بيستو


         وصفة : منى                 2012/10/11                 6 تعليقات
بيستو

كنز المطبخ الايطالي الي طار و ملى الدني , ريحان و صنوبر و بارمجان و زيت زيتون , مزيج مستحيل ما يكون طيب , مستحيل ما يضيف نكهة روعة لكل طبق بينضاف اله , معكرونة , معجنات , سندويشات , ايا شي بيخطر ببالك ممكن تضيفله البيستو , حتى البيض بالبيستو بيطلع خيلة .

في اخر كل صيفية بحضر كمية كبيرة من البيستو و بعبيه بمرطبانات صغيرة , ريحته و لونه و طعمه رح تخلي ايا وصفة بالشتي منعنشة بريحة الصيف . بيكفيني طول الشتوية لحتى ارجع ازرعه بالربيع و يرجع يطلع .

الحلو كمان بالريحان انو كل ما قطفتي منه أكتر بيشتغل أكتر , نبتة كريمة بنكهتها و بريحتها و كمان بعطائها و مو بس هيك , نفس النبتة بتعطيكي بذورها لحتى ترجع تنبت السنة الجاية و هل المعلومة خبرتني عنها الست غالية. علمتني وصفتها للكبة النية و كمان علمتني كيف ازرع الريحان , باخر الصيفية بتزهر الريحانة زهرات صغيرة و بعدها بتنشف و بيصير فيها بذور صغيرة , هل العود لما بينشف على الاخر بقصه و بحتفظ فيه في مكان جاف , بشهر شباط بهز هل الاعواد بشكل خفيف بيطلع منها البزر , هل البذر بسمي بالرحمن و بزرعه و بسقيه شي بسيط , بعد عشر ايام بيبدى الريحان بيطلع , سبحان الخلاق , احساس حلو كتير لما بتزرعي شي بايدك .

إذا حابة تزرعي الريحان فافضل وقت انك تزرعيه بشباط او أذار و اسقيه كل ما بينشف التراب مو كل يوم , و بعد ما ينبت الورق حاولي ما ترشي الورق بالمي لان الريحان بينبت و هو جنب بعضه , اذا انغسل الورق بيبعدوا الاعواد عن بعضهن و بحسهن زعلوا و ما بيعودوا يقربوا مرة تانية على بعضهن البعض :(

البيستو بيتحضر بالريحان و الصنوبر , اتعلمت من ريم الزعيم اني ضيف بقدونس , اللون عم يصير روعة و الطعم بقي بيجنن , يم يم . و جربت حضره بالكاجو و اللوز و كمان بالجوز , كل نوع من المكسرات اله ميزة و نكهة مختلفة بس كلو طيب كتير كتير كتيرر

بالصحة و الهنا





بيستو الريحان :

3 كوب مضغوط بخفة ريحان طازج
1 كوب مضغوط بخفة بقدونس
نصف كوب صنوبر
1 فص ثوم صغير , مهروس
نصف كوب زيت زيتون
1 كوب جبنة بارمجان , مبشورة طازج
ربع ملعقة صغيرة فلفل أسود






1 - يوضع الصنوبر في وعاء غير لاصق على نار متوسطة و يقلب لمدة 3 دقائق أو حتى تشقر الحبات , يرفع و يترك حتى يبرد .

2 - يوضع الريحان و البقدونس و الصنوبر و الثوم في محضرة الطعام و تشعل عدة مرات حتى تنعم المكونات نوعاً ما من دون أن تهرس .

3 - تشغل المجضرة و يضاف الزيت على شكل خيط رفيع و مستمر حتى يصبح المزيج كمعجون ناعم .

4 - تضاف الجبنة و الفلفل و يقلب البيستو بالملعقة , يذاق البيستو و يضاف الملح حسب الحاجة .

5 – في حال عدم توفر محضرة الطعام يوضع الريحان و البقدونس و الصنوبر و الثوم و الزيت في خلاط العصير و يضرب المزيج حتى ينعم الريحان و البقدونس , يصب المزيج على الجبنة و يتبل بالملح و الفلفل الأسود حسب الرغبة .

6 – في حال اعداد البيستو لحفظه في الفريزر يفضل الاستغناء عن الثوم .





التعليقات

  1. ام مثنى 13 October 2012

    حبيبتي منى من حسن حظي اني انا اول وحده ترد وتقول لك يسلمو هال الادين ويخليكي لعيلتك منى عندي سؤال امبارح جبت من المول شرائح سمك فيليه مدخن وكاتبين انو جاهز للاكل عندك فكره شو بحط باسندويش معو نحنا السمك الفيليه المقلي بنحب ناكلو مع حمض الليمون براءيك هاد كمان نفس الشي اسفة طولت عليكي ويعطيكي ربي الف عافية

  2. الحنان 16 October 2012

    :) السلام عليكم كيفك منى مشتاقلك كثير وللموقع الغالي ارجعت بعد غيبه طويله :zzz انشاء الله تكوني بخير انتي واهلك والله يفرجها على بلادنا

  3. dee1ma 17 October 2012

    يسلموا الديات يارب حبيبتنا منى الله يعطيك العافية ويسعدك ويخليك لأهلك واحبابك كثير فرحانة بموقعك وبدي أسألك انت عملت شي كتاب يا أحلى شيف بهالدني كلياتها لو عملت بقى أنا راح اول واحدة بشتريه من فضلك اذا عملت كتاب بس خبريني باسمه وفين ممكن الاقيه واليت دزيلي إيميل مع خالص الود
    tr.ra7ma@hotmail.com

  4. Mona 25 October 2012

    هلا ام مثنى :)
    اتوقع الي اشتريتيه سمك سالمون , انا بحب قدمه على صمون صغير بيكون مدهون بشوي مايونيز مع بشر ليمون , كتير طيب و كمان سهل :zzz

  5. Mona 25 October 2012

    و عليكم السلام و رحمة الله و بركاته حنان :)
    الحمد لله نحنا من فضل الله بخير , الله يتلطف بسوريا

    شكرا كتير لسؤالك

  6. Mona 25 October 2012

    هلا ديما :)
    الله يخليكي يا قمر و يسلمك , لسى الكتاب ما انطبع , بسبب هل الظروف , الله يسر كل خير , في كتاب بالسوق اسمه لقمة طيبة مع سوزان , بس الكتاب مو الي بس واحد اخدة اسم الموقع :roll

    لما بينطبع اكيد رح يصير عن الكل خبر :zzz ان شاء الله

تقييم الوصفة
عاديةقد أحضرهاجيدةممتازةأكثر من رائعة (8 votes, average: 3.50 out of 5)