى بشر البرتقال


         وصفة : منى                 2007/12/08                 30 تعليقات
مربى بشر البرتقال

·          تغسل حبات البرتقال و تفرك جيداً ثم تبشر على الطرف الخشن أو المتوسط من المبشرة .

·          ينقع بشر البرتقال في الماء و يدعك قليلاً للتخلص من المرارة التي فيه , يغير الماء عدة مرات حتى تزول المرارة تماماً ثم يصفى على مصفاة ناعمة .

·          تقاس كمية البشر المصفى , كل مقدار من البشر يحتاج لمقدار من السكر مع مقدار و نصف من عصير البرتقال .

·          يغلى ماء في قدر متوسط ثم يضاف البشر و يسلق لبضع دقائق فقط حتى يطرى ثم يصفى من الماء .

·          يوضع عصير البرتقال و السكر على النار و يترك ليغلي لبضع دقائق حتى يذوب السكر تماماَ و يسمك القطر قليلاً .

·          يضاف بشر البرتقال و يغلى مع قطر البرتقال حتى يسمك القطر تقريباً لعشر دقائق أو أقل .

·          تضاف عصرة صغيرة من الليمون للمربى ثم يبعد عن النار و يسكب في مرطبانات زجاجية صغيرة , يحفظ في البراد حتى وقت الاستعمال و يقدم مع الخبز أو التوست و الزبدة  و هذه صورة قريبة للمربى .

 




بشر برتقال
عصير برتقال
سكر
عصرة صغيرة من الليمون





• تغسل حبات البرتقال و تفرك جيداً ثم تبشر على الطرف الخشن أو المتوسط من المبشرة .

• ينقع بشر البرتقال في الماء و يدعك قليلاً للتخلص من المرارة التي فيه , يغير الماء عدة مرات حتى تزول المرارة تماماً ثم يصفى على مصفاة ناعمة .

• تقاس كمية البشر المصفى , كل مقدار من البشر يحتاج لمقدار من السكر مع مقدار و نصف من عصير البرتقال .

• يغلى ماء في قدر متوسط ثم يضاف البشر و يسلق لبضع دقائق فقط حتى يطرى ثم يصفى من الماء .

• يوضع عصير البرتقال و السكر على النار و يترك ليغلي لبضع دقائق حتى يذوب السكر تماماَ و يسمك القطر قليلاً .

• يضاف بشر البرتقال و يغلى مع قطر البرتقال حتى يسمك القطر تقريباً لعشر دقائق أو أقل .

• تضاف عصرة صغيرة من الليمون للمربى ثم يبعد عن النار و يسكب في مرطبانات زجاجية صغيرة , يحفظ في البراد حتى وقت الاستعمال و يقدم مع الخبز أو التوست و الزبدة و هذه صورة قريبة للمربى .



  • وصفات تانية ممكن تعجبك


التعليقات

  1. Rino 10 December 2007

    الله الله يا منى ذكرتيني بالذي مضى ايام اللي كنت آكل و ما أخاف من شي اسمو سمن كانت أمي الله يمدها بالعافية تعمل هالمربى و أحب كتير آكلو مع الجبنة الخضرا يا سلالالالالالالالالالالام ما أطيبو ما كنا أيامها نخاف من شي أسمو مالطية هلق ما منسترجي ناكلها بدون غلي
    روحي الله يسعدك و يبارك بزوجك و أولادك و ما ننحرم من أكلاتك

  2. منى 10 December 2007

    خليلي عينك رينو على هل الدعوة ما أحلاها ..

    عن جد بعد ما قريتها قلت و ان شاء الله انت كمان و أحسن يا رب :)

    انا بحياتي ما استرجيت اكل جبنة خضرا :roll , يمكن على أد ما كانت امي تخوفنا منها :grin

    بتعرفي رينو و انا عم حضر الوصفة قلت لحالي أكيد انت أول واحدة رح تردي , سبحان الله بحسك بتحبي كتير الاشياء القديمة و الي علبى أصولها و الي هلا ما يقي كتير ناس تحضرها

    ما انحرم من هل الطلة الحلوة يا عسل

  3. تورتاية بالكريز 10 December 2007

    الغالية منى كيف حالك اختي يارب تكوني بخير وحشتيني انت وغاليات موقعك الحلوين
    انا كنت فقدت كلمة مروري وكان عندي مشكلة بتسجيل الدخول بس انحلت الحمد لله مكنتش عارفة اسجل دخول….
    وصفة المربى روووووعة والصور تحفة وحتنطق بسيم الله ماشاء الله
    مشعارفة ليه عمري ماجربت اعمل مربات مع اني كل يوم بجرب وصفة جديدة اما طبق رئيسي او سلطة او حلو
    بس شكل طريقتك واضحة ومبينة رائعة خاصة انني ممن يضايقهم سكر المربات الجاهزة المرتفع بشكل يضايق وانا بحب البرتقال كتير وبدخله في الكثير من الوصفات هو ومبشوره سواء الحلو واللا اللحوم والاطباق الرئيسيه والشوربات احيانا
    انا كل يوم تقريبا ادخل الموقع واتابع جديدك الطيب والانيق وحواراتك الممتعة الجميلة وطريقة سردك اللي فيها طيبة وحميمية حلوة
    وانا على وعدي لك بارسال وصفات خاصة لموقعك انا بس منتظرة قريبا اشتري كاميرا لتكون الصور واضحة لاني جوالي كاميرته انتهت صلاحيتها ..
    اتكلمت كتير جداااا سامحيني
    اكيد تعبتوا

    :upset :upset :upset
    اتركك في حفظ الله ورعايته وان شاء الله موفقة ومتالقة وحبايبك الحلوين بالف خير وبصحة وسعادة يارب
    اختك في الله ام ياسمين

  4. ام نور 10 December 2007

    عنجد شي روعةشي بيشهي كتير يسلم دياتك يا اخت منى على هالافكار الحلوة
    اشتهيت دوء هالنوع من المربى ,خصوصي انا كتير بحب المربى وعفكرة اكلت مربى الجوز عند نداء ويا الله شو طيب عنجد رهيب اما مربى الورد كمان شي غير شكل :p
    بس لفت نظري انو بيصير عصير البرتقال لا المونة وكتير حبيت اتعلم الطريقة خصوصي انو موسم البرتقال الان يا ريت اذاممكن تنزلي الطريقة لو سمحتي والف شكر

  5. تورتاية بالكريز 10 December 2007

    أختي الحبيبة منى ياريت اللهي رضى عليكي تقوليلي ولو بشكلتقريبي النسب اللي استخدمتيهايعني كل ملعقة بشر برتقال كم تحتا من عصير برتقال وسكرلاني خايفة ماتضبط معي لانها اول مرة وتسلمي يارب شكرا لك

  6. منى 11 December 2007

    مية أهلا و سهلا فيك أختي ام ياسمين :)

    بعد ما قرأت ردك ما بقى أعرف بأي كلمات جميلة ممكن رد عليك , و هادا كله بس من طيبة قلبك و اخلاقك و زووءك :)

    يا ريت لو كنت راسلتيني في لك كنت حليت لك المشكلة فوراً ;)

    أختي هدا المربى كتير سهل و إذا جربتيه رح ينجح أكيد إن شاء الله و ما دامك بتحبي البرتقال , فرح تحبي هل المربى كتير

    أختي كل مقدار من بشر البرتقال بتحطي له مقدار و نصف من السكر مع مقدار و نصف من العصير , أنا عملت 5 برتقالات و طلع المقدار معي تقريباً صحن زبادي صغير ;)

    أنا بانتظار وصفاتك ام ياسمين , و كلامك و ردك أسعدني جداً :)

  7. منى 11 December 2007

    هلا ام نور :)

    صحتين و هنا يا رب , لسا كمان لو تدوقي مربى البانجان ,, يممي

    خلص لازم تعمليلي زيارة مع ندا و دوقك كل هل المربيات الطيبة ;)

    هو مو عصير هو شراب , و من عيوني التنتين وصفته و لا أسهل و لا أطيب :)

  8. ام نور 13 December 2007

    نعم اخت منى قصدي شراب البرتقال حابي جربو وكمان شراب الورد اكيد بتعملو ما دام بتعملو مربى الورد :?

  9. منى 13 December 2007

    هلا ام نور :)

    أختي نحنا ما منعمل شراب الورد و لا حتى بيعرفوه بحلب :roll

    رح ضيف وصفة شراب البرتقال الاسبوع القادم اذا الله راد :)

  10. linda 10 February 2008

    منى جربت الوصفة وما زبطت و اكيد الغلط مني
    اول شي القشرة ضل فيها مرارة
    مع اني نقعتها بالمي و غيرت المي شي خمس مرات وفركتها منيح مشان تروح المرارة

    و انا ما برشتها انا قطعتها قطع رفيعة مشان هيك ما كانت تستوي نشف القطر وهي بعدها عم تعلك و مو منيحة
    و القطر توقعتو يسمك ضل تقريبا متل العصير بس اسمك بشي بسيط
    خايفة جرب كمنا مرة افشل و انا ما بحب كب اكل
    لانو هي ما بتتاكل
    اسعفيني
    :cry

  11. منى 11 February 2008

    هلا ليندا و الله شو زعلت , لان هل المربى بالذات سهل كتير :roll
    القشرة بقي فيها مرار معناها ما نقعتيها لفترة منيحة و عم نحكي هون عن يوميين أو تلاتة مو كم ساعة ..

    إذا قطعتيها قطع رفيعة أو بشرتيها مو مشكلة المهم أنك تكوني سلقتيها منيح , البشر بده سلق شوي لحتى يطرى أم متل ما عملتي فرح ياخد سلق أكتر شوي ;) ..

    أما قصة القطر هي ما عرفت لها سبب لأن هو رح يسمك متل القطر العادي و على كل فيك تزودي كمية السكر لحتى يصير بالسمك المطلوب

  12. linda 11 February 2008

    شفتي
    طلع كل الحئ عل البرش انا ما دخلني شاطرة وعين الله عليي :roll

    عاد لو تشوفي يومها كنت عم حضر لاعمل كوسا بلبن و كنت برا عم جيب غراض و عملت هاد المربى كتير تعبت لا و كنت فاتحة عيني قدام جوزي اني رح اعمل مربى و خاصة انو قلي انو كان ياكل منو كتير لما كان بالسويد
    شو انخزيت بس هيك صار :sigh
    خلص هل المرة رح اعملها و ان شالله تزبط معي
    عزبتك معي منى
    الله يخليلنا ياك يا حئ

  13. منى 11 February 2008

    :roll يلا زرعيها بدقني هل المرة و جربي حضريه مرة تانية و الله بيستاهل ..

    شو عزبتيني و ما عزبتيني , دا انت تؤمر ياا جميل ;)

  14. سارونات 17 July 2008

    السلام عليكم و رحمة الله و بركاته

    جازاك الله خيرا اختي منى على هالوصفة و كل الوصفات عنجد فكرة غريبة و شكل المربى كتير حلو ان شاء الله بالشتا الجايي بجربو
    بدي اسالك عن عصير البرتقال هل منعصر برتقال و منستعمل العصير او منضيفله مي و ازا منقدر نستعمل عصير جاهز

    اختي منى بدي مساعدتك ازا بتقدري بدي وصفة لتحضير مربى الاجاص دورت بالنت بس لهلا ما لقيت شي و كمان وصفات للاجاص لان عندي اجاص اخضر كتير و ما عرفت شو ساوي فيه

    بالتوفيق

    سلام

  15. منى 13 August 2008

    و عليكم أفضل السلام و اتم التسليم :)
    انا بستعمل عصير فريش , اطيب بكتير , ما بستعمل الجاهز ما دامه الطبيعي موجود..

    مربى الاجاص سويته من شي ثلاث أو اربع سنين ,. ان شاء الله بحضره هل السنة كمان و ببقى بنزل الك وصفته ;)

  16. لموسي 24 May 2009

    عن جد الذ من المربيات الفرنسيه والله عملته مرتين ومع العلم بكون عندي انواع كتيره من المربيات بتحضرها لي اختي الله يحفظها لي كل سنه بس هل مربى مابعرف عشقته خاصه مع التوست المحمص والزبده تسلم ايديك يااستاذه بدون مبالغه اشوف هل موقع احلى موقع بقدم الماكولات السوريه خاصه عاصولها

  17. منى 25 May 2009

    هلا لموسة :)
    الف هنا و الف صحة و عافية على كل لقمة من هل المربى , و انا متلك الصراحة بس ما انوجد هل المربى بتلاقيني بروح و بجي لحتى خلصه :zzz
    ألف شكر الك للكلام الجميل و لما يجي من واحدة الها نفسك الطيب فهادا كلام اعتز فيه جداً

  18. Amar 21 March 2010

    أول مرة أنفذ وصفه بشكل متسرع بدون قراءة التعليقات، لأن قراءة التعليقات تغنيني عن بعض الأخطاء وخاصة في المره الأولى، لذلك لم أنتبه أنه علي أن أنقع القشر لعدة أيام وقمت بنقعه لنص ساعه وغسلته ثلاث مرات، وقمت بالبشر بسرعه وبشكل عشوائي فبشرت أصبعي أيضا، المهم أنني غليت البشر والقطر ولم أحصل على قطر سميك فاستمريت بالغلي حتى اختفى العصير تقريبا، النتيجه بشر طري ولذيذ لكن حد أكثر من اللازم ولكن بدون قطر تقريبا ، فما السبب؟

  19. Noora 30 January 2011

    مرحبا أخت منى إذا بتريدي بدي أسألك على هل مربى أنا عملته وماظبط معي بدي أسألك كاسة قشر البرتقال كم كاسة عصير وسكر بدها.وكمان القشر كم مدة سلقه وألك جزيل الشكر

  20. Noora 16 March 2011

    جربت أعمل مربى قشر البرتقال مرة تانية لأني مصممة أتعلمه وهل مرة سلقت القشر منيح وحطيت لكل كاسة عصير كاستين سكر صحيح سمك شوي بس أخيرآ ظبط معي والحقيقة الطعمة بتستاهل التعب لهيك بنصح الكل مايستسلموا ويعملو هل مربى

  21. منى 17 March 2011

    هلا نورا :)
    و الله اسفة للتاخير بالرد, كمية السكر و العصير موجودة بالوصفة , يمكن ما انتبهتي عليها ;)

    الف الف صحة و هنا يا رب على البك , هادا واحد من وصفاتي المفضلة و لو شو ما اكل منه ما بشبع

  22. Noora 19 March 2011

    شكرآ على الرد منى أنا أول مرة طبقت المقادير متل مانك كاتبتيها يعني مقدار ونصف عصير مع مقدار سكر بس ماكان يسمك أكتر من ساعتين غلي وقسي القشر وماكان يسمك بقى مابعرف إذا في خربطة بالمقادير

  23. Lost spoon 13 May 2011

    يسعد أوقاتك يا منى، انشالله ربنا يهدي البال.

    منى، يا ترى نفس الطريقة ممكن تستعمل لقشر النارنج؟ هون في شجر بحمل نوع فاكهة بين النارنج والبرتقال. اللب مو طيب، بس القشر شكلو مغري. كنت عام فكر إن ممكن نفس الطريقة تمشي بشرط اني اتأكد إن المرار يختفي من البرش….شو رأيك؟

  24. Lost spoon 13 May 2011

    يسعد أوقاتك يا منى، انشالله ربنا يهدي البال.

    منى، يا ترى نفس الطريقة ممكن تستعمل لقشر النارنج؟ هون في شجر بحمل نوع فاكهة بين النارنج والبرتقال. اللب مو طيب، بس القشر شكلو مغري. كنت عام فكر إن ممكن نفس الطريقة تمشي بشرط اني اتأكد إن المرار يختفي من البرش….شو رأيك؟

  25. لينا 15 May 2014

    مرحبا منى كيفك انشالله تكوني بخير كان بدي اسئلك انت حاطه ثلات انواع لمربى البرتقال بالموقع وانا حابه اعملو بس ضعت ماعاد اعرف اي واحد اجرب بشر البرتقال ولا بشرالبرتقال مع الليمون ولا مربى البرتقال انا مو دايقه ولا واحد فيهن ياريت تقليلي اي واحد اطيب الشي وشو الفرق بيناتن واي واحد بتنصحيني اعملو ياريت تجاوبيني لانو جبت برتقال وناطره ردك لحتى ساويه وشكرا

    • منى 17 May 2014

      اهليين لينا :)
      من التلاتة انا بنصحك ببشر البرتقال ، انا بشوفه اطيب الشي و مااا بشبع منه ابدا ، مربى بشر الليمون و البرتقال كتير طيب كمان ، بس لازم يتحضر بعز الشتي لان لازم الليمون ين بوقته و الا بيمرر
      ايا سؤال تاني من عيوني

  26. لينا 17 May 2014

    شكرا كتير منى ع ردك خلص انا رح امشي بنصيحتك واعمل هاد المربى بس بدي اسئلك عصير البرتقال مو منجيبو من البرتقاله نفسها بعد مانبشرها منعصرها يعني هيك ولا انا غلطانه والمربى كيف رح يصير يعني بس عباره عن مرقه اللي هي القطر ولا رح يكون بشر البرتقال ظاهر
    شكرا كتير عنجد الله يعطيكي ليرضيكي ع قد ماعم تفيدينا

    • منى 18 May 2014

      ان شا الله بيكون ع زوقك و رح تاكليه و تاكلي اصابيعك وراه :)
      البرتقالة اول شي منبشرها و بعدها منعصرها و المربى رح يكون قطر و بشر متل كل المربيات
      خليلي روحك احلى و اغلى دعوة ، الله يبيض وجك دني و اخرة :)

  27. لينا 29 May 2014

    مرحبا يا اروع منى بالعالم انا عملت المربى واني اكل اصابيعي وراه لأ هي قليله كتييييير عن الشي اللي طلع معي وع اللي كنت متوقعتو المربى طلع شي غرااااااام شي بيجنن انا اول مره بدوقو وطار عقلي عليه انا كنت مشتهيه ع مربى الكباد وكتير هاد المربى بشبه طعم مربى الكباد وماتوقعت البشر يعطي هالطعمه الرائعه للمربى عنجدانا شو ماقلتلك واد ما شكرتك قليل الله يعطيكي مراد قلبك ويخليكي لجوزك واولادك عنجد انا بنصح كل الصبايا بالموقع يجربو هالمربى اللي اكتر من رائع
    شكرا كتييير لذوئك

    • منى 29 May 2014

      ابوووس روحك لينا , ان شا الله عافية و الف الف هنا يا روح قلبي , ما بتتخيي اديه انبسطت ان المربى عجبك , عن جد هادا هو الغرام :D

      صحتين و الف عافية , ممنونة وجودك و ممنوة ثقتك في , شكرا كتير :)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)