براونيز بكريما الخمس دقايق السرية
هل الوصفة الرووعة كل مطبخ بيشدها لاله , المطبخ الحلبي بيقلك هي من مطبخي , و الأرمني بيعلى صوته بيقول لااا هي من مطبخي , بيجي المطبخ التركي بيقلك زيحوا يمين و زيحوا يسار , الوصفة أصلها من عندي و الدليل اسمها التركي ( ıç ) ..
شو ما كان اسمها و اصلها و فصلها , هي من اطيب و الذ الوصفات و لازم تجروبها , و فيك تعتبريها مقبلات , أنا بعتبرها وجبة رئيسية , لان اكلات البرغل بتشبعني كتير .
بالصحة و الهنا
كوب برغل ناعم
ربع كوب زيت زيتون
بصلة متوسطة الحجم
ملعقة كبيرة رب البندورة
نصف ملعقة كبيرة دبس فليفلة
2 ملعقة كبيرة دبس رمان ( أو مزيج من دبس الرمان و عصير الليمون )
عصير ليمون حسب الرغبة
ملح
رشة كمون
3 حبة بندورة
1 عود صغير بصل أخضر
5 ملعقة كبيرة بقدونس
حفنة أو حفنتان نعناع طازج
• تفرم البندورة و البصل العادي و الأخضر و البقدونس و النعناع فرماً ناعماً جداً , ينقع البرغل بالماء الحار لمدة 5 دقائق ثم يصفى من الماء .
• يقلى البصل بنصف كمية الزيت حتى يطرى , يضاف البرغل و يقلب لمدة دقيقة ثم يضاف دبس الرمان و رب البندورة و دبس الفليفلة و الملح و الكمون و نصف كوب من الماء المغلي و يقلب على نار هادئة حتى يمتص الماء , يبعد القدر عن النار و يغطى و يترك حتى يبرد تماماً .
• بعد أن يبرد البرغل يدعك باليد لمدة 5 دقائق ثم تضاف البندورة و البقدونس و النعناع و البصل الأخضر و باقي الزيت و يقلب الإيتش ثم يسكب في طبق التقديم و يقدم بعد تزينه حسب الرغبة .
-
وصفات تانية ممكن تعجبك
(6 votes, average: 3.83 out of 5)
مره تذوقته بمطعم عندنا مشهور بالاكلات التركيه والارمنيه والحلبية اسمه سراي
وكانت لذيذه وطعمها مميز… وصرت اسمها التبوله الحمرة لاني نسيته ههههه
مشكووره حبيبتي
بصراحه هالموقع جد جد رائع واشكرك من اعماق قلبي على هالاطايب الموجوده
الله يخليك كوكو يا عسل و الله خجلتيني بهل الردود الحلوة , و صرت عم قول و عسى أن تكرهوا شيئا و هو خير لكم
بتعرفي و لا مرة خطر ببالي انها بتشبه التبولة مع انها بالفعل كتير بتشبهها :grin
انا كتير بحب الايتش بس مالي خبر بصير بدون ماكينة كبة جربتو اليوم طلع بجنن ابوس روحك يامنى على هالموقع جدماعم بقدر بدونو
يعني ان شاء الله رح اصير طباخة اذا تميت على هالهوس بالموقع
طبعا مع تصميمي ونفسي على الطبخ :grin
هلا يا نوارة
هنا و عوافي يا رب على قلبك , الحمد لله انه عجبك و على فكرة هي الطريقة الأصلية للأيتش اما طريقة ماكينة الكبة فهي اختراع حلبي
انت ما دام فيك عرق من الست غيثاء , فسنة تانية رح تحطيني بنص الطريق و ببقى بذكرك :zzz
لا بقى انتي ست الكل
ببقى بذكرك
هلا حبيبتي منى، يعيشو هالديات يا رب. مزبوط يا عسل، طريقتك هي الطريقة الرسمية للكيسير وبتلاقيها بالمواقع التركية بنفس الطريقة. بس الستات هون بتركيا صايرين يستسهلو ويعملوها عالسريع بطريقة بتشبه شوي التبولة تبعتنا. يعني من غير طبيخ عالنار. :roll بس بينقعو البرغل بماء سخنة لفترة كافية ليطرى ويبرد. وبعدين بيجبلوها زي الكبة بالإيد بالزيت والملح والبهارات ودبس الرمان وشوية رب بندورة. وبعدين بيضيفو الخضار وبيقلبوها كمان شوي وبيقدموها. هاي يا ستي هي الطريقة السريعة اللي عملتها قدامي بنت تركية. وعرفت كمان إنها وصفة بيعملوها مثلا الممرضات لما بيكونو مناوبين بشغلهن بالليل. لإنها وصفة مش محتاجة غاز وطبخ. :grin ويفضل تقديمها مع شراب اللبن العيران
ممممم , فكرة و الله سريعة كتير هيك ..
بتعرفي نحنا عندنا بحلب لسا بيديروا البرغل متل الكبة :upset لهيك هي الطريقة بالنسبة الي متل الصاروخ جنب طريقة امي :grin
اللة يصبحك بلخير شلونك اختي مني اللة يعطيك العافية علي الاتش كتييييييييييير طيب جارتي ارمنية كانت تحكيلي انو اما كنت تعملون اكلة بلبرغل كتير طيبة بس نسيان شلون واول مادخلت علي الموقع وشفتها عملتلها هي مفاجا ياللة شو انبسطت يسلمو وان لازم كل اسبوع اعملها مره : :grin
الف هنا و عافية على قلبك و قلب جارتك , يا ستي اعمليها و اتهني فيها مفيدة كتير و خصوصا هل البرغلات الي فيها :zzz
طيب سؤال.. معناها اذا عملنا كبة نية عادية بمقاديرها اللي تتضمن دبس بندورة ودبس فليفلة وبالاخير ضفنا دبس رمان وضفنا الخضار المطلوبة بيصير ايتش؟؟ هيك قصدكم بطريقة الماكينة؟؟
سلام حبيبتي منى وشكرا علىالموقع الرائع بدون مبالغه نحن منا الايتش غمس بس بورق العنب المسلوق جربيه كتير طيب معها
هلا ريما
لا مو هيك , هلا هنن بيشبهوا بعض , بس في اختلاف بالمقادير
هلا اختي مدام الصن
ممم , طيب كيف ما اكلاناه , وو حتى في من رفقاتي بياكلوه بالخس او الملفوف , و انا بحبه بكل الطرق لان البرغل من الاكلات المفضلة عندي
شكرا كتير للاضافة و منورة الموقع , شرفتينا
يعطيك العافية مدام منى
بدي أسأل ازا ممكن نستغني عن دبس الرمان ودبس الفليفلة ونستخدم بس الليمون؟؟؟
لا رح تصير غير شي , بتطلع طيبة بس مو ايتش
طيب فيني استغني عن دبس الفليفلة؟ . مو موجود عنا
شكرا
هلا اصولها بدبس الفليفلة , اذا مو موجود ممكن تستعملي فليفلة حمرا ناعمة لحتى تعطيها طعم الحر , بتطلع طيبة كتير , بس مو نفس الايتش
وجدتها..وجدتها وجدتها
وهي بوسة مووواه
الله حيووو منامينو لك الي اربعين سنة عم دور على هالاكلة ههه مع انو عمري 19
بس هي بابا الله يرحمو كان يعملا ونحن صغار ويسميا كفتة وكنت موت عليها وهلا عم حاول اتذكر كيف بتنعمل او اذا حدا بيعرفا وعبث تحاول
من فترة اكلتا عند رفيقتي تركية بس ولدانة ببلجيكا المشكلة انو لسا ماتعلمت احكي فرنسي حتى اسالا عليها
وهلا عم قول شو هاد ايتش والا المفاجأة بطلع اكلة الطفولة
الله حيو مرة تانية ونشالله الله بوفقك وبحميكي عقد ماعندك معجبات بهل الموقع
حبيبتة قلبي , ما بتعرفي ردك اديه اثر فيني , بتعرفي انبسطت انو رح ساعدك لحتى تعملي شي بتتذكري فيه باباتك , الله يرحم روحه و يرحم روح ابي كمان …
بوسات
مرحبا مدام منى قديش صرت قارية هالوصفة مع وصفة الايتش قد مابحب مكوناتون من البرغل ودبس الرمان والفليفلة وعصير الليمون ….حابة كتير جربا أكيد طعمتاعلى زوئي تماما بس هون بقبرص بستصعب جيب المكونات شوي متل دبس الفليفلة والبرغل الناعم,ياريت فيني حضرا بالبرغل الخشن.بس رح أعمل جهدي أمن المكونات وحضرا وبخبرك عن رأيي رح يكون أكيديممممممممي
شكرا ألك ياملكة النكهات والذوق
شكراً الك نور على هل الزوء كله , و تواجدك الطيب في الموقع ..
لا ما بيصير بالبرغل الخشن , بس غريب هلا بقبرص المفروض تتوفر هل الاشيا لان قريبة من تركيا ..
ان شا الله تجربيها و تكون الطعمة متل الي ببالك و رح استنى ر ايك
فيكي تخبريني عن الطريقة الحلبية للايتش يللي بتنفرم عالماكينة مشان جربا بالطريقتين.شكرا عم عزبك معي كتير,بس نرجع ع سورية ان شالله أختي بحلب متزوجة حلبي رح زورة وزور أختي التانية منى صابوني لاني حبيتك من غير ماشوفك عالصورة والتعليقات بس
بتنوريني نور و القلب ع القلب و الله
الطريقة الحلبية هي اننا مننقع البرغل و منجهزه متل الكبة و بعدها منفرمه على ماكينة الكبة و بعدها منحمضه بدبس الرمان و نكمل الوصفة عادي
شكرا كتيير على هالوصفة يامنى جربتا وطلعت كتير طيبة بس كتير حدي لأنو دبس الفليفلة اللي عندي شغل ايدي وهاالسنة طلع معي حد كتير وانا حطيت المقدار تماما متل ماهوي بس شو بدك بالحكلي أكلي غير شكل.
غير شكل و الله , فرط ريقي من الوصف و الحد , يم يم
الف هنا و مية عافية على قلبك يا رب
يسلمو كتير على كل الوصفات اللي طالعين من ذووق عالي أنا متابعة إلك بصمت وطبقت كتيير من وصفاتك طيبين…
تقبلي احترامي اخت منى …
نورتي اختي ام سارة وشرفتي وكسر الصمت اسعدني ^_^