تجفيف الباذنجان و القرع و البامياء و غيره من الخضار


         وصفة : منى                 2008/09/05                 10 تعليقات
تجفيف الباذنجان و القرع و البامياء و غيره من الخضار

فكرة تجفيف الخضرة و الفواكهة من الأفكار العبقرية الي خطرت للانسان , انو تخبي خضرة الصيف الكتيرة لفصل الشتي البخيل , أنو تخبي شمس الصيف في الخضرة , كيف خطرتلهن الفكرة , أديه كانوا عايشين برواق و هدوء لحتى كانت تلمع هيك أشيا براسهن .

فكرة التجفيف ممكن نطبقها ع كل الخضرة تقريباً , باتنجان , قرع , فاصوليا , بازلا , بامة , فليفلة و غيره و غيراته . منحضر الخضرا بالطريقة الي بدنا ياها , حفر أو تقطيع , بعدها منسلقها شوي بالمي المملحة و منشفها و ننشرها تحت الشمس حتى تنشف على الاخير و ممكن أن تشكي حبات البامة أو الفاصوليا مع بعضها عن طريق ابرة و خيط و تعملي منهن عقد و بعدها منعلقها في مكان جاف و بيلعب فيه الهوا من دون ما تضرب الشمس عليهن بشكل مباشر و منخليهن حتى ينشفوا ع الأخير و هل العقد الحلو منحفظه بمكان بارد و جاف و بيطول معنا طول الشتوية يعلق العقد في غرفة المونة .

وقت اللزوم منغسل الخضرة كتير منيح و مننقعها بالمي السخنة و نغير عليها اكتر من مرة تغسل جيداً و تنقع منعلقها بالماء البارد طول الليل و تستعمل في اليوم التالي حسب الرغبة .

اكتر الخضرة الي بحفظها بهل الطريقة البتنجان , البتنجان المحفور للمحشي أو المقطع لمسقعة البتنجان المجفف , كمان القرع و الفليلفة و البامية و البندورة , و التجفيف بيعطي الخضرة طعمة و نكهة غيررر و انا المحاشي الميبسة أطيب عندي من المحاشي التازة ..

هلأ رح أكتب طريقة تجفيف الباتنجان المجفف و فيك تطبيق نفس الطريقة على لقرع و البامية و الفاصولياء أو اللوبياء .

بالصحة و الهنا




باذنجان محفور
كمية كبيرة من الملح الصخري الخشن





• بعد حفر الباذنجان و تجهيزه يوضع قدر كبير فيه ماء و يترك حتى يغلي .

• يضاف الملح بكمية كبيرة على الماء ثم توضع الحبات المحفورة و تترك حتى تغلي غلوة واحدة , و واحدة فقط في الملح ثم ترفع فوراً و تترك حتى تصفى من الماء .

• يرش المزيد من الملح في قلب كل حبة و خارجها ثم تنشر على السطوح تحت أشعة الشمس حتى تجف تماماً .

• توضع الحبات المجففة في مكان جاف و بارد نوعاً ما و تحفظ حتى الحاجة , إذا وجد لديك مكان في البراد يمكن حفظها فيه حتى يأتي الشتاء البارد فتحفظ على الشرفة بعيداً عن الشمس .

• عند الحاجة تغسل حبات الباذنجان من الملح جيداً و تنقع طوال الليل و في اليوم التالي تغسل مجدداً و تستخدم لأي نوع من المحاشي أو حسب الرغبة بالنسبة لبقية الخضار .

التعليقات

  1. ام نور 6 September 2008

    الف شكر حبيبة قلبي منى على هالطريقة رح اعطيا لا ماما ميشان تجففلي كم كيلو لان ما بتجفف الا البامة والملوخية وبدون ماء وملح بلشمس بس ولما قلتلا عن الباتنجان طلبت الطريقة

  2. منى 6 September 2008

    هلا حبيبتي ام نور :)
    ان شاء الله بتجففه و بتجربيه , كتيرر طيب , بس انتبهي ان ما تغلييه كتير يا دوب غلوة و بس و إلا بعدها بيعزبها وقت الطبخ و بيفتح كله :roll , هم بالاساس كانوا بيحفظوه من دون سلق بس لتخفيف وقت الطبخ أمي صارت تعمله بهل الطريقة وانا بعمل متلها ;)

  3. ام نور 7 September 2008

    الله يخليكي يا منى ما قصرتي

  4. نادين 27 November 2008

    يسلم ايديكي يا منى
    انا عندي بامية ميبسة من سوريا
    ومو عارفة كيف اعملها و عزيمني بكرا
    انا اليوم رح انقعها بالليل و غير عليها مي بكرا بس ياريت تفيديني بالطريقة و الحمض
    وتاني شي اذا فيكي تبعتيلي ايميلك
    اولا لنقدر نكون على تواصل بسوريا
    و حاليا ابعتلك الاكلات
    و تسلمي يارب

  5. منى 27 November 2008

    هلا نادين :)
    الطريقة موجودة بالتفصيل على وصفة البامية باللحمة , بتطبخيها بنفس الطريقة بس المهم انك هلا تنقعي البامية و تغيري عليها مرتيين تلاتة

    الوصفات فيك تبعتيهم عن طريق اتصل فينا و هيك انا بعرف ايميلك و ببقى بحاكيك ;)

  6. baniqia 12 October 2011

    تسلمي الله يعطيك العافية

  7. منى 13 October 2011

    الله يسلمك و يخليك :)
    منورة اختي

  8. حلا ومحمد 3 September 2014

    السلام عليكم
    جزاك الله خيرا الوصفة كتير حلوة بس انا عم اجرب الباذنجان على الطريقة الحموية وهو انه بتحفري وبتعلقيه بالخيط وبيعرضيه على اشعة الشمس
    في الشتاء وقت بدي اجي لاحشيه عم لاقيه مهلهط كما يقال عندنا بعد ما نضعه في الماء كم الافادة
    هل السب عدم وجود الملح بداخله
    علما انه الكوسا بتطلع اطيب من السجق وبتزبط معنا
    ولك جزيل الشكر

    • منى 27 October 2014

      اهلا و سهلا اختي
      طبعا بده ملح لان هو الي رح يحفظه كل هي الفترة ، و انا ما الي مجربة الكوسا ، كيف بتجففوها

      نورتي حبيبتي

  9. ميمي 18 January 2016

    مشكووورة…..جزاك الله كل خير

تقييم الوصفة
عاديةقد أحضرهاجيدةممتازةأكثر من رائعة (4 votes, average: 3.25 out of 5)