براونيز بكريما الخمس دقايق السرية
السمبوسك واحدة من أطيب و أشهى المقبلات الشامية الي لازم تكون حاضرة ع كل سفرة و بكل عزيمة , و هي وصفة ألذ و أسهل عجينة سمبوسك ممكن تحضريها في مطبخك , مقاديرها متوفرة دوما و الحشوات ما الهن نهاية , انت و زوءك و افكارك و ابتكارك . , جبنة , لحمة , دجاج , خضار , لحم بعجين , اجبان مشكلة , ما في حدود للحشوات .
مرات كتير بحضر الوصفة و برتب الحبات بعد ما تجهز على طبق مغطى بورق نايلون و بفرزهن , و بس ما تجمد القطع على الاخير بعود برتبهن بتوبروير و بفصل بين الطبقة و التانية بنايلون , وقت الي بدي بطلعهن و بخليهن برة التلاجة شي ربع ساعة و بعدها ع القلي فوراً .
العجينة سهلة كتير , انتبهي وقت تحضريها لهي الشغلة لحتى تنجح معك , حطي الطحين و الملح في وعاء و صبي فوقه الحليب المغلي , و مو بالعكس و الا رح تتشقق العجينة و تعزبك كتير .و وقت القلي لا تكتري القطع , حطي كم قطعة كل مرة لحتى تقرمش الحبات و يبقى لونها اشقر و بيفرفح القلب .
بالصحة و الهنا
2 كوب طحين
ربع كوب زيت زيتون أو زيت ذرة
ثلاث أرباع كوب حليب
رشة ملح
• يمزج الطحين و الملح في وعاء كبير ثم تعمل حفرة في منتصف الطحين .
• يوضع الحليب و الزيت في وعاء صغير على النار و يترك حتى يغلي , يصب المزيج في الحفرة و يقلب بالشوكة حتى تختلط السوائل بالطحين و يترك حتى تهدأ حرارته قليلاً ثم يفرك الطحين ثم يعجن الكل لمدة 5 دقائق حتى تتشكل لدينا عجينة ناعمة و متماسكة .
• إذا كانت العجينة جافة يمكن إضافة ملعقة كبيرة من الماء بالتدريج حتى الحصول على عجينة ناعمة , و إذا كانت العجينة لينة أكثر من المطلوب تضاف رشة من الطحين بالتدريج حتى الحصول على عجينة متماسكة لان كمية السائل تعتمد على نوعية الطحين و الفصل و لكن بصورة عامة كل كوب من السوائل يأخذ كوبان من الطحين .
• تلف العجينة بورق نايلون كي لا تجف أثناء العمل و يمكن تحضير العجينة مسبقاً و تركها مغطاة ثم استعمالها في اليوم التالي .
• تقطع العجينة إلى كرات صغيرة أو كبيرة حسب الذوق , ترق كل كرة بالشوبك حتى الحصول على دائرة و كل ما كانت العجينة أرق كانت السمبوسك ألذ و مقرمشة أكثر .
• تحشى الدوائر بحشوة حسب الرغبة ثم تقفل جيداً و يمكن استعمال آلة السمبوسك لتسهيل العمل و الحصول على أشكال جميلة و متناسقة للسمبوسك .
• تصف قطع السمبوسك على طبق مستو مغطى بنايلون كي لا تلصق .
• يوضع الزيت على نار متوسطة و يحمى ثم تقلى قطع السمبوسك حتى تشقر و تصبح ذهبية اللون .
• ترفع السمبوسك من الزيت و توضع على ورق ماص و تقدم ساخنة أو فاترة حسب الرغبة .
أفكار لحشوات السمبوسك :
- حشوة الجبنة : 2 كوب من الجبنة مع حبة بركة و القليل من الفليلفة الحمراء الناعمة أو النعناع أو البقدونس المفروم .
- حشوة اللحمة : تقلى بصلة كبيرة بالزيت حتى تشقر ثم يضاف ربع كيلو من اللحمة و يقلب حتى يجف مرقه و يتبل بالبهار المشكل و الملح , يبعد عن النار و يضاف جوز مجروش أو صنوبر محمص .
-
وصفات تانية ممكن تعجبك
(11 votes, average: 4.27 out of 5)
فايتة جوعانة
و بس شفت الوصفة جعت اكتر
يعطيكي العافية ست الستات
بس بدي اسألك ما بعرف ازا فهمت صح حطيتي الحليب بعد ما غلى مباشرة ولا تركتيه شوي ليصير فاتر
معلش استحمليني شوي
جزاك الله خير
الله يعافي قلبك و بدنك و ينولك كل الي ببالك
…
شوفي ليندا , منحط الحليب و الزيت على النار و بس ما غلوا مع بعض و قبل ما يفور الحليب نبعده عن النار و منحطه فوق الطحين ,,
هلا رح يصير المزيج سخن شوي لهيك فيك بالأول تخلطيهم بالشوكة و بس ما اختلطوا ببعضهم رح تخف درجة الحرارة و رح يصير فيك تعجنيهم بإيدك ..
و اي سؤال انا بخدمة الناس الطيبة
نورتي
كيفك اخت منى
اكلاتك بجننو جربت السمبوسك طيب كتير تسلم ايدك
بس كنت حابة اشترك بموقع لقمة طيبة ما عرفت كيف
ياريت تقليلي كيف لان عم يقلي الصفحة محظورة وشكرا الك
هلا حبيبتي , صحة و عافية و الف الف هنا ع قلبك
يا ترى قصدك صفحة لقمة طيبة ع الفيس بوك , ما كتير فهمت ..
الله يعطيك العافيه
أنا عادة ما بحط حليب والعجين بيكون بس بالماء ممكن تقوليلي شو ميزة الحليب يعني بيأثر على الطعمة ولا شو؟؟ظ
مية أهلا و سهلا فيك أخت ام عبادة أخت جديدة و عزيزة في الموقع
أختي الحليب حيعطيها طعم ألذو كمان حيكون لون العجين كاشف أكتر و بيشهي أكتر من لما بتستعملي الماء
أختي جربيها و ان شاء الله رح تعجبك كتير:)
الله يعطيك العافية .. الوصفة روعة .. جربتها اليوم وظبطت معي .. مشكووووووووورة أختي
مية اهلا و سهلا فيك نور
هنا و عوافي يا رب على قلبك و ان شاء الله تجربي غير و صفة و تكون على زووءك كمان 
تسلمى يداك يا منى بجدتجنن ان شاء الله بجربها
جربيها رانيا و ان شاء الله رح تعجبك كتير , هل الوصفة انتشرت بكل عيلتي و كل الي جربها حبهااا كتير
السلام عليكم و رحمة الله و بركاته
ما شاء الله الصورة راح تحكي و اللون بيجنن ان شاء الله راح جرباو فكرة الحليب بتعطيه طعم كتير حلو بس بدي اسال ازا جربتابالماي شو بعمل يعني بحط ماء فاتر و الزيت لحاله او بس بدل الحليب بالزيت و اتبع نفس الخطوات و كم راح تصير كمية الماء
و شو بالنسبة لتفريز العجينة هل منقدر نحفظها و كيف و كمان سمعت انهم بيحطو السمبوسك جاهزة بالفريزر و بعدين بس بيطلعوها و بيخلوها شوي و بيقلوها شو رايك
و كمان لو ممكن افكار لحشوات مختلفة للسمبوسك ضروري و كيف بتنعمل حشوة السبانخ
و الله حاسة حالي صايرة ثرثارة بس بلش احكي ما بقدر وقف مشان الله تسامحيني على اسئلتي لكتيرة
ربنا يوفقك و يسهل دربك
سلام
السلام عليكم ورحمة الله و بركاته
اختي منى بشو لزقتيها بطحين مخلوط مع ماء صح ازا هيك فكم بتكون كمية الطحين بالموازة مع الماء و هل لازم يكون الماء دافئ او بارد
كمان شو الافضل انو نقليها مباشرة او نخليها ترتاح و هل بالفترة بين الحشو و القلي بنخليها متل ما هي او نغطيها بنايلون حتى ما تنشف
سامحيني على الاسئلة لكتيره
بالتوفيق
سلام
السمبوسه بتجنن…تسلم إيدك يامنى …
جربتها و طلعت تحفة,و مش شربة زيت ولا حاجة, و مقرمشة و طعمها يجنن, الف شكر يا منى على الوصفة دي و تسلم ايدك
هلا سارونات
اذا جربتيه بالمي تبدلي كمية الحليب بالمي , فيك تحضري السمبوسك و تحفظيه في الفريزر و لما حابة تجربيه ممكن تطالعيه و تخليه ليفك عنه التلج بس شوي و بعدها تقليه
حشوة السبانخ نفس حشوة فطاير السبانخ و هي موجودة يقسم المعجنات و الخبز
اختي ما لزقتها بشي لحالها بتلزق مع بعضها و ما في داعي للعزاب ..
القلي متل ما بتحبي , اذا عندك عزيمة حضريها قبل بيوم و احفظيها فيالبراد مغطاية كتير منيح و بعدها ااقليها :zzz
هلا اختي قهوة
الله يسلمك و هنا و عافية يا قمر
هلا رنونة
الله يسلمك حبيتي , كتير انبسطت انها عجبتك و طلعت على زووءك
و كمان انبسطت انك خبرتيني , هناااا
العزيزة منى
أولاً كل عام وأنتِ بخير
ثانياً اسمحي لي أن أناديك صديقتي لأنك أصبحت بالفعل صديقتي دون أراك أو تريني
ثالثاً لا بد أن يضيفوا لأنواع الإدمان المعروفة عالمياً نوعاً جديداً اسمه إدمان موقع لقمة طيبة
رابعاًبيكفي حكي وإليك سؤالي واستفساري:
أبحث عن عجينة سمبوسك لا نقليها بل نخبزها بالفرن.
فأرجو المساعدة مع الشكر الجزيل سلفاً.
مية هلا ميسون:)
و انت بالف الف خير و ان شاء الله ينعاد عليك و كل عيلتك بالخير و البركة يا حق
خليلي عينك على الرد الحلو و انا صار الي فترة بشوف اسمك بين المتصفحين و كنت حابة اتعرف عليك اكتر
العجينة الوحيدة الي ممكن تنشوى و تطلع طيبة هي الباف باستري , صار جربت كتير بس ما عم تطلع طيبة كتير :roll
من فترة شفت وصفة فيها السمبوسك بينشوى و بعجينة عادية , اذا جربتها و طلعت طيبة اكيد ببقى بنزل الوصفة
نورتي اختي و ان شاء الله تبقى مبسوطة معنا و نشوفك دايما :zzz
تحياتي اخت منى انا بحب كتير السمبوسك شهيتيني عليها انا ساويتها مره بالزمانات لكن استوت من بره بس من جوه ما استوت ليش ما بعرف لكن رح جربها بطريتك ان شاء الله
هلا نور
ان شاء الله تجربيها و بتزبط معك , اما اذا استوت من برة و من جوى لا معناها ان النار كانت قوية كتير
مرحبا منى اليوم جربت السمبوسك وطلعت العجينه ممتازه وكتير طيبه :zzz بس بدي اسالك شو الفرق بين ان نضع الحليب والزيت على الطحين مباشرة دون مانخليه على النار
شكرا الك كتير
هلا نور
عافية و صحة و هنا
الغلي رح يخلي العجينة طرية و سخنة و تنمد معك أحسن و حتى بتفرق بعدها بالطعم , هي الطريقة رح تخلي فيهافقاعات صغيرة لمن تجي تقليها و بيطلع منظرهاو كمان طعمتها بتجنن
يسلمو يا احلى منى بلعالم
انا كتير كتير مشتهيه اعمل سمبوسك وتنجح معي
كل مرة ما بتطلع بلشكل اللي بتمناه هالمرة رح جرب طريقتك ويارب اعتمدها
ساويت دفتر وسميتواكلات لقمه طيبه والمبدعه منى :zzz وعم حط فيه هالوصفات الرائعه الله يسلم دياتك يارب
ان شاء الله تجربها و تشوفي شو سهلة هل العجينة و ممتازة من كل النواحي , خفيفة و مقرمشة و ما بتشرب زيت و لونها حلو , المهم انك تقليها على نار وسط لقوية و باذن الله بتطلع يممي
انا دخلت لاعمل السمبوسك اتذكرت اني نسيت اتشكرك عليه لما عملته المرة الماضية
لانه طلع كتير طيب وبشهي وتغير شكل عن الرقائق
خاصة انو انا عندي بالبيت اله شعبية كبيرة كتير
لدرجة انو جوزي بيقلي بكرة برمضان مافي داعي تطبخي بكفي سمبوسك وشوربة:zzz
مشان هيك صرت احاول اغير بالحشوات
يعني حشوة اللحمة صرت اضيفلها جزر مكعبات مسلوق وبازيلا وشوية بقدونس بتطلع كتيير كتيير طيبة
وصرت اعمل حشوة بطاطامسلوقة وجبنة صفرا
واذا عندك افكار تانية لحشوات ياريت تضيفيها
لانك متل مالك شايفة ادمان سمبوسك
مع كل الشكر الك ولجهودك
هنا و الف عافية و صحة يا حق .
فيكي كمان جبنة بيضا و قشقوان مع زعتر اخضر فريش
فيكي بصلة و لحمة و فليلفة و جزر مبشور
فيكي لحمة و بصل و جوز
انت بقى و افكارك و هادا بحر ما بيخلص
كل عام وانتم جميعا بالف خير
اليوم ان شاء الله رح جربها شكلها كتير زاكية
مرحبا أخت منى
مهما شكرتك ما راح أوفيك حقك .. وفضلك علي محفوظ طول العمر .. أخيراً عملت سمبوسك .. نفذت الوصفة حرفياً وعملت نص بلحمة ونص بجبنة .. طلع لذيذ جداً ومقرمش وأكتر من رائع وفرحتي به لا توصف .. بنفس الليلة عملت وصفتين الباتون ساليه والسمبوسك .. أعطوني ثقة كبيرة بالنفس وصار عندي إحساس أنو ما عاد في وصفة صعبة علي .. مشكلتي الوحيدة في الوصفتين كانت بتشكيل العجينة .. أصابع الباتون ساليه طلعت متل أغصان الشجر :grin وكرات عجينة السمبوسك تحولت معي تحت الشوبك إلى كل الأشكال التي تخطر ببالك إلا الدائرة :grin وبالنهاية طلعت قطع السمبوسك عجيبة غريبة .. على كل حال أنا ما كتير بيهمني الشكل .. المهم الطعم كان رائع .. والفكرة من أسهل ما يكون :zzz
بس عندي سؤال أختى بالنسبة للمعجنات .. ليش بعض العجائن بتحتاج خميرة وغيرها لأ
هلا حنان
اتمنى تجربيها و تكون يممي و زاكية و على زووءك
هلا ارام
بالاول الف صحة و هنا على السمبوسكات لو شو ما كان شكلهم يكون , و تاني شي برافو عليك ان هل الوصفات الي ممكن تعتبرها شوي صعبة , او بالاحرى جديدة , ما عم تلغي فكرة تجربتهم , و تالت شي لازم خبرك اني عن جد استمتع بقراءة تجاربك لان احسها بث حي و مباشر من جهة و من جهة تانية بتذكرني بحماستي لما بحضر وصفة لاول مرة و كيف ببقى اتنغم فيها اذا نجحت , أو حاكلها يعني حاكلها اذا نو .
بالنسبة للاشكال العجيبة , شايف السمبوسكات الي فوق و شكلهم حلو و مرتب و متكيات بفخر على الطبق , هدولة اكيد مو من ابداعاتي الهندسية , عندي قوالب بلاستيك كتير رخاص , يمكن التلاتة ب 25 ليرة , هنن الي بشتغل عليهم و في منهم متل الشكلين الي بالصورة , شي مثلث و شي نصف دائرة , لو جبتهم رح يسهلوا عليك كتير و بتطلع السمبوسك معك بتشبه السمبوسك , شكلا و طعما
العجائن الي نضيف الها الخميرة بيكون المطلوب منها ان يكون قوامها فيه شي متل الاسفنج , لهيك الخميرة رح تساعد و تعمل فقاعات بقلب العجين لحتى يطلع الشي الي عم نخبزه خفيف و نافش .
اخر الشي حاكيت خالو مروان و سالته عن الكتاب , طلعت انا فهمانة غلط و الي فكرته جزء تاني هو كتاب تاني , يعني الكتاب الي عندك هو الجزء الوحيد و ما في غيره و انا اسفة للخبطة الي اتسببت فيها :roll
السلام عليكم
أنا كتير بحبك ست منى وبحب كلماتك الحلوة
وكمان بحب أكلاتك الطيبة :roll
جربت السمبوسك وبنفس الخطوات
هو عم يطلع طيب منظره حلو كتير
لكن .. للأسف عم يطلع معجن شوي
:sigh
يا ترى لماذا
هلا رامة
يمكن عم يطلع معجن لان سميك , السمبوسك لازم ترقيه كتير و بهيك بيطلع مقرمش و طيب و مستحيل يكون في اي اثر للتعجين
العنوان مضحك لكنني قمت بعمل دراسة مقارنة بين عجينة السمبوسك التي في الموقع أي الطريقة السورية وبين عجينة الساموسا الهندية والنتيجة كالتالي:
العجينة السورية أطيب وأسهل بالتعامل وكانت مقرمشة وسطحها أملس.
العجينة الهندية التعامل معها صعب جدا وتحتاج لقوالب وكانت مقرمشة أيضا لكن سطحها ليس أملس.
السؤال المهم؟؟أذكر أن السمبوسك الذي تعده أمي يجب أن يكو ن مقرمش وسطحه ليس أملس والقشرة ليست رقيقة أي أقرب بالقوام للعجينة الهندية.
مقادير العجينة الهندية كما يلي:
1/2 cup all purpose flour
1/2 tablespoon samolina
1/4 teaspoon salt
1 tablespoons+ 1 teaspoon oil
1/4 cup -1tablespoon warm water
تعجن لمدة عشر دقائق وتترك لترتاح لعشرين دقيقة ثم يتم العمل بها.
شكرا.
مممم , على فكرة انا كتير بعمل اخت هل الدراسة لما بيكن جاي على بالي جرب وصفة جديدة .
السمبوسك يا قمر غير البرك بالسماكة , السمبوسك رقيق والبرك شوي اسمك , بس الاتنين ناعمين من برة و ملسين و مقرمشين :roll
فيكي تشوفي طريقتي بالسمبوسا الهندية [URL=http://www.l2ma.com/content/view/465/2/]على هل الرابط[/URL]
مممممم، أوكي اتفقنا انو سماكة السمبوسك غير سماكة البرك، السؤال هون ،هل في طريقة للبرك بحيث انو تنعمل مشوية بالفرن؟ وهل استعمال عجينة الشيشبرك مناسب للشوي بالفرن؟
وشكراً.
يسلمو على هالوصفة الحلوة
هلا قمر
اي في طريقة للبرك المشوية , اذا ربنا راد بنزلها قريب .
في ناس بتشوي الشيشبرك بالفرن , انا ما بحب اشويهن , هيك بحس بتتغير طعمة الشيشبرك
هلا حورية
الله يسلمك , ان شاء الله تجربيها و تكون متل ما بتحبي و اطيب
ماشاءالله فعلا اللون بيفتح النفس ان شاءالله راح اجربها برمضان او قبل واردلكو خبر وماتخافي خالتو منى راح ادعيلك انشاءالله
اه نسيت أسألك هلا لو عملتها العجينة وغلفتها وحطيتها بالفريزر بتفتفت او بتتغر؟ وحابة اعطي نصيحة لاخواتي اللي في المنتدى والك بدل ماتقلوها ممكن وهيا لسى عجينة ومحشيةممكن تدهن بالزيت سواء بالزيتون او الذزة وجه وضهر وبتنشوي شوي والنتيجة رووووعة طبعا اللي بتعمل رجيم واللي بيعانو من الكوليسترول العالي راح تنفعهم كتيير وماتنسوني من صالح دعائكم شيمو
كتير بتشهي شكرا
بس انا كتير عبتطلع معي العجينة سميكة
يعني بستخد الشوبك و بساويها رقيقة و بترجع بتسمك :cry
شو الحل برأيك؟
السلام عليكم ورحمة الله
لما مريت وقريت هالوصفة عدة مرات، كان كتير جاي عبالي أعملها بس اليوم لحتى قررت، رح قلك منى بصراحة أنا قلت لحالي: شو هالوصفة الغريبة؟ أوكي رح جرب بس ما اتوقع تطلع احسن من اللي انا بعملها، يله بجرب وما زبطت برجع بعمل عجينتي (طحين وماء وزيت وبيضة) .. ((صحي ليه مافي بيض هون؟)).
معاذ الله ما كون واثقة بوصفاتك :roll عسلامتك ..
حطيت الكميات تمام متل ما كاتبة … ولا لاقي سحر ! … العجينة لحالها انعجنت وما اخدت معي 30 ثانية ولحالها انعملت وما احتاجت شي زيادة لا طحين ولا مي. وجهزت محل فرد العجينة وكالعادة مسحت المحل والشوبك بالطحين … أتاري العجينة مااااااا بتلزق بشي .. معقووووول ؟
ويا عيني ما أحلى فردها، ما بترجع بعد الترقيق بالشوبك لتصغر كالعادة. يعني ما بعرف شو بدي قول، عملتون وقليتون وأكلناهون وأنا لسه مصدومة :upset
شكرا كتير كتير معلمة منى
وعالقلي يا عييييني عالعجينة، لا معجنة ولا مشربة زيت ومقرمشة وطرية ما قاسية وطيبة.
الله يجزيك كل الخير يا رب
بتعرفي ان ردك واحد من احلى الردود الي وصلتني
حسيت حالي معك و على فكرة كتير احيانا بيصير معي متلك , بجرب و انا مو كتير واثقة و ممكن احيانا النتيجة تفاجئني
الف الف هنا و صحة على البك و الب العيلة و اا كتير مبسوطة ان الوصفة عجبتك و كانت متل ما بتحبي و الف شكر الك لردك و كلمك الي اجى فيه و ربي دوما يديم المعروف
هلا رورو
بدك تطولي بالك عليها و ترقيها أكتر كمان لحتى تصير رقيقة متل ما بدك , ما الها غير حلة و كمان ممكن تخليها ترتاح شوي و ترجعي ترقيها
ياسلام يبدو اكلة ولا أطيب
ان شاء الله تجربيها و تطلع على زووءك
هلا شيمو
شكرا كتير للاضافة , ان شاء الله يستفادوا منها الاخوات
بينفع تشيليه للفريزر , جلديه و لما حابة تستعملي طالعة كم واحدة على منشفة مطبخ نظيفة و خليها نص ساعة مش اكتر او ااقل و اقليها :zzz
وأخيرا جربت الوصفة
فعلا طلعت روعة وطيبة
يسلم إيديك يارب ويجزيك الخير يامنى
ما شاء الله
شي قليته وشي بالفرن وكله طلع طيب
هش ومقرمش :eek
وبالنسبة للحشوات بحب أضيف للي ذكرتيه وذكرته الأخت شفاء
حشوة الدجاج المسخن
اللي هي بصلة ودجاج مسلوق وسماق وليمون وأنا بضيفلا بهار وشطة.
وحشوة الخضار المشكلة مع النقانق المقطع والقليل من الصويا صوص.
وحشوة الخضار(بصل وبطاطا مبشورة وجزر مبشور وملفوف مفروم ناعم وفليفلة خضرا) مع شرايح زيتون وجبنة شيدر مبشورة
حبيت أفيد بوصفاتي متل ما استفدت من الوصفات
شكرا للجميع :zzz
يعطيك العافيه مني
مثل ما خبرتك من قبل , أنا جربتها وكلمة روعه قليله عليها ..
جزاك الله خيرا
لكن اذا سمحتي , أنا حابة أشارك معكم بوصفاتي
لكن مش عارفه أبدأ منين , رجاء افادتي
هلا ام ندى
الف صحة و هنا يا رب على البك و الب مين داقها :zzz
ممكن تبعتي الوصفات عن طريق اتصل بنا و انا ان شاء الله رح انشرهم باسمك
هلا فيك اختي 8)
هلا فرفوشة
مممم , شكل هل الحشوات بيشهي و خصوصا الخضار ,مممم , رح جربها و خبرك ان شاء الله
شكرا كتير الك و ممنوتك على الاضافات اللذيذة
شكرا لك منى
جزاك الله خيرا
أنا بعت الوصفات مع الصور وان شاء الله يوصلوا
ويعجبوكي
جدا جدا رااااااائعه فوووق الوصف
تسللم ايديك
وتقبلوني ضيفه جديده عليكم :p
هلا ام ندى
الوصفات وصلوا و شي بيشهي , رح نزلهم بكرة ان شاء الله , الف الف شكر الك
هلا سدومة
مية اهلا و سهلا فيك أختي ببيتك و مطرحك نورتي و الف صحة و هنا على السمبوسك
اتمنى تبقي معنا على طول
مسا الورد والفل والياسمين عالجميع:
وسلامي الكبير لأختي منى امبارح باليل جربتها وكانت ممتازة هي أول مرة بعمل السمبوسك وأكيد مو أخر مرة
بتجنن هي العجينة زوجي كتير حبها يسلموا هالديات يا ست منى …….
هلا رهف
الف الف صحة و هنا على البك حبيبتي , كتير مبسوطة انها عجبتك , صحتبين و عافية
على فكرة اختك حكت مع اية , صحة و هنا على كل شي , ممنوتك لثقتك في :zzz
هلا اسراء
الف الف صحة و هنا على البك و الحمد لله انها عجبت الباشا
يسلمو ايديك اش هيك وصفة بتجنن برمضان كل يومين اسويه ماشاالله شقد حبوه الولاد وابوهم جزاك الله كل خير :grin
ان شاء الله صحتين و الف عافية يا رب بكل لقمة على البك و الب كل العيلة واحد واحد
مرحبى منى كيفك حبيبتي بدي انا عملت السمبوسة شي 3 مرات هي طلعت ممتازة من ناحية القرمشة والسهولة بالشغل بس حسيتا بتشرب زيت شوي واستغربت لما ئريت ردود الصبايا ئنو ابدا مابتشرب فئلت لاسئلك شو السبب يارترى- علما ئنو انا اخدي ئيدي كتير على عمل السمبوسة دائما بعمل سمبوسة البف بتطلع ناشفة من الزيت تماما بس بتغلبني شوي بئليا لانو بتنفخ بالزيت متل البالونة وبتصير مابتئلب معي للجهة التانية مشان تاخد لون فبصير بضل عم رش فوئا زيت مشان يصير لونا دهبي -مشان هيك طريئتك بالسمبوسة ريحتني كتير بالئلي بتئلب بسرعة وبتاخد لون بسرعة بس مشكلة ئنو حسيتا غابي زيت شوي وطبعا صفيتا مظبوط وحطيتا على ورق نشاف وكل شي -معلش اتحمليني طولت عليكي بعرف ريت كذا رد عم يسئلوكي على برك الجبني المئلية تبعت المطاعم بسوريا مو موجودة بالموقع لسا صح؟؟وشكرا كتير لئلك
عزيزتي منى عم استنى ردك وينك؟؟؟
هلا نورا
اتوقع انك زدت كمية القطع وقت القلي لان هل العجينة ما بتشرب زيت نهائيا
اكيد بتعرف ان الزيت لازم يكون حامي قبل ما نقلي السمبوسك , و اذا انت فرضا حطيتي 8 قطع كل مرة , قللي الكمية ل 5 قطع , و ان شاء الله بتكوني رضيانة عن النتيجة 
تكرم عينك اختي ,س مو هلا لان شوي مشغولة , باذن الله فترة تانية بنزل البرك
مية اهلا و سهلا فيك و ايا سؤال تاني من عيوني
هااااا
شو في :roll
هاى اول مشاركة اللى مع انى من متابعات موقعك من أول ما فتحتيه
ماشاء الله على هالابداع يسلموو دياتك يا قمر
هلا فيك مرجانة
منورة , ابقي طلي دوما و شرفينا برد حبيبتي
السلام عليكم : كيف صحتك اخت منى ان شاء الله تكوني بخير وكل اهل سورية بخير وامان يا رب وبشكرك ع هالدعوة الحلوة اولاً وع هالاكلات الطيبين كتير
المشكلة انو انا بحب الشغل بالمطبخ وهالاكلات كتير وما عم يمشي الحال مع الرجيم :sigh ؟؟؟شو بدنا نعمل دخيلك 8) والله شي بشهي ومو بس يم يمي ويممممممممممممممممممممممي ويمي يمممممممممي
السلام عليكم كيفك يا غالية ان شاء الله تكوني انت والاهل بخير يارب :roll انا جربت هالعجينة الطيبة وكمان عطيت الطريقة لأمي بس مشان الامانة قلتلها من الموقع وحكيتلها قديش حلو وهي كمان جربتها وبتقلك يسلمو ايديكي والله يجزيكي الخير ووصتني ابعتلك سلام .اليوم كمان خالتي داقتها عند امي وطلبت الطريقة 8) .طولت عليكي بس طمنينا عنك والله يفرجها آآآآآآآآآآآمين
تسلم ايديكي ست منى بالفعل العجينة رائعة وسريعةوأهم شي انها بتزبط وبتشتغلي فيها فورا على نفس المقادير
يسلوا ايديك يا رب اول مرة بجرب شي من النت بس عن جد شي بياخد العقل بعدين العجينة كتثر طرية قبل القلي يعني لاحالها بتحكيلك انا راح ازبط وبعد القلي مقرمشة [B]الله يطعميك ثمرات الجنة [/B]
حابه اضيب حشوه كتير طيبة هي بصل وزيت قلي وفليفة خضراء مبروشة وكزبره خضرا وبعدين نضيف عليهم الصنوبر المقلي كتثر طيبة دلتني عليها صاحبتي ( كتثرمعدله )الله يدلها على الخير
هلا مسك
الله يبل قلبك , على هل الدعوة الكريمة من اخت كريمة , انت كمان اختي
شكرا كتيررر للحشوة شكلها بيشهي كتير , ممنونتك حبيبتي و منورة الموقع
السلام عليكم شجعتوني حتى اجربها ان شاء الله اليوم بجربها واقلكم على النتيجة على المساء ان شاء الله
السلام عليكم
جربت اليوم السمبوسة وطلعت ماشاء الله عاشت ايدك اخت منى بارك الله بك
سبحان الله اني كنت من اجرب شي وصفة وما تظبط يصير عندي فد حالة احباط فظيعة بس من قريت الوصفة وقريت الردود اتشجعت كثير فبارك الله بكم جميعا والشكر الجزيل للاخت منى
يسلم هالايدين يامنى
مرحبا منى
كل وصفاتك بتاخد العقل، الله يعطيك العافية و يخليلنا ياكِ يارب…
ياريت تحطيلنا وصفة السمبوسك اللي بتنشوى بالفرن، لأنه خفيفة كتير على المعدة و خاصة لـرمضان… شكراً كتير إلك. و يسلموا إيديكِ على هالوصفات و الأفكار الجديدة.
نور
منى، شو الحل إذا كانت العجينة رخوة!؟ ضليت ضيف طحين و لسه هي رخوة!!؟؟ ما عرفت ليش ما ظبطت معي!؟ يا ريت ادليني شو أعمل لأنه و الله هلكت و ما مشي الحال
:upset
:cry
بس بدي ألفت نظرك إنه أنا عايشة بـأميركا
شكراً كتير سلفاً و رمضان مبارك على الجميع…
هلا نور
اتوقع انك سخنتي الحليب و الزين في قدر و على هل القدر ضفتي الطحين , و المفروض انك تحطي طحين في وعاء و تصبي عليه السائل المغلي , هل التفصولة الصغيرة بتعمل فرق , لان المقادير الي فوق ع التكة و بتزبط ان شا الله كنتي بالقمر
ايا سؤال تاني من عيوني
على فكرة عجينة هالسمبوسك بتاااخد العقل شوماحكيت قليل عليها… الله يسلم دياتك اخت منى..ماعذبتني العجينة أبدا وطلعت مقرمشة ولذيذة .. اما بالنسبة للموقع بشكل عام فانا من اشد المعجبات ومين مابيسألني من وين عم تجيبي هالوصفات بقلهم مالكم غير لقمة طيبة موقع توب بكل تفاصيله يعطيكي الف عافية..
الله يسلم هالايدين يارب من جد شي اكتر من رائع اليوم جربتا مع اني ماكنت واثقة كتير انو تنجح معي لانو اغلب الاحيان مابنجح معي الشي الجديد بس من جد العجينه ولا اروع من هيك يعني انا وعبشتغل فيا حبيت اطول وحبيت تكون الكميه اكتر وزوجي كتير عجبتو مع انو مابعجبو اي شي بس المزوء ياست منى مابيطلع منو الا كل الزوء يسلمو ايديكي والله يوفقك يارب على اهالاكلات اللذيذة
هلا ورد
كتير مبسوطة انك اتشجعتي و جربتيها و بالفعل ممكن احيانا ياف من تجربة شي جديد , الحمد لله انها كانت تمام و عجبت الباشا
منورة حبيبتي
هلا لولو
ممنوتك حبيبتي على ردك و كل الكلام الي فيه , ان شاء الله الف عافية على البك
شكرا للدعاية و الله يديم هل الود و ان شاء الله بتبقي معنا على طول
هلا نور
و الله حبيبتي صار جربت اكتر من مرة بس ما عم حب الننتيجة و عم يبقى المقلي غير , بس حاطة الفكرة بذهني و ان شاء الله تزبط معي قريب
هلا ام جواد
يسلم ايديكي مية هلا فيك
هلا اختي فستق و بندق
الحمد لله انها زبطت معك و كانت على زووءك , مبسوطة كتير انها عجبتك , هنا حبيبتي
هلا اريج
صحتين و الف عافية يا رب , و كتير انبسطت انها زبطت معك و مقاديرها كانت تمام , هنا و صحة
مرحبا ست منى ريتو تسلم هالايادي على هل الاكلات الطيبة والله مو عرفانة شلون بدي اتشكرك انا مو مصدقة انو في هيك موقع عن اكلاتنا الحلبية وفرتي علي تلفونات كتير لامي مشان اسألا عن الطبخات اللي ماكنت اعرف منا غير شلون بتتاكل هههه وهلا بالغربة عم ابدع بالطبخات لحالي والحمدلله عم اتعلم شوي شوي وبفضل هالموقع الحلو رحاكون شيف نظامي تقبشي قلبي شغلك مرتب ومنظوووم :grin
يسلمو هالايديييين
الله يخليك , اديه مبسوطة بردك و تواجدك معنا , منورة حبيبة قلبي , انا الي حابة اشكرك على ردك و كلامك و ان شاء الله تجربي من الوصفات و تكون متل طبخات ماماتك الغالية
حبيبتي شكرا عترحيبك من هلا ورايح الله يعينك بتليتي بوحدة نقاقة وفضولية بدي عزبك معي شوي الله يخليكي بالنسبة للبرغل فيني اعملو بالخلاط العادي مشان يجهز للكبة ؟
لانو بالغربة صعب نحصل ماكينة وجوزي من عشاق الكبة وحابة اعملو ياها ياريت تدليني عطريقة اعمل فيا البرغل ويسلمووو كتير
مدام منى حضرتك حلبية ولا شامية ؟ طبخك حلبي بس حكياتك شامية وبالحالتين انتي احلى منى بالعالم
:roll
هلا ام شهلا و مية السلامة بهل القامة
فيك تستعملي برغل ناعم كتير بتنقعيه بشوية مي باردة و بعدها بتضريبيه كم ضربة على محضرة الطعام و بتدعكيه مع البرغل , بتزبط بس مو تمام متل كبتنا
شكرا حبيبة قلبي , انا حلبية احية
السلام عليكم ان شاء الله اليوم رح جرب هالوصفة والبيتزا بالتتبيلة الخاصة وفطر وموزاريلا
من أول ما تزوجت لهلأ كلما بعمل السمبوسك المفروض تطن إدنك اليمين ع أد ما بذكرك بالخير وبقول لحالي والله هالطريقة خيييييييييلة..
لأنو استعمال الحليب بدل الماء بيعطي قرمشة رهيبة ..
يسلمو منمن
طبعاً حشوة الدجاج المنقوع بعصير ليمون كمان بتعطي نكهة رائعة وبتدوب بالتم دوبان
ألف شكر يا ست منى على كل شيء أولا على هالموقع الرائع يللي فبه شرح وافي وكافي وممكن المشاركة والاستفسار وكأنه الواحدة عم تحكي مع أختها وانشالله انت اخت عزيزة وغالية دائماً وثانياً على الوصفات الرائعة بارك الله بك وأزاح الكرب عنكم وعنا جميعاً بعرف أننا نمر الآن جميعاً بوقت عصيب وما بعرف متى لح يصحللك تجاوبيني بس أنا مقدرة الظروف بس حبيت احكي كلمتين حلوين الك والله يكون معك
:grin
وصفه سهله وان شاء الله اجربها
عاشت الايادي
اخت منى انا ما اعرفت كيف استعمل موقعك الجديد و اوصل للوصفات انا مشتركة معكم ,,,بدي طريقة الكبة مقلية اللي بتضيفي عليها سميد للعجينة
الموقع لسى مو خالص لهيك لسى مو مرتب
هادا رابط الوصفة http://l2ma.com/?p=1619
عوافي مقدما يا زهرة
كل عام وانت بخير اخت منى الحقيقة اكلاتك كلها بتشهي انا جربت السمبوسك وطلع بجنن اولادي جبو كتير الله يسلم ايديك
و انت بالف الف خير ياسمين , ان شا الله عافية ع قلبك و قلب هل الحلويين الصغيريين
الاخت منى الموقع الرسمي وليس موقعكم عالفيس بوك
أختي موقع لقمة طيبة هو موقع الرسمي .
ما بعرف اذا بتقصدي غير شي
يعطيكي العافية ست منى بيشهي.بس العجينة شقد بدها رياحة يعني كم ساعة وكمان كيف شكلتي السمبوسك هيك اذا بدي سكرو هيك بيطلعلوا حرف.وشكرا
جربتها و النتيجة رااااااااائعة
صحتين و الف عافية عروبة بكل لقمة , ريتو مطرح ما سرى مرى
ع ئلوبك
يعطيكي العافيه مدام منى
ان شا الله رح جربا بهاليومين و بوافيكي بالنتيجة
ان شا الله تجربيها و تكون ع زوقك
ست منى يعنيموقعك من المواقع اللي باخد فيو الوصفه و انا واثقه انو رح تنجح ما بعرف ليش عندي كل هالثقه بكلامك و وصفاتك بمكن لانو بتعطي بالتفصيل الممل ادق التفاصيلو هي شغله انا كتيررر بحبها و بتريحني بس هلق انا عندي مشكله بالسمبوسك الجبنه كلما بعمله و بقليه بتطلع الجبنه لبرا مع انو بستعمل يا اما القشقوان او الجبنه البيضا او الموزريلا الناشفه (بس ملاحظه انا عجينتي كاستين طحين عادي و كاسه فرخه و نص كاسه مازولا و كاسه مي مغليه و رشه ملح) عندك حل لقصه الجبنه اللي بتطلع لبرا وقت القلي ر بتخليني اكب زيت كتيرر لانو بيكون تبهدل من الجبنه))) :
اهلين منى
هي ثقة غالية عندي اكتر من ما بتتخيلي , ممنوتك كتير , الله يديم المودة يا حق
مشان الجبنة معناها الحبة عبتفتح وقت القلي , اما ما الك مسكرتيها مزبوط , أو الجبنة مي مصفاية منيح و نزلت مي خلت الحبات تفتح , أو عجينتك نفسها رح تفتح ع القلي
السلام عليكم منى ..الله يسلم ايديكي ..صار عملت هاعجينة اكتر من مرة والنتيجة رائعة ..وبتتميز انو السمبوسك بضل بيقرش حتى لتاني يوم ..بس في مشكلة اتكررت معي مرتين ..انو العجينة بعد شوي بتبدا بتشقشق ومابقا بتساعدي عالمد ..واذا مديتا السمبوسكات بيطلعلن ثقوب من النص …ماعبعرف ليش ..عجب ﻷنو عبحط الحليب الزيت سخنين كتير ..يعني لازم يبردوا شوي ولا مالاعلاقة ؟؟؟؟
صحتين و الف هنا رانو ع السمبوسكات
التشقق معناها كان في حرارة زيادة ع الطحين , اما انك حطيتي الطحين ع طنجرة الحليب بيقوم الطحين كانو بينطبخ , أو انك بعد ما ضفتي الحليب و الزيت و هنن مغليين على الطحين و حركتي شوي , عجنتيها و هي سخنة زيادة , و الاحتمال التالت انو ما عطيتيها وقت لترتاح
هاااا..هو الاحتمال التاني ..ﻷنو ما استنيتا لتبرد عجنتا فورا ﻷنو عجنتا بالعجانة ..فكرت انو الانتظار بس مشان الإيد …يسلمو كتير يامنى على ردك
ممتاز , وقت واحد يعرف السبب
ست منى وصفه السمبوسك رهيبه و مبارح جربتها و طلعت رائعه الله يجزيكي الخير يارب و جربت المعروك كتير طلع كويس و بدي جرب كل وصفاتك ان شالله لانو شكلهكل وصفاتك ائعه متلك شكرااااا كتيرررر
منورة يا منى , ان شا الله الف الف عافية و صحة يا قمر ع ل لقمة , ممنونة ثقتك في
يسلم دياتك والله يجعله بميزان حسناتك هالموقع .. جربتها وطيبة كتيييييير
صحتين و الف الف هنا يا رب ، ااامين
منورة غدير مية هلا فيك
السلام عليكم ورحمة الله وبركاته
مدام منى تسلم أيدك والله وصفة بتجنن جربتها وإن شاء الله بدي عيدها والكل لما داقوها قالولي كأنها رقايق من السوق
بس سؤالي بعد إذنك كأني حسيت الزيت تبعها كتير فيني قلل مقدار الزيت
والله يجزيك الخير
اهلا و سهلا حبيبتي
الف عافية و صحة ع قلبك و قلب كل الي داقها يا حق
مممم , جربي قللي معلقتين او تلاتة و شوفي شو بيصير معك , انا بالحقيقة ما جربت الا هيك , بس ممكن يطلع افضل
الله يعطيكي العافية ست منى أنا جربتها وكتير عجبتني سهلة وطيبة
واعطيت الوصفة لمعارفي
يا مية الف صحة و هنا و عافية يا قمر ، ع قلبك و قلب معارفك
ممنونة هل الثقة