براونيز بكريما الخمس دقايق السرية
نصف كيلو ورق عنب مسلوق و جاهز
2 كوب رز مصري
4 حبة متوسطة بصل
نصف كوب جوز مفروم
نصف كوب زيت زيتون
نصف كوب دبس رمان أو عصير ليمون أو أقل حسب الذوق
كوب ماء مغلي
بهارات اليالنجي:
ملعقة صغيرة بن
ملعقة كبيرة معجون بندورة
ملعقة كبيرة دبس فليلفة
نصف ملعقة كبيرة قرفة
ملعقة صغيرة نعناع
نصف ملعقة صغيرة بهار مشكل
ملعقة صغيرة فليلفة حمراء ناعمة
1 – 2 ملعقة صغيرة سكر ( بعد التذوق )
ملح حسب الرغبة
• يفرم البصل ناعماً ثم يقلى بنصف الزيت حتى يصبح شفافاً , يضاف الرز و يقلب لبضع دقائق أخرى حتى يصبح شفافاً أيضا .
• تضاف بهارات اليالنجي و تقلب مع الأرز ثم يضاف معجون البندورة و دبس الفليلفة و الماء المغلي و دبس الرمان و تغطى الطنجرة و تترك على نار هادئة لمدة 10 دقائق أو حتى يمتص الرز كل السائل .
• يضاف باقي زيت الزيتون و الجوز المقطع للرز , أصبحت حشوة اليالنجي جاهزة تترك حتى تبرد و يمكن أن تعدل البهارات و الحمض حسب الرغبة .
• تجهز الطنجرة التي سيطبخ فيها اليالنجي , توضع طبقة من شرحات البطاطا و البندورة أو بضع أوراق من ورق العنب في قاع الطنجرة و ذلك كي لا تعلق حبات اليالنجي .
• تمد ورقة عنب على طاولة العمل بحيث يكون الوجه الناعم ملاصق لطاولة العمل و الوجه الخشن هو الوجه الذي ستوضع عليه الحشوة , يوضع عليها ملعقة صغيرة من الحشوة و ترد عليها الأطراف .
• تلف الورقة كما ظاهر بالصورة مع ضرورة الشد إثناء اللف ثم ترتب في الطنجرة المجهزة , يجب أن يكون اصبع اليالنجي سميك قليلاً و قصير , بعكس طريقة لف اليبرق أو ورق العنب المحشي بالرز و اللحمة .
• تغطى أخر طبقة من اليالنجي بطبق واسع ثم يوضع عليها ثقل كي لا تفتح حبات اليالنجي أثناء الطبخ ثم تغمر بالماء المغلي و توضع على نار متوسطة و بعد أن تغلي تهدى النار و يترك اليالنجي حتى ينضج مدة ساعة أو ساعتين حسب نوعية ورق العنب , مع ضرورة اضافة المزيد من الماء المغلي إذا دعت الحاجة .
• أخر خطوة و هي خطوة مهمة جداً و سر من أسرار اليالنجي : بعد أن ينضج ورق العنب يبعد عن النار و يترك مغطى حتى يبرد كي يمتص كل المرق و يصبح طري و يذوب في الفم .
• يرتب اليالنجي في طبق التقديم و يغطى بورق نايلون لاصق حتى وقت التقديم .
أفكار و تنويعات :
• تذوقت مرة اليالنجي عند صديقتي و كان لذيذاً و مختلف قليلاً , سألتها عن الطريقة و أخبرتني أنها أضافت لقلية البصل حبة فليلفة حمراء و حبة فليلفة خضراء و ثلاث حبات من البندورة و بعد أن بردت الحشوة أضافت كوب من البقدونس مع الجوز , جربت طريقتها و كانت لذيذة أيضاً .
(5 votes, average: 3.40 out of 5)
اختي الكريمة بدي جرب هالطبق بس ما فهمت شغلة الرزيسلق مع البهارات وبعدان يلف بالورق بيكوت مستوي يعني ولا بيكون نص سوية وفي الاخير الرز بيطلع مستوي دايب ولا كيف لازم يطلع
أختي ام نور الحشوة طبخناها مع شوية مي لحتى نضمن ان البهارات و الصلصات امتزجت بشكل كامل و اتوزعت منيح على كل الرز
يعني حيكون الرز مستوي ربع استواء , و بعدها رح يكمل سواه مع ورق العنب ..
هلا رز اليالنجي ما بيكون مفلفل , بيكون طري و بيدوب دوبان في الفم
أتمنى أختي ان تجربيه و ان شاء الله يعجبك
و أي سؤال تاني أنا بالخدمة
فعلا مشكورة ورح قوي قلبي وجربها لان نحن في لبنان ما منعمل ابدا متل هل طريقة ومنسمي ورق عنب بزيت والحشوة عبارة عن رز وخضار بس انا بعد ما اكلت اليالانجي عند صديقتي الحلبية ما عاد عجبني متل ما نحن منعملو وانشالله رح جربو وبتمنى يظبط ,انا كتير بحب جرب اكلات وتعلمت كتير اكلات من اصدقائي الفرنسين والمغاربي والجزائرين
ان شاء الله رح يعجبك
فيك تقللي من كمية الحمض إذا كنت عم تجربي اليالنجي لأول مرة و تحطيها على ذوقك
أتمنى أختي أن تشاركي بطبق من الوصفات المغربية أو الجزائرية , بكون كتير ممنونة ليك
إذا جربتي اليالنجي أتمنى ان تخبريني ..
نورتي أختي
تكرم عينك اكيدبحب شارك بس وين بتحبي اكتب الوصفة على بريد الموقع وانت بتراجعيها وبتعطي رايك؟
أختي ابعتي الوصفة هون عن طريق اضافة تعليق و أنا بضيفها ..
هل الحل مبدئيا بس لحت نعمل وصلة لاضافة الاطباق
أنتظر مشاركتك أختي
لو سمحت اخت منى عندك طريقة الكروسان كتير حابي جربهابس ما عندي طريقة عم اطلب كتير بس انت كريمة ونحن منستاهل
تكرم عيونك أختي ام نور
انت الكريمة غاليتي و وصفتك هي أول مشاركة من زوار الموقع و أنا مبسوطة فيها كتير
تسلمي اختي والله يبارك فيكي بس انشالله يكون عجبك هالطبق ووصلت الفكرة لان انا كتبت متل مابنفذ الطريقة واذا اسا بتحبو جربت الحريرة اذا سامعة فيها وهي شوربة كتير مشهورة بالمغرب الغربي ولازم تكون موجودة على الفطور كل يوم برمضان وبتنعمل بلحمة او جاج كتير طيبة
ما شاء الله عليك أختي ام نور
شرح كافي و وافي و الله ..
انا بعمل الحريرة , بس اذا انت أخذتيها من صديقاتك المغربيات معناها من مصدر موثوق
الله يخليك اختي و تسلمي على وجودك الطيب في الموقع
السلام عليكم ورحمة الله وبركاته على فكرة انا صديقة ام نور الحلبية يلى داقت عندى هل الاكلات يسلم ايديك اخت منى على هل الاكلات والله شى بشهى بس رجاء ممكن اطلب منك طريقة الهيطليه لانه نحن هنا لايوجد محلات لبيعها والله عم نترحم على سلورة والف الف شكر [/LIST] :zzz :cry
يا هلا بنداء ما تبلى هالطلة يا رب نورت انت اخت عزيزة واعز كمان الله بيعلم اديش غالية عقلبي الله يخليكي عفكرة كمان انا كتير بحب الهيطلية وكنت بدي اطلبها وناوي جربها عفكرة نحن ما منعملا بلبنان انا عرفت بفرنسا
عفكرة الاخت نداء ما شالله شو نفس طيب عالاكل سألوني انا لان كل الاكلات الحلبية اكلتون عندها وعجبوني وحبيت اتعلم الاكل الحلبي
ما شاء الله عليك أخت نداء
و اتمنى ان تشاركي بأطباق من تحت دياتك أختي
هلا نداء
نور الموقع بأخت جديدة و متل ما وصلت أخبارك من قبل ما تجي ,, نفسك كتير طيب على الاكل
تكرم هل العينتين , الهيطلية ما في أسهل منها و مو مستاهلة تترحمي على سلورة
الله يسلم هالايدين ويخليلنا هالموقع والاكلات الطيبين كلون
منى و انا عندي طريئة اكلة وحيدة و ما بعرف غيرا تعلمتا من رفيئتي بالاردن بيخطرلي بتعرفيها بس حبيت اشارك بشغلة :roll
كمان ابعتلك ياها هون و انت بتشوفيها و بتنزليها؟
و اذا في عندك شي تعليئ او تعديل عليها نصحيني.
طبعا انا جربتا بنفسي يعني كمان عن تجربة وهي الفوتوتشيني
يااا سلام بدورة :eek
فتوتشيني مرة وااحدة
يلا انا بانتظار الطريقة بلكي بساويها شي يوم برمضان
مرحبا للجميع والله يا أخت منى عيلة الصابوني عيلة معروفة كتير عنا في حلب و انا كان عندي صديقات من مدرسة فوزي الجسري نفسي اتعرف عليك على كل حال اقبلوني اخت جديدة في المنتدى وانشاء الله نفيد و نستفيد
مية أهلا و سهلا فيك بتول
نور الموقع بأخت جديدة و عزيزة ..
ألف شكر ليك على الكلام الحلو
و ألف شكر ليك على تواجدك الطيب أختي
أنا و أخواتي كلنا كنا في فوزي الجسري , الدنيا صغيرة كتير
والله وصفة رائعة جدا جدا انا عملتها من ورا شيف لبناني بس مااضاف غير ملح وفلفل ابيض ودبس الرمان وانا ضفت من عندي البن وشوية بهار قليل مشكل عشان مايطغى على نكهة الحامض بس اياخت منى لي سؤال هل يمكن عمل دبس الفليفلة بالبيت لاني مش شامية اجد فقط في السوبرماركتات الكبيرة دبس الرمان بصعوبة اما دبس الفلفل غير موجود ابدا كنت اخلط بين اليبرق واليالنجي الله يباركلك على على معلوماتك الروعة يارب وتسلمي وان شاء الله ابعتلك وصفة جديدة قريبا يششرفني تكوني بموقعك الرائع جداااااااااااا
مية اهلا و سهلا فيك أختي تورتاية بالكريز
اسمك من زمان عاجبني كتير كتير
و اسعدني جدا تواجدك في الموقع و كلماتك الحلوة , الله يجبر بخاطرك أختي
دبس الفليلفة ممكن يتحضر بطريقتين و هلا وقت اعداده أختي
ممكن تدخلي لهذا [URL=http://www.l2ma.com/content/view/25/25/]الرابط[/URL]
أنتظر وصفتك أختي و الف شكر ليك مقدما , و يا ريت لو تكون من الوصفات المصرية اللذيذة
يعني ممكن سؤال غليظ…
بس مابدها ملح؟
ولا بلا ملح لانو انا بالطبخ يعني 4 تحت الصفر… :upset :p
وشغلة تانيه تقبريني..
هلق المرقة اضفلها شي حمض ولا لا؟
لانو المي مابتخفف حموضة الحشوة..
لاتواخذيني بس حامل وعم بتشهون عاليالنجي والحامض هههههههه فخايفه تروح الحموضه بالمرقه :zzz
:grin و الله حسيت فيك , و يا ريتك جنبي لابعتلك أطيب يالنجي , بيكفيك تعب الحمل
هلا اكيد بده ملح , بس المرق ما بقى بدها حمض , و كمان انت و زوءك و حسب دبس الرمان الي عندك ..
أحيانا بيكون في انواع مغشوشة بعصير الليمون لهيك بتشوفيها حامضة زيادة
يعني الدوق هو الأهم , بدوقي الحشوة و لازم تطلع متل ما بتحبي حمضها , لان اليالنجي رح يرجع و يمتص المرق
و اي سؤال تاني تكرم عيونك
لك الله يسلملي ياكي يارب
خلص حطيته عالنار يابتفلح يااما بدي بطل مهنة الطبخ وسلم الراية لزوجي ههههههههه :p
بقى بخبرك يا قمحة ياشعيرة
ادعيلي امانة
يعني جد الله يسلم ايديكي عهالمقادير مومعقول ماشاء الله مضبوطه عالحبه اخر حبة رز لاخر ورقة عنب…عن جد يسلم هالايدين حلو الواحد يلاقي هيك موقع في معلومات مكتوبة بامانة..الله يقويكي ويجزيكي الخير
كلك زووء أختي
عن جد شو انبسطت بكلامك , و هلا بقي علينا الدوق :roll
ان شاء الله يكون على زووءك , بس لا تنسي تتركيه بالمرق بعد ما تطفي النار ..
لان هدا هو سر اليالنجي الطيب , بتلاقي اليلانجيات رجعوا شربوا المرقة , و يم يميي
ياستي قمحه وطيبه كتير كتير :p
وسكبت لجارتي قام قالتلي مالي خبر بتعرفي تطبخي؟ههههههه
شايفه شو بيضتي وجهي الله يبيض وجهك يارب
ان شاء الله عوافي و هنا و صحة على طول يا رب
كتير منيح , ما دام اليالنجي نجح معك معناها بقية الطبخ مو مشكلة
الله يقومك بالسلامة انت و البي بي
اكلتي المفضله…
هنا بالكويت الدولمه تكون حلوة وحامضه يطبخونه بالتمر هندي و يضعون في الحشوه قليلا من السكر مع اللحمه المفرومة والخضار مع الزر ورب الطماطم
اما اليلانجي فنقةل عنه ورق عنب حامض
ساجرب طريقتك ان شاء الله (( جدولت اطباقي لاسبوع كامل هههه))
استغربت من اضافه البن.. ماسر اضافته؟؟
بالوصفه التي استعملها عاده تكون مكونه من بقدونس وطماطم وبصل ورز وملح وبهار وليمون وزيت زيتون ونعنع
هلا كوكو يا عسل
البن و القرفة هم السر كله , ما فيني خبرك إذا ما دقتي الطعم بنفسك , نحنا عنا اليالنجي هو بطعمة الحامض و الحلو من استعمال دبس الرمان مع السكر ..
أختي انا حتى احيانا بضيف أكتر بن , بحب طعمته كتيررر كتير , و أنا على فكرة مشهورة باليالنجي الي بعمله
إن شاء الله تجربيه و لا تنسي تخبريني شو صار معك
ياااالنجييي يالجني يالنجي
اول مره اذوق هاليالنجي.. طعمته شوي غير اللي متعوده اكله بس طيب جدا ولذيذ… والنكهه غامضه… انا سويته لزوجه اخي لانها تتوحم على ورق العنب .. ومفكره اسوي مقدار ثاني هالكم يوم
تسلم الايادي
الله يسلمك يا رب , مممم صحتين و هنا على قلبك و قلب مرت أخوكي
كتير انبسطت انك جربتيه و عجبك
منى انا مالي منتبهة انو انت رديتي علي من زمان مشان طريئة الفوتوتشيني :cry
والله عفوا..
اليوم رح ابعتلك ياها نشالله..
بس وئت عملتا ماصورتا للإسف :roll
اذا انت جربتيها و عجبتك نزلي الصورة اذا ممكن و اذا انا عملتا عن ئريب ببعتلك الصورة نشالله عنجد عفوا :sigh
ألى العزيزة منى أرجوإضافةوصفات وحلويات أكثر من المطبخ الشامي الأصيل وتكون الوصفة الأصلية للجدات وليست المعدلةمع بعض المعلومات الطريفةإذا وجدت عن الوصفة ليكون الموقع شبه موسوعة للتعرف على ثقافة وعادات بلد عزيز عليناويتميز عن باقي المواقع الأخرى وتسلم يديكي.
و لا يهمك بدورة
الطريقة وصلت و شي بيشهي كتيرر 
رح نزلها و تسلم دياتك
هلا فيك لارا
و هدا الي بعمله اختي الوصفات كلها اصلية و من فم الجدات و الحموات الحلوات ساخنة و بريحة الاصالة للمائدة 
اشكرك على ردك و على الثقة الي عطيتيني اياها , مية اهلا و سهلا
معلش أسأل سؤال غليظ شوي :roll ،
إذا ورقة العنب كبيرة ،الأفضل أستخدمها بحجمها الطبيعي ولا قسمها حتى تطلع الحبة صغيرة؟
هون رفقاتي لما عملتلهن اليبرق ،ما عجبهن حجم الحبة، طويييييلة ؛لأني عملتها على حجمها ،في حين هنن بقسموها 3 قطع .
برأيك شو الأحسن لليبرق واليالنجي؟
ما بعرف ايمان , انا بحياتي ما قسمت ورقة العنب , بحط الحشوة و بعدها بتحكم بالحبة بالحجم الي بدي يااها , و إذا ما عجبهن , معلش , يمكن مو متعوديين على يبرقنا , بس هو هيك اصوله طويل و ضعيف و اليالنجي قصير و سمين :grin
أختي الغزيزة مني .. حابة أسأل سؤال ؟ .. كيف نجهز ورق العنب الطازج ؟ أنا بعرف أتعامل مع الجاهز من السوبر ماركت بس ولا مرة اتعاملت مع الطازج يا ريت تفيديني .. ولكي مني كل التقدير
هلا نور , مو عارفة كيف أشكرك على اهتمامك و قرأتك للوصفات و أسئلتك التي أغنت الوصفة و نبهتني لأشيا لازمة
كل شي حابة تعرفيه عن ورق العنب فيك تشوفيه على [URL=http://www.l2ma.com/content/view/105/2/]هل الرابط[/URL]
نور الموقع بأخت غالية و عزيزة
أهلين أختي منى شو أخبارك أنشاء الله بخير
لهلأ مستغربة من اضافة البن مابعرف مابيعطي
مرارة لأني بدي اعمله هاليومين وشكرا
هلا حوراء
الحمد لله انا بفضل و خير من رب العالمين , لا تستغربي البن , هي مو اضافتي كل الناس عندنا بحلب بيحضروا اليالنجي بالبن و على كل فيك تجربي نص الكمية و تشوفي إذا بتعجبك , بس ان شاء الله رح تعجبك كتير :zzz
منى اذا بتريدي بدي اسألك عن طريقة طبخ البرغل بالتفصيل مع تحديد عيار البرغل و المي و مدة الطهي خاصة انو انا الفرن عندي مو متل أفران سوريا
الفرن عندي عبارة هن دوائر من الصاج
لا تضحكوا علي حبابين . انا متزوجة من جديد و ماني بسورية حتى اسال حدا و فتت عمواقع للطبخ كتير و بصراحة ما عجبني غير موقغك بمكن لانو نحن سوريين و النا نفس الطريقة بالطبخ
عفكرة انا من حماة و تزوجت لكندا
مشكورة شيف منى
هلا سوسو
البرغل و طريقتك بالتفصيل على هل [URL=http://www.l2ma.com/content/view/102]الرابط[/URL] , مية هلا فيك و بكل أهل حماة و ان شاء الله جازة الدهر , ينور الموقع فيك دايما أختي
السلام عليكم و رحمة الله وبركاته
اختي منى اليالنجي من زمان بدي ساويه بس خفت من النتيجة و الطعمة مع ان بعتقد ما عندي مشكلة باللف المهم قررت اني ساويه بكرا او اللي بعده ان شاء الله و انا راح استعمل ورق عنب من الشجرة و بعتقد ما راح ساوي نص الكمية لان كتير يمكن ربع الكمنية بيكونت مناسب كأول مرة و بعدين منشوف انا حسيت ورقات العنب اللي بالطبق :grin و طلعو26 فهل نص الكيلو فيه 26 ورقة او قديش تحتى قسم الكمية كمان ما راح حط دبس فليفلة فهل زيد من كمية الفليفلة الحخمرا الناعمة او ما في داعي و كمان شو فينا نحط تقل فوق الطبق و هل الطبق لحالو ما بيكفي تحتى ورق العنب ما يفتح كمان كيف بعرف انو خلص نضج
بعرف كترت اسئلة بس عن جد بدي ساويه و ما بدي اغلط بشي
بالتوفيق
سلام
هلا سارونات , قعدت تعدي اليالنجيات
ولي منيح ما كنت حطيت الطبخة كلها كنت دوختك :grin ..
شوفي هلا الحشوة لازم تعمليها و انتي مو صايمة لان لازم تدوقيها و تشوفي شو ناقصها , الطعمة رح تكون حلوة و حامظة بس طييييبة , ورق العنب من الشجرة بتغسلييه و بتسلقيه لكم دقيقة قبل الاستعمال بس لازم تنقي ورق طري , ما بعرف كيف الجو عندك , بس هلا عنا بسوريا ورق العنبما بقى ينفع لليالنجي بيكون صار كبير و قاسي و ورق اليالنجي او اليبرق لازم يكون طري , الطبخة بالصورةهي ااقل من نص الكمية لان سكبت للحبايب نص الطبخة و أكلت نص الطبخة التانية و انا عم دووق و اتنغم يعني تقريباً الظاهر بالصورة هو تلت الكمية , بعدها انت اعملي الي بيناسبك
زيدي كممية الفليلفة اذا ما رح تحطي دبس فليلفة بتعطيها نكهة أطيب , و التقل أكيد ما بيكفي الرز لحاله , ممكن تستعملي أي حجرة كبيرة تاخديها و تغسليها كتير منيح و بعدها بتحطيها فوق الصحن فوق اليالنجي , اذا كان بيتك على البحر ممكن تروحي على الشط و تنقي حجرة من الحجم الكبير و تتركيها دايما عندك للمحاشي , بعد تلات ارباع ساعة من ما يغلي المحشي بترفعي التقلية و بتطالعي واحدة و بتقسميها بالملعقة , إذا انقسمت معك بسهولة معناها نضج , إذا لأ معناها بدوه كمان , أنا السنة جاييني ورق قاسي شوي لهيك عم حط اليالنجي بطنجرة الضغط لمدة ساعة كاملة , بعدها بترك الطنجرة من دون ما افتحها لحتى تبرد , بس متل ما قلتلك أنا عرفانة شو عندي , اليالنجي عادة ما كتير بيطول يا دوب ساعة بس من دون طنجرة ضغط
ان شاء الله تجربيها و تعجبك و مية هلا سارونات
اختي منى اليالنجي لوحده قصة واذا كان على طريقة اهل حلب قصة ثانية واذا من يد الفنانة منى قصة ثالثة يعني ثلاث قصص ناجحة على التطبيق انشاء الله في اقرب فرصةيكون عندي حفلة شاي بعد رمضان
هلا منونة
خليلي عينك انت و قصصك و ردودكم الحلوة الي بتنعنش القلب :grin ان شاء الله تجربيها و يكون على زوءك
السلام عليكم و رحمة الله و بركاته
اختي منى جيت تساويه هلأ بس انتبهت انو ما في ملح يا ترى ما منحط ملح او نسيتي تكتبيه
ان شاء الله تدخلي و تجاوبيني قبل ما ساويه
بالتوفيق
سلام
هلا أختي , أكيد منضيف ملح , هلا رح عدل الوصفة , بس متل ما قلت الك لازم تساوييه بعد الافطار لان الحشوة بدها تدوقيها و تعدليها على زووءك , مثلا مو كل دبس الرمان بيحمض نفس الشي و هيك اشياء
السلام عليكم و رحمة الله و بركاته
الحمد و الشكر لله كنت حاطة ايدي على قلبي انو طعمتهم ما تضبط و الحمد لله ضبطو شو هاليالنجيات الحلوات الطيبات حبوهن كتيييير
صحيح هلأ الورق يبس بس لحقت على شوي على الشجرة و كتير فرحت فيهن و ان شاء الله بعملن بالمستقبل و يطلعو احلى و احلى
انا ضفت ملح قبل ما اقرا ردك مع انو من البديهي وضع الملح و لهيك يمكن ما حخطيتيه بس ما بعرف هيك شكيت و قلتي بلكي في غاية من عدم اضافة الملح و عملت بنصيحتك و دقت الحشوة بس قليلي ازا ساوينا الحشوة قبل بيوم و حطيناها بالبراد ما بيصيرلها شي مو
كمان ورق عنب الشجرة لما بتحطيه بما مغلي ل4 او 5 دقايق بيصير لونو يني فاتح و اللي بالصورة ظل اخر هل هالشي حسب الشجرة او شو و ورق العنب اللي ساويتيه هل كان مفرز او معلب او فريش لان اللون طالع بيجنن ما شاء الله
بالتوفيق
سلام
هلا و غلا أختي
صحة و هنا و الحمد لله انهم عجبوك , أكيد ممكن تعملي الحشوة قبل بيوم و سر اليالنجي الطيب بالحشوة الطيبة , أنا كتير احيان بحضر الحشوة بالليل و بجهز اليالنجي تاني يوم اختصارا للوقت 
ورق العنب ما بيصير لونه بني بيصير أخضر غامق متل مو ظاهر بالصورة , انا الورق جبته تازة و جهزته و فرزته و كل ما بيلزمني أطالع من الفريز و استعمله 
مية هلا فيك أختي
السلام عليكم و رحمة الله و بركاته
جازاك الله خيا اختي منى
انت قلتي انو فينا نستعمل هالحشوة للملفوف كمان بدي اعرف ازا بغير شي او لا
انا شفت وصفة محشي الملفوف باللحمة بس بالوقت الحاضر بدي ساويه من غير لحمة بقى بدي اعرف شو بغير و هل بسلق الملفوف بنفس طريقة اللي باللحمةو هل بيطلع طيب الملفوف بهالحشوة متل ما طلع ورق العنب
بالتوفيق
سلام
اكيد اختي نفس الطريقة , بتساقيه و بتقطعيه و بتحشيه و بيطلع كتيرر طيب , مين اطيب هي شغلة زووء انا بحب اليالنجي اكتر الشي بورق العنب , اما بقية البييت بالبانجان , بالملفوف طيب كتير بس رح يصير شغله اصعب
صباحك سكر
انا جربتوا امبارح مع شوربة العدس
طلع متل ماقلتي بدوب بالفم(يالاهي مااطيبه) وكل ما اكلت لقمة اتذكر كلمتك بدوب بالفم
انا اليالنجي كنت اعمله نفس مقاديرك تقريبا يعني البن ودبس الرمان وبضيف بقدونس وبندورة بس الفرق انه كان كلشي ني يعني ما كنت اطبخ شي عالنار
ومبارح كان عندي بطاطا كتييير صفيرة فحفرتا وحشيتا وحشيت بصل كمان وبانجان فطلع كتيييييييييير لذيذ
يسلمو ايديك انك عم تعطينا خلاصة تجربتك
وان شاء الله كله بكون بميزان حسناتك
بس
مممم , يا عيني على اليالنجي شو بمووت عليه و الله لما بيكون عندي منه ببقى بروح و بجي و بنقور لحتى يخلص
الف صحة و هنا على قلبك بكل لقمة و شو فكرة حلوة بالبطاطا و البصل , ان شاء الله ببقى جربه مرة تانية فيه
الشكر الك لردك و تواجدك الطيب و الغالي و مية هلا فيك شفاء
ياييييي يا منوش .. شي مغري جداً جداً ..
المشكلة إني لحالي بتكاسل ساويه بس مابقى في مجال للكسل .. فرط ريقي .. يسلمو إيدكي ربي :cry
ما بدها تتكاسلي و لا شي , هو سهل و ما بياخد وقت , يا رب تجربيه و يعجبك و تبقى خبريني
و على فكرة الي لفلفه طنجرة يبرق خرج عزيمة هل اليالنجي بيصفي ادامه لعبة :zzz
يا سلالالالالالالالالالالالالالالام يالنجي انا بموت على اليالنجي كتيييييييييييير بحبه بس بصراحة لما قرأت طريقتك لاقيتها متل طريقتي يللي تعلمتها من ماما بس انا بضيفله شوية بندورة خضراء وكمان شوية بقدونس وبهي الطريقة ما في داعب اضيف مي للرز لأنو الخضرة بتطلع ميتها وبتكون كافية ليتشرب الرز التوابل والنكهة بس في شغلة تانية انا بحض شوية دبس رمان مع عصير ليمون وملح لمرقة اليالنجي لأنو كتيير بحب اليالنجي يكون حامض بقى يا ترى لو عملت بطريقتك رح تخف حموضته ما هيك ؟يسلموا يا منونة والله إنك إم الزوق والفن عن جد الله يهني عيلتك فيك والله يجيزك الجنة على هل الموقع الحلو
الله يخليلي ياكي على هل الدعوة الحلوة , ان شاء الله الك متلها انت و كل الغوالي على قلبك
شوفي الحمض حسب الرغبة , بس لو تحطيه كله بالحشوة رح يطلع بياخد العقل , انا هل الطريقة اتعلمتها من جارتي , قصدي كل الحمض بالحشوة , كنت حط نصها بالحشوة و نصها مع المرقة و كانت تطلع طيبة , بس مرة دقت عندها يلانجي على اد مو تحفة خرج الواحد يتصور بجنبه :grin , المهم سألتها و خبرتني سرها . هلا بعد ما يغلي اليالنجي بشي عشر دقايق لازم تدوقي المرقة و تطلع حامضة و كانك ضايفتيلها حمض , اذ حسيتي ان بدها كمان فيكي تضيفي كمان
مرحبا حبيباتي وبالاخصمدام منى شكرا كثيير الك على هالموقع بجد شي بيشهي ورائع وانشالله منتعلم ونفيد ونستفيد مثل ما قالت الاخت انشالله تقبلوني وترحبو فيي انا مو كل هالقد تشدي ايدك قدامكن بس انشالله بالتوفيق
هلا رضاب
يا ستي شرفتي و نورتي و مية اهلا و سهلا فيك ,كلنا بالاول ما كنا نعرف كتير نطبخ , بس مرة عن مرة و تجربة ورا تجربة منصير , و ان شاء الله اذا انتي حابة تتعلمي رح تصيري اشطر واحدة حبيبتي
تسلمي يا منوشة القمر , ساويتو من المرة الماضية وطلع كتير طيب , حتى هداك اليوم رحنا على بيتزا هت أنا وجوزي وقلي اليالاني تبعك ما بيتقارن باللي عندن , بس لفت نظري شغلة عاملينا هيه بصل بس لونو صاير على أخضر شوي بس طعمتو حامضة وإلو زيت , يعني البصلة قاسمينا بالنص وحاطينا هيك
بقى اليوم ان شاء الله رح ساوي يالانجي لانو قاعدة لا عندي شغلة ولا عملة :grin بقى حبابة ابوس روحك خبريني احط بصل بدون ما اعملو شي ولا في بروتوكولات تانية :grin
يسلمو ليديكي على هالوصفه انا كنت اسويه بسو كل هالاضافات بنتي تحبه كتير بعد يومين جايين لعندي من حلب عطله عيد الحج سويتو بطريقتك طلع يجنن حمضت المرقه بعجون الحصرم وهلق خليته بالطنجره مع المرقه حتى يبرد متل ما قلتي الله يستر ما يفلش على قوله ماما مو مابيصير نخليه بالمرقه انا اول كنت اصفيه اول ماانزله عن النار لو خرباو فلش تكوني ضيعتيلي تعبي
هلا بشورة
ريتو الف الف صحة و هنا يا رب على كل لقمة , وهيك انبسطت كتير لان عجبت الباشا
بشورة ليكون قصدك على يالنجي البصل ؟ هلا هو نفس الطريقة و نفس الحشوة تمام و طريقة حشوه موجودة على[URL=http://www.l2ma.com/content/view/457/2/]هل الرابط[/URL]
هلا ام رومل
مية اهلا و سهلا فيك , نورتي و شرفتي الموقع و يا رب تبقي معنا على طول
أختي رح يطلع غير شكل ان شاء الله , بس المهم انك ما تشيلي التقلة من عليه و هو لا رح يفلش و لا شي , على مسؤوليتي ان شاء الله
عم استنى رايك
الله طلع يجنن و اجت بنتي من حلب و جنت عليه وبدها تاخد الباقي معها لحلب مشان يتنقرشو فيه
ان شاء الله ربي الف صحة و هنا , و ان شاء الله تكوني اكلتي عني كم قطعة , لان انا بمووت عليه
شكرا منى كل وصفاتك بتجنن وبشكر ام رومل بنت حماى اللي دلتني على هاد الموقع الظريف لانو وصفاتك من المطبخ السوري الحقيقي وكل المكونات الي بتحطيحا متوفره بمطبخنا وهاد اللي شدني للموقع وصرت مجربه كذا وصفه والحمدلله كلو زبط وطلع طيب كتير ويعطيكي العافيه :grin
مرسي كتير عالموقع الاكتر من رائع اخت منى لوتعرفي شقد فرحت لما عرفتو وحنيت لحلب واكلات حلب وخصوصا بالغربة والاكل الغريب نشالله راح جرب كل وصفاتك الحلوة وارجو تقبلوني اخت جديدة الكون بهالموقع الحلو
هلا نورا
الف صحة و هنا و عافية , كلك زووء , شرفتي انت و ام رومل و ان شاء الله تجربي كمان وصفات و يكونوا على زووءك
سلام للجميع و لمنى خاصة
لو تعرفي أديش انبسطت لما شفت هاليالنجيات
بس في عندي سؤال صغنون
ممكن اطبخ دولما نوعين بنفس الطنجرة
يعني انا خاطر عبالي أعملا بورق العنب و الملفوف
بصير حطن بطنجرة وحدة و اطبخن سوى يا ترى؟؟
اي اكيد بيصير , بس بدك تنتبهي للنوعية , يعني ورق العنب و الملفوف بياخدوا تقريبا نفس الوقت , الكوسا ما بياخد كتير , البصل بينفع نحطه مع ورق العنب و الملفوف , هيك
شكراً كتير على الرد منى
و شكراً أكتر عهالموقع الحلو
صرلي 4 تيام لزقانة فيه على قولة زوجي :grin
عم بحبش و اقرأ و شوف
ساويتلي كم شغلة و طلعت ماشي بالطبخ
ما اشبني شي الحمد لله :zzz
الله يوفقك يا رب و يقويكي لتساويلنا وصفات أطيب و أطيب
تسلمين يا اخت منى على الطبخة بس عندي سؤال لو سمحتي انت تقصدي البن (القهوة)ولا غير شي وشو طعمها بيكون باليالنجي يعني باين ولا شو افيدينا والله يوفقك للخير
هلا حساسية
اقصد فيه البن الي منعمل فيه قهوة , و هو رح يعطي نكهة خفيفة و مميزة كتير و هادا الي بيميز يالنجي اهل حلب عن ايا يالانجي تاني حضرتيه
هلا حياة
ان شاء الله تجربي وصفات كمان و كمان و كلهم يطلعوا يمييي , صحتين حبيبتي
بدي اسألك منى يعني منحط الرز بدون نقع ومنحمصه مع الزيت و كمان أنا بحب القهوة باليالنجي لتير بقى أنتي لما بتعمليه شقد بتحطي يعني ممكن حط معلقة كبيرة قهوة وألك جزيل الشكر
السلام عليكم اخت منى
انا متابعة للموقع على طول ’ وهو مرجع لالي كوني عروس جديدة ومتغربة فكل ما لزمني شي مامنة فيكي والله و وصار دربت كتير اكلات وبحذافيرها والحمد لله عم تظبط الله يقويكي يارب
بس اليوم جربت اليلانجي ’ الحشوة طلعت بتجنن طيبة ونظامية وعملتها بحذافيرها محسوووبة تمام ما شاء الله عليكي , بس لما خلص ودقته حست انو ناقصه كمان حموضة , هلأ ما بده نحط للمرقة اللي طبخناه فيها شي ؟! قالتلي امي لازم نحط كمان للمرقة اللي عم يغلي فيها دبس رمان وملح ونقطة زيت ؟ شو رايك ؟ :roll
الله يجزيكي الخير يارب
هلا نورا
اي منحط الرز من دون نقع و بس منحمصه , و مقدار البن مذكور بالوصفة حوالي ملعقة صغيرة
هلا امولة
ان شاء الله جازة الدهر و ان شاء الله تبقي معنا على طول و صحتين و هنا على كل شي جربتيه و طلع طيب
انا ما بحط للمرق شي ابدا لان المفروض ان الحشوة تحمض المرق , بس كمان حسب نوعية دبس الرمان الي عندك , اذا حسيتي ناقصة حمض ضيفيلهاشوي زيادة متل ما قالت ماماتك
سلامات يا منى
لو تعرفي شو انبسطت لما شفت ست بيت وتوب شيف متلك بتحط بن بحشوة اليلنجي….صحيح مالي شاطرة بلف الورق وبهربو مني الرزات، بس حشوتي معتبرة. ولما بقول اني حاطة معا بن، بدك تسمعي الضحك.
ومتل ما ماما، الله يطول عمرا، علمتني، بحط بقدونس، نعنع أخضر ويابس، وحبه صغيره فليفله خضرة، ومتل ما بتعرفي أكيد، الحشوه ممكن تتاكل لوحدة من كتر مو طيبه. شكلي راح ورط حالي بلف الورق اليوم
وبلش الحق الحشوه وهي عم تهرب من اليمين والشمال……ربي يسلم إديكي يا منى ويباركلك بكل لقمه عم تساعدينا فيا.
مرحبا أخت منى كيفك أنا هلق طفيت النار تحت اليالنجي وعمبنتظره ليبرد ويمتص المرق دقت من شوي وحدة طلعت طيبة كتيييييييييييير لك تسلميلي يارب عنجد نيالك عالدعوات اللي عمتجيك ماشاء الله فعلا ثوابك كبير انشالله والله شهيتيني أساوي موقع متلك بس المشكلة إني وقتها رح أسرقلك كل وصفاتك لأني صرت ما أطبخ شي قبل الرجوع لملاحظاتك حتى لو طبخة كنت طابختها قبل ومتعودة عليها كمان صرت أرجع لملاحظاتك فعلا شي رائع بس عندي سؤال انشالله وزن زوجك وولادك مثالي ولا شلون ماشاء الله لأن أنا بصراحة زوجي عوصفاتك اللذيذة ماشالله سمنان فصار يدايق من صحتو ويقلي لبقى تطبخي طبخ طيب وبالنسبة لليالنجي طبختو هلق لأن عندي ابني صغير عمرو 4 شهور ما بخليني أعمل شي بالنهار فلفيتو من شوي بالليل وطبختو وهلق خلص وانشالله أكيد رح يطلع طيب لأن نفذت وصفتك تمام وأنا بثق كتييييييييير بوصفاتك يسلمو كتير طولت عليكي مو هيك :grin
السلام عليكم ورحمة الله وبركاته
كيفكن ؟
ودئيت لماما عالماسنجر قلتلها: رجع موقع منى !
بعد ما بردت يعني 
.. بس ما مشكلة
مع اقتباس : “من منوشة خانم” ست الطباخين.
صرلي دهر بالضبط بدي اكتب رد !
بالصيف انشغلت بالسفريات الونقليات شي عبيت أهلي شي عسوريا لعند حماتي شي مدري شو، وعدي ما شاء الله من وئت ما عدا السبع أشهر صرت ملازمة لإلو وحركاتو بالبيت 24 ساعة.
بزماني أظن قرأت أنك منوشة عملتي الموقع لما قعدتي بالصبيت بعد ولادة ابنك الصغير؟ بدي اعرف كيف كنتي تلائي وئت ؟؟؟!!!!!!!!
كمان مبروك عرجعة الموقع، كنت كل يومشوف ما ظهر من بعد الاختفاء ؟! .. والف الحمد لله لما شفتو رجع نطيت وقلتلو لجوزي رجع رجع
:grin
المهم صحي غبت عن التعليقات وهيك، وما عدت عملت خلال هالأشهر تئريبا لا حلويات ولا أطباق جديدة، بس من فترة إجت بنت حماي عالإمارات وكان لازم ورجي مهارتي (ولأول مرة) أدام حدن من أهل زوجي بالسفرة .. واخترت المحشي (اللي طبعا جربتو عدة مرات وتعلمتو من منى خانم)، وقلت بجرب اليلانجي باعتبار زوجها بيموت عليه.
قريت الوصفة بالطول والعرض .. وجبت الغراض حطيتون أدامي، وشوف واستغرب .. أن معئول هيك الوصفة ؟!
طبعا قررت إعمل نص الكمية .. لا ومو بس هيك :grin هو عالأساس تجربة، لبين ما جوزي فاجأني أنه عزمون بهاليوم المسا !!! يعني يا بتلحئي يا ياس يا ما بتلحئي، منيح كنت طابخة المحشي أبل بيوم لأن كان ألبي محسسني.
المهم عملت الرز … وبصراحة أكلت نصو ! وهو نص مستوي … وقررت شي يوم إطبخو متل ما هو … من أد مو بيعئئئئئد، كبعا متل بائي الخوات استغربت وخفت من البن بس ما ترددت اعمل شي من اللي كاتبتو الست منى.
بس بصراحة ضاعفت كمية الدبس الرمان ومع هيك حسيتو مو حامض، بعدين قلت لحالي يا بنت انتي حامل وهلئ زوئك كلو فايت بالحيط هههه ما حتحسي بالحموضة بكل الاحوال. بعدين الضيوف قالوا: طعمة الدبس الرمان فايحة منها فوح !
المهم طلعت بتجنن بتجنن كتير زبطت رائعة :zzz وبتدوووووب بالتم عئولة منى.
بس زاد عندي شوية مي بسفل الطنجرة
طبعا دغري وزعت الوصفة عماما والاحباب
يسلمو دياتك يا رب
طمنينا عنك أهم الشي ؟؟
والسلام عليكم ورحمة الله
8)
[img]http://img850.imageshack.us/img850/904/myyalanji.jpg[/img]
ياي يامنوشة شو محبطة هلا انا بعرف اعمل يالنجي منيج وعملتو من قبل كزا مرة بس اليوم جبلي جوزي ورق عنب من السوق التركي هدول الفهايم حافظينو بالملح وانا مانتبهت لبعد مالفيتو كلو :sigh طبختو وطلع مرصوص وشكلو تمام ومستوي بس المصيبة انو مالح صبر مع اني ما ملحتو ابدا المشكلة اني كنت واعدة رفقاتي بالمعهد انو دوقهن ياه بس للاسف :cry راح الشغل عالفاضي :sigh
السلام عليكمممممممممم
هاي اول مشاركة الي هون بس مو اول مرة باخد وصفة من هالموقع الاكتر من راااااااااااااااااااااااائع
ان شاء الله بميزان حسناتك
المهم اليوم الصبح حماتي اعطتني ورق عنب و قلت ما الي غير وصفة منى اطبقها
واااااخ , لو كنتي حسيتي قبل الطبخ كنتي حطي شرايح بطاطا مع اليالنجي ,كانت شربت كل الملح و كان طلع تمام ..
يلا خيرها بغيرها
على فكرة ورق العنب لازم ينحفظ بالملح و لازم يكون مالح , بس اذا نقعتيه شوي بالمي بيمشي حاله
سلام
صباح الخير
انا مبارح حضرت هالاكلة و جوزي عجبه كتير و قالي اذا زاد خبيلي
بس طبعا ما زاد و طعميت اخواتي كل وحدة صحن صغير
ان شاء الله بميزان حسناتك
صباح الفل و الورد
صحتين و الف هنا على قلبك و قلب خواتك , الحمد لله انو عجبهن , و نورتي الموقع و شرفتيه يا عسل
تسلم ايدك هاي نفس وصفتي بالضبط وأنصح كل وحده ما جربتها تقوي ألبا وتجربها وفعلا متل ما التي القهوة ودبس الرمان بيعطيها طعم روعه يعطيكي الف عافية يامنى
الله يعافي قلبك ام مثنى
نورتي الموقع يا قمر
ست منى انا من زمان بتابع الموقع بس عالسيكت ههههه و جربت كذا طبخة و كلن تمام بس كنت دائما أستصعب اليلنجي لبين ما تشجعت و عملتو و يا سلاااااااام شي بيجنن عن جد يسلمو ايديكي يا ست منى و يعطيكي ألف عافية على هالوصفات
حتى انو جوزي صار يمزح و يقلي حبيتك أكتر بعد هاليلنجي الطيب ههههههههه
هههههههههههه الله يديمكن لبعض و يخليكن و يبارك بعيلتكن الحلوة
صحتين و الف هنا ع كل شي جربتيه و ظبط معك , ممنونة ثقتك في كتير