بوفيه مفتوح فطور سوري


         وصفة : منى                 2009/04/11                 24 تعليقات
بوفيه مفتوح فطور سوري

العزيمة كانت لـحوالي 15 شخص و السفرة مو كلها من شغلي , في الفول بحمض و الفول بطحينة هدولة جاهزيين مع الفلافل كمان لأن كان صعب ااقليهم مع الضيوف و في كمان شعيبيات بالقشطة المعتبرة , قشطة أذار .

الوصفات من فوق لتحت :

مناقيش بالزعتر بس انا ما عملتهم مناقيش صغار , عملت صينية كاملة
فول بحمض
بندورة مفرومة و صحن خضرة مشكل فيه تعناع و فجل و فليلفة لزوم الفول و الفلافل
فلافل , و هي طريقة الي بحضرها فيهن بالعادة
حمص
مامونية
بيض مسلوق
لبنة
سلطة بطاطا, بس من دون مايونيز
فول بالطحينة
شعيبيات
سلطة زعتر أخضر بالجبنة
سلطة زيتون
صحن مربى مشكل فيه
مربى الورد
مربى الفريز
مرملاد البرتقال و الليمون
مربى المشمش الممروس
مربى المشمش

صحن جبنة مشكل , حلوم و بيضاء حلبية و مشلشلة
و صحن خيار شرحات
طبق زبدة
كروسانات , بس خفيفة من عجينة أمي و لف أية
صحن خبز تازة من الفرن مع خبز باكيت و صمون


هي صورة من الطرف التاني



و متل ما خبرتكم بالعادة لازم انسالي شي شغلة و الضحية اليوم كان المكدوس و العطون , بس يا ريت بس على المكدوس , الي صار اني كنت محضرة صينية بيتزا مدعومة بالفطر و الجبنة الموتزاريلا و القشقوان .

بعد ما خبزتها و جهزتها حطيتها بالفرن لوقت ما جهز بقية الطاولة و من العبطة و الشغل , و كمان التصوير , صرت شم شي محروق , بس سبحان الله راح عن بالي , يمكن لأن المطبخ كان قايم و قاعد و الناس بكل محل

ماما و أخت زوجي هلا كانوا عم يحكوا ادام الفرن , و انا و عم روح و اجي و علقلي بشي كلمةعلى حديثهم و نضحك , و أنا قول لحاليكأنه في شي عم يحترق ! ا

هي سفرتنا و هي فطورنا السوري , اتفضلوا يا حبايب و ريتو الف صحة و هنا
  • وصفات تانية ممكن تعجبك


التعليقات

  1. قهوه مُره 11 April 2009

    السلام عليكم…هالمره أنا أول وحده بالتعليق..زكرتيني بأيام الشام.الله يعطيكي العافيه بس ليش مو حاطه التسئيه..إزا مافيها سآله إتعلميني تسئية الزيت والسممنه…وجزاك الله خير :)

  2. ميساء 11 April 2009

    شو هاد يا ميمو الله يسلم ايديكي تعيشي وتعملي عزايم انشا الله بيتك بيضل عامر بجمعات الفرح يارب بوجود زوجك وأولادك وأهللك ومشان البيتزا يلا ستي بسيطة فداكي ما شاء الله في بدائل أطيب :zzz

  3. غيث 11 April 2009

    بالهنا ان شاء الله وصحة على قلب كل مين اكل والله شهيتيني اكون معكم انا كتير بحب اكلات الفطوراللي سميتيه سوري فعلا كلنا الحلبية بالذات لنا نفس التكتيكات بالفطور فبيطلع بيشهي الحمد لله على نعمة الذوق بالموائد وانا كتير بيلفت نظري التكتكة بالمائدة اكتر من تنوع الاشكال خيتو انا بحب الترتيب والنظافة والنفنفةالله يسلم هالايدين اللي مرتبة ومتفننة فعلا الذوق واضح فيها شكرا منى على تذكيري بترتيباتنا بحلب لما نجتمع عند ماماتي او عند حدى فينا انا واخوتي هيك بيكون الترتيب وخاصة عند ست الكل ماماتي الله يخليلي ياها والله حنيت ودمعت عيوني الله يسامحك ميمو والله يخليكم لبعض بجمعتكم الحلوة

  4. zsoukar 11 April 2009

    ان شاء الله الف هنا والله يسلم ايدين يلي اشتغلت والله بعد الاكل السوري مافي .ماشاء الله عليكي :)

  5. ام عمر 11 April 2009

    بسم الله ما شاء الله روعة تسلم ايدك

  6. dado 11 April 2009

    إي شو هالفطور يا منوش.. والله ولا فنادق الخمس نجوم.. ومتل ما قلتي فيه ما لذ وطاب من الأطباق يلي ما بينشبع منها.
    صحيح إنو في كتير أطباق ما بتتأمن هون.. بس كمان في أفكار كتير حلوة للفطور.. وهيك شجعتيني إني إعملي شي فطور سوري لرفقاتي ;)
    بس كأنو في بالصورة حمص وكرواسان.. وما ذكرتيهن.. ولا أنا زاغ نظري عكتر مو الصورة حلوة؟ :eek

  7. عبير 12 April 2009

    الله عليك يامنى شو هالسفرة اللي بتطير العقل :eek فعلا روعة بتشهي وبتخلي اللي عامل ريجيم بياكل وما بيسال لان طريقة التقديم كمان رائعة والعين بتاكل قبل التم :p والله بيعطيك العافية انا حبيت موقعك كتير وحطيتو عندي الصفحة الرئيسية 0 بتمنالك التقدم الدائم والمزيد من النجاح :) [B]null[/B][B]null[/B][LIST][LIST][*]

  8. رندوش 12 April 2009

    ما شاء الله يا منى دائما مبدعه
    انا من مؤيدي الافطار وسفره للجمعات
    بحب دائما صديقاتي يزوروني بالافطار
    تسلمي افكار رائعه ولازم شغلات
    تنكد على الواحد مع العجقه بس
    فداك يا عسل سفره عامره دائما :grin :grin :upset

  9. DOUHA 12 April 2009

    شي بيشهي منى سفرة شيك
    برافو عليكي :p

  10. رنا 12 April 2009

    ماشاء الله حولك وحواليكي شي مرتب كتير واكتر من رائع الله يقويكي يارب ;)
    اكتر شي غرف قلبي ع صحن المامونية والمربيات :zzz شي لذيذ لذيذ لذيييييييييييييييييييييذ

  11. Iman 12 April 2009

    بسم الله ما شاء الله يا منى. الله يعطيكم الصحه. عنجد شي بيبيض الوجه. سلم هالايدين و ريتو هالبيت يضل عامر يا رب

  12. نادين 12 April 2009

    امممممممممممم شي ظريف وبيفتح النفس والله احترت اجي لعندك عالفطور ؟؟ ولا الغدا؟؟او العشا؟؟؟
    بس المهم ما تنسيلي البيتزا بالفرن او المكدوس لانو كتييييييييييييييييير بحبهم
    يسلم ايدكي وكلو شي ظريف

  13. larooo 12 April 2009

    مممممممممممممممم
    سفرة غييييييييير شكل ماشاء الله
    بتفتح النفس …
    انا بحب كلشي محطوط عليها
    :upset :x
    منيح ماكنت موجودة ..كنت ماخليت شي لحدا
    الله يعطيكي العافية

  14. سوسنة 12 April 2009

    شووو هاد شي حلووو

    كتير :eek

    ماشاء الله اطيب فطور بالدنيا

    شي بشهي

    يسلمو عاالاكلات

  15. ام دانية 14 April 2009

    يسلم هل الديات ماشاءالله المنظر بشهي يعطيكي العافية يعني على قولت الحلبية شم ولا دوق وعلى قولت الست منى تفرج ولا دوق :cry

  16. منى 15 April 2009

    هلا فيكم اخواتي واحدة واحدة و فردا فردا , نورتونا و شرفتونا و لو تعرفوا ردودكم شو بتسعدني ..

    يلا , شي مرة الا ما اعزم كل الغوالي على قلبي عزيمة حقيقية , مو شوف و لا تدوق :p

  17. dania 29 April 2009

    هاي انا كمان من سوريا من وين انتي انا من حلب وطبعا لسه عزايم الغذاء احلى بككتير

  18. منى 29 April 2009

    هلا دانية :)
    و انا من حلب طبعاً و ممكن تشوفي عزايم الغدا بالمواضيع الي جنب هل الموضوع :zzz

    نورتي

  19. ق و ت 14 April 2010

    يعطيكي العافيه

  20. ق و ت 14 April 2010

    يعطيكي العافيه
    روووووووووعه

  21. منى 15 April 2010

    الله يعافيك :) مية اهلا و سهلا فيك نورتي اختي 8)

  22. na3oom 19 May 2010

    كيف أخبارك منوش
    أن شاء الله راح أعمل فطور سوري هون لرفقات أختي بكندا من بعد إذنك ممكن طريقة الفول بحمض
    واذا في أفكار تانية بكون ممنونة كتير
    على فكرة صار شفتك مرتين بمنامي إني زرتك بحلب ودقت من أكلاتك الطيبة
    بس من شان تعرفي معزتك عندي حتى لو ما شفتك وأهمية موقعك في عقلي الباطن

  23. منى 4 June 2010

    هلا اختي :)
    اغلب الافكار موجودة هون , و الفول بيتحضر بطريقتين
    بالطحينة[URL=http://www.l2ma.com/content/view/621]على هل الرابط[/URL]

    و بالحمض [URL=http://www.l2ma.com/content/view/620]على هل الرابط[/URL]

    الله يديم المحبة و المعزة دوما :zzz و ان شاء الله ميسرة عزيمتك :)

    خبريني شو بيصير معك

  24. رانيا88 2 February 2012

    مرحبا ست منى بصراحة انا سفت طريقة لف الكروسان بس بعد ما تقطعي المستطيل لمثلثات كل واحدة بتصير كروسان وشلون بتلفيهايا ريت تفصليلنا الطريقة اكتر بالصور لو سمحت.تسلم ايديكي

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)